Le Roman du Renart - D. M. Méon - 1826/7
C’est de Tybert le Chat et des deux Prestres.
Tybert le chat dont je ai dit,
Doute Renart assez petit,
Ne quiert avoir treves ne pès.
Es-vos deus prestres à eslès
Qui en aloient au saint sane,
Li uns ot une viez balcane,
Et li autres ot desoz soi
Un souef anblant palefroi.
Cil alegue a Tybert choisi,
Conpains, dist-il, estez ici,
Quel beste est-ce que je voi là ?
Cuivert, dist li autres, esta,
C’est uns merveilleus chaz putois.
Ha ! Diex ! con je seroie rois
Se le pooie as poins tenir
A mon chief por le froit covrir,
Por ce que il bone pel a !
Bon chapel et grant i aura :
Certes grant mestier en aroie.
Diex nos amena ceste voie
Qui bien savoit le grant mestier :
Or en feré apareillier
Tout à vostre los un chapel,
Et por agencier le plus bel
Me sui porpensez d’une rien,
Se vos loez que ce soit bien,
Que je voil sa qeue lessier
Por le chapel agrandoier,
Et por mon col covrir deriere :
Véez con est grant et pleniere.
Dist li autres, or oi bon plet,
Por amor Dieu q’ai-ge mesfet
Ne mespris en nule baillie,
Que doie perdre ma partie ?
Ce dist li autres, non avez,
Mesire Turgiz, ne savez
Con je en ai moult grant mestier,
Por ce cel me devez lessier.
Lessier ! fet-il, por quel servise ?
Quel bonté ai-ge de vos prise,
Por quel chose, por quel merites
La vos leroie, ce me dites ?
En mal éur, dist Rufrangiers,
Trop par estes adès maniers,
Jà mar du vostre i aura rien :
Or soit partie, jel’ voil bien,
Mès d’itant sui-je mal-bailliz
Conment il doit estre partiz.
Je le sai moult bien, par ma foi,
Jà mar en serez en effroi,
Que se fere en volez chapel,
Nos en ferons prisier la pel,
Et de la moitié le vaillant
Ferez en après mon créant.
Dist Rufrangiers, feson le bien,
Le Chat voil-ge tot quite mien
Et nos alons au sane ensemble,
Et si mengerons, ce me semble,
Que ce ne poons-nos véer
Que ne nos coviengne escoter,
Por moi et por vos paierai,
Par tot vos en aquiterai,
Et vos m’afiez loiaument
Que vos nel’ ferez autrement,
Mès la pel quite me lairez
Ne jamès rien n’i clamerez.
Honte ait qui vée, dist Turgiz,
Tenez, sire, je vos pleviz
Et loiaument le vos afi.
Bien est, dist Rufrangiers, issi,
Mès liquex de nos la prendra ?
Ce dist Turgiz, qui el sera,
Je n’i claim riens ne rien n’i ai,
Ne jà ne m’en entremetrai,
Ne par moi n’i aurez aïe.
Por ce ne remaindra-il mie,
Dist Rufrangiers, que il n’ert mien,
Or vos en coviengne dont bien.
Rufrangiers de la croiz aproche,
Que riens plus au cuer ne li toche
Fors Tybert le Chat trere à soi,
Mès trop ot petit palefroi,
Si n’i pot ataindre en séant,
Sor la sele monte en estant.
Qant Tybert vit qu’il est dreciez,
Par mautalent est hericiez,
Escopi l’a enmi le vis,
Puis done un saut, sel’ fiert des gris,
La face li a gratinée,
Jus l’abati teste versée,
Si que le haterel derriere
Li est chaü en la chariere,
Par pou que n’est escervelez.
Deus foiées s’estoit pasmez,
Li prestres jut en pamoisons,
Et Tybert sailli es arçons
Qui vuidié furent du provoire,
Et li chevax s’en torne en oire
Qui avoit esté esfréez.
Tant fuit par chans et par arez,
S’a tant erré qu’il vint tot droit
A l’ostel dont tornez estoit,
Et la fame au provoire estoit
Enmi sa cort où buschetoit.
Ne vit pas le cheval venir,
Et il vint enz de grant aïr,
Tel cop li done en la poitrine
Que il l’a jetée souvine.
Bleciée fu, si ot péor
Qant ele ne vit son seignor :
En la sele où il seut séir
Vit dant Tybert desus cropir,
Bien cuida ce fussent déable.
Le cheval sailli en l’estable,
Et dant Tybert toz jors en son,
Qui bien conoissoit la meson.
Moult li estoit bien avenu.
Que ne l’ont mort et retenu.
Le cheval lessa estraier,
Puis s’en est alé ostoier.
Li prestres qui jut contre terre,
Ne sot bon palefroi où querre[1],
Son compaignon apele à soi,
Amenez moi mon palefroi,
Bian conpains, car le m’ensaigniez.
Estes-vos, dist Turgiz, bleciez ?
Bleciez, dist-il, ainz sui tuez,
Ne fut pas chaz, einz fu maufez
Qui nos a fait ceste envaïe,
Déables fu, n’en doutez mie :
Ice sai-ge de verité,
Que nos somes enfantosmé,
Ne jà de cest ost n’en istron,
Ce sachiez, que nos n’i perdon.
Ne sui pas aséur de moi
Qant perdu ai mon palefroi.
Lors conmence une kyriele,
Sa credo et sa miserele,
Pater noster, sa letanie,
Et sire Turgiz li aïe.
Sovent gardoient s’il véissent
Ainz qu’à la voie se méissent,
Tybert et le cheval ensemble,
Mès nel’ virent pas, ce me semble.
Qant il nel’ voient, si s’en vont,
Chascuns fet croiz enmi son front :
Ore est li sanes respitié,
Que Rufrangiers est moult bleciez.
A son ostel en est venuz,
Moult fu dolenz et irascuz ;
Sa fame li a demandé
Quel vent vos mene et quel oré ?
Pechié, dist-il, et enconbrier.
J’encontrai hui un aversier
Entre moi et mon conpaignon
Seignor Turgiz de Lonc-Buisson,
Qui nos à toz enfantosmez,
A paine en sui vis eschapez.