Le Roman du Renart - D. M. Méon — 1826/44
Si ke li Rois Nobles asaut Malpetruis.
Traient et lancent as cretiaus,
Et cil lor gietent grans quariaus,
Dars, oille caut et plonc boullant,
Et gavelos et fu ardant.
Cil lor regietent fu grigois,
Et à eaus traient dars turcois
Amont et de lor arbalestres,
C’as cretiaus n’ose li plus mestres
Demourer. Rois Nobles un pont
Ot fait faire, ù puéent de front
Aler sissante chevalier.
Li Rois l’avoit tout fait quirier
De quir bouli ; une traitie
Ot de lonc. Li Rois lors s’escrie,
Li pons soit mis sour les fossés
Et il si fu ; cascuns montés
I est que mius mius, qui ains ains
Pius, peles, hauwiaus en lor mains,
Que le mur cuident effondrer,
Mais ne le puéent entamer,
Tant estoit fors. Lors font drecier
Eskieles et sierjans puiier
Contremont, et Renart lor saut
Il et si gent qui de si haut
Conme il sont les fait céoir jus,
Et li plus fiers se trait en sus.
Quant voit li Rois ke ce ne vaut
Riens, lors reconmande l’assaut
Et conmande son mangoniel
Metre d’autre part le castiel
Et le fu griois à gieter
Por ceaus dedens plus agrever.
Le mouton conmande c’on face
As murs hurter et c’on l’abate,
Et on si fist, mais rien ne vaut :
Engien ne criement ne assaut
Cil dedens. Li Rois un castiel
Ot de fust moult rice et moult biel,
Fort séur et bien kevillié,
A trois estages et quirié
De cuirs tanés ; moult ert séurs.
Celui a fait mener as murs
De Malpertruis ; arbalestriers
Ot fait metre es moiiens soliers,
Et en l’estage amont plus haut
Estoit Pincars freres Primaut
Ki ocis fu, fius Ysengrin.
Od lui ot maint rice mescin,
Maint baceler, maint chevalier
Bien armés con por iaus aidier
En l’estage aval premerain,
Ot sierjans armés trestot plain :
Aisil ont por le fu griois
Estaindre. Lors a fait li Rois
Le castiel au mur caroiier,
Et de recief reconmencier
L’assaut et mangouniaus geter
As murs, as tours quariaus voler
Véissiés plus espès que pluie,
Li uns brait et li autres huie :
Cil assalent, cil se deffendent,
Rompent heaumes, et targes fendent,
Braient li vif, coisent li mort.
Cil dou bierfroi par lor effort
Ont le mur endroit eaus conquis.
Renart ki moult sot de refuis,
Dist à ses gens, or vous muciés
Es garites, pour voir saciés
Que cil dou bierfroi monteront
Sour les murs, et quant il veront
Qu’il n’ara nului chi aval,
Des murs descenderont aval,
Avoir cuideront tout conquis,
Mais non aront se onques puis.
Renart et se gent sont mucié
Es garites et acoisié
Si que nus n’i ruit ne ne muit.
Cil dou bierfroi que mius mius tuit
Par les murs descendent aval,
Mais ce lors tournera à mal,
Car la gent Renart à un cri
Crient traï, traï, traï,
Par le castiel ; et Renart saut
Ki ses contraires livre assaut
Tel que à cascun pour l’ostage
Prist la tieste, et nul autre gage
N’en volt avoir. Quant voit Pincars
Le mescief tel, por cent mil mars
N’i vosist estre dont là vint,
S’en vint fuiant, maus li avint,
Que quant del mur adevaler
Cuida et où bierfroi monter,
Par trop haster par sa folie
Kéi del mur, si que brisie
Ot et quisse et bras et canole.
Li sages dist en sa parole
Dont li entendement est teus,
Que mauvaise haste n’est preus ;
Par trop haster li meskéi.
Quant ensi jus del mur chéi,
Pasmés jut Pincars ; à grant paine
Pot parler ne r’avoir s’alaine.
Li Rois conmande c’on l’emport,
Et on si fist. Li Rois destort
Ses puins et ses ceveus detire.
Tandis k’il maine tel martire
A fait Renart que li bierfrois
Et li pons est de fu griois
Ars et bruis ; au mangouniel
Fait ciaus dou bieffroi dou castiel
Gieter hors en l’ost estiestés.
Li Rois les voit, dou doel pasmés
S’est trois fois : souner le retrait
Fait et as tentes s’en revait
Il et sa gent dolans et mas,
Car il a gieté ambesas,
Le meneur pointure dou dé.
De cuer reclaime Dame-Dé
K’il li aït. Grant doel en l’ost
Mainent conmunalment, et tost
Se sont que mius mius desarmé,
Car il estoient moult lassé.
S’ost fist li Rois escargaitier
La nuit : Orguel qu’il moult ot chier
Od lui Noblet et Leoniel,
Et tout li chevalier nouviel
Escargaitent, et od lui cent
Chevalier autre coiement
Se tienent, en l’ost n’i ot bruit
Destrument ne de nul deduit ;
Et Renart maine grant baudour,
En Malpertruis sounent tabour,
Flahustes, tymbre et calimiel,
Trompes araines, où castiel
Ot cierges cinc cens alumés
K’en l’ost en reluist li clartés.
A grant orguel le tient li Rois,
Que Renart maine teus buffois ;
Mais pour sa gent reconforter
Fait à un cors l’iaiwe corner :
Au souper sisent, si mengierent.
Enprès souper tuit se coucierent
Fors cil ki l’ost escargaitier
Durent, li autre vont coucier.
Endroit l’eure de mienuit
De Malpertruis issi sans bruit
Renart et si fil : de ses gens
Mena od lui quatorze cens
Moult bien armés sour les destriers,
Sonne li fers et li aciers :
Où gait à plain cours d’escuellie
Feri Renart et sa maisnie.
Tel noise font al aprochier
Que ciaus de l’ost font esveillier ;
Pour la noise k’il ont oï
Crient traï, traï, traï !
Li Rois saut sus tous effraés,
Cascuns s’est que mius mius armés :
Viers le caple vont conmunal.
Renars voit où demourer mal,
A un cor soune le retour
Qu’en demourer voit pou d’amour.