Le Roman du Renart - D. M. Méon - 1826/8
Si coume Renart coupa à Tybert la queue.
Ce fu en mai au tens novel
Que il fesoit seri et bel,
Tot droit entor l’Acension,
Que Renart fu en sa meson,
Sanz garison et sanz vitaille,
Si a tel fain que il baaille,
De la fain li delt moult li cors.
De Malpertuis s’en issi fors
Grant oire trestout eslessié,
Si s’en feri en un plessié :
Moult ot le cuer vain et iré.
Tybert li chaz a encontré,
Meintenant l’a à reson mis,
Tybert, fet-il, biax doz amis,
Quel vent vos maine, dites moi ?
Sire, fet Tybert, par ma foi,
Je avoie enprise ma voie
Chiez un vilain lez ceste haie
Que vos véez là devant nos :
Li vilain a, foi que doi vos,
Une fame qu’il aime tant,
Que riens qu’il voille tant ne qant
Ne li contredit, tant soit let.
Cele a mucié plain pot de let
En une huche, et là m’en vois
Tot eslessié parmi cel bois,
Savoir s’i porroie avenir :
Se tu en vels o moi venir,
Je te metrai en la meson,
Mès par foi soies conpaignon,
Gelines et chapons i a.
Renart repont, et g’irai là,
Je t’aséur, moult volentiers.
Atant se metent es sentiers
Grande aléure et le troton
Tant qu’il vindrent à la meson
Qui tote estoit close de piex.
Dex, dist Renart, biau sire Diex,
Conment porrons entrer dedens ?
Ces piex sont si entretenanz
Que n’i porrons metre les piez.
Dist Tybert, ne vos esmaiez,
Moult bien, ce croi, nos[1] i metron.
Lors s’en vont entor la meson
Tot belement, le pas soé,
Si ont trové un pel froé :
Enz se metent sanz atargier.
Renart vet vers le gelinier
Que plus ne volt sienre[2] le chat.
Tybert qui moult sot de barat,
S’apensa conment porra fere
Privéement le son afere.
Renart, ce dist Tybert li chaz,
Moult vaut hons qui set de baraz ;
Par barat nos covient ovrer,
Car ne porrions recovrer
Ceste perte, se là perdons
Ce que entre nos mains tenons.
Le vilain se dort finement,
Or nos contenons sagement :
Ne poons pas tot fere ensemble,
Le miex à fere, ce me semble,
Si est que li uns face avant,
Et puis l’autre je vos gréant.
Et dist Renart, en toz endroiz
Fet ert einsi con vos vodroiz.
Et dist Tybert, sez que feras,
En la meson o moi venras,
Car se tu seus vas as chapons,
Il a çaiens de tiex gaingnons,
S’il te sentent, il t’assaudront
Et moult tost retenu t’auront,
Et se il t’avoient blecié,
J’en seroie trop coroucié
Se je perdoie mon afere ;
Mès vien çà, se tu vels bien fere,
Avecques moi tant qu’aie fet,
Et se tu vels avoir du let,
Tu en auras à grant plenté.
Renart dist, vostre volenté
Feré, que que doie avenir,
A vostre los m’estuet tenir :
Alez devant, g’irai après,
Sachiez je vos sieuré de près.
Atant sont à l’ostel venu,
Tybert qui plus vesiez fu,
Si est dedenz entrez avant,
Puis dist, Renart, se Diex t’avant,
Çà vien, si susleve la huche,
Du let i a plaine une cruche,
Or soies mes amis entiers.
Par foi, dist Renart, volentiers.
Lors ne se volt plus atenir
Renart, ainz va la huche ovrir,
Et Tybert lors dedenz sailli,
Au pot en vint, n’a pas failli,
Dedenz a sa teste boutée,
Au let boivre met sa pensée,
Et Renart la huche sostient
Qui por le let fremist et gient.
Il semble la langue li arde,
Et moult piteusement l’esgarde
Tybert qui le let hume et boit,
Et cil qui la huche tenoit,
Estoit durement à malaise.
Tybert, fait-il, es-tu aaise ?
As-tu ce que tes cuers voloit ?
Or as-tu ce dont te doloit
Tes cuers hui matin durement,
Soies cortois, se dex t’amant,
Si hume tost et si t’en is,
Foi que je doi à saint Denis,
Ceste huche forment me grieve,
Et par un poi que je ne crieve.
Tybert entent tant à humer
C’onques ne li vout mot soner.
Autre foiz l’a à reson mis,
Tybert, Tybert, biax doz amis,
Por Dieu hume tost, haste-toi,
Ou la huche charra sor toi.
Tybert si entent moult petit
A ce que dant Renart li dist,
A humer a s’entente mise,
Tant en huma à sa devise ;
Qant ot humé tant con li plot,
Si tresbuscha tot jus le pot
Et espandi le let trestot.
Renart li dist, tu es trop glot,
Por qoi as le pot abatu ?
Miex vosisse que bien batu
M’éusses, et après bien point.
Bien voit que du let n’auré point,
Et neporqant fui, si sail hors
Que trop sui traveillié du cors
De ceste huche sostenir,
Il te convient hors à venir.
Compains, fet-il, et je l’otroi,
Mès atent moi encore un poi.
Je ne puis, dist Renart, por voir,
La huche lesseré chaoir
Se ne viens hors hastivement,
Que trop me grieve durement.
Tybert se prent à soupirer
Qant voit qu’il ne puet endurer,
Maintenant avoit fet un saut.
Renart tint le covercle haut,
Et Tybert saut hors de plain vol,
Et Renart let chaoir si fort
Le covercle, et si l’empaint,
Tybert en a la qeue ataint
Si grant cop que ne fu pas gieus,
Tronçonnée li a en deus,
Que le covercle sus chaï.
Tybert li chaz si s’esbahi,
Tel douleur senti à son cuer
Que ne se tenist à nul fuer,
A terre le covint venir,
Por riens ne se pooit tenir,
Si a Renart araisonné :
Renart, tu m’as mal atorné
Que tu m’as la qeue trenchie,
Si en ai soffert grant hachie.
Quoi, dist Renart, par ma vertu,
Ce n’ai-je pas fet que dis-tu ;
Tu saillis de si grant aïr
Que la huche féis chaïr.
Je nou fis, par saint Liénart,
Jà n’est-il hons qui por musart
Ne me tenist se fet l’éusse,
Certes si corouciez ne fusse,
Je te tenisse por musart.
Diva, tès-toi, ce dist Renart,
Tu en doiz avoir moult grant joie,
Car tu sez bien, se Diex me voie,
Que tu as le cors plus legier.
De ce n’avoie-je mestier,
Dist Tybert ; saches-tu de voir,
Nel’ vosisse por nul avoir
Que tu n’as qui te croie lores.
Dist Renart, tot est forelores,
Que tu es certes trop musart,
Ta qeue estoit un apesart
Qui au cul t’aloit debatant :
Or lessons de la qeue atant
Qui ne puet estre recovrée,
Di moi en verité provée
Se n’en vas plus legier assez.
Et dist Tybert, vos me gabez.
Gabé, dist Renart, à qoi fere ?
Que as-tu de cele qeue afere ?
S’on te chaçoit, se Dex m’amant,
Plus fuiroies legierement.
Bien voi, si n’est pas gaberie,
Foi que je doi Hersent m’amie,
Et Hermeline et ses enfanz,
La moie qui est einsi granz,
Vodroie fust par mi coupée.
Dist Tybert, bone l’as trovée,
Mès or lessons atant ester,
Si en alons sanz demorer
Tot droitement sanz delaier
Droit là où est li gelinier.
Et dist Renart, par saint Richier,
Je voil que aions à mengier.
Atant s’en issirent de l’uis
Tot belement par un pertuis ;
Droit as chapons en vont corant
Que il ne se vont delaiant,
Il sont au gelinier venu.
Tybert qui porpensé se fu,
En a Renart à raison mis,
Renart, fet-il, biax douz amis,
Li chapon sont ici dedenz,
Mès se me créez par mes denz,
As gelines ne toucherez,
Ainz vos diré conment ferez.
Vos prendrez le coc tot avant,
Qui a le cors et gras et grant ;
Et lessiez ester les gelines
Qui trop ont megres les eschines.
Megres sont et entrepelées,
Dures et vielles et crotées ;
Le coc si est jones et tendres,
Et si est des autres moult mendres,
Et si i metroit jà dangier
Qant vos vendrez au gelinier,
Se les gelines perniez
Et se vos les sesisiez,
Il s’escrieroit jà si haut
Que il esveilleroit Gombaut,
Si vos feroit trop acheter,
Se il vos povoit atraper,
La pel i lairiez por voir.
Renart quide qu’il die voir,
Mès non fet, ainçois le gaboit :
Lors sot Renart trop pou d’aguet.
A Chantecler tot droit s’en vient,
Qui son bec en sa plume tient :
Delez Pintain estoit à destre,
Renart le prent parmi la teste,
Qant il le tient grant joie fet.
Tybert qui estoit en aguet,
Qui moult le bée à engingnier,
De la main se prent à seignier,
Si li a dit, tien le tu bien ?
Garde ne t’eschape por rien ;
Ne le tiens-tu bien, di le moi.
Oïl, dist Renart, par ma foi,
Je le tieng par col et par cuisse,
Ne m’eschapera que je puisse.
Si con Renart ovri la goule,
Celui qui tot le monde boule,
Le coc li sent lascher la bouche,
Bat ses êles et si s’en touche ;
Si conmence à chanter si haut
Que li vilain sire Gombaut
Qui se dormoit, s’en esveilla,
Drece la teste, s’oreilla,
Si a oï dant Renardier
Qui jà estoit au gelinier,
Si cuida estre toz robez.
De son lit saut tot effréez,
Ses chiens apele et sa mesnie,
Du fuerre prent une bracie
Et si l’a el fournier jeté ;
Le feu est tantost alumé
Si que parmi la meson voit.
Au gelinier en va tot droit,
Et avec lui ses chiens en maine.
L’uis a overt à quelque paine,
Et qant Tybert l’a entendu,
Fuiant s’en va col estendu,
Et tot coiement s’en eschape,
Et Renart remest en la trape
Qui moult fort à fouir s’atorne.
Si ne remaint ne ne séjorne,
Les granz sauz se met à la fuie,
Et li vilain après le huie.
Ses chiens, sitost con l’ont véu,
Et qant il l’ont apercéu,
Après se mistrent en sa trace,
Et Renart durement menace
Tybert, se il le puet ataindre,
Il le fera crier et geindre,
Qui tout ce li a esméu,
Et que por fol l’a-il tenu,
Et li vilains le va huiant.
Tybert le chat s’en va riant,
Grant joie fet et moult est liez
Que de Renart s’est bien vengiez,
Qui par barat l’ot escoué,
Et vient tot droit au pel froé,
Si est sailliz hors del porpris.
Ne li chaut, puisque il n’est pris,
Que à Renart huimès aviengne,
Au miex que il porra se tiengne.
Mès Renart le sieut plus de près
Qu’il ne cuide, et li chien après
Vint au pertuis et au destroit
Par là où il entrez estoit,
Si se cuide parmi lancier.
Li chien pristrent à avancier,
Si l’aerdent au peliçon,
Bien li valut une friçon.
Desoz lor piez l’ont abatu,
Moult l’ont defoulé et batu,
Moult l’ont atorné malement.
Renart l’endure bonement,
Bien voit n’en pot fere autre chose,
Car il ne pot ne fouir n’ose,
Si con li chien le vont tirant.
Renart qui moult va soupirant,
En aert un par les narilles
As denz qu’il a et fors et fines,
Et si le fet crier et braire.
Qant li chien voit n’en puet plus faire,
Saut en travers, s’escost la teste,
Et Renart qui fu pute beste,
Li a la narille coupée,
Entre ses denz l’en a portée,
Vint au pertuis, parmi s’en fuit,
Nel’ bailleront huimés, ce cuit.
Fuit s’en Renart de grant randon
Tant con il puet à esperon,
Tant con piez le porent porter,
Que dant Tybert cuida trover,
Mès il ne l’a mie trové.
Sachiez que moult li a grevé,
Se Tybert l’eust atendu,
Il li éust moult chier vendu
L’estrif que li chien li ont fet.
Fuiant s’en va tot un garet,
Que grant péor ot des gaingnons,
N’i atent per ne conpaingnons.