Le Roman du Renart - D. M. Méon — 1826/39
Li Parlement et li Concile le Roi Noblon.
En may c’arbre et pré sunt flori
Et vert de fuelles, que joli
Fait es selves et es foriès
Que cil oisiel cantent adiès,
C’amoureus cuers fait nouviaus sons,
Mesire Nobles li Lyons
Tint Cort par grant sollempnité
Au jour de sa nativité,
Ce fu au jour de Rovisons.
Moult i ot Princes et Barons
Et de pluseurs manieres biestes :
On n’i péust véir fors tiestes
Quatre grans lieues en tous sens,
N’en sai les milliers ne les cens.
De biestes i ot grant concilie
Dame Orghilleuse i fu con cille
Ki ert feme à mon signour Noble.
La Dame ert de façon moult noble ;
El faudestuef sist lés le Roi
Ki moult l’amoit en boine foi.
A ses piés sisent si troi fil
Ki povre cose tienent vil.
Li ainsnés ot de par sa mere
A non Orghilleus ; de par pere
Ot li autres à non Noblés
Ki moult estoit nobles varlés.
Li tiers ot à non Léoniaus,
Li mainsnés ert et li plus biaus ;
Cascuns ert viestus endroit soi
Si k’il convient à fius de roi.
Entour eus ot grant baronie
Ki leur tenoient conpaignie.
Renars li Houpius i estoit
Qui trois siens fius o lui avoit,
Malebranche ot non li ainsnés,
Plus ert cremus ne fust amés.
Li secons ot non Piercehaie,
Li tiers Rousiaus ki n’ot manaie
Ne pité de crasse gheline ;
Et si i fu Dame Ermeline
Mere as enfans, feme Renart.
Ysengrins li leus d’autre part
Sist et lés lui Dame Hiersens,
Et deus siens fius od li moult gens,
Pincars et Primaut. Icist doi
As brebis ne as agniaus foi
Ne porterent en lor vivant,
Bien renaturent li enfant
A lor pere. Bruians li tors
I fu cui soit drois ne cui tors.
Od lui fu Blere et Maskelée,
Bruians l’une aime, et l’autre amee
Ot li taissons. I fu Grimbiers
Cousins Renart, et Malapiers
Ses fius. Bruns li ours et Bruniaus
Fius Bruns ki moult par estoit biaus.
Si i fu Bricemers li ciers
Ki fu vistes, sages, apiers,
Et li Archeprestres Timers
Li asnes ki n’estoit avers
Ne escars de paistre cardons.
Bauduinz i fu et Fromons,
Fil Timer erent et jumiel.
Cascuns ot sour son cief capiel
De cardons à toutes les flours
Qu’il les amoient par amours.
Si i fu li chevaus Moriaus
Et Ferrans li ronchis ki biaus
Estoit, et Bauchens li sainglers ;
Li pourciaus i fu Wanemers
Et Dant Froibiers li crikillons
Et Espinars li irechons.
Li escuireus i fu Boskés,
Si i fu Pounés li fuirés.
Tybers li cas, ses fius Raous
Et uns siens autres fius Mirous.
Tardius i fu li limeçons,
Si i fu Belins li moutons,
Biernars ses fius et Cornuiaus
Cascuns ert jouenes damoisiaus.
Li corbiaus i fu Tiesselins
Avoec Roieniaus li mastins ;
Et s’i fu ses freres Grignars.
Si i fu cameus li Lombars
Et ses cousins li dromadaires
Isniaus ki moult ert debonaires.
Robués li bués et Anieus
Li bugles avoec Soumilleus
Li loirs ki l’ivier dort, i fu
C’à paines s’esveille pour fu.
Li singes i fu Cointeriaus,
Martinés ses fius ki moult biaus
Iert. Si i fu dame Boursée
Feme Cointeriel : galounée
Ert la Dame à un fil d’argent,
A or furent si viestement.
Si i fu Cantecler li cos,
Et Pinte qui pont les oés gros ;
Noire, blance, rouse, coupée,
Tite ki de coc rampronée
Ne fu onques, estoit avoec.
Pinte en fust moult envis senuec,
Car c’estoit sa fille l’ainsnée,[1]
La plus biele et la miex amée.
Li escoufles i fu Hubiers,
Ki toudis a les gans ouviers
Par prendre ausi conme ont li prestre.
Pelés li ras se sist à destre,
Il et Kenue la soris,
Andoi se sunt ensanle assis.
Si i fu Barbue la chievre,
Lés li repust Couart le lievre.
Luxurieus i fu li bous,
Blancs fu de cors, s’ot le vis rous.
Si i fu Watiers li oisons
Tubés et Duins li coulons :
Frere Germain erent cil doi,
Estoient messagier le Roi,
Car il estoient sans fiélée,
C’est une cose moult amée.
Si i fu Mehaus li agace
Ki violt bien que li Rois le sace
Pour çou k’il li avoit mandée.
D’Inde une diverse contrée
I vint Vrediaus li papegais,
Amparliers fu, moult sot de plais.
De Perse i vint li olifans
Fortins, moult par ert fors et grans ;
Et d’Aufrique i vint Dezdaigneus
Li Ostrisses, cil sist tous seus
Desous ses piés un bankelet,
Pour le caut osta son huvet.
Hardis li lupars cousins Noble
I vint d’outre Constantinoble,
Et sa feme Dame Harouge,
Ki une cape avoit plus rouge
Viestue ne soit escarlate.
La Dame estoit lassée et mate,
Car ele ot esté deshaitie :
Encontre eus s’est li Cours drecie.
Nobles Hardis sour deus coissins
Assist, car c’estoit ses cousins,
Lés lui et Harouge ensement.
Ainc mais à Cort n’ot si grant gent,
Car Malegrape li griffons
De Frise i vint ; tous les barons
Convint encontre lui lever.
Li Rois pour lui plus honorer
De jouste lui et par lignage
Le fist séoir, moult fist le sage.
L’Unicorne rinocerons
I vint, li Rois li ot semons
Par pais faisant et par acorde,
Car entr’aus deus avoit discorde
Éue moult avoit grant tans.
Ains puis que formès fu Adans
Ne tint Rois Court à si grans gens.
Mainte autre i ot dont ne m’apens
Ki erent Baneret et Conte
Nus n’en poroit nonbrer le conte.
Li plus povres que j’ai nommés
Estoit quens u dus apielés,
Empereres, Rois u Marchis :
Ne fai mention des petis
Ne des chevaliers d’un escu.
Li conmuns pules si grans fu
C’on n’i oïst pas Dieu tounant
Ains mais ne vit nus peule tant.
- ↑ Al. Mainsnée.