Le Roman du Renart - D. M. Méon — 1826/37
Ce est isi come Renart fu coronés à Roi et il se parti de Mal-repair.
Huimais me plaist que je vos die
Du Roi Renart que Diu maudie,
Coment de Mal-repair parti.
Quant le Lion ont enfoui,
Chascuns Prinches l’aséura,
Et puis maint riche don douna
As grans singnors ; mais ainc à povre
Ne douna or, argent ne covre,
Plonc ne estain, arain ne al,
Ronchi, palefroi ne cheval,
Robe ne drap, ne chaucemente.
Ne vauroit or que vos en mente,
Onques si vilains rois ne fu
Come Renart là endroit fu.
De Mal-repair Renars parti,
Droitement à Grenomaisnil
Un sien chastiel torna son frain
Une matinée moult main.
Li Moutons et li Hireçons
Dont autre fois dit nos avons,
Li vinrent lors en son devant,
Hautement disent en oïant :
Ha ! sire Rois, entendés nos.
Et il si fist, ainch l’orgueillous
Ne fist, anchois s’est arrestés :
Qui est-çou ? dist-il. Jà l’orrés,
Dist l’Ireçons, biau sire Rois :
Nos soumes qui avons anois
Et destourbier por no bien fait,
Sire, jà vos avons-nos fait,
Et vos isi nos faites mal.
Coment, singnor, vos dites mal :
Ne cuidiés mie que nos face
Autre que cil qui en sa face
Vos crea et fist et forma
Tous isi fais com vos voila,
L’un Mouton et l’autre Hireçon,
Come de ciaus qui en maison
D’oume qui vaille n’ont afaire.
Cuidiés-vos or, singnor, contraire
Que jà mon col vos doi jà
Porter o moi, ia, ia :
Com iestes or musart et fol,
Qui de muse a depechiet fol !
Quidiés jà bone note dire
De soul orfiel nos puis bien dire
Que jà de loire vuide et vaine
N’arés boin gré à longe estraine.
Atant s’en part et cil demeurent
Qui mis à çou dont bien ne seurent
Respondre, anchois Castor l’oï
Qui la parole entendi :
Singnour, dist-il, oï avés
Mon singnor, se bien entendés
Sens et voisdie et grant simplece
Vos aprent et jou coi qui mece,
M’en sovenra soventes fois,
Ausi face vos, car nos Rois
Vos fait entendre pour itant
Que l’avés fait, n’est-il saçant
Que par paisnage vos ament
Vos defautes, se drois ne ment,
Et drois n’aporte ne raisons
Que vos soiiés el qu’Ireçons
Et li autres Moutons ausi.
Si n’a ce dist, pas meschoisi
Se pour teus que vos iestes tient
Vos et vo iestre il le couvient,
Ou autrement drois ne seroit
Selonch çou c’à lui aferoit.
Si vos souffise çou c’avés,
Car de lui el n’enporterés :
Un autre fois, s’il ne vos siet,
Si faites çou c’à vos afiert,
Car se Renars est ore Rois
Ne porroit-il pour nus en drois
Cangier de rien son viés usage,
Pour coi ne vos tieng mie à sage
Se vos li cuerés fors la piel.
Bien vos en doit-on faire apiel
En lui ou vos fussiés pungnis,
Si vos en di or mon avis
Pour çou que vos en pais soiiés.
Atant Castor s’est alongiés
L’ampléure apriès les autres
Qui s’en aloient come viautres
Fait quant il est descaïnés,
Et l’Ireçons est demourés
Et li Moutons tout abaubi,
Moult se tinrent à escharni
De çou c’avenu lor estoit.
Isi avient tout où endroit
Que li aucun font ensiment
Que l’Ireçons qui ensient
Avoit que Renars est mauvais,
Fel et traïtes desloiais,
Et si le fist singnour de tous
Pour gré avoir issi com vos
Avés oï çà de devant.
Et il isi souavenant
En eut com vos avés oï,
Que des autres furent parti
Et mis hors si vilainnement.
Bien en eurent mon ensient
Çou c’on demannois doit avoir,
Et puis dont que je me di voir.
Atant demeure et m’en passe outre
Apriès Renart qui à grant route
S’en vint droit à Grenomaisnil.
Là endroit tant demoura-il
Que il le fist moult bien fremer.
De là endroit pasa-il mer
Et vint droit en Jherusalem,
Droit au sepucre, ce dist l’em,
Fait son offrande et douna dons
Avant, isi com nos trovons,
Qu’il s’en partist, fu si conneus
Con çou ne fu ne gas ne geus
Que partout jusqu’en la grant Aise
Furent li traïtour moult aise
De çou qu’il seurent le renon
Dont Dant Renars avoit le non
D’iestre sages et avisés.
Moult tenoit ciaus à ses privés
Qui racontoient les mesdis ;
Se je ne fail or à mes dis,
Mesdisans amoit por mesdire
Par le Roiaume et par l’Empire :
Car en mesdire mesdisans
Amoit tous chiaus qui mesdisans
Disoient à lui faire rire,
Moult desiroit que par mesdire
Qui touraissent à autrui pierte
Desist-on chose mal apierte,
Qui autrui voloit encouper,
Moult desiroit à encouper
Celui qu’il tournast à tort.
Que vos diroie ? De nés tort
Ne puet-on biele chiere voir.
Renars tout partout fist savoir
En Galilée, par tout Pierse
Que bleue lainne n’ert pas pierse,
N’ébouelés n’ert mie chars ;
Ne vers hom n’ert mie eschars
Ne hom couvoitous envieus,
Rires, gabers n’estoit pas geus,
Chapeles ne r’ert mie aumuche,
Ne esrins n’estoit mie huche ;
Ne tarbars houche d’autre part,
Et si avint dont à Renart
Que ces decrès et ices lois
Fist el païs, ice sachois,
Avant que de là fust partis.
Droitement de là s’est viertis
Tant c’à Toulete en est venus
Où il refu moult bien conus,
Car autre fois i eut esté
Tout un ivier et un esté.
Apriès avoit del nigremance,
Onques ne fu clerc qui en France
Séust tant des enchantemens ;
D’apresté et d’esperimens
Nus hom ne se prendoit à lui.
Que vos diroie ? Dou refui
Seut plus que ne fist tous li mons,
Mainte valée, pluisours mons
Ont trespassé cele maisnie
Tant qu’en France s’est adrecie.
Droit à Paris en sont venus
Où il refu bien conéus
De Clers, de Maistres et dou Roi
Même qui ot fait grant conroi,
Car pour Renart faire aume
A mandés tous ciaus dou Roiaume.
Qiconques dou Roiaume tint
Pour Renart voir à Paris vint
Et li fist fieste et douna dons
Pour son maintien dont li renons
Estoit jà par tout si alés,
Qui méime tous li barnés
Prisent del tout si sa maniere
C’un pingnonchiel en sa baniere
Ont fichié par envoiséure.
N’i eut nul d’iaus qui s’aséure
Devant çou qu’il orent empris
La maniere qu’il ont apris
De la noviele contenance
Qui dont estoit venue en France
Que Renart avoit aportée.
Que vos diroi ? Teil renomée
Ala partout que nes à Rome
Devant le Pape en vint la nome
Coment Renars ert honorés
Et sour tous autres couronés
De sens, d’avis et de falourdes.
Nus autres Rois ne faisoit bordes
Ester pour voir, mais ce fist-il
Ne fust nus drois qu’eus el peril
Par son sens ne féist vierser
Tant savoit-il très biel parler
Et ramener uns drois avant
Qui moult sont souef et plaisant,
Delitable à toute gent.
Mais ne cuidiés que je vos ment,
La sustance de fauseté
Est à un pau d’ingniquité
Escrire où fiel de trecherie
Au pelagrafe de boisdie
D’une loi qui ensi comenche :
Pou m’est, sachiés, où que je menche,
Et en un autre liu ausi
Conferme ceste chose ensi :
Sans conscience me soumont
Que jou die dou val que mont
Soient oni et pais par tant.
Ensi li Papes oï tant
De Renart que par leitres fist
Mander ce Roi c’a lui venist
Par le conseil des Chardenaus.
Que vos diroie ? Les grans saus
S’en vint li més droit à Paris.
Cil qui pas ne fu esbahis,
Trova le Roi droit as Prescheurs.
Ensi com des Freres Meneurs
Venoit, où mese avoit oïe,
Dont jou, sachiés, ne me dout mie.
Que cil très bien là fu venus.
Quant du Pape éut les salus
Dounés primes au Roi Renart,
Ne vos poroie pas le quart
Ramentevoir de la grant joie
Que Renart fist quant vit en voie
Le mès le Pape et ciaus de Roume.
Riches juiaus et moult grant soume
D’avoir douna li mesagier ;
N’atendi mie jusc’à hier
Renars de movoir por aler,
Anchois vos di que s’il voler
Peuist, n’alast-il pas plus tos
Com il le cors et les walos
Vint el paiis et en la tiere.
Ne li fisent mie grant wiere
Cil de Roume ; li Chardinal
Contre lui vinrent à cheval,
Méime dames et puchieles,
Mie les laides, mais les bieles,
Les mingnotes et les amans :
Celes c’om plus cuidoit saçans
Aidierent Renart à fiester.
Que vos diroie ? Au par aler
S’en vint devant le Pape droit
Et il contre lui trestout droit
Se dreça et li mist au col
Ses bras et ne le tint à fol,
Anchois l’asist de jouste lui :
Renart, dist-il, n’ai mie anui
Quant ci vos tieng de jouste mi.
Sire, dist-il, vostre mierci,
Jou sui tous vos et c’est bien drois.
Sire Renars, tout çou est voirs,
J’ai moult à faire en pluisors lius,
Si ne puis mie avoir mon chius
De chascun à ma volenté,
Pour quel raison vos ai mandé
Que m’aprendés des vostre tours,
Car on m’a dit chastiaus ne tours
Ne se pueent tenir à vos
Que ne tournés tout au desous
Çou qui au deseure doit iestre.
D’un huis vos faites bien feniestre,
Et d’un viés pot un nuef chaudron,
De chauces ausi chaperon,
Et de moufles housiaus à chievre,
D’un porch-espin faites un lievre
Et d’une grue un hireçon.
Sire, dist Renars, ce dist-on
Que de legier ne puet mie iestre,
Voirs est dou Mouton fa-ge un priestre
Et un abé d’un cornabus,
D’un mais loudier bien un renclus
Et un evesque d’un guinau ;
Mais bien sachiés n’est pas por pau
Que teus estrumens puist-on faire
Sans argent, pour coi çou atraire
Dont il covient fer l’ongement,
Et à çou metre longement
Ne puet-on mie ongement metre,
Qui l’ongement i vorroit metre,
Anschois vos di l’ongement teus
Est, que se l’onguement est teus
Que longuement n’i puet voloir
A l’ongnement faire valoir,
Et pour çou di-je ongement
Que tos n’est fais quant l’onguement
Puet pau valoir à teus gens faire :
Pour çou avient que le contraire
Covient faire aucune fois,
Et pour itant metre en defois.
Les aucuns covient-il maniere
Por les uiseus mius metre arriere :
Car maniere avoir covient
Qui à si faite chose avient.
Maniere vaut à avenir
A çou c’on covoite à venir :
Car venir ne puet sans maniere
A çou où il covient maniere ;
Sans maniere jà nus se vant
De metre çou derrier devant.
Li Papes ot et si entent
A Renart dont ses bras li tent
Et met au col et l’eust baisié
Quant il le chief a dou baissié
Et dist : Renart, en vos m’afi,
De mes Chardenaus di tous fi
Quant nul si sage entour moi n’a.
Atant chascuns illuec vint là,
Si vinrent Renart qui se sist
Jouste le Pape qui se rist
De la grant joie que il ot
Qu’ensi Renars apris li ot
A faire evesques et abbés
Et de moutons et de chabrés,
D’asnes à pont, de cas cornus
Dist qu’il feront desous desus
Et çou devant metroit arrier,
Car l’ongnement seit jà broiier.
L’ongnement seit-il jà bien faire,
N’a soing, ce dist, dou contrefaire,
Car jà fausaires n’en sera,
Anchois le droit saiel en a,
Fors tant que Saint Piere et Saint Pol
I mist les chiés tous et le col,
Qui mie bien à l’ongnement
N’afierent tandis c’on i ment.
Apriès çou que la nostre Pape
Eut donée Renart sa chape
Par grant amor, non par haïne
Et il l’asolt par desipline
D’une verge deus cos ou trois.
Li plus vaillans, li plus cortois
Des Chardenaus Renart a pris,
Com apensés et bien apris,
L’en mena dedens son osteil.
Que vos diroit ? ? Ainc mais teil
Joie ne fist home vivant
Com cil a faite dou vaillant
Renart dont vos avés oï.
Ne vos sai mie tout isi
Com lor paroles furent dites
De leur atour, mais cascuns cuites
Des Chardenaus ne veut mie estre
Que de ses tours et de son iestre
Lour aprist tant com il apert,
Anchois que d’entors aus s’apert
Pour repairier en sa contrée.
Fu toute Roume saielée
De ses tours et de ses wenkeues,
Congié a pris, si vint as keues
En Engletiere où les cuidoit.
Là en trova plus c’orrendroit
En ait nule en autre paiis.
Tost eurent de ses fais apris,
Ce dist l’istoire ici briément ;
De là se part se jou ne ment,
Et fist tant que en Alemaingne
Vint à moult grant compaigne,
Car jà estoit de si grant pris
Renardie, que n’ert empris
Nus hom qui ne l’avoit aprise.
Pour çou disoit que moult pau prise
L’oume qui dou Renart ne seit
Ne doit-on tenir à seneit ;
Home qui Renart ne conoist
Jà à nul jour as chieus ne voist :
Car s’il i va et nel conoisse,
Je me dout mout que ne le coisse,
Par coi il tost l’avera mors
Anchois qu’il jà il l’aie amors.
Si fait trop mal hom qui emprent
Chose par coi il tost mesprent,
Si com il font aucune fie
Teus i a que ne nome mie :
Car il novise sont dou fait,
Non mie pruech qu’ensi ne vait
Que teus se melle de Renart
Qui n’en siet le tierc ne le quart
De çou qu’il en cuide savoir,
Si ne fait mie cil savoir
Qui entreprendent chose à faire
Dont aient honte ne contraire,
Si com fisent li hireçons,
Meme se compains li moutons
Qui de Renart fisent singnor,
Qui lour tourna à deshonor ;
Par coi s’il fusent aviseit,
De lui fusent tout honoreit
Si com on puet de cele gent.
Mais la chose ala autrement
Dont mainte bieste fu ochise
Qui onques puis ne fu requise
Par vengance ne autrement,
Dont vos veil ci dire briément
Et faire fin de mon propos,
Coment Renart qui ert el bos
A Malpiertruis si com j’ai dit
Avoit le cucu entr’oït ;
Coment treize ans de son aé
Li otroia si com conté
L’avoi en ses bras sa moillier,
Pour encore à comencier
Euist ce trait, ne fust dame Erme
Qui li avoit oï dou tierme
Parler dont jou ai di ancor
Que qui pensoit à maison d’or,
S’en avoit-il une chieville
Ains qu’il morust, ne mie guille
Que tout ausi fu de Renart,
Ne failli mie tempre ou tart
A çou où il tant eut baé :
Ne fu mie si fol baé
Qu’il comenchast sans faire fin
Ausi com font pluisor voisin
Qui encomencent moult de choses,
Mais en la fin lour sont si closes
Qu’il ne lour chaut coment il voist.
Mais cil Renars, coment qu’il loist,
Vint au chief de çou qu’il emprist
Ausi come li contes le dist.
Quant tout le paiis eut chierchié,
Vers son chastiel s’est adrechié
Guirnomaisnil, dont la courone
Movoit que ci endroit vos nome
Quant il là vint grant gent i ot
Qui l’atendoient, qui ains pot
A lui parler pour besoingnier.
Ce furent Duc, Conte et Princhier,
Bourgois et dames et riche home.
Se jou dire en veil la soume
Onques povres, foibles ne vieus
N’i peut parler, fors envieus ;
Orguis, mesdis et fausetés
L’avoient si pris de tous lés,
C’à poines povoit-il mengier.
Li Oliphans dont où huisier
Avoit fait, tint l’uis si très fort
C’on n’i peuist un tout seul bort
D’une verge dedens bouter.
Que vos diroie ? Au par aler
Oïst-on crier povre gent :
Haï ! argent ! argent ! argent !
Come tu fais ces huis ouvrir !
Argens, tu fais tous ciaus finir
Qui ne te puéent mie avoir.
Argent, jou di priès est d’avoir
Vilonie qui trop t’a chier ;
Argent, qui à toi atachier
Se puet, si le fais eslever ;
Argent, qui toi puet amaser
Si besoingne tous jours à Cort ;
Argent, pour coi te tient-on cort
Quant il ne te puent contendre ?
Argent, de toi nos covient prendre
Povre loiier, qui riens n’avons.
Argent, pour toi pierdu avons
No bon singnour qui tant valoit ;
Argent, qui bien te conistroit,
Tu fais çou qu’atres ne puet faire.
Argent, tu pués bien contrefaire
Blanches és et rouges brebis ;
Argens, que vaus que vos devis
Quant nus ne puet viers vos tenser
Chose que vos veilliés verser ?
Vierser povés ce qu’il vos siet
Et redrechier c’à tiere chiet
Fors home mort : celui ne pués
Resusciter, car hom muert lués,
C’argent ne el nel’ puet contendre.
Mors, pour coi tu nos fais entendre
Nostre pierte apiertement ?
Mors, tu pour coi si faitement
Nous a mis de si haut si bas ?
Mors dou li non dont tu nos as
Douné Renart, pour coi c’as fait,
Mors costumiere de maisfait,
Les de piecha t’ai-jou oït ;
Mors, tu pour coi as-tu choisit
Mort pour le vif, se mius ne vaut ?
Mors, il est voirs que mius moult vaut
Uns mors cortois c’uns vilains vis,
Mors, ne cuidiés c’uns vilains viés
Vaille jà tant c’uns cortois mors.
Mors, ne cuidiés que vilains mors
Puist tant valoir come li frans
Mors, com tu as pris pour safrans
Flour de senef et de chardons,
Mors, com tu nos fais povres dons
Quant aisil dones pour claré !
Mors com tu nos as declaré
Tenebres pour cler jour en mai !
Mors com nos as mis en esmai
Sans droiture que nus i voie !
Mors, car nos mostre une autre voie
Par coi nos puisons vivre apais ;
Mors, jou n’i voi aute relais
Que vivre tous jors en morant.
Mors, ci ne vos lo plus avant
Qu’envie avés del tout emplie,
Mors, de çou, sachiés, ne dout mie
Que puis que li miens sire est mors.
Ses nons encor n’est mie mors,
Anchois vos di que par raison
Nons de prodome est en saison.
Tous jours et ivier et esté,
Et par itant ai-jou prové
Que moult vaut mius nons de prodome,
Tout soit-il mors, çou est la some.
Que Renars qui encor est vis.
Moult vaut or mius à mon avis
Nons de prodome qui ne puet
Morir, que li vis qui n’eut
Loiauté ne bien ne honor,
Moult vaut or mius nons de singnor
Qui ait honor en son vivant,
Que Renars qui or vait revant
Partout où il puet avoir liu.
Moult vaut or mius nons de soutiu
A honor cuerre meme fios,
C’uns vilains vis à querre los
D’iestre riches ne mal querant.
Ha ! Cuens Guillaume, conquerant
N’estiés mie fors que d’onor,
A droit on vos tint à singnor,
Et çou fu drois à mon avis.
N’est merveille se li Marchis
De Namur de çou vos resanble,
Car onques jour, si com moi sanble,
N’eut que faire de renardie,
Mais sans faille jou ne di mie
C’aucune fois ne puet bien iestre
Que Renars ait dedens son iestre
Esté par aucune maniere
De ciaus qu’il savoit lour maniere,
Qui bien s’i sont arenardi.
Ha ! sire Cuens, ce poise mi
Que tant ne savés dou Renart,
Par coi séussiés tempre ou tart
Qui cil sont de coi je paroil,
Pour coi ore ichi vos soil
Que cil qui juent as eschés
Ne voient pas tous les bons très
Qui demeurent sour l’eschakier,
Anchois avient c’uns de derier,
D’encoste, de lés ou de lonch
Voit teil chose qui la selonch
Trairoit, qu’il gaingneroit le geu.
Et pour cou di-je li soutiu
En malisse et en orgueil
Qui traient le pene par l’ueil
As gentius cuers qui n’ont talent
For que d’ounor et largement
Faire à tous ice qu’il covient,
Vienent à çou que il covient
Faire à la fois teille aramie
Dont on parole en vilonie
Par tout l’Empire et le Roiaume ;
Et pour çou dou Conte Guillaume
Qui ceste honor eut encharcie,
Pris mon prologue com Marie
Qui pour lui traita d’Izopet,
Et pour itant ici fin met
De Renart qui est couronés,
Isi com vos oï avés,
Que confremés fu de par Rome
Si que partout porte couronne
En Franche et en toute Bretaingne,
En Engleterre, en Alemaingne,
En Poitau et en Honguerie,
En Escoche et en Hiermenie,
En Loheraine et en Saisoingne,
En Champaingne et en Borguingne,
En Gresce, en Aise, en Galilée.
Que vos diroie ? N’est contrée
En tout le monde où on abite
Que Renart n’ait home tout cuite,
Qui de lui tingne aucune chose,
Et qui choser m’en veut, si chose :
Car nel’ dira pour celi rien
Que jou sache home terrien
Qui de renardie se melle,
Mais li consaus si li droit melle
A çou que je conferm cest conte
Que je traitié pour le bon Conte
Ai isi com avés oï,
Que nus ne puet, ce poise mi,
Au jour d’ui venir à maistrie
Se il ne set de renardie ;
Et pour itant sachiés vorroie
Mon singnor méise en la voie
Par coi il séust plus des chiens
Qu’il ne face, si seroit biens
A ciaus qui n’aiment for le droit,
Et pour çou veil ici endroit
Raconter pour coi m’entremet
Des bons proverbes d’Izopet.
Suivent, dans le manuscrit, les fables d’Ésope par Marie de France.