Le Roman du Renart - D. M. Méon — 1826/68
Ainsi que Renart vint devant le Roi Noblon, li disiesme de compaignon en guise de fusicien.
Jusk’au Roi Noblon n’ont ciessé,
Boin jour li ont ensanle oré.
Nobles lor salu lor rendi,
Et puis si dist à eaus ensi :
Dont estes-vous et de quel tiere,
Et que venés-vous à moi querre ?
Renart pour eus respont au Roi :
Sire, par le foi que Dieu doi,
Nous soumes tous de cest païs
U on dehue les caitis ;
C’est ciaus ki ont petit d’avoir
Dont nous soumes, vous ai dit voir.
Et li Rois tantost li respont :
Or me dites quel gent ce sunt
Cil c’o vous sont. Rois, marcéant,
Ce dist Renart, rice et poissant ;
Et vous, qui estes, dist li Rois ?
Ce dist Renart, par Sainte Crois,
Je sui, sire, uns fisissiens,
De mainte science sciiens,
De fisique et d’astrenomie,
Et d’ingremance et de surgie,
De natures et d’angorisme :
Ne vous aroie le centisme,
Rois, dit hui de çou que je sai.
Or m’escoutés, gentis Rois, s’ai
Sour moi ierbes, pieres, racines
De moult diverses médecines ;
Tel cose ai s’uns hom ert wihos
Ne cous de sa feme, tantos
Feroie qu’ele le diroit
En son dormant et gehiroit
A son mari sans riens celer.
Avoec çou sai à deviner
Des coses ki sont à venir ;
C’est merveille que sai taisir[1]
Si fui jadis au Roi Artu
Avoec Merlin ki devins fu ;
Mès grant tans a à lui apris
Morghe la Fée ki ot pris,
D’encantement m’aprist ausi
Dont je sui sages, Dieu merci.
Si m’aprist maistre Galiiens
Par quoi je sui grans surgiiens,
Et de maistre Ypocras apris
Tant que maistres sui de grant pris ;
Et dou sage Virgille sai
Maint grant sens, gentis Rois, et s’ai
Tous les livres maistre Aristote :
Ensi Renart le Roi assote.
Empriès li Rois li demanda
Sen non, et Renart dit li a,
Rois, non ai maistre Ginemans,
Près d’estre li vostres sierjans
Se vous avés mestier de mi.
Et li Rois dist, vostre mierci,
Et pour ce mot de mon ostel
Vous retieng et avoec tout el
Retieng od vous vo conpaignie.
Et Renart li dist, jel’ otrie,
Et Dieus le vous puisse merir.
Atant es-vous laiens venir
Mon signeur Hardi le lupart,
Ysengrin le leu d’autre part.
Li Rois encontre eus se dreça,
A eaus moult estroit conseilla :
De maistre Ginemant lor conte
Si conme avés oï où conte.
Tout mot à mot li Rois lor dist
De quoi Hardis li lupars rist
Tout ensi con par mokerie,
Mais conment k’il en moke et rie,
Jalousie si enbrasa
Son cuer, k’il pense k’il sara
A ce maistre, conment k’il soit,
S’il à droit Harouge mescroit,
Car jalousie son cuer art
Pour Roi Noblon et por Renart.
Ysengrins repensa ausi
Pour Renart ki l’ot acoupi
De sa feme Dame Hiersent.
Le Roi jalousie ensement
Esmut à penser por Renart,
Et si se doute dou Lupart
K’il ne li volsist faire autel
K’il li ot fait en son ostel.
Tant vint puis la cose et ala
Que cascuns à Renart parla
Et assiierent l’aïmant
Dont il sorent le couvenant
De le buske, si s’esmarirent
Si ke lor trois femes batirent
De bastons et les formenerent,
Et enprès çou les forjurerent
Et encacierent, et Renars
Fist tant vers eles par ses ars,
C’à Passe-Orguel les mist par mer,
Et puis lor dist sans riens celer
Conment et pour quoi çou fait a.
Cascune une cambre livra
Cointe et noble, et quatre pucieles
Por eles siervir assés bieles.
Des Dames faisoit son voloir
Et nuit et jour et main et soir.
Tandis fu à Noblon conté
Conment Renart avoit ouvré
Des Dames, et Renart fu teus
Ke par capes les a deceus.
Quant l’ot li Rois, en haut s’escrie,
Que ferai-je, Sainte Marie !
Hahai ! Roïne de lassus,
Tous jors me mesciet plus et plus :
C’est cler, ce ne puis-je noiier,
Tenés mes dras, je vois noiier,
De pis en pis va mes afaires.
Hahai ! me sire Saint Acaires,
Gardés moi, ou de moi n’est niens.
Ha ! sire Saint Constanciiens,
Ki à Bretuel en Biauvoisis
On requiert, soiiés moi aidis :
Vous garissiés les forsenés,
Sire, aidiés moi se vous volés.
Ha ! sire Saint Lambiers dou Liege,
Ki el haut trosne avés vo siege
Lés Jhesu-Crist et Diex, fuissiés
Gentius, sire, se vausissiés ;
Mais le paine vous ne peuistes
Endurer que vous i véistes,
Si con l’en dit en vo legende,
A vous me plaing de le laidenge
C’ai par Renart, bien m’a houni.
A vous, sire Saint Gauweri,
Pri, dounés lui male mescance ;
Et sire Saint Denis de France,
Dounés m’ent tempre vengement.
Le Roi reconfortent si gent,
Li Ostrisses et li Lupars,
Et Belins et ses fius Biernars ;
Si fist li limeçons Tardius
Et Dans Boskés li escurieus :
Au Roi disent, or vous souffrés
Teus deus faire, si est viutés.
Se le sevent vostre anemi,
Il en devenront plus hardi,
Vo gent en devenront couart,
Si en douteront plus Renart.
Respont li Rois, vous dites voir,
Demain matin volrai mouvoir
O mon pooir, et parmi mer
Juskes à Passe-Orguel aler :
Se puis Renart par force prendre,
Sans arester le ferai pendre.
Passe-Orguel ferai escillier
Et ceus dedens tous escorcier.
Viespres vint et coucier alerent
Jusqu’al matin k’il se leverent,
K’il murent de Roce-Gallart
Pour aler à ost sour Renart.
- ↑ D’esperimens me sai chevir.