Le Roman du Renart - D. M. Méon — 1826/46
Einsi com Renart couronne Orgueil, si font sis Dames, Avarice, Accide, Ire, Envie, Luxure et Gloutonnie.
Renars a le couronne prise
Et les Dames, si l’ont assise
Sour le cief Orguel ; couronné
L’ont, et sour iaus à Roi levé,
Por chou que de tous visces chiés
Est, en fu courounés ses kiés.
Lués que fait fu, sot Proserpine
Le courounement, d’amor fine
Amoit Orguel et li Orghius
D’infier des plus tenebreus lius
Un septre d’or pour signourie
Li envoia par druerie,
Por çou que Rois et Empereres
Soit el monde, et çou que li Peres
Fist en Crois son fil racater,
Fait Orghius en infier aler.
Par le conseil de Lucifier
Fu li septres tramis d’infier
A Orguel ki moult en mercie
Proserpine sa ciere amie.
Del present tuit grant joie font
Cil et celes qu’el palais sont :
Tel bruit, tel noise vont menant
C’on n’i oïst pas Dieu tounant.
Par moult de gens est coronés
Orgius el monde ; corounés
N’est que d’orguel ne viegne et naisse.
Renart les sis Dames ne laisse,
Ains lor dist, no Roi conpaignie
Tenons, si ne le laissons mie.
Eles dient, si ne ferons
Jamais jour tant que vie arons.
Et Renart dist, et je serai
Od vous tous jours, si afferrai
Ausi bien con la piere en l’or.
En un trosne d’or en un cor
Del palais ont Orguel assis,
Le septre en sa main ki massis
Est d’or, les sis Dames lès lui
Ki el monde ont fait maint anui,
Et encore s’en vont vantant :
Et Renars lor va prometant
K’en bone foi les aidera.
De la joie que cascuns a
A genous flecis l’en merchient,
Et à mon signeur Orguel dient :
Sire, t’ies Rois de tout le monde,
Car el monde n’en a si monde
Ki de nous u de vous n’ait take,
U de Renart traïson plake ;
Partout es cuers fauvain et ghille
A mis Renart, en mainte ville,
Peu i a de vraie paterne.
Renart vessie pour lanterne
Fait à entendre à tous les siens
Qui il lace de ses loiiens :
Et nous aussi ne nous faignons,
Mais tout le pis que nous poons
Faisons au monde. Li clergiés
Est tous d’avarisse takiés
Et de se fille couvoitise
Ki en lor cuers sen fu atise.
Li prince, et li conte et li roi
Sont prièsque tout de nostre loi.
Par les grans avons les petis,
Ensi est li mondes honnis ;
Tous est li mondes enmondés,
Ne savons nus i soit mondés.
Par nous est enmondés li mondes,
Car de mil n’en i est uns mondes ;
Nous en savons peu par le mont
Ki se desmonde et ki se mont.
S’uns se desmonde, mil s’enmondent
En cest monde, et quant il se mondent,
Tost resont par nous enmondé
Si que puis ne sont remondé ;
Et s’il avient k’il se desmondent,
Errant faisons k’il se remondent :
Car s’en lor fin sunt enmondé,
Jamais ne seront desmondé,
C’onques encor ame mondée
Ne fu, mais tous jours enmondée.
Monder ne se puet hom mondains
S’il n’est desmondés dou monde ains ;
Poi ot sens cil ki le monde a
Mis tel non, c’onques ne monda,
Ne jamais nus n’i ert mondés,
Se de vous et de nous mondés
N’est et de Renart. Nul mundé
Ne sai nul el monde, enmondé
Sunt de vous, de nous, de Renart.
Li mondes est nos, nus n’i part
Se moult poi non, partout avons
Pooir quant nous nos concordons ;
Mais el monde seize anemies
Avons par qui somes hounies,
Cascune moult nos desavance.
Li une a à non repentance,
L’autre confiessions se suer,
Ces deus des cuers nos getent puer.
Humilités vostre anemie,
Cele où monde moult nos gerrie ;
Sobrietés et astinence
Contre glouternie grant tence
Font souvent, et fois contre accide,
Et larghesse contre avarisse.
Virginités et caastés
Font luxure moult de durtés :
Atemprance, sens et raisons
Font moult de tribulations
A ire et envie ; concorde,
Sillence et pais ki d’une acorde
Sunt, lor refont moult grant travail,
Mais envie n’en doune un ail,
Ne ausi ne fait se suer ire,
K’el monde a fait maint home ocire.
S’aidier nos volés et Renars,
Del monde ert petite li pars
Celui qui en moru en Crois ;
Biaus sire, se tu nos en crois
Nous ne demorrons plus çaiens,
Ains irons visiter nos gens
El monde et es relegions.
Et dist Orghius, or en alons,
Si laissons guerroiier Renart.
Orghius de Malpertuis se part
A grant baudour et les sis Dames
Ki en infier metent moult d’ames.
Renart les convoie, et Orghius
Li prie que uns de ses fius
Li preste pour la ramenbrance
De lui. Renart prist Malebrance
Son fil l’aisné et si li livre
Ki savoit par cuer tout sans livre
Tout l’art le pere ; il li aprist
Très s’enfance et pour çou le prist
Orghius od lui qui moult l’ot chier,
Si qu’il en fist son consillier
Où liu dou pere, et senescal
De son ostel, et le roial
Confanon li baille à porter.
Renart conmande à retorner,
Mais quant sa gerre ara finée
Viers lui face la retornée,
Et il li a en couvenant.
Congiet prist si s’en torne atant,
Et Orghius avance od sa gent.
Baniere desploïe au vent
Pour tout le monde conquester.
Les Dames conmande à quester,
Voisent as cités et as villes,
As parlemens et as concilles,
Et s’irai les rices véoir
Ki m’ouneurent à leur pooir,
Si com princes, contes et rois,
Dames, chevaliers et bourgois.
S’irai al Apostole à Roume
Et as legas ki Wileconme
Diront à moi. Li Archevesque
Sont priès tout mien, et li Evesque
Et li Prelat de Sainte Eglise,
Et li Abbé, cascuns m’en prise
Tant qu’il me tienent por ami ;
Par les grans li menu ami
Seront. Avarisse, venés
A moi et od vous amenés
Couvoitise vo fille ainsnée
Ki moult sera Walecoumée
As Cardounaus et au Clergié.
Par vous deus en ai gaaignié
Maint que quant il sont amonté
D’avoir, ki n’ont d’umelité
Cure, ains metent en son lieu.
Maint povre en son ki sont moult preu,
Humle, simple, dous, debounaire,
Ki seroient tout d’autre afaire
S’il fussent rice et assasé,
Qui sont humle par povreté.
Quant Orghius ot dit son voloir,
Sa gent conmanda à mouvoir
Tantost ; lors prendent à esrer.
Al esmouvoir a fait souner
Trompes plus de cinc cent Orghius.
Or prions Dieu le Roi des Cius
K’en cest siecle nos doinst si vivre
Que d’Orguel soiiemes de1ivre,
Que quant nous serons trespassé
De chi, que soions respassé
Lassus od lui et qu’il nos gart
Des princesses et de Renart,
Et nos doinst si le monde amer
Haïr, et lui si bien amer
K’il nos voelle conme ses fius
Od lui metre où regne des Cius.
Orghius en va, Renars retorne
Vers Malpertuis, ciere fait morne,
Car de son fil li resouvient
Rousiel ke li Rois prison tient.
N’arieta, si vint à la porte
Ki de griés ert merveille forte ;
Ens entre et descent au perron,
Entour lui vienent si baron
Ki li demandent quels novieles.
Et il lor dist laides et bieles :
Laides, que sui ci ensierés,
Et mes fius est emprisounés
Là fors entre mes anemis ;
Bieles, de çou que je sui vis
Et de çou c’Orgius por m’amour
A retenu mon fil grignour,
Si en a fait son consillier
Et son maistre gonfanounier.
Se jou Rousiel mon fil r’avoie,
Roi Noblon moult poi douteroie.
Mais se je puis je le r’arai
Dedens demain, car jou irai
Véoir mon fil en l’ost tous seus
Entre mes anemis morteus ;
Si ne soiiés mie à mescief
De moi, car bien venrai à cief
De moi, se mon fil truis en vie,
C’on ne l’ait ocis par envie.
S’il est en vie, il sera chi
Et jou et il ains miedi.
Cascuns respont, sire Dius l’oe !
Endroit de nous cascuns le loe.
Li viespres vient, li jours decline,
Renart ki fu de pute orine,
Pour lui descounoistre, son vis
Oint d’une erbe que blans ne bis
Ne fu, mais entre deus couleurs.
Ausi conme uns frere meneurs
Se viest et se fait rooingnier,
A son col pendi un sautier.
Congiet prist, si s’en torne atant ;
Si gent vont pour lui larmoiant,
Et il les apaise et conforte,
Et lor dist qu’il soient com forte
Gent, car petit vaut desconfors,
Mais cascuns se tiegne com fors :
Car se vous vos desconfortés,
Vos anemis conforterés.
Sans paour vous tenés com fort,
Et si prendés en çou confort,
C’on ne vous puet par force prendre.
Il douse poroient deffendre
Le castiel contre l’ost mil ans.
Je m’en vois, Dius me soit aidans.
On alumoit jà les candeilles
En l’ost, or oiiés grans merveilles
Que Renars fist al aprocier
De l’ost. Conmencha à hucier,
Aye, Dieus ! Vrais Dieus, aye !
Secourés moi, Sainte Marie !
Je noierai en ces fossés,
Nuis est, ne sai ù vois. Reubés
Sui, et li miens conpains ocis.
Quant cil dou gait oent les cris,
A lui vienent si le rapeskent
Dou fossé et puis li enpeskent
Dont il vient et qu’il quiert si tart.
Et il lor dist, se Dieus me gart,
Uns hom sui de relegion,
Por faire predication
Veniemes en ceste partie.
Mon conpaignon ocis sans vie
M’ont cil de cel castiel, par m’ame,
Escapés d’eaus sui ; Nostre Dame
M’a tensé qu’il ne m’ont ocis.
Ains mais ne fui en cest païs,
Et dist, signour, or escoutés,
Ce que dirai est verités,
De par le grant Pape sui chi
Venus, signour, por Dieu merchi,
Par devant le Roi me menés.
Et il si font, li Rois levés
S’estoit, c’as eskiés ot jué.