Le Roman du Renart - D. M. Méon — 1826/69
En mer entrent et font souner
Mil grailles au desenancrer.
Vent orent ki les maine droit
Viers Passe-Orguel, mais jà savoit
Renart la venue le Roi.
Encontre va et maine od soi
Ceus en cui il plus se fia
En se nave ù tant visces a,
Et dist k’il mousterra deffense.
Vers le Roi mains dist k’il ne pense,
Et pour se gent plus esbaudir
Fist au desaancrer tentir
Mil trompes, et il orent vent
Ki le chemin tout proprement
Les mena que li Rois tenoit.
Sitost que l’une nave voit
L’autre, s’armerent conmunal.
Renart s’arieste et livre estal
En se nave, et il et li sien :
Ce fist Renart par grant engien.
Et li Rois s’arieste autressi,
K’ensi li loent si ami.
Tandis Renart se pourpensa
Conment le Roi plus grevera,
Dont prist à traire et à lanchier
Si que li Rois fist esmaiier.
Blancart l’ors huça, si li dist
Que tost un tarelet presist,
En mer se plonke, et voist trauer
Le nave au Roi pour affondrer.
Blancars dist, sire, je le lo.
En mer saut, si se met à no
Entre deus eves, n’aresta
Dusqu’à la nave, et puis fora
Dis traus ains c’on s’en donast garde ;
Mais Couars ki partout regarde,
L’aparçut premiers, puis cria :
Traï, traï ! or cha, or cha !
No nave effondre, aïe Dieus !
Saint Nicholas et Saint Andrieus,
Sainte Katerine et Saint Mars,
Soiiés od nous ! Bien sai Renars
Fait no nave ens el fons forer.
Quant li Loutres l’ot si parler,
Porpensa soi k’il le sara.
Un coutiel a meure pris a,
A tout sali ens en le mer,
Et tant a fait par bien noer,
Blancart trouva ù il foroit,
Et ki tele entente i metoit,
K’il onques ne senti le Loutre.
Et cius l’ala ferir tout outre
Le cors ; lors Blancars se pasma
Dou cop, l’aigue si le porta
Flotant amont et lors fu pris,
Et en le nave en prison mis.
Lors en le nave se remist
Li loutres, et puis en haut dist :
Estoupés et si espuisiés,
U cascuns sera jà noiiés.
Tout se misent al espuisier,
K’il doutoient à perillier.
Entrués ke li uns espuisoient,
Li autre les traus estoupoient
Que Blancars fist de vraie foi
Par le conmandement le roi.
Quand li Rois fu rasséurés
Et ses vaissiaus bien estoupés,
Dont fist Blancars desprisouner
Et par devant lui amener,
Entrenavré parmi le cors,
A Blancart dist Rois Nobles lors :
Conment as-tu à non ? Blancart.
Et ki t’envoia chi ? Renard,
Et me conmanda à forer
Vo nave pour vous affondrer.
Or me di donc dont tu es nés.
De Noireweghe et i ai més
Tout mon vivant, or sui-je chi,
Gentius Rois, si vous pri merci.
Et li Rois dist, merci aras
Huimais, mais de matin morras.
Et remetre le conmanda
En prison, et on si fait l’a :
Ens en le santine en prison,
Ki boine esperance a à non,
Fu remis ki par grant concorde
Ert faite de misericorde.
Quant en le prison fu jetés,
Dont fu-il tous asséurés ;
Et Renart fu tous abaubis
Por Blancart ki ensi fu pris.
Lors fist une trompe souner
En signe de desaancrer,
Car il veut assalir de priès
Le Roi. Tuit en furent engriès.
Li gent Renart desaancré
Se sunt, s’ont lor sigle levé ;
Li vens s’i fiert, la nave en va
Plus tost k’arondiaus ne vola
Ne c’arbalestres ne descoce :
Le nave le Roi de le broce
De se nave si roit feri,
Ke le bout devant abati.
Li broce de le nave au Roi
Referi si l’autre, k’à poi
Ne froissa toute al assanler,
Dont véissiés les hès geter
Les gens Renart et atacier,
Et grant bataille enconmencier :
Car Cointeriaus et Martinés
Ses fius ki moult est biaus varlés,
Erent où coffin sour le mast,
Des gens le Roi font moult grant wast
De gros caillaus aval gieter.
Ki lors véist Renart capler
D’un grant fausart, et gent ocire,
Bien péust en verité dire,
Hardis est et preus de sen cors,
Com se ce fust li bons Ectors,
U Accilles u Thidéus
Ki d’Escalidone fu Dus,[1]
Ki devant Tebes fu ocis.
Li fil Renart d’ireur espris,
I fierent, et maillent, et tuent ;
Braient li un, li autre huent ;
Crient li vif, coisent li mort :
Ains puis le tans Sanson le fort
N’ot en mer si fiere bataille.
Tant pié, tant puing et tante entraille
Véissiés par le mer floter,
Et tant escu et tant boucler,
Et tant vassal en mer noiier,
Et tant chevalier detrencier.
Atant es-vous les fius Noblon,
Ki chevalier estoient bon ;
Cascuns i fu si bien faisans
Que se cascuns d’eus fust Rollans,
S’en péust-on en bien parler.
Ki dont véist le Roi capler
Et ferir à tas de tous lés,
Con se fust Judas Macabés.
Le cat Tibiert atant es-vous,
Od lui estoit ses fius Raous,
Amont ramperent au coffin,
Car Renart héent de grant fin
Por Mitoulet ki fu pendus.
Des grans cailliaus k’il gietent jus
Ont des gens Renart vint tués,
Et bien quarante esciervelés ;
Mais Pelés li ras en venga
Renart, car Tibiert envoia
Une sajete barbelée
Tout outre parmi l’eskinée :
De cel cop fiert Raoul où piet
K’andoi sunt aval trebuciet.
Adont leva un moult grant hus,
Quant Bruns li ours est salis sus,
Entre lui et son fil Bruniel
Ki chevaliers ert de nouviel ;
Andoi ramperent où coffin,
A Renart livrent grant hustin
De caillaus k’il gietent aval.
Ki lor vist Moriel le cheval,
Et Ferrant le roncin od lui,
Conment il font Renart anui.
Si faisoit Ysengrins li leus,
Et od lui Lonbars li cameus,
Et li dromadaires ses niés,
Cil fait sanlant k’il soit iriés.
Li bous i fiert, li ciers i frape,
Et li bugles oste se cape
Por plus grever Renart le faus.
Robués li bués crie, or à ceaus,
Faites le bien, signor baron.
Atant es-vous Rinoceron
Et od lui Hardi le lupart
Ki haut s’escrie, ore à Renart.
Li griffons fiert et tue et maille,
Le gent Renart forment travaille ;
Et li Ostrisses desdaigneus,
Cius i est et vistes et preus.
Ausi est Cantecler li cos,
Ke Percevaus ne Lanselos,
Ne Gauwains, ne li preus Tristrans,
En un jour nus d’eus si vaillans
Ne fu conme Cantecler fu.
Car si esporon sunt agu,
Et si ongle dur et taillant.
Dou biek va merveilles faisant ;
Un des fius Renart creva l’oel,
Et puis li dist par grant orguel,
Or aras-tu millor visée.
Adont i ot moult grant risée
Des gens le Roi et grant lééce
De çou dont Renart ot tristrece.
Lors fist pour sa gent esbaudir
Renart cent cors d’arain tentir,
Dont salirent li gent Renart,
Et Renart à tout sen fausart,
Des gens le Roi fait grant escil.
Atant es Renardiel le fil
Renart ki ert uns enfeçons,
Cantecler voit c’as esporons
Damagoit durement lor gent,
Dou vengier a moult grant talent,
Par quoi estranler le péust,
Et mengier conment que ce fust,
Lui sanle qu’il seroit refais.
Desriere les autres s’est trais
Trestout bielement et quatis,
Car Nature l’ot jà apris,
Car ortie c’ortiier doit
Tempre ortie ; au jor d’ui on voit
Si tempre ortier les enfans
Où monde, que c’est dolours grans.
En çou ont pere et mere part,
Tout sont mais de le gent Renart ;
Se pere et mere sage estoient,
Leur enfans endoctrineroient
A bien dire et à bien ouvrer,
Les siermons et l’Eglise anter
Leur fesissent, et leur blasmassent
Les peciés et lor ensignassent
Tous les articles de le foi,
Conment Dieus moru ne por quoi,
Et tous les dis conmandemens,
Conment rostis fu Saint Lorens,
Et les legendes des boins sains,
Et conment Paradis est plains
De lééce, infiers de tourmens ;
Les fais des anciienes gens
Ki furent à Dieu vighereus,
Et les set grans peciés morteus
Blasmer, et les autres peciés
Dont li mondes est enteciés.
Ce dussent faire pere et meres
Et de le vie des Sains Peres
Recorder as enfans souvent ;
Mais il va mais tot autrement :
Sitost que li enfés est nés,
Est de se boine mere ostés,
Et mis puet estre à tel nourice
Ki est et sote et orde et niche,
Et est de mauvaise nature,
Et a éu par aventure
Enfant en fornication ;
Et de mauvaise estrassion
Puet estre estraite et engenrée.
Dame ki livre se portée
A teles femes pour nourir,
En doit à la fin mal joïr ;
Et de tout çou ne doutés jà,
De teus meurs que la nourice a
De qui lait l’enfés est nouris,
Ara en lui, j’en sui tous fis.
Dont il avint jadis un jour
K’uns rices hom ot de soissour
Un enfant, sel’ mist à nourice
A une feme petit rice,
Ki pour une somme d’argent
A garder li ot en couvent,
Car mestier ot de gaaignier,
Lors li fist-on l’enfant kierkier :
De son lait bien l’enfant nouri,
Mais enmi voies li failli
Ses lais, si que point n’en douna,
De lait douner toute seca,
Si que ne l’ot de quoi nourir,
Dont vosist bien son voel morir,
Car ele en avoit bon louier,
De perdre çou n’éust mestier ;
Si li faisoit-on des bontés
Pour l’enfant souvent et assés.
Or pierdoit tout, ce li sanloit,
Pour çou que point de lait n’avoit :
Le nourice forment anuie,
En son ostel ot une truiwe
Ki de nouviel ot pourcelé,
Le nourice a à çou visé
Ke de ce lait bien nouriroit
L’enfant, et jà tost le saroit.
L’enfant à le truie assaia,
Li enfés le truie alaita.
- ↑ Al. Qui de Cassidoine fu Duz.