Le Roman du Renart - D. M. Méon — 1826/45
Einsi comme Renart et sa gent en moinent pris Orgueil, fil le Roi Noblon.
En son retour prison en maine
Orguel ki pas n’i mist de paine
A lui deffendre : de cuer lié
Va od Renart ; sanlant irié
En fait por ses gens, non porquant
Vait od Renart à cuer joiant.
Renart s’en fuit od son prison,
N’ariesta, si vint en maison
Od lui les siens : deus cens laissiés
En i a en l’estour. Mesciés
Avint Rousiel son fil menor,
Car ses destriers en son retour
Fondi ; pris fu et od lui cent,
Tardieus au Roi prison le rent
Ki de joiant cuer le reçoit ;
Mais encore point ne savoit
D’Orghilleus son fils la vreté ;
Et quant le sot, de doel ploré
A et la Roïne ensement.
Or tost après, dist à sa gent ;
Et il si font, mais jà estoit
En Malpiertuis. Renart s’avoit
Fait reclore apriés lui le porte.
De son fil Rousiel li aporte
Nouvieles uns sierjans, qu’est pris
Od lui cent chevaliers de pris.
Quant Renart l’ot, del doel k’il ot
Por un mui d’or ne desist mot,
Fors tant qu’il a dit à se feme,
Pris est Roussiaus vos fius, Dame Emme.
La Dame l’ot, de doel se pasme,
A poi qu’ele ne rendi l’ame.
Grant doel mainent par le castiel
De çou k’il ont perdu Roussiel
La nuit en une rice sale
Ont mis Orguel qui n’ert pas sale.
Li nuis s’en va, li jours revint,
Renart au matin à lui vint
De ses plus privés, vint véoir
Orguel, et de tout son pooir
L’ouneure et lui dist, bien venus
Soiiés deus cens fois. Orgius mus
Ne fu, ançois le resalue.
Renart au col ses bras li rue
Et Orgius ausi le racole.
De cuer, de foi et de parole
S’entreplevissent conpaignie
A porter mais toute lor vie,
Et por plus honorer Orguel
Li dist Renart, sire, je voel
Que venés véoir mon castiel.
Alons, dist Orghius, ce m’est biel.
Renart en Malpertuis le maine
Partout, et il ne li fu paine
Del aler, ains dist que castiel
Ne set el monde nul si biel,
Ne si fort ne si aaisié.
De çou ot Renart le cuer lié ;
A Orguel dist Renart, venés,
Encore autre cose verés,
Une maison le plus diverse
Ki soit de chi dusques en Perse.
Renart Orguel en se maison
Maine, ki ert de traïson,
De haïne et d’envie ouvrée ;
De boisdie estoit li entrée
Et de blades li pavemens.
De toutes manieres de gens
Avoit Renart laiens od lui,
Nel’ aroie parnonciet hui
La joie que à Orguel font
Contre lui. Encourtiné ont
De dras d’or le maison trestoute.
Encontre Orguel fors d’une croute
Vinrent sis Dames noblement,
Vesties d’or moult ricement.
Encontre Orguel viennent cantant
Deus et deus main et main tenant ;
Del ostel estoient princesses.
Des sis Dames les plus maistresses
Erent deus suers, Ire et Envie,
C’est doulours qu’eles sont en vie.
Devant les autres tout à pié
Vont contre Orguel, et bien-vignié
L’ont et à genous aouré ;
A lor pooir l’ont honoré
Avarisse et Accide apriés
Ire et Envie : as kaukains priés
Suiwent Luxure et Gloutenie,
Cascune de fin or viestie,
Sivent les autres main à main.
Devant soleil levant bien main
Estoit quant Orghius vint laiens.
Contre Orguel sounent estrumens,
Viieles et psalterions,
Orgues, citoles ; li resons
I ert grans des trompes d’argent
Contre Orguel, reçus fu moult gent.
Les sis Dames de leur tresor
Font toute pure de fin or
D’une corone Orguel present ;
U ot maint rice diamant,
Saffirs, esmeraudes, rubis
Et kasmahius bruns, blancs et bis.
Orgius le reçoit liement,
Cent mercis as Dames en rent.