Le Roman du Renart - D. M. Méon - 1826/6
C’est le desputement de la Mesange avec Renart.
Renart se leva par matin,
Si s’estoit mis en son chemin,
Qar la fain durement l’estraint,
Si se demente et se conplaint.
Que qu’il se plaint de la losenge,
A tant es-vos une Mesenge
Sor la branche d’un chesne crués
Où ele avoit repost ses oés.
Renart la voit, si la salue,
Conmere, bien soiez venue,
Qar descendez, si me besiez.
Renart, fet-ele, or vos taisiez,
Voirement estes mes conperes,
Se vos ne par fussiez si lerres,
Qar vos avez fait mainte guiche
A maint oisel, à mainte biche,
C’on ne se set à coi tenir ;
Et que cuidiez-vos devenir ?
Maufé vos ont si deserté
Qu’en ne vos puet prendre en verté.
Dame, ce respont li Gorpil,
Si voirement con vostre fil
Est mes filleus en droit baptesme,
Onques semblant ne fis ne esme
De riens qui vos déust desplere :
Savez por quoi je nel’ doi fere ?
Droiz est que nos le vos disons.
Si a danz Nobles li Lions
Novelement la pès jurée,
Se Diex plaist, qui aura durée.
Par sa terre l’a fet jurer
Et à ses barons afier
Qu’ele ert gardée et maintenue.
Grant joie en ont la gent menue,
Par tout iront en plusors terres,
Que partout charront mortiez guerres,
Et les bestes granz et petites,
La merci Dieu, seront bien quites.
La Mesenge respont atant :
Renart, or m’alez-vos gabant,
Mès s’il vos plet, besiez autrui
Que moi ne beseroiz vos hui.
Qant Renart ot que sa conmere
Ne fera riens por son conpere,
Dame, fet-il, or m’escoutez,
Por ce que vos me redoutez,
Les eulz cliniez vos beserai.
Par foi, fet-ele, gel’ ferai,
Cliniez donques. Il a clinié,
Et la Mesenge a empoingnié
Plain son poing de mouse et de foille :
N’a talent que besier le voille,
Les grenons li conmence à terdre,
Et quant Renart la cuide aerdre,
N’a trové se la mouse non
Qui li fu remese el grenon.
La Mesenge li escria,
Ahi ! Renart, quel pès ci a !
Tost éussiez la pès enfrete
Se ne me fusse arriere trete.
Vos disiez que afiée
Estoit la pès et bien jurée,
Et jurée l’avoit vo sire.
Renart li commença à rire,
Si li a geté un abai,
Certes, fet-il, je me gabai,
Ce fis-ge por vos péor fere :
Vos qui chaut ? Or soit à refere,
Je reclinneré autre foiz.
Or dont, fet-ele, ce est droiz.
Cil cline qui moult set de bole,
Cele li vint près de la gole
Renart, mès ne vint pas dedenz,
Et Renart a gité les denz,
Prendre la cuide, mès il faut.
Renart, fet-ele, ce que vaut ?
Ce n’iert que jà croire vos doie,
En quel maniere vos croiroie ?
Se mès vos croi, le maufé m’arde !
Ce dist Renart, trop ies coarde,
Ce fis-ge por toi esmaier,
Einsi te voloie essaier :
Qar certes je n’i entent mie
Ne traïson ne felonie.
Mès or revenez autre foiz,
Tierce foiée, c’est li droiz,
Par non de sainte charité,
Par bien et par estaubleté,
Bele comere, sus levez,
Par cele foi que me devez
Et que devez à mon filluel
Que j’oi chanter sor cel tilluel,
Si refaisomes ceste acorde,
De pechéor misericorde.
Cuidiez-vos donc que je vos morde ?
Or a Renart auques la borde,
Mès cele fet oroille sorde
Qui n’est mie fole ne lorde,
Ainz siet sor la branche du chesne.
Que que Renart si se deresne,
Atant es-vos les venéors,
Et bons levriers et coréors
Qui sor lui se sont enbatu.
Et qant Renart a ce véu,
Forment s’en est esmerveilliez,
De fouir s’est apareilliez.
Que qu’il s’apreste de l’aler,
Li uns s’escrie à l’avaler,
Vez le Gorpil ! vez le Gorpil !
Or est Renart en grant peril,
Il drece la qeue en l’arçon,
Qar moult doute mors de gaingnon.
Sonent grelles et menuiax,
Et Renart trousse ses peniax
Qui moult petit en eus se fie,
Et la Mesenge li escrie :
Renart, cist bans est tost brisiez
De la pès que me disiez ;
Atendez moi, o vos irai,
Et par amors vos beserai.
Où fuiez-vos ? car revenez.
Renart fu cointes et senez,
Si li a tret une mençonge.
Que qu’il parole si s’esloinge,
Dame, les trives sont jurées
Et plevies et afiées
De pès fere de tot en tout,
Et est jurée tout à bout :
Icil chael qui ici viengnent,
Qui la pès que lor pere tiengnent
N’ont encor pas aséurée
Si con lor pere l’ont jurée,
Encore estoient-il trop jane
Au jor que lor pere et lor dame
Jurerent la pès à tenir,
Que l’en les i fist lors venir.
Certes or estes-vos mauvès,
Cuidiez-vos qu’il fraingnent la pès ?
Quar retornez, si me besiez.
Je n’en sui pas or aaisiez,
Ce dist Renart li desloiaux :
Atant s’en torne les granz saux.
Renart s’en fuit, ne volt plus dire,
Parmi le bois trestot à tire,
Con cil qui bien sot les travers.
Atant estes-vos un convers
Qui deus viautres encheanez
Avoit lez la voie amenez :
Li gars qui maine les levriers,
Si aparçut Renart premiers,
Voit le convers, si li escrie,
Deslie, va, les chiens deslie.
Renart l’oï, si soupira,
N’est merveille s’il s’esmaia :
Bien set que il est mal venuz
Se il pooit estre tenuz ;
Que tele gent entor lui voit,
N’i a celui, s’il le tenoit,
Volentiers n’en ostast la pel
A la pointe de son costel.
Péor a de perdre s’escorce.
Se plus n’i vaut engin que force,
Moult doute à perdre sa gonele,
Que riens, ce dist, n’i vaut favele.
Li convers de toutes parz muse,
Et Renart qui pas ne réuse,
Bien set que il ne puet guenchir,
Ne nule part ne puet fouir
Ne retorner en nule guise.
Es-vos le convert qui l’avise,
Devant lui vient toz aïrez,
Ha ha ! cuivert, n’i garirez.
Sire, fait-il, por Dieu ne dites,
Vos estes preudons et hermites,
Ne devriez en nul endroit
A nul home tolir son droit :
S’ore estoie ci arestez,
Ne par voz chiens point destorbez,
Sor vos en seroit li pechiez,
Et j’en seroie corrociez,
Qar miens en seroit li domages,
Si en seroie en mavez gages.
Entre moi et ceste chienaille
Moult à grant chose en la fermaille.
Cil se porpense qu’il dist bien,
A Dieu et à saint Julien
L’a conmandé, si s’en retorne.
Renart s’en va, pas ne séjorne,
Si esperone son cheval,
Par unes broches lez un val
S’en va fuiant par une plaine.
Li criz qui après lui engraingne
Le fist aler plus que le pas.
Lez un buisson à un trespas
A un grant fossé tressailli.
Ileuques l’ont li chien guerpi,
N’en sevent mès ne vent ne voie,
Et Renart qui bien se desvoie,
N’i atent per ne conpaignon,
Qar moult doute mort de gaignon.
N’est merveille s’il est lassez,
Qar le jor ot coru assez,
Si a éu mauvez éur,
Mès qui chaut ? or est aséur.
Assez a grant travail éu
De ce dont li est meschéu
De qant qu’il s’estoit entremis ;
Moult menace ses anemis.
Que qu’il se plaint de s’aventure,
Garda parmi une costure,
Si voit Tybert qui se deduit
Sanz conpaignie, sanz conduit ;
De sa queue se vet jouant,
Et entor soi feste fesant.
A un saut qu’il fist, ce regarde,
Et vit Renart que Mau-feu arde !
Si le conut bien au poil rous :
Sire, fet-il, bien veniez-vous.
Renart respont par felonie,
Tybert, je ne vos salu mie,
Jà mar vendroiz là où je soie,
Qar par mon chief je vos feroie
Volentiers mal s’en avoie aise.
Or covient que Tybert se taise,
Que Renart est moult corrociez.
Et cil se r’est vers lui dreciez
Tot simplement et sanz grant noise
Li dist, biau sire, moult me poise
Que vos estes vers moi iriez.
Et Renart fu moult enpiriez
De géuner et de mal traire,
N’a ore soing de noise faire,
Que moult a jéuné le jor.
Et Tybert fu plain de sejor,
Si ot toz les grenons chanuz
Et les denz trenchaz et aguz,
Et les ongles granz por grater.
Se Renart le voloit mater,
Je cuit qu’il se vodroit deffendre,
Mès Renart ne volt mie enprendre
Envers Tybert nule mellée
Que en maint lieu ot desirrée :
Les moz retorne en autre guise,
Tybert, fet-il, je ai emprise
Guerre moult dure et moult amere
Envers Ysengrin mon conpere,
S’ai retenu maint sodoier,
Et vos en voil-je moult proier.
O moi remeingniez en soudées,
Car ainz que soient acordées
Les trives entre moi et lui,
Li cuit-je fere grant anui.
Tybert li chaz si fist grant joie
De ce que dant Renart li proie,
Si li a retorné le vis,
Tenez, fet-il, ge vos plevis
Que jà nul jor ne vos faudré,
Et que volentiers assaudré
Dant Ysengrin qui m’a meffet
Sovent et en dit et en fet.
Or l’a Renart tant amusé
Que ambedui sont acordé.
Andui s’en vont par foi plevie.
Renart qui fu de male vie,
Nel’ lessa onques à haïr,
Ainz se pena de lui traïr,
En ce a mis toute s’entente.
Il garde en une estroite sente,
Si a choisi en une orniere,
Entre le bois et la cariere
Un broïon de chesne fendu
C’uns vilains i avoit tendu ;
Il fu recuiz, si s’en eschive,
Mès dant Tybert qui pas n’estrive,
S’il le puet au broion atrere,
Volentiers li fera contrere.
Renart li a jeté un ris,
Tybert, fet-il, dire vos puis
Que vos estes et preuz et biax,
Et vostre cheval moult igniax :
Mostrez-moi comment il set corre,
Par ceste voie a moult grant podre,
Corez toute ceste sentele,
La voie i ert auques plus bele.
Tybers li chaz fu eschaufez,
Et Renart fu uns vis maufez
Qui le volt à folie joindre.
Tybert s’apareilla de poindre,
Cort et recort les sauz menuz
Tant qu’il est au broion venuz.
Qant il le vit, s’aparçut bien
Que Renart i entent engien,
Mès il n’en fet semblant ne chiere,
En eschivant se trait ariere,
En sus se trait bien demi pié,
Et Renart l’a bien espié.
Tybert, fet-il, ce n’est pas jus,
Vostre cheval est trop eschius,
A refere est, or repoingniez.
Il s’est un petit esloigniez,
Et let corre col estendu
Tant qu’il est au broion venu ;
Ne guenchi onques, ainz tressaut.
Renart qui a véu le saut,
Voit bien qu’il s’est apercéus,
Et que il n’iert pas decéus ;
Porpense soi que il dira
Et coment il le decevra.
Devant lui vint et si li dit
Par maltalent et par despit :
Tybert, fet-il, ne sai que dire,
Vostre cheval est assez pire,
Es por vendre en est mains vaillanz
De ce qu’il est ainssi saillanz.
Tybert li Chaz forment s’escuse
De ce dont Dant Renart l’acuse,
Forment a son cors engraingnié
Et maint estor reconmencié.
Que qu’il s’esforce, es-vos atant
Deus mastins qui vienent batant ;
Renart voient, s’ont abaié.
Andui se sont moult esmaié,
Par la sente s’en vont fuiant,
Li uns va à l’autre apuiant
Tant qu’il vindrent au leu tot droit
Où li broions tenduz estoit.
Renart le voit, guenchir cuida,
Mès Tybert qui trop l’angoissa,
L’a si feru dou pié senestre,
Que Renart estraint dou pié destre,
Si que la clef en est saillie.
Li engins clot qu’il ne faut mie,
Si serrent li buisset andui,
A Renart ont fet grant anui,
Le pié li ont bien enserré.
Or a Tybert moult bien ouvré
Qant el broion l’a embatu,
Où il aura le dos batu.
Ore est mauvese conpaingnie,
Que Tybert a sa foi mentie.
Renart remaint, Tybert s’en touche,
Si li escrie à plaine bouche,
Renart, Renart, vos remanez
Et je m’en vois touz delivrez :
Sire Renart, viez est li Chaz,
Petit i vaut vostre baraz,
Ileques demorez anuit,
Encontre vezié recuit.
Or est Renart en male trape,
Que li chien durement le hape,
Et li vilains qui vint après
Leva la hache qant vint près,
Son coup rua de grant aïr.
Peor ot Renart de morir,
Si a esté moult effréez.
Mès li cox est jus desvalez
Sor le broion, si l’a fendu.
Renart a son pié estendu,
A soi le tret, moult fu blecié,
Et liez qu’il n’ot le pié trenchié.
Qant il senti qu’il fu delivres,
Ne fu pas estordiz ne yvres,
Moult tost se r’est mis à la fuie,
Et li vilain forment le huie
Qui moult se tient à engingnié.
Li chien ont lor cors engraingnié,
Si reconmencent à glatir,
Et Renart ne s’osa tapir
Devant qu’il ot le bois passé.
Illuec furent li chien lassé,
Recréant sont torné ariere.
Renart s’en vet une chariere,
Moult se demente et moult s’esmaie,
Forment li delt et cuit sa plaie ;
Ne set li las que fere puisse,
A poi qu’il n’a perdu la cuisse
Qui el broion fu froisie.
Grant péor ot de la coingnie
Dont le vilain le volt ocirre.
De l’un et de l’autre martire
Fut Dant Renart moult esmaiez
Et en son cuer moult corouciez.
Renart qui moult sot de treslue,
Et qui avoit grant fain éue,
Se met baaillant au frapier.
Si con il aloit son sentier
Et s’en aloit à moult grant paine
Si con aventure le maine,
Poingnant de ce qu’il se doloit,
Choisi Tybert qui s’en aloit,
Qui el broion l’avoit lessié.
Vers lui s’en va le col bessié,
Crient soi que Tybert ne s’en voise,
Si lesse son plet et sa noise,
Vers lui s’adresce pas por pas
Conme cil qui moult estoit las.
Ainz n’en sot mot Tybert li Chaz
Tant qu’il fu chaoit en ses laz.
Renart le voit, si li fremie
Tote la char de lecherie ;
Grand talent a de lui mengier,
Mès il se voudroit revengier
Por ce qu’el broion le bouta,
Mès jà semblant ne l’en fera
Que il li voille se bien non,
Lors l’a mis Renart à raison.
Tybert, fet-it, quel vent vos guie ?
Et Tybert se met à la fuie.
Avoi ! Tybert, ce dist Renart,
Ne fuiez ne n’aiez regart,
Arestez-vos[1], parlez à moi,
Soviengne-vos de vostre foi :
Cuidiez-vos donc que je vos hace ?
Ne doutez pas, jà Dieu ne place
Que jà nul jor ma foi vos mente,
Je n’entrasse hui en ceste sente
Se ne vos cuidasse trover,
Que ma foi voloie aquiter.
Dant Tybert, de la vostre foi
N’estes-vos mie en tel effroi.
Tybert retorne, si s’areste,
Vers Renart a torné la teste,
Et va ses ongles aguisant,
Bien s’apareille par semblant
Que forment se voudra deffendre
Se Renart li volt le doi tendre ;
Mès Renart qui de fain baaille,
N’a cure de fere bataille :
Tot autre chose a empensé,
Moult a Tybert aséuré.
Tybert, fet-il, estrangement
A en cest siecle male gent ;
Li un ne volent l’autre aidier,
Ainz se painent de bareter
Son conpaingnon à son pooir :
Par foi je le vos di por voir,
L’en ne trove mès verité
En nul home de mere né,
Et si est bien chose provée
Que cil en porte la colée
Qui s’entremet d’autre engingnier.
Gel’ vos di por un sermonier,
C’est vostre compere Ysengrin
Qui de novel a Ordre pris.
N’a encor gueres qu’il cuida
Tel engingnier qui l’engingna ;
Por ce ne voil estre traïtre,
Que tuit en ont male mérite.
De losengier ne de mal fere
Ne voi-ge nul à bon chief trere :
Mau chief praingnent li traïtor
Que il n’aront jamès m’amor.
De tant me sui aparcéuz
Que il est viz et mal venuz
Qui de riens ne se puet aidier :
Tost vos méistes au frapier
Hui main qant véistes ma mort,
Et neporqant si ai-ge tort,
Que certes il vos en pesa.
Honiz soit qui le mescrera
Que vos n’en fussiez corouciez,
Et moult durement aïriez ;
Mès neporqant en loiauté
Me conoissiez la verité.
N’éustes vos grant marrement
Qant fui chaüz en cel torment,
Et chevilliez enz el broion
Où me destraintrent li gaingnon,
Et li vilain avoit haucie
Por moi ocirre la coingnie ?
Bien me cuida à mort livrer,
Mès il failli au coup ruer,
Encor port-ge sor moi ma pel.
Tybert respont, ce m’est moult bel.
De ce sui, dist Renart, tot cert,
Que pot ce estre, Dant Tybert ?
Vos m’i botastes tot de gré,
Mès or vos soit tot pardoné.
Je nel’ di pas par felonie,
Certes vos nel’ déissiez mie,
Ne cuit que nus le péust fere,
Ne fet ore mie à retrere.
Tybert s’escuse molement,
Que vers lui corpable se sent ;
Mès Renart ou il voille ou non,
Le conduit par grant traïson.
Tybert ne set que il li die,
Renart derechief li afie
Foi aporter d’ore en avant,
Et Tybert refait son créant :
Bien ont la chose confermée,
Mès n’aura pas longue durée.
Jà Renart voir ne li tendra,
Ne Tybert si fox ne sera
Que il croie cel vif maufé
Qui n’a ne foi ne loiauté ;
Mès Tybert bien se gaitera
Que de riens ne li mesfera.
Andui s’en vont par une sente,
N’i a celui qui son cuer sente,
Que fain avoient fort et dure ;
Mès par merveilleuse aventure
Une grant andoille ont trovée
Lez le chemin en une arée.
Renart l’a premerains saisie,
Et Tybert a dit, Diex aïe,
Biax conpains Renart, g’i ai part.
Conment dont, ce a dit Renart,
Qui vos en velt tolir partie ?
Ne vos ai-ge ma foi plevie ?
Tybert moult poi s’i aséure
En ce que Dant Renart li jure.
Conpains, dist-il, qar la menjons.
Avoi ! dist Renart, non ferons,
Se nos ici demorion,
Jà en pais n’i mengerion :
Porter la nos covient avant.
Et dist Tybert, je le gréant,
Qant vit qu’autrement ne puet estre.
Renart fu de l’andoille mestre,
Par le mileu as denz le prent,
Que de chascune part li pent
La droite moitié égaument,
Ne la viaut porter autrement.
Qant Tybert voit que il l’enporte,
Moult durement s’en desconforte :
Volentiers la voudroit avoir,
Qar il set bien trestout de voir
S’ele est à partir à Renart,
Il en aura mauvese part.
Un poi s’est de lui aprimez,
Dist Tybert, or voi mauvestiez,
Conment portez vos cele andoille ?
Ne véez-vos con ele soille ?
Par la poudre la traïnez,
Et à vos denz la debavez,
Toz li cuers m’en va ondéant ;
Mès une chose vos créant,
S’ainssi la portez longement,
Je la vos leré quitement :
Moult la portasse ore autrement.
Et dist Renart, et vos conment ?
Mostrez le çà. Si le verroiz,
Ce dist Tybert, car il est droiz
Que je vos en doie alegier,
Que vos la véistes premier.
Renart ne li quiert ce véer,
Et si se prent à porpenser
Que s’il estoit auques chargiez,
Tant seroit-il plus tost plesiez
Et miex le porroit-il reprendre,
Por ce li fet l’andoille prendre.
Tybert ne fu pas petit liez,
L’andoille prent con afaitiez,[2]
L’un des chiés en met en sa bouche,
Puis la balance, si la couche
Desor son dos conme senez,
Si s’en est vers Renart tornez.
Conpains, fait-il, si porteroiz
L’andoille qant vos la r’auroiz,
Qar ele à la poudre n’atouche,
Ne je ne la soille à ma bouche ;
Ne la port pas vilainement,
Moult vaut un poi d’afaitement
Que ne fet assez vilanie
Ne plain un val de lecherie ;
Et tout einssi nos en irons
Tant que en tel tertre vendrons
Où ge voi cele croiz fichie.
Là soit nostre andoille mengie,
Ne voil que aillors la portons,
Mès illeques la mengerons.
Là ne poons-nos riens cremir,
Que de partot verrons venir
Toz ceus qui nos vodront mal fere,
Por ce nos i fait-il bon trere.
Renart de tot ce n’éust cure,
Mès Tybert moult grant aléure
Se met devant lui au chemin,
Onques de corre ne prist fin
Tant qu’il est à la croiz venuz.
Renart en est moult irascuz,
Qu’il s’aparçut de la voisdie.
A plaine boche li escrie,
Conpains, dist-il, quar m’atendez.
Renart, dist-il, ne vos doutez,
Jà n’i aura rien se bien non,
Mès suiez moi à esperon,
Jà mar de riens serez en doute.
Renart i met sa force toute
Et son sanc avec avaler,
Mès avant prent à escrier
Tybert qui s’en va le grant pas,
Qu’est-ce, ne m’atendez-vos pas ?
Einsi s’en va Tybert devant,
Et Renart va après corant.
Tybert ne fu mie à aprendre,
Bien sot monter et bien descendre ;
As ongles à la croiz se prent,
Si rampa sus moult vistement,
Desus un des braz s’est assis.
Renart fu dolenz et pensis,
Qui de voir set que moquié l’a :
Tybert, fait-il, que que sera ?
N’est rien, dist Tybert, se bien non,
Mès montez sus, si mengeron.
Ce seroit, dist Renart, grant mal,
Mès vos Tybert, venez aval,
Vos déussiez moult bien savoir
Qui ceste andoille doit avoir.
Que c’est chose saintefiée,
Si ne doit pas estre mengiée
Devant que ele soit partie.
Si m’en jetez jus ma partie,
Que trop me feriez grever
Se lasus m’estovoit monter ;
Mès fetes ore que cortois,
Si mengerez tant con voudroiz,
Si serez de vostre foiz quites.
Renart, que est-ce que vos dites ?
Il semble que vos soiez yvres,
Je nel’ feroie por cent livres.
Vos déussiez moult bien savoir
Que tele chose à grant pooir,
Ce est chose saintefiée,
Si ne doit pas estre mengiée
Desoz croiz ne desoz mostier,
Moult la doit-l’en bien essaucier.
Biau sire Tybert, ne vos chaut,
Car poi de place a là en haut,
N’i porrions ensemble ester,
Mès or le faites conme ber,
Puis q’aval venir ne volez.
Conpains Tybert, bien le savez
Que vos m’avez vo foi plevie
De porter loial compaingnie :
Conpaingnon se il sont ensemble
Et il trovent rien, ce me semble,
Ensemble doivent bien partir
Se lor foi ne veulent mentir.
Partez cele andoille lasus,
Si m’en getez ma part ça jus,
J’en prendré le peschié sor moi.
Non feré, dist Tybert, par foi :
Conpains Renart, qu’est-ce que dites ?
Pires estes que sodomites,
Qui me rovez chose jeter
Que l’en ne doit desenorer.
Par foi jà n’auré tant béu
Que à la terre le vos ru,
Moult empireroie ma foi,
Ce est saintisme chose en loi.
Andoille avon, bien le savez,
Conter l’avez oï assez,
Or vos diré que vos feroiz :
Vos souferroiz à ceste foiz,
Et je vos en doing ci le don,
La premiere que troveron
Si sera vostre sanz partie,
Jà mar m’en donrez une mie.
Tybert, Tybert, ce dist Renart,
Tu charras encore en mes laz,
Se tu vels si m’en giete un poi.
Et dist Tybert, merveilles oi,
Ne poez-vos dont tant atendre
C’as poins vos en viengne une tendre
Qui sera vostre sanz doutance ?
N’estes pas de bone atendance.
Tybert a lessié le pledier,
Si aqeut l’andoille à mengier.
Qant Renart vit qu’il la menjue,
Si li troble auques la véue :
Renart, fet Tybert, moult sui liez
Qant vos plorez por vos pechiez ;
Diex qui connoist sa repentance,
Le vos atort à penitance.
Ce dist Renart, or n’i a plus,
Mès tu vendras encor ça jus,
A tot le mains qant auras soi
T’en convendra venir par moi.
Ne savez pas, ce dist Tybert,
Conme Diex m’est amis apert,
Encore a tel crués delez moi
Qui m’estaindra moult bien ma soi ;
N’a encor gueres que il plut,
Et de l’eve assez i estut
Ou plus ou mains d’une jaloie
Que je bevrai conme la moie.
Toutevoies, ce dist Renart,
Vendrez-vos jus ou tost ou tart.
Ce n’ert, ce dist Tybert, des mois.
Si sera, dist Renart, ainçois
Que set anz soient trespassé,
Et qar l’éussiez-vos juré,
Et dist Renart, je jur le siege
Tant que je t’auré en mon piege.
Or serez, dist Tybert, déables,
Se cest serement n’est estables ;
Mais à la croiz qar l’afiez,
Si sera donc miez afermez.
Ce dist Renart, et je l’afi
Que jà ne me movrai de ci
Tant que li termes soit venuz,
Si en esteré miex créuz :
Assez en avez, dist-il, fait,
Mès d’une chose me deshait
Et si en ai moult grant pitié,
Que vos n’avez encor mengié,
Et set anz devez jéuner :
Porrez-vos donc tant endurer ?
Ne vos en poez resortir,
Le serement covient tenir
Et la foi que plevie avez.
Ce dist Renart, ne vos tanez.
Et dist Tybert, et je m’en tais,
Certes jà n’en parlerai mais,
Tere m’en doi et si est droiz,
Mès gardez que ne vos movois.
Tybert se taist et si menjue,
Renart fremist et si tressue
De mautalent et de fine ire.
Que que il ert en cel martire
Si oit tel noise qui l’esmaie,
Car un mastins de loing l’abaie
Qui en avoit senti la trace.
Or li covient guerpir la place
Se il ne velt lessier la pel,
Car après vienent li chael,
Et li venieres les semont.
Renart regarde contremont,
Tybert, dist-il, qu’est-ce que j’oi ?
Atendez, dist Tybert, un poi,
Et si ne vos remuez mie :
C’est une douce melodie,
Par ci trespasse une compaingne
Qui vient parmi ceste champaingne ;
Par ces buissons, par ces espines
Vont chantant messes et matines,
Après por les mors chanteront
Et ceste croiz aoreront :
Or si vos i covient à estre,
Ausi fustes-vos jadis prestre.
Renart qui set que ce sont chien,
S’aparçoit qu’il n’est mie bien,
Metre se volt as desarez.
Qant Tybert voit qu’il s’est levez,
Renart, fet-il, por quel mestier
Vos voi-ge si apareillier ?
Que ce est que vos volez faire ?
Je me voil, fet-il, en sus traire.
En sus ! por quoi, et vos conment ?
Soviengne-vos del serement
Et de la foi qui est plevie,
Par certes vos n’en irez mie :
Estez illec, je le conmant,
Par Dieu se vos alez avant,
Vos en rendrez, ce est la pure,
En la cort Dant Noble droiture,
Que là serez-vos apelez
De ce dont vos vos parjurez,
Et de plus que de foi mentie,
Si doublera la felonie.
Set anz est li sieges jurez,
Par foi pleviz et afiez,
Con mauvès vos en deduiez
Qant au premier jor en fuiez :
Moult par sont bien de moi li chien,
Se vos jà les doutez de rien.
Ainz que vos fetes tel outrage
Donroie-ge por vos mon gage,
Et vers eus trives en prendroie.
Renart le let, si vet sa voie ;
Li chien qui l’ont aparcéu,
Se sont après lui esméu,
Mès por noient, que le païs
Sot bien, que Renart n’ert jà pris,
Ainçois s’en va grant aléure.
Moult menace Tybert et jure
A lui se voudra acoupler
Se jamès le puet encontrer
Esforciez est vers lui la guerre,
Ne velt mès trives ne pès querre.