Le Roman du Renart - D. M. Méon — 1826/38

Pierre de Saint-Cloud — Richard de Lison — « Le prêtre de la Croix-en-Brie » et 29 auteurs anonymes.

Le Roman du Renart

Texte établi par D. M. Méon, Treuttel et Würtz, 1826 (Tome 4, p. 125-126).

Renart le Nouvel.

Ki le bien set, dire le doit ;
S’il ne le dist por lui le doit.
Metroie envis au jugement
U li Rois qui tout juge ment,
Ki dist k’il rendra la merite
Des labours ; c’est joie parfite
Ke li hom ki bien labourront,
Aront ; li mauvais labourront
U infiers est, et à tous dis.
10C’est à ce monde un crueus dis
Ki de fauseté est tous plains,
Et ens es vaus et ens es plains,
Par envie ki tous maus pont
Et convoitise a fait son pont
En ce monde sour quoi monter
Fait les Prelas et desmonter.
De Dieu en montant se desmontent
Quant plus as temporeus biens montent :
Car par avoir voit-on avoir
20Orguel, wardés se je di voir.
Roi et Conte, Prince et Casé
Sont pour ce point plus que casé.

Del monter sus cascuns s’apreste,
Mais por ce Dieu pas ne lor preste
Le santé as cors ne la vie.
Pour convoitier n’avoir envie
Sour l’autrui n’i a Roi ne Conte
Dont Dieu n’ait tost deffait le conte ;
Clerc, Veske, Prestre ne Abbé,
30N’est asséur, tant ait abé,
De longhe vie soir ne main,
Ki en est siecle ait nul demain.
Por chou ne laissent mal à faire
Tant est li mons de mal afaire,
De fauseté et de mal art,
Li cuer sunt mais plain de renart.
On ne voit ne petit ne grant
Qui n’en soient trestuit engrant ;
Et pour çou que tant monteplie
40Renars, me plaist que vous en die
Une branche où plusiour poront
Prendre example s’en eaus senz ont.

---