Le Roman du Renart - D. M. Méon — 1826/36
ROMAN
du Renart.
Le Couronnemens Renart, qui par son engin Rois est coronés.
Pour la noble chevalerie
Qui jadis fu si ensauchie
En France et en toute Bretaigne,
En Engleterre, en Alemaigne,
Par tout l’Empire et le Roiaume
Dou preu vaillant Conte Williaume
Qui jadis fu Contes de Flandres,
Pour le grant non dont nus eschandres
Ne fu de lui, dont vilains dis
Fust onques contés ne oïs ;
M’est pris talens et volentés
Que pour çou qu’il fu si senés,
Si larges, si preus, si cortois,
Par raison deuist iestre Rois,
Et si fust-il mais que la mors
Le prist pour ce qu’il s’ert amors
A çou qu’ele het et despite.
Si ne veil or ci soit descrite
Autre raison, que vos dirai
Pour coi ma matere pris ai
Sour celui que j’ai dit desus :
Li tens d’ore est si en us
Que pau de forche, au dire voir,
Fait nus fors à querre l’avoir ;
Car qui avoir a asamblé,
Tost le paiis a asamblé :
Qui grant avoir a mis ensamble,
Tost a mis des amis ensamble.
Avoirs, quant tu ies asamblés,
Tost as des amis asamblés ;
Avoirs, tu les amis asambles,
Avoirs, tu tost les desasambles ;
Avoirs, moult ies or conjoiis,
Avoirs, moult ore as d’amis ;
Avoir, moult te puet-en amer,
Mais en toi n’a fiel ne amer
Que tout ne soit confusion.
Avoir, toi enamer puet-on,
Mais en la fin voit-on d’avoir
Que par lui est-on prest d’avoir
Confusion, ce sevent maint,
Qui en l’avoir repose et maint,
Que quant il l’ont mis en un mont,
De leur avoir tost parti sont.
Veillent ou non, partir l’enstuet,
Que ses avoirs tenir nel’ puet,
Anchois l’encace et si le hue
Ausi con l’en conte de Hue
Qui la toile à la feme prist
Si come li contes le dist.
Cil ne fu mie ensi hués
Dont j’ai dit, mais plus regretés
C’onques ne fu mesir Gavains,
Pour çou que li Cuens morut ains
C’avoirs montast en si grant pris.
Si l’ai-jou en mon conte pris
Pour doner exemple d’onour
A son linage qui la flour
Ont aveuc aus de tout le monde,
Qu’il prendent garde coment monde
La renomée de ce bon Conte
Qui ne vot onques oïr conte
De chose nule qui tornast
A çou que ses osteus n’alast
En largeté et en houneur.
Li mesdisant cestui singneur
N’aproismierent de nule part,
Avers en son ostel n’eut part,
Ne envie nient son liu ;
Orguis d’el crut avoit eschiu
Le portier qui ens nel’ laisoit ;
Anchois cil portiers conisoit
Tous chiaus que li Cuens avoit chier.
Ne povoit l’ostel aporchier
Mesdis, envie ne orgeus,
Que tous jours ne fussent escheus
De sa Court, tant com il vescui,
Cil troi traïtour que jou di,
Si qu’en la fin tant pourcacierent,
Alerent, vinrent, chevaucierent,
Que la mort au Conte troverent,
Et fisent tant qu’il la proverent
A un tournoi où li Cuens fu.
Là eurent cil troi le viertu
Sour tous autres, ce poés croire,
Car se vos dire en veil la voire,
Li Cuens qui sour tous ert poissans
Chevaliers et li mius faisans
Qui fust adonc ens en l’Empire,
Si chevalier qui à eslire
N’estoient mie des piours
N’eurent povoir ne fer soucours
Que il le peuisent tenser.
Celui jour covint devier
Joie et solas des trois larrons
Qui sour le Conte à esperons
Vinrent puignant plus que le pas.
Là endroit eut un felon cas,
Où orguis vint et feillonie,
Mesdis qui o li eut envie,
Ne feri mie à gabelés,
Quant en poi d’eure font les és
Del escu au lion voler
En pieches, celui revierser
Qui ainc puis ne fu où cheval.
Ha, Dius ! on dist de Piercheval
Qui si preus fu, et de Gavain,
De Bohort, de monseur Yvain,
De Lanselot et de Tristran,
Mais onques icil tel ahan
Ne souffrirent en un estour
Con li Cuens fist à celui jour :
Car quant il se vit entrepris
De ciaus dont vos ai fait devis,
Il s’aficha sor les estriers :
Devant, d’encoste et de desriers
Feri del espée esmoulue,
Mais tost sa riesne desrompue
Orent cil qui cure n’avoient
De proeche, ne ne voloient
Que cil vesquist, ains l’acorerent
Et de ce siecle le poserent
En l’autre où puis n’orent povoir.
Or li doinst Dius là tel manoir
Par coi l’arme ne soit perie,
Car jou di sa chevalerie,
Sa renomée et ses boins los
Là où il gist, mime si os
Valent moult mius, ce m’est avis,
C’uns Empereres vilains vis,
Et dont puis qu’il vaut mius tous mors
C’uns vilains à cui sui amors.
Pour sa valour veil par example
Moustrer aucuns une voiz ample,
Que moult doi-on amer signour
Qui prodom est hui en cest jour ;
Voit-on sovent poi amender
De signorage remuer,
Ausi com vos dirai avant,
S’oïr volés icest Roumant.
Un jour ert Renars à repos
A Malpietruis où ert repos
Pour lui deduire et solacier.
Entre ses bras tint sa moillier
Dame Ermengart la siue espeuse
Qui moult estoute et orguilleuse
Estoit enviers la povre gent :
Sire, dist-ele, moult sovent
Ai éu volenté et cure
Que me déisiés l’aventure
Pour coi premiers ne fustes rois ;
Jà savés-vos plus tors et drois
Que ne fait nus hom que jou voie.
Dame, dist-il, se Dius me voie,
Voirs est que je moult sai de tours,
Mais onques ne fu ma labours
A çou menée c’ainc m’en fust,
Se n’i fas force, car dou fust
C’on kiut sovent est-on batu.
Sire, dist-ele, que dis-tu ?
Jà ne se doit nus hom demetre
De soi avanchier et sus metre
Que pour lui, que pour ses amis.
Jà est tous grans li vostre fis
Qui dignes seroit d’iestre Rois
Ou Empereres, bien sachois.
Je veil que vos fachiens la some
Pour coi nos portions courone
Avant que nos morons de mort,
Car jou sai bien que qui s’amort
A perece et à faintise,
Que tele uevre sovent atise
L’ome à çou que il devient
Precheus et faus. Si me sovient
D’un proverbe que j’ai oï,
Si m’entendés, car je vos di
Jà nus ne baera à chose
Qu’il n’i vigne coment qu’il chose.
Qui veut baer à maison d’or,
S’en averoit-il aucun tor
Avant que du siécle partist.
Dame Ermangart, voirs fu qui dist
Que moult estiés sage et voiseuse ;
J’aie dehait parmi ma geule,
Se je cuidoi vivre dis ans
Encore, se jou tes ahans
Ne prendroie porchainement,
Mais teus cuide vivre granment
Qui moult tost est alés à fin,
Si ne puis mais si grant hustin
Endurer come jou ai fès,
Si me samble que desormès
Seroit raison et tans et cure
Que no vie relegieuse
Fust, car jou moult tost criem morir.
Coment, sire, dou Saint Espir
Vos soigne ! Que dites-vos ?
Pieça ne vos vi ausi rous,
Ne si luisant à mon esgart.
Voire, dist-il, Dame Ermengart ;
Mais quant on a tant traveillié,
Tant alé et tant chevauchié,
Si vient la mors soudainement
Qui tost un home ahiert et prent
Quant il le mains s’en done garde ;
Et cil autrui malement garde
Qui soit méime trop oublie,
Et j’ai mené moult povre vie,
Si seroit mais dès ore tans
Que jou fuse un pau repentans
De mon iestre où j’ai vescu.
A cest mot Renart le cucu
Entent, si jeta un faus ris,
Jou te conjur, fait-il de cris
Cucus, que me dies le voir,
Quans ans j’ai à vivre, savoir
Le veil, cucu, en preu cucu,
Et deus cucu, et troi cucu,
Quatre cucu, et cinc cucu,
Et sis cucu, et set cucu,
Et uit cucu, et nuef cucu,
Et dis cucu, onze cucu,
Douze cucu, treize cucu.
Atant se taist, que plus ne fu
Li oisiaus illuec, ains s’envolle,
Et Renars maintenant acole
Dame Ermengart ; avés oï ?
Sire, dist-ele, des cuer joi,
Vos semons que me baisiés.
Dame, dist-il, j’en suis tos liés,
Mais que celés soit cis consaus,
Ainc mais nul jour ne fu si biaus
Come jou sui, c’aséuré
M’a li cucus treize ans d’aé
A vivre encore ci apriès.
Or sace Nobles que j’engriès
Sui de lui desposer et faire
Chose cui li iert à contraire
Dedens un bien prochain termine.
Sire, dist Ermen, jou destine
Que vos uevres moult bien achief.
De çou Renart crolla le chief,
Puis ne fist illuc lonc soujour.
A lendemain au point dou jour
Se leva et ne li fu paine,
Congiet a pris à bone estraine,
Baisa sa Dame Erme, puis s’en vait.
Ne vos veil mie faire plait
De ses journées, car ne puis,
Mais jou vos di en ça mais puis
Fu ains qu’il fu venus à chief
De çou dont il ot pris le chief.
Ce fu au tans noviel d’esté
Que Renars ot l’ivier esté
En Malpiertruis le sien manoir,
Hors isi pour lui fer valoir
Si come cil qui vot emprendre
Une chose où il fist entendre
Mainte bieste, si com jou truis
Dont jou de chascune ne puis
Faire mencion à mon chois,
Et non pourquant soit tors ou drois,
Me covient traitier et retraire
D’aucunes selonc lor afaire,
Pour çou que devant ai traitié
Sour ma matere quel daintié
Renars avoit empris à faus.
Il si s’en vint les menus saus
Par mi une lande puingnant ;
Il done garde en son devant,
Si vit l’Asne où il paisoit
Chardons asnins. Viers lui tot droit
S’en vint lui saluer et dist :
Dant Timer, de çou m’abielist
Que vos tos jours portés le blé,
Ne jà nient plus c’on l’ait emblé
Li cors de vos n’en goustera.
Lors quant Timers entendu a
Renart, si a levé le chief :
Haïnes Dieus ! à quel meschief
M’as ore trové, dous amis ?
Saches de voir et soies fis
Mius aim chardons sans cop ferir
Que blé avoir et moi laidir.
Mius aim chardons à mon voloir
Que que dou blé à rechevoir.
Se j’avoie de blé cent muis,
Si aroie-jou mes deduis
Soventes fois entre chardons.
Renart dist, de çou que li hons
Est norris, ce veut-il avoir,
A l’autre lés, au dire voir,
Çou c’on aprent veut-on tenir
Et sa nature retenir.
Renart, dist-il, c’est verités,
Mais dites moi où vos alés,
Si vos pist Jhesu-Cris aidier !
Jou vois, dist-il, à ce mostier
Ci devant dont j’ai pris la cure,
Si croi de voir qu’il n’aront cure
De moi cil vilain quant g’i iere.
Coment, dist l’Asne, en quel maniere
Jà sarés-vos bien confieser ?
Oi jou, dist Renart, mais chanter
Ne sai, s’en sui tous abaubis.
Timers respont, je sui tous fis
Se tu chantasses ausi haut
Come jou fas parmi ce gaut,
Te poroies jà faire entendre.
Por çou, dist Renars, veu-ge aprendre
Pour combien tu venras o moi,
Si chanterons entre nos doi
Une laisse de cuer joli.
Jà, dist Timers, n’irai o ti
Se jou n’ai part ens en l’ofrande.
Oïl, dist Renars, ausi grande
Come jou même veil avoir.
Atant s’en vont au dire voir
Entre Timer et Dan Renart ;
N’estoit mie encore si tart
C’on ne chantast à un mostier
Où il s’alerent adrechier
Dehors la ville en un dimence,
Que li vilain, que jou ne mence,
S’estoient tuit là asamblé.
Li Provoires, qui n’ert sans blé,
Estoit el secré du canon :
A l’uis vinrent cil conpaignon
Del mostier qui estoit tos plains.
Timers qui ert farsis et plains
S’estut à l’uis, et Renars dist :
Compains, chantons ; et il si fist
Si haut que tuit cil dou mostier
Orent tel peur et tel cuidier
C’à pau ne sont dou sens issu.
Lors sont cil del mostier issu,
Si troverent l’Asne chantant
Et si très forment recanant
Que bien samblast à son avis
Que moult fust icil ses amis,
Por coi il féist sa grant joie.
Renars s’ert jà mis à la voie
Quant cil ahiersent lor bastons :
L’Asne ont doné tant de froions
Que ses las cors fu teus menés
Qu’il eut froisiés tost les costés,
Tant debatus, tant laidengiés
Que tous fu desrous et plaiiés,
Tant deboutés et tant ferus
Que tous fu ses espirs confus ;
Tant peteilliés d’aguillons
Que li sans de ci à feillons
Li raoit des cuisses aval.
Ensi l’enbatent en un val,
Puis l’ont illuec laisié tout coi.
Renars ne demora c’un poi
Quant il salli ens en la lande,
Et dist : Timer, as-tu l’ofrande ?
Partir i veil c’à la moitié.
Ha ! las, dist-il, par quel pechié
Sui-jou ore si mal chéans ?
Ainc mais offrande n’ot si grans
Priestres ne clers com j’ai éue.
En éuis-tu, Renart argue,
Qui dist, oïl, plus la moitié ?
Jou n’ai, dist-il, pas covoitié
Que n’en r’aies moult bien ta part,
Jou le te cuite, biau Renart,
Fait Timers qui de çou n’a cure :
Jamais d’ofrande ne de cure
N’arai envie que jou sace.
Coment, dist-il, fos est qui cace
Meillor viande de cardons ;
Foi que jou doi tous compaignons
N’est nus qui mais me féist croire
Que jou bien ne die la voire,
Que fox est cil qui bien esta,
S’il se remue et il lonc va
Seur esperance d’avoir mieus ;
Fox est li hom qui desitieus
N’est quant il cuert chose, ne fait
Dont il en la fin a mal plait.
Qui segnor a en son endroit,
Fox est qui d’empirer ne croit :
Mius vaut mesire li vilains
Qu’iestre prestres ne chapelains.
Renart, Renart, aies adiu,
Je veil demourer en mon liu ;
Mius aim à siervir mon signor
O mon iestre et ma labour,
Qu’iestre priestres, clers ne chanones
Pour ces offrandes ne tes dones ;
Moult aim or mius mon vilain mort
Que vo priestrage o tel deport.
Pour cest conte vous dis devant
Que moult doit-on peser avant
L’unne chose avant que on face
Riens nule qui apriès desplace ;
Que teus cuit iestre moult senés
Qui tost se croke sor le nés,
Pau puet li nés iestre defais
Quant li visages est plus lais.
Vilains qui n’a apris honor
Pau puet siervir Emperéour.
D’escoufle puet-on bien savoir
Que hairon n’en puet-on avoir.
Autretel vous di sans mentir,
Jà de vilain à gré siervir
A la longue n’en goïran,
Car s’il avoit signor aiman
Qui li donast toute sa terre
A maintenir, il aroit guerre
A son voisin ou à atrui
Dont sans honor aroit anui.
De vilain home acompaignier
N’ait nus afaire, il n’a mestier,
Mais teus est ore li saisons
Que de Renart vos conterons
Coument il esploita avant
Quant departis fu ça devant.
Ensi qu’il fu partis del Asne,
Dont jou de çou forment le blasme,
Que celui qui rien nel’ blasmoit
Isi sans raison cunchioit ;
Et nonpourquant raison i eut,
Car Renars bien faire i péut
Là où il seuist que biens fais
Peuist venir, si ne m’en tais,
Que de ce fait fist-il un autre,
Si com aloit d’un liu à autre,
De lon vit venir un vilain :
Andoille portoit en sa main,
Ce li sambla à son avis :
Lors pensa coment aroit quis
Art et engien de lui sousprendre.
Cil qui ne vot longues atendre,
Vint viers lui et le salua :
Vilains, dist-il, qui t’amena
Cest chemin a fait pau por moi ?
Coment, Renart, dites por coi,
Savoir le veil. Jel’ vos dirai,
Çà derier vient sans delai
Li chien au Conte de Poitiers,
Pour coi ne me fust or mestiers
Que tu m’euisses encontré.
Renart, Renart, en charité,
Fait li Vilains, de vos espès,
Car vos mengastes mes poulès,
Sel’ comparrés à ceste fois.
Tais-toi, Vilains fel et renois,
Faisons pais pour coi ton damage
R’aies, et jou te ferai sage
Dou tresor qui vaut un empire.
A cest mot li Vilains arrire
Comença, et Renart li dist :
Vien ent o moi ; et cil si fist
Jusque à un fraisne lonc et droit.
Droit où soumet un nit avoit
D’un escoufre grant et corsu :
Vilains, dist Renars, ne vois-tu
Cel nit en l’arbre ? Jou si fas.
Met çà ta main, si me jurras
Sor ta créance et sor ta foi
Que jamais tu, pour nul desroi
Que t’aie fait, ne me grever,
Et tu lasus porras monter
Où sont pieres tant presieuses,
Si plaisans et si deliteuses
Que mius valent c’argens ne ors.
Qui les i mist ? li grans tresors
Otheviens i vi porter.
Qui donc oïst Vilain jurer
De Crois de Dieus, de philateres,
Qu’il fust pendus ausi com lerres
Se il jà jour mais en parloit
A home nul et li dounoit
Ses andoilles de charité.
Renars li dist, en carité
Jà une seule n’en ara,
Car n’avoit gaires que il a
Mangui et bui ; mas monte tos.
Et li Vilains nices et sos
Se descauça et desviesti,
L’arbre ambracha, si n’atendi
Fors tant c’à paines est montés.
Quant au nit vint, si n’a trovés
Fors çou dont li pouchin cuncient :
Lors vint tandis qu’il eslecient,
Et li Vilains rudes et doilles
Regarde aval viers ses andoilles
Où Renars les ot enbrachies.
Vilains, dist-il, or me cunchies
Des esmeraudes, des rubis,
Des diamans et des saphirs,
Des topasses, des chelidones,
Des camahius n’ai-jou en sones
De topasses, de margerites,
Tout soit tien, jou tes claime cuites,
Mais les andoilles seront moies.
Atant s’en torne et va en voies,
Et li Vilains est descendus
Plus tost que peut, mais estendus
Chéi aval geule baée,
Pour pau n’ot route l’eschinée.
Criant se lieve et apriès va,
Ha ! ha ! Renart, ha ! ha ! ha ! ha !
Vos n’en dirés or c’a li chien.
Il s’en va là, cueres le bien.
Renars oï bien le Vilain,
Se li dist un mot en reclain :
Vilains enfruns, fel et estous,
Tant gaingnent cil qui font por vos ;
Or iestes riches par mon sens,
Si vorriés jà que de tous sens
Venissent jà li chien le Conte
Qui vos vengassent de ce honte,
Mais ne vos vaut, si com moi samble,
Tout ne poés avoir ensamble,
Perriers et bouchier ne pués iestre.
Atant s’en va et vuide l’iestre.
Li Vilains demora confus,
A soi meimes dist, dechéus
Me sui ore par covoitisse,
M’avoient or Diable à çou mise
Que créoie ce laron ci,
Voloi-jou iestre del autrui
Lapidaires ne menestreus,
Mius me venist iestre teus
Quant jou oï son parlement,
Mais jou voi bien que mainte gent
Sont à la foi trop covoitous.
Tout autresi ai esté lous
En cestui fait, mieus me venist
Avoir mes andoilles que cist
En rempléist jà ses poiiaus :
Mais ne me vaut ore rapiaus,
A tant m’en tigne et si m’agrée
Qu’à poi n’ai route l’eschinée.
Encore m’en peuist bien pis estre,
Si en lot Diu le Roi celestre,
Et Renart doinst mal enconbrier
Avant c’au soir se voist couchier.
Apriès cestui fait chevauçoit
Renart qui le Lion cueroit
En un liu et puis en un autre.
Ysengrins qui lance sor fatre
Venoit une viés voie antie,
L’encontre et li dist : Sainte Marie !
Dont vient ore mes chiers comperes ?
Renart respont, tes est or lerres
Cui jou levai son fil de fons.
Coment, Renart, oï avons
Mantes fois de vos vilains dis.
Ysengrin biaus très chiers amis,
Fait-il, jou nel’ di pas por vos,
Encore ai-jou autrui que vos
Par comparage acompaignié ;
Mais or me dites hui mengié
I ot, foi que vos mi devés ?
Si ai, dist Ysengrins, asés
D’une viande moult divierse ;
Queus fu et Ysengrin li vierse
Une bourde pour lui deçoivre.
Je hui matin m’en alai boire
Jouste le rui d’une fontaine,
É-me-vos un priestre qui maine
Une norriche qui protoit
Anguilles cuites moult estroit
Loiies en une touaille.
Quant il me virent dont sans faille,
Fis ausi qu’aler ne péusse
Ne que d’illuec ne me méusse
Pour cose c’om me vosist faire,
Dont me vot li priestres contraire
Fer, si me cuida aprochier.
De maintenant me vot lanchier
Un pel agu, et jou me lanche,
Que n’i fis longe demoranche,
Parmi lui, si le fis chaoir
En une rasque au dire voir
Si parfons et si malaisiue
Que on peuist bien une liue
Aler avant qu’il s’en r’isist.
A la norice qui s’asist
De paour, ving à li tout droit,
La touaille que ele avoit
Li sachai de ses mains isniel.
A tout m’en vig en un praiel,
Là desloiai cele viande,
Mais n’aie chose que demande
Se iomques mais chose mangai
Qui tant me pléust : jou ne sai
Se vos onques point en mengastes.
Nai, dist Renart, mais en hastes
En ai-jou mengié moult sovent.
Ysengrins dist : venés-vos ent
Et je vos encor en donrai.
Renart respont, jou je n’irai,
Car à t’alaine voi et pens
Que tu de cest ici me mens ;
Mais vignes o moi anuit,
Et jou te doins, cui qu’il anuit,
Deus chapons à la gause aillie.
Or ai borde trop mal taillie,
Dist Ysengrins, si m’aït Dieus.
Renart dist, ce n’est mie geus
De son ami ensi mentir.
Ysengrin jure Saint Espir
Qu’il l’i menra tout errament
Par tel maniere, s’il li ment,
Que jamais ne le veille croire.
Bien dis, fait Renars. Enne voire,
Fait Ysengrin, si voit sa voie.
Quant Renart voit c’on le mocoie,
Si iriés fu ne set que dire.
Renart, Renart, biau très dous sire,
Venés avant se vos voliés.
Renars fu moult très fort iriés,
Si dist à soi, jà Dius ne plase
Que jou jamais vigne en place
Où preudom soit, se ne te vent
Ce que me moques ensiment.
Si m’aït Dius, fait Ysengrins,
Biaus dous compere et biaus voisins,
Grant tort avez, venez vos ent
O moi, jou vos di boinement
Que jou jà joie ne deduit
N’aie, se jou encor anuit
Ne vos maine à cel ostel
Où vos onques ne vistes tel.
Chapons et glines vos donrai,
Oués et fromages : tant en sai
Que çou n’est se merveille non.
Renart a fronchié le grenon,
Si ne set que il puisse faire
D’aler o lui, si dist que traire
Se viaut à Guirnomaisnil.
Ysengrins dist, en grant peril
Alés, compcee, sans conduit.
Coment, dist-il, en quel refuit
Me puis-jou metre fors dou Roi ?
Ysengrins dist, ce poise moi
Que vos ne l’avez saielée.
Si ai-jou, dist-il, à m’espée
Atachié très devant ier.
Foi que doi Diu, au mien cuidier
C’est sans mentir et sans falourde,
J’oï dire, ne sai s’est bourde,
Que novieles doivent venir
Temprement à Court qu’à soufrir
Ara nostre Empereres Rois,
C’on a véu jà pluseur fois
Un estoile qui senefie
Par science d’astrenomie
Que li Roiaumes doit avoir
Temprement un merveilleus oir ;
Jou ne sai mie queus il ert,
Ne se il encore cuert
Qui bien l’en sace raison rendre.
Coment, Renart, fai moi entendre
De çou que tu ci vas disant.
Jou vos ai dit con faitement
L’en dist en aucunes contrées
C’on a véu as ajournées
Estoiles qui bien senefient,
Si com astremien dient,
C’un Roi nos covenra siervir
Qui dignes iert de desiervir
L’Empire de Rome et de Gresce.
Nomini dame, Renart, qu’es-ce
Que tu me vas ore glissant ?
Jou te di voir, dès or destant
Renars et torne les galos,
Grant oire vait à ices mos,
C’onques ne dist ne mains ne plus.
Ysengrins fu de çou confus
Que il plus ne li a jehi :
Apriès lui fiert, mais consivi
Ne l’a devant qu’en la foriest
Virent où ne fisent arest ;
Anchois ont lor voie tenue
Qui grant et large ert et hierbue.
Si ont tant le chemin tenu
C’à Ysengrins est mal venu
Quant en un cep lors s’enbati,
Ne demora, quant ens chaï,
Le tieste aval et les rains sus.
Renars areste et trait en sus,
Et dist, compere, or ne le fis.
Hai ! Renart, onques ne fis,
Chose pour bien que mal n’euise.
Coment, dist Renart, jou qu’en puise,
Ne pour coi dis ore cest mot ?
Jel’ di, fait-il, por cel espot
Que tu or me déis isniel,
Que mie n’avoies ton biel
De çou que ci ere chéois ;
Et d’autre part iere renois
Qu’ensi de moi te departoies,
Si vint o toi quant tu disoies
C’un noviel Roi nos averiens,
Si m’en est avenut teus biens
Que ton voloir as acompli.
Renars voit bien que d’escondi
N’i avoit point, si s’est téus.
Atant é-me-vos où venus
Est li loviers, et[1] ester
Renart qu’il ne povoit amer,
Jouste le cep, si s’ariesta
Pour çou que maintenant cuida
Que dedens se déust chéoir,
Renars a dit avoir avoir
Te covient de mon compaignon.
Lors vint cil droit à espoiron
Qui la parole ot entendue :
Renart a dit, vostre venue,
Sire Lovier, desire-jou.
Coment, dist cil ? or coi, de çou
Or sui venus. Jel’ vos dirai :
Ici le Leu amené t’ai,
Si veil que tu pris le me livres,
Et jou t’en renderai cent libvres
Que jou sai en cest bois repus.
Li Loviers ne fu pas confus,
Anchois dist, Renart, dis-tu voir ?
Vilains, se tu ne vius l’avoir,
Si te tien bien à ce que t’as,
Dont s’est tornés ausi c’à gas
Et fist samblant c’aler se veille.
Atant li Loviers ne s’orguelle,
Ains dist : Renart, à vo devis
Ysengrins vos renderai pris
Par maniere c’aie l’argent.
O tu, dist Renart, fai briément
Et si te haste que ne vingne
Aucuns qui compaingnie tingne
A l’argent que je veil que t’aies.
De maintenant heue les braies
Dou cep et est ens avalés,
Ysengrin prent, puis r’est montés
Amont et l’a isi loiié,
C’un glaon el dens a fichié
Et loiié desus les oreilles.
Or entendés fines merveilles,
Ysengrins loiien li a mis où col,
Renart le baille qui por fol
Le tenoit si com vos orés.
Lovier, apriès moi en venés,
Dist Renart, et je vos menrai
Là où l’avoir vos liverai.
Atant s’en vont, Renart les maine
Une voie qui fu lointaine,
Bien i ot grant liue et demée.
Lors virent en une valée
Où un marchais avoit parfont,
Ne cuist Renart ne gué ne pont,
Mais devant lui vait à droiture :
En sa main tint qui n’avoit cure
Dou pas ne del Vilain qui vint.
Outre paserent ; ne se tint
Pour raisce ne pour autre pas :
Li Vilains qui ert en porças
Del avoir qu’il ot covoitié,
A dit, Renart pora-je à pié
Passer apriès toi sans peril ?
Renart respont : Louvier, oïl,
Hardiement apriès moi vien.
Cil passe avant qui pesoit bien
Aune et demie et encor mais.
Tant ala cil que dou grant fais
S’est enbatus en une rasse ;
Li fais pesa, aval s’eslaisse
Jusques au chaint, lors a crié :
Haï ! Renart, j’aie dehé
Se ne me tieng à engingnié.
Atent, Vilain, quant compissié
T’araie et mes compains ausi,
Lors aurons-nos de toi merchi.
De maitenant Renart desloie
Ysengrin de la grant corroie
Dont loiiés fu, si com j’ai dit,
Andoi vinrent tout aatit
Au Vilain qui aidier ne pot
Soi ne autrui. Alains qu’il pot
Ysengrins torne le desrier :
Vilains, dist-il, de ton louier
Veil or que t’aies la merite.
Le visage tout li eschite,
Nès et bauleures et menton.
Renart a dit, ensi doit-on
Le covoiteus tous jors paiier.
De maintenant li vait raiier
Del cpmpenage c’ot el ventre
Où Ysengrin l’avoit soventre
Au devant ensi avisé.
Moult laidengié et moult hué
L’ont entr’iaus deus, n’en doutés jà.
Coment Diable ! Renart dit a,
Vilains, n’avoies entendu
Ton cep dont avoies éu
Le louier à faire ton preu ?
Or pués-tu ci faire ton veu
Que le premier mais que tu prendes
De nos deus, que bien tu en prens
Ceste rançon et l’autre ausi.
Atant du Vilain sont parti,
Et cil demeure illec ahiers
Qui covoiteus fu et parviers.
Pour çou vos mostre or chi endroit
Que covoiteus moult se dechoit
Qui a bien çou qu’à lui afiert,
Et dont puis par envie acuert
Chose dont il vient en la fin
A vilain blasme et à hustin,
Ausi con font çà mainte gent
Qui cuerent menu et sovent
Meillour pain c’à iaus n’apartient.
Cil de forment ne lour atient,
Anchois veulent celui d’avainne ;
Ne lour plaist sainnie de vainne,
Si se font sainnier à buhot,
Ne sevent l’eure qu’ens el hot
Son enbatut où li Vilains
Chaï dont or vos contai ains.
Si me veil or atant soufrir
Et à Renart m’estuet venir
Qui Ysengrin eut delivré
Ensi com je vos ai conté,
Dou cep où il fu enbatus.
Ensi com il les saus menus
S’en aloient çou democant
Dou Vilain qu’il orent atant
Laissié. Mist Renars à raison
Ysengrin, et dist : compaignon,
Avons esté moult a grant tans,
Mais aincht que sace de cent tans
N’éut povoir de bien à faire
Com jou ai ore, si repaire
Del tout de ma mavaise vie :
Ne cuer jamais avoir envie
De maus à faire, jou les hé.
Ysengrins çou a escouté,
Si cuida pour l’esperiment
Dont il l’avoit isi briément
Delivré, que il déist voir.
Sire Renart, vos dechevoir
Ne veil mie, sachiés de fi
Que hautement je vos merchi
De çou que vos m’avés hui fait.
Renars a dit, bien por mal fait
Doit-on rendre qui seroit saus :
Je hui cuidasses iestre asaus
De çou que cuidiés vos euise
Fait trebuchier dont mespréise
Se preudom fuse, mais je non,
Bien i parut c’à compaingnon,
Et pour ami vos ai tenu
Et pour itant un saut menu
Me faites de chi au Grenomaisnil,
Se vos le Roi trovés et il
Vos demande de moi maniere,
Querés que ne navés où iere
Pour chose nule que il die.
Et d’autre part ne cuidiés mie
Se vos oés nient murmurer
De cele estoile dont parler
M’oïstes hui, jà mention
Ne faites c’onques le grenon
M’en oïsiés onques movoir,
Car ne vorroie dechevoir
Mon singnour en nule maniere.
Ysengrins dist, tout ensi iere,
Renart, que vos ci le contés.
De lui se part et est tornés
Tout droit deviers Grignomaisnil ;
En chevauçant se pensa-il
Que desormais se vengera
De Renart qui tantes fois l’a
Desbareté de son afaire.
Son anui vorra à chief traire
Coment qu’il aut ne coment voise :
Dedens son cuer forment s’envoise
Et fu moult liés en son corage,
Car onques n’ot véu si sage
Que se compaignie à Renart
Éust éu, fust tempre ou tart,
Qu’en la fin ne s’en repentist,
Dont à lui méime lor dist :
Moult me deduirai ore aise
Se jou puis fer chose qui plaise
A mon signor Noble le Roi.
Atant s’en vint sans tenir coi
Jusques à lui et li a dit :
Sire, par foi on m’avoit dit
Je hui matin où je erroie
Que je me méise à la voie
De venir viers vos vistement.
Coment, fait-il, sont nos parent,
Ysengrin, que tu ne m’adaignes !
A ques letres n’à ques ensaignes
Sés-tu que je te mant ensi ?
Par foi, sire, dist-il, jou vi
Je hui matin Renart venant
De ceste part moi demandant
Pour Diu se de moi iert noviele,
Coment féist savoir c’à ele
Que moult m’aviés en souspeçon
De Renart qui à compaignon
A las et ne fait son compere.
Coment, dist-il, en quel manere
Te vorroi de çou encoper ?
Sire, dist-il, j’ai le Sengler
Juré fiance à porter foi,
Si fu ensi qu’entre nos doi
Venimes deviers aux ars
Où avoit giut l’Asne et Renars,
Si éurent éut parlement.
De coi fu çou ? mien escient,
Dist Ysengrin, jel’ vous dirai.
Renars, de piecha prové ai,
Fist son povoir de vos demetre,
Por coi il vos peuist hors metre
De vostre Roiaume demaine.
Sainte Marie Madelaine !
Dist Nobles, puet çou iestre voirs ?
Ysengrins dist, ausi com soirs
Est la miudre eure que je sace,
Renars de son povoir porcace
De l’Asne faire vo singnour,
De çou ne veut avoir sejour
Pour home qui soit el Roiaume.
De cesti chose eut Nobles asme
Et en entra en grant riote.
Lors dist Ysengrin ça tapote
Et me jure sour tous les Sains
Que de cesti ne parras ains
Devant çou que t’en aparrai.
Sire, dist-il, en covent l’ai
Sour mes ordene et sour ma piel.
Et jou, dist Nobles, je t’apiel
Que tu mes letres et mes briés
Porte partout, n’aies tes piés
Oiseus itant que chascuns sace
Que jou li mant et que il face
Tant pour mon bien ou par cremour
Que il soient dedens un jour
A Malrepair où je fui nés,
Car là vorrai iestre entierés
De mes amis les mius vaillans,
Pour çou que j’ai vescut en grans
Honors, si veil povres morir,
Mais ne veil Roiaume tenir,
Dius fu povres, et jou le veil.
Va tost et ton chemin acueil,
Ne fine jà de chevauchier,
Si aies fait çou que te cuer.
A Pentecoste sont li jours
De ceste chose et li grans Cors.
Quant Ysengrins ot et entent
Que Nobles eut tel ensient,
Si cuida bien c’oï noviele
Avoit de l’estoile taele
Dont Renars li avoit parlé.
Sire, dist-il, de vo barné
Avés-vos bien mestier, je croi,
Car mesme Renart dist à moi
C’une estoile ert aparue
Par coi on savoit la venue
D’un Roi qui à venir estoit
Qui sour tous autres regneroit.
Coment Diable ! di me tu voir ?
Est-çou achiertes ? Oïl voir,
Nel’ saviés vos ? Je par foi non,
A rat n’en oi movoir grenon
Qui m’en euist noviele dit.
Et dont avés-vos l’apetit,
Dist Ysengrins, de çou à fer
Que vos volés ciaus asambler
Qui de vos tienent tant ne quant ?
Ensi me vient en mon samblant,
Si n’est mie sans aucun muef.
Et jou, dist Ysengrin, me muef.
Lors est montés et si s’en va
Com cil qui mie ne cuida
Jà avoir fait asés à tans.
Lors traviersa maint plusor chans
Soi merveillant de l’aventure
Dont il pas ne s’aséure
De chevauchier pour cest afaire,
Car il li covenoit atraire
Amis en ceste chevaucie.
Bien vit que por nient n’a mie
Li Rois cest veu encomencié.
Dont ne laissa bois ne plaiscié,
Haie ne champ, trau ne buison
Qu’il n’ait partout dit sa raison
Pour coi li Rois à tous nonchoit
Que chascun d’iaus par non mandoit.
Quant il eut à tous dit et fait
Çou por coi li Rois eut ce plait
Encomencié, si s’avisa
Coment il en esploitera,
Car il seut bien Renart n’avoit
Coupes de çou qu’il l’encoupoit.
A l’autre les non ot li Asnes
Por coi porroit avoir bien blasmes
De cest emprise et de cest plait,
Car n’avoit gaire que il fait
Avoit por lui chose à ami
Dont il penser ne deut viers li
Vilonie ne traïson.
Moi n’en chaut ; c’afiert à gloton
De mal rendre por bien à faire
Ouquel tel bien ne li lut faire
Fors por moi metre à sa cordiele.
Ensi Ysengrin se rapiele
A sa nature et à son droit.
Tant a alé que de lonc voit
Venir Renart grant aléure :
Bien sambloit qu’il ne s’aséure
De la chace au Conte Deslandes.
Formens estoit sans faire eschandes
Des chiens, si se mist un pendant.
Ysengrin li vint au devant
Et li dist : Renars, bien vingniés,
N’est ore poins que vos r’aiiés
Ma response. Biaus chier compere,
Alons nos ent, vès ci l’empere
De chiens qui vive…
Dont nient autre que cil doi
Se misent huers de la riote
De ciaus où laisié lor cote
Euisent, se il destorné
Nes fusent. Dont a conté
Ysengrin à Renart l’afaire
Auques priés de çou qu’il vait querre
Et coment au Roi vint et mut
La parole por coi se mut
D’aler isi c’avés oït.
Par mon chief, Dans Renart, a dit
Ysengrin, je vos ferai Roi
Cui qu’il empoist, à çou que voi.
Vos iestes sages et viseus,
Mais ce me dites, est oiseus
Mesire et a pau de maisnie.
Oil, dist-il, ne doutes mie
Que jou cuit qu’il soit ore au lit ;
Couchiés malades, sans delit
Je laissai n’a hui que trois jours.
Alés à lui, c’est vostre honours
De lui porter or compaingnie
Tant com il nos sera en vie.
Partons li foi et loiauté,
Car je me dout en verité
Qu’apriès lui porons-nos avoir
Encor piour au dire voir.
Jà pour çou nel’ lairai au dire
Que vos ore m’en ferés, sire,
Ce véistes en vo gabois.
Ha ! Ysengrin, con t’ies revois,
Fel et cuviers quant biaus atrais
De biel parler ne de bons fais
Ne te puet à çou amener
Que tu puisses oïr soner
Un seul mot se retraite non.
Voirs est movoir estuet grenon
De legier cui la lepe pent :
Ne t’ai pas paiié isiment
Tous jours come tu m’as paiié.
Coment, Renart, as ce songié ?
Or voi-jou que m’as reprové
Le bienfait dont m’avés jeté
N’a mie grant tierme au jour d’ui.
Quant vos autant vos di d’anui,
Fait Renart, si me reprovés
Vos biens fais, jà n’en aiiés grés
De moi, car je le veil ensi.
Atant chascuns se departi
Ausi come par maltalent.
De maintenant Renart descent
D’une montaingne où il estoit,
Un chastiel vit où il avoit
Jacobins et Freres Menos :
De maintenant vint au Prious
Et li proia pour Diu le dras,
Car grant piece avoit esté cras
De mais morsiaus et de mesdis,
De traïson ert ses avis,
Tous jours avoit mené tel vie.
Li Prious maintenant envie
Eut del’ reçoivre, mais non fist
Sans conseil, ains illuec li dist :
Renart biau frere, or te tien chi,
Ne porroie fer cesti chi
Sans le conseil tous de nos freres ;
Jou vois à iaus, mais se tu eres
Repentans et iestre preudom,
Je vos feroie vrai pardom
De tous pechiés parfitement.
Sire, dist Renart, autrement
Ne cuer-jou chose que demant.
Li Prieus de lui maintenant
Se depart et vint en chapitre.
Les frères tous cestui chapitre
A encomenchié à desclore.
Singnor, le tans que jou voie ore,
Est moult mués puis que premiers
Ne fui au siecles escoliers.
Jadis li siecles estoit teus
Que moult troviens poi sienteus :
Le siecle or est plains de barat,
Nus ne vaut rien sans sain de cat,
Ou de Renart sache parler,
Aveuc çou, s’il n’en seit user,
Pau doit-on entendre à ses dis.
Jel’ di pour çou nus hom mendis
Ne puet au jour d’ui porfiter
Se de barat ne set ouvrer ;
Et nous tuit soumes mendiant,
Par coi ne porons tant ne quant
Recovrer se barat n’avons
O nous, par coi nos le tenons
A ami et il nos menra
Par tout le mont et conduira
Devant Rois et devant Contours.
Se chiaus avons, çou est la flours
De tout le mont, je vos afi,
Car dou clergié d’iaus tous de fi
D’Apostoile, de Chardonaus,
Des Archevesques, nus de chiaus
N’ara si hardi pour le nés
Qui contredie en ces renés
Chose nule que veulliens dire,
Et pour itant vos viel-jou dire
Que li meillour clerc sont o nos.
Ne nos faut el entre nos tous
Fors que Renart à compaingnon.
Aions d’ore en avant paingnon,
Et pains, fouache et encor vins,
Poissons de mer, tenres pouchins,
Lus et saumons et venisons
Ne nos faura tant que l’aions
Avenques nos, ce sachiés tuit,
Ou jà sachiés n’arons refuit
Pour chose nule que nus chace,
Tant meste qu’il veule la chace
Corte et estroite à poil locu
Ne die bien de Fernagu,
Ne de Guilliaume au cort nés,
De Saint Jehan qui décolés
Fu pour voir dire et mis à mort,
Ne pour Jhesu qui fu à tort
Mis en la crois pour nos pechiés.
Avant cascuns tous depechiés
Seroit que nous puissons durer,
Se Renard n’avons au disner
Et à toutes eures dou jour.
Entré somes en grant dolour,
En grant paine somes entré
Se Renart n’avons encontré,
Par coi o nos frere se tengne
Et dou barat cascun aprengne.
Sire Prieus, dit uns conviers,
Nos mie ne sons si parviers
Que se Renars les dras voloit,
Que chascuns moult liés en seroit.
Oïl, par foi, dist li Prieus,
A la porte est moult covoiteus
Que il o nos peuist viertir
Et ses grans pechiés espanir :
Les dras demande, et je vos lo
Que vos comenchiés un seul po,
Sire chantres, le Te Deum.
Qui donc oïst com à haut ton
Cil qui fu liés l’encomença,
Et li Preus dont pruech ala
Renart, mais il ne l’a trové,
Dont l’a au portier demandé.
Et il dist ç’à freres Menors
S’en ert tornés tout le grant cors.
Quant çou entent li Jacobins,
Arrieré torne tous enclins
Et abaubis, ne doutés mie,
Si trova que cil à grant hie
Cantont de çou qu’il n’orent pas.
Singnor, dist-il, n’est mie gas,
Renart nos est ore eschapés.
Coment, Diable ! par quel maufés
Nos en est-il si avenu ?
Dist li Prieus, moi dechéu
Me tieng c’onques m’en conseillai,
Et nonpourquant bien proverai
Que pour çou pierdre nel’ devons
Se de no bien nos conseillons.
Maintenant li Prieus s’en va
Droit as Menors, si trova jà
C’on ot viesti Renart la cote.
Li Prieus dist qu’en grant riote
Les avoit mis, car il laiens
Ne demorroit jà à nul tens,
Car il le devoient avoir.
Li Gardiiens dist pou povoir
Que Jacobin peuissent faire,
Renart mais d’iaus ne verroit traire.
Si ferons, çou dist li Prieus,
Maintenant remist entr’iaus deus
Renart et dist, or m’entendés,
Bien voi sans faille que tendés
Cascuns à moi fer grant honor :
Je vos dirai, icest estour
Departirai asés briément,
Il iert ensi ne autrement
Que jou dirai je veil qu’il soit.
Chascuns a dit : bien soit, bien soit.
Et jou veil, dist Renars, ma cote
Soit partie, et harligote
D’une chape à Jacobin,
Et par itant cestui hustin
Partirai, que g’iere d’andeus,
Jacobins et Freres Meneurs.
Par Sainte Crois nos le gréons
Et par itant ami soions
D’ore en avant à tous jours mais.
Ensiment fu faite la pais
Des Menors et des Jacobins,
Si jurerent jamais hustins
Ne moveroient entr’iaus deus
Tant que Renart seus
En l’Orde n’aront-il regart,
Mais qu’il honeurent bien Renart,
Et il si fisent longuement.
De l’un à l’autre bonement
Aloit Renart, et lor aprist
Coment cascuns se maintenist
En Cours de Contes et de Rois.
Tous les maintiens et les conrois
Lor aprist Renars en un an ;
Mainte paine et maint ahan
I mist cascuns ains que seuist
Coment cascuns se maintenist
Quant il estoit venus à Court.
Que vos diroie ? chascun court
Tenoit Renars, ne déist mie
Qu’entr’iaus éust jà esté mie
S’il ert ensi c’on le demant.
Voirs fu, bien tinrent ce conmant
Et encor font, et iert ensi
Que jamais jour n’iere jhehi
C’onques en ordene de precheur,
De Jacopin, Frere Meneur
Renars n’entra ne fist estage ;
Si ont bien droit et font que sage,
Car il ensi l’orent covent,
Mais lors ne demoura granment
Quant congié prist à lor Prious
D’aler visiter l’orgueillous
Noble le Roi qui ert enfers.
Lors s’atorna come grans clers
Et prist o soi l’un de lour freres.
Tant ont alé que lor meneres
Les a mis en la Court au Roi.
Bien se contint Renars en soi
A loi d’ome relegieus.
N’estoit par samblant orgueilleus,
Mais simple et dous et debonaire,
Dont ne sevent arriere traire
Que viers la chambre ne soit trais
Dou Rois où il avoit grans fais
De barons qui erent venu.
Li chambrelench ont contendu
De Renart fer parler au Roi :
Nomini Dame tenés coi,
Singnor, qu’est or ce que vous dites ?
Jà somes-nos venu tout cuites
Pour mon singnor doner santé.
Quant içou orent escouté
Li baron et li huiséour,
Si les mainent à lor singnor.
Renars a dit : sire, bon jour
· · · · · · · · · · · · · · · · · · · · · · · · ·
Vos doinst cil qui por nos morut !
Singnor, dist-il, et grant…[2]
Vos aiiés ! quel gent iestes-vos ?
Sire, fait l’uns, c’est li Prious
Des Jacobins de Saint-Ferri.
Singnor, dist-il, votre merci,
Joians sui de vostre venue.
Renars a dit : teus au main sue,
Sire Rois, qui à viespre a froit,
Ausi vos di que teus a droit
Qui à le fie chiet en tort,
Et teus cuide veillier qui dort
En son pechié soventes fois,
Pour çou vos di, biau sire Rois,
Que vos gardés à vos méismes,
Car nos avons véu les singnes
Que morir vos covient vias.
Sainte Marie, jou à gas
L’avoie dit n’a pas granment,
En non Diu, sire, autrement
Est ore que vos ne cuidiés,
Jours va et nuis, mais li pechiés
Demeure à celui qui le fait.
Por Diu gardés coment il vait
Entre vos et nostre Singnor.
Sire, fait-il, j’ai grant paour
De çou que vos m’alés disant.
En non Diu, sire, j’en sai tant,
Que morir vos covient sans doute
Lendemain de le Pentecoste.
Dont me dites, fait donc li Rois,
Biau sire chiers, et que savois,
Dites le moi par coi le sace,
Ou se çou non, je veil c’on face
De vos ausi com traïtour.
Renars a dit, devant le jour,
Biau sire chiers, le vos dirai
Et aveuch çou le mosterai
Par droit art de astrenomie.
Dont, dist li Rois, que ch’iert maistrie.
Si ont atendu de ci là
Que sour le jour aparu a
Veneris une estoile clere,
Grans à merveille, car tans ere
Qu’il faisait biel en plaine lune.
Lors fu li Rois et sa coumune
Apareillié de çou véoir,
Dont fist Renart ester pour voir
Que çou fu singnes de Roi pierdre
Et d’autre gaingnier et acuerre.
Lors eut Renart bien aprové
Çou qu’il li plot, car alité
A si le Roi, qu’il dist qu’il muert.
Confiesion pour Diu recuert,
Car morir veut honiestement,
Povres et nus et saintement
Ausi come font maint prodome.
Renars dou tout à çou s’adone
Que il moult bien l’a confiesé,
Apriès li a moult demandé
Liques des Barons seroit Rois ;
Et il dist que li plus cortois,
Li mius faisans, li plus hardis
C’est li Lupars à son avis.
Ha ! sire chiers, çou dist Renars,
A çou mie li vos esgars
Ne doit iestre, mais esgardés
Un home sage qui senés
Soit et soutius et enginneus,
Par coi conoist malesieus
Quant il de çou se vient aidier.
Sire, tout çou a bien mestier,
Car nos trovons el livre d’Orche,
Mius vaut engins que ne fait forche,
Car engins à la fois le met
Où sa force bien le demet :
On dist que force le prepaist,
Mais de force moult sovent naist
Guerre qui mal est maintenue
Don Lupart an sovent véue
Que quant il faut à proie prendre,
Que sa valours en est moult mendre.
Un autre en nemès, sire Rois,
Car cil n’est preus, ice sachois.
Ha ! sire, un vos nomerai ;
Ne cuit el mont, si com jou sai,
Si faus, mais trop par est soutius
Et de son preu faire ententius ;
N’est rien, s’il le vieut achiever,
C’à chief n’en vigne au paraler.
Ha ! dist Renars, celui lo-jou,
Honeur et croi et vorroi-jou
Que bien sans mal li avenist.
Qui est-il or ? Et il li dist :
C’est Dans Renars, bien l’os nomer ;
N’a home nul deça le mer
Si l’acuelloit, qu’il au desous
Ne la méist, tant fust estous,
Preus ne hardis, crués et fiers :
Moi méimes où jamais piés
Fait-il sovent mon cuer trambler.
Par Sainte Crois, celui à ber
Tieng-jou. Qui est-il, biaus dous sire ?
Nel’ savés-vos ? Jou non sans dire,
Fait-il, et qui le m’aroit dit ?
Par foi, fait li Rois, d’apetit
Le saroit chascuns qui m’oroit.
Biaus sire chiers, nos orendroit
Qui somes en relegion,
Ne savons mie le renon
Qui ore ceurt par le paiis,
Et pourtant n’ai-jou mie apris
Qui cil est, se n’est Cointeriaus
Li Singes qui est moult isniaus
En pourchachier cuivert malisse.
N’est mie cil par Saint Meurisse,
Renars a non en droit baptesme ;
Par fin covent d’oile et de cresme
Ne fu onques hom preseingniés
Qui de noviel mal ne de viés
Seuist tant come Renars fet.
Ha ! sire Rois, cil trop mefet
Qui sour autrui met nesun blasme
Dont en la fin puist avoir asme
Nus prodom qui a bien entende :
Car nos trovons de cesti meme
C’on a envie sour les bons
Plus asés que sour les felons.
Et pour itant cuit-jou savoir
Que qui vorroit dire le voir,
Renars est dingnes d’iestre Rois,
Plus qu’il est sages cest cortois,
Puisqu’il est sages, il est biaus,
S’il est sages, il est isniaus.
Sages doit bien iestre hardis,
Cortois, larges, amanevis :
Preus conquerans doit sages iestre,
Si fais Princes doit bien Rois iestre
Et si iert-il, jel’ sai de voir,
Si vos pri que le puise voir,
Biau sire chiers, ains que m’en voise.
Li Rois a dit : forment me poise
Que vos ne l’avés pas véu ;
Roviel Timer, di, où ies-tu ?
Fai moi savoir où est Renars.
S’il est chaiens, moult est musars
Quant il ne vient là où je sui.
De maintenant n’i ot refui,
Que li huisier ont demandé
Se nus savoit de vérité
Que Renars soit encor venus.
N’i ot nul d’iaus qui ne fust mus,
Car il la noviele n’en savoient,
Ançois as osteus demandoient
S’ert nus noviele de Renart.
Onques tempre matin ne tart
Ne peut-on oïr où il ert,
Car de nul liu il ne s’apert.
Dont seut li Rois et oï ire
C’on ne savoit vent ne espire
De lui, car encor n’erent tuit
Venu à Court, si eut refuit,
Ne Ysengrin à l’autre lés
N’estoit mie encor retornés
D’iaus à soumonre par habet.
Que vos diroie dou vallet,
Fait li Rois, fors que au besoing
Ne me fu onques Renars loing ;
Mais quant mestier jou ai de lui,
Dont se meit-il en mon defui.
Ha ! sire Rois, ce mar i dites,
Vos iestes confiés et tous cuites
De vos pechiés, mais que pardon
Fachiés à tous, car sans raison
Onques Renars ne demoura.
Puet-il bien iestre quant il sara
Vostre malage et vostre anui,
N’i ara plus dolant de lui ;
Et s’il le seit, puet-il bien iestre
Qu’il pourchace qui porra iestre
Rois apriés vos, ou vo mecine
Cuert et pourcace bone et fine
Qui, si Diu plait, de vo santé
Prendera manaie et pité.
Sire, bien dites et jou le lo.
Or vos prechiés un tout seul po,
Car grant mestier nos est par foi,
Car poi savomes de la foi
Com cil qui ne l’avons apris.
Renart respont com bien apris :
Sire, or vos fist icil parler
Qui ciel et tiere fist et mer,
Oisiaus et biestes, darains home ;
Sans doute plus noble persone
Ne fist-il pas, ce sevent tuit,
Si prions Diu où no refuit
Sont, qu’il me doist teil chose dire
Dont il soit mius a tout l’empire
Et à nos meme qui ci sons
Et pour itant cascun dirons
La patrenostre et le Credo.
Par foi, dist cascuns, jou le lo.
Singnor, dist Renars, j’ai le reume :
Or entendez cascuns mon teusme,
Car tuit sachiés grant sens i a
· · · · · · · · · · · · · · · · · · · · · · · · ·
Nate au bant nate au leson
Et dele au lit sia.
Ceste parole nos trovons
En moult de lius où nos alons,
Qui senefie povreté
Méime en no maison trové
J’ai-jou sovent et plusors fois.
C’est en nos lis et en dortoirs,
Au mostier et en no chapitre,
En tous les leus où on habitre,
Dedens maison, nes sor les bans,
Que nates gisent de tous sens.
De nate fu Sains Paus viestus
Et Sains Jehans qui or lasus
Veist robe d’or Emperial.
Singnor, ne tenez mie à mal
Se je vos prece povreté,
Jou di pour voir et est prové
Par Evuangiles en no loi
Que cil qui ne portera foi
Au vrai povre, en paradis
N’entrera j’à ne mors ne vis ;
En paradis jà n’enterra
Qui en soi povreté n’ara.
Qui n’amera vrai povre ausi,
Jà Dius de lui n’ara mierchi.
Qui le povre heit et despite,
Soi mime de Diu se respite :
De Diu se respite sans faille
Qui dist, dou povre ne me caille ;
Qui dou povre ne fait amor,
Jà n’ara enviers Diu honor.
Et pour itant que senefie
Povreté ? nate, si vos die
Que nos somes frere Menor
Par povreté, non sans honor.
Par povreté sons Jacopin
Par nate c’avons à voisin.
Nates, singnor, ne haés pas,
Car ens eschius est grans solas.
Sains Martins dont trovons lisant,
Trovoit-on moult sovent gisant,
Dedens nates faisoit son lit
Où il avoit povre delit,
Fors tant que pour Diu le faisoit
Pour çou que il de fi savoit
Que povretés ert li solas
De paradis et li estas.
De paradis sachiés trovons
Que povretés en est li pons,
Ne par aillours aler n’i puet
Nus hom qui jà aler i vuet ;
Par povreté très bien se gart
Coment paser en celui gart
Qui enclos est de feu argant.
Cil n’est de fin or ne d’argant,
De riches pieres ne de dras,
De viandes, de morciaus cras,
De vins d’Auchoirre ne de Biaune,
D’escarlate, de piers de gaune,
De vert de Gant ne de Douai,
Ne des camelins de Cambrai.
De penes de vair n’i a nule,
De gris de martre ne d’estule,
De poupes ne d’escurieus
N’i a nule si curieus.
Tous est li pons fais si estrois
Que nus n’i passe qui destrois
Ne soit avant qu’il l’ait passé.
Moult le covient iestre lassé
Avant qui vingne en cest gardin
Où Cordelier et Jacopin
Venront par vraie povreté :
Car bien sachiés en verité
Leur osteus est si porpendus
Par bans, par sieles sus et jus
De nates et de povretés
Que on puet dire en povretés
Sont cele gent, et vos soiés,
Biau singnor, cascuns avoiiés
De povreté à rechevoir.
Si voirement com jou di voir
Si vos otroit cil Dius s’amour,
Qui nos doinst ci apriés singor
Qui nos tingue en vraie justice ;
Et cascun de nos si s’afice
De prendre home qui sages soit,
Par coi de son sens nos porvoit
A çou qu’il sace et conoise
Le malisse et li griés noise
Qui aujourd’ui va soumeillant
Le pere encontre l’enfant,
Et l’enfant encontre le pere,
Le mère encontre le compere,
Le cousin contre le parent
Voit-on maintenant moult sovent
Entreprendre et cuerre maniere
Coment on puist l’un traire arriere
Pour soi méime avant bouter.
Ne chaut aucuns qui puist vierser
Mais qu’il même demeure droit.
Li pluisour d’ui soit tors ne droit
Veulent lour lingnage avanchier ;
Jou voi sovent d’aucuns princhier
Qui mariages font de gens
A ciaus qui sont de fors parens,
Et font aloianches et fois
Pour autrui metre en defois
Son iretage ou son eschance
Dont à la fois ont meschéance.
De là lour maus hiretemens
Dont autrui deshiretemens
Est, si se dampnent morteilment,
Car tele lois cascun jour ment.
Quiconques soit icil ne cele
Qui autrui tout Dame ou puciele
Chose qui li doie eschéir,
Par teil afaire departir
Le doit Jhesus del iretage
De paradis de haut estage
Où nos tuit là soumons soions.
Prions Diu en cui tous li mons
Doit avoir fiance de bien,
Qui nos doinst singnor terrien
Où vos puissiés tuit vivre en pais,
Les bons tenir et les mauvais
Conviertir à la vraie foi,
Si voirement com jou vorroi
Que vos croire me vausisiés,
Et jou je cuit si bien feriés
Que vos au lonc n’i perdriés jà.
Adont chascuns haut s’escria,
Sire, pour Diu or nos donés
Singnor par si que se només
Home qui vaille, chiert nos los.
Singnor, dist-il, ne sui si sos
Que je jà face tel folie.
Hom sui d’Ordre, ne conois mie
Tous chiaus qui plus prodome sont ;
Mais d’une chose vous soumont,
Alés ensamble à parlement
Par si que cascuns son talent
Die et nome en son avis
Un prodome sage et rasis,
Qui sage de guerre et des lois,
Par coi soit dingnes d’iestre Rois,
Et se je vos puis adrechier,
Ne m’en covient mie priier,
Car tous renbrachiés je veil iestre
A ce conseil et à cel iestre.
Li Rois a dit : par Diu, biau frere,
Moult iestes sages ! Cil bien lerre
Seroit qui ne vos enkerra,
Et jou de moi vos prie jà,
Que del tout je me met en vos,
Que ma parole soit en vos
Et mes povoirs tant com je vit ;
Si n’est pas moult, mais moult petit
En regart com jou ai vescut.
Ceste parole a moult mut
De barons en plours et en larmes.
Que vos diroie ? N’i eut charmes
Qui i valut : un jour ont pris
De faire Roi. Renart a pris
Congié au Roi qui moult li prie
Que pour Diu il ne laissast mie
Qu’il ne revigne à l’Ascension,
Car il veut c’à l’eslexion
Venist et fust de son conseil.
Renars a dit : jou m’apareil
Del tout à faire vo siervisce.
Grans mierchis, frere, et je sans visce
Vous pri pour Diu qu’en vos biens fais
Me metés tuit dès ore mais.
Et jou si fach, biau sire Rois.
Atant s’en part li faus renois,
Et n’ont finé tant que venus
Sont arriere à Freres Menus.
As Jacobins vint la noviele
Cui moult, sachiés, tinrent à biele
Ceste besoingne et ceste afaire.
Si me veil ore à tant taire
De Renars ici orendroit.
A Isengrin revient or droit
Li Contes qui ne faut ne ment,
Si vos dira asés briément
Coment il depuis esploita
Qu’en la lande Renart laissa.
Honour doinst Dius à cui m’apui
Tant que venir peuisse au Pui
Où on corone les biaus dis ;
Mais ne sai où, car tous mesdis
Est coronés en Cort de Roi,
Et je pour çou à ce m’apoi
Que pour itant que coroné
Sont li mesdit, encore né
Ne sont pas cil qui ont corone
A ciaus dounée cui jou done
Honor et pris, sens et louenge.
Dont sont-il mort ? Par foi ce enten-ge,
Car s’il vescuisent, jà Renars
N’euist corone, mais mes ars
Est jà tendus pour lui atraire
Une corone, où maint contraire
Avoit au jour dont coronés
Fu cil qui puis descoronés
Ne fu, anchois est enforchiés
Des plus vaillans, des plus proisiés
Qui soient en tout le Roiaume
Despuis le bon Conte Guillaume
Sour quel piere pris fondement.
Si m’entendés ore coment
Ma matere veil atraper.
Ensi com m’oïstes conter
Des remprosnes Dant Isengrin
Et de Renars le sien voisin,
Qui onques pais n’orent ensamble.
Si vos dirai, si com moi samble,
Com Isengrin se departi,
Mainte contrée puis vierti
Par delà mer et par deçà.
Que vos diroie ? Il asambla
Tous les barons qui Prince furent
Des biestes qui quatre piés urent
De cascune maniere conte
Ou Duch ou Prince mis où Conte
En romanch ou en droit latin,
Pour çou que toutes ne destin
A roumanchier, car ne porroie
Se toutes les or vos nomoie ;
Et nonpourquant nomer covient
Les aucunes, car il m’en tient
Pour çou que jou en ai afaire.
A l’Asne primes me doi traire,
Car c’est commencemens par A,
Aper, aloy, anabula,
Alches, ana et ahuné,
Cil furent primes asamblé.
Bubalus et bouacus,
Caius ausi et camelus,
Cama, calopus et castor
I virent à l’autre cor.
Camelopredus, capra i virent,
Capriolus vel rubrica s’i cotint
Moult noblement aveuch Cato
Cefusa ne se pris à po,
Cervus qui revint d’autre part,
Cimera retint en sa part,
Et autresi cirogrilus
Revint aveuch cuniculus,
Cricetus et corocrotès,
Catapleba revint apriès.
Demma dammul à grant couvine
Ne fisent quant duran ravine
D’une contrée deviers Inde
Daxus elephans lor asinde.
Equum cervum à l’autre lés
R’ont eale hemcire amenés,
Hamtra ermatius ausi
Revirent d’Ierminie iqui.
Erminius moult noblement
Vint d’autre part à moult grant gent.
Furunculus et felena
Furious aveus amena.
Feles finge grant gent avoient,
Glis et gali les conduisoient,
Geneta, guesses n’i faillirent.
Quant ibiches devant iaus virent
Et ibidra, istrix ausi,
Si les ont de cuer conjoï.
Apriès ciaus revint spinosus,
Hyena s’i est embatus
Aveuch le duc Leopardum.
Lamia qu’il tint à barum,
Tint par la main Dant Lazani,
Lins qui venoit aveques li,
Ramenoit tenant licaon,
Lupus qui j’apiel en sornon
Isengrin, venoit en lor route.
Lucius qui home ne doute
Menoit o lui leucroceca,
Uns riches Cuens dans Locusta.
R’avoit ausi biele compaingne
Leoncophana qui n’adaingne
Home nul qui li puisse vivre.
Lepus, lachtapon lui deduire
Menoit o lui à grant harnas
Lucer et lucer ne fu gas,
Com chevauchoient noblement.
Mulus monache ros granment
Ne virent mie à mains de rote.
Molosus sa maisnie toute
R’avoient pasé le grant flueve ;
Maurice Morion recuevre
Mancitora de sa maisnie,
Mus que li ber n’oblia mie,
Mammonetus le duch dou Nil,
Migale qui avoit son fil
Revenoit tro à grant beubant.
Murilegus tout ausimant
Venoit o li dant mustela,
Mus et earum genera
R’avoient le camp empli
Que ne omon ne peut o li
Chevauchier ne fust onager.
Onnocentaurus tout l’iver
Avoit mis derrier, ce dist-on,
Onrix oraflus, ce dist-on,
Onvis amenoient o eus
Pardus panthera mie seus
Ne venoient quant parader
Pegasus pilosus en l’er
Fisent voler grande porriere.
Pathio putorius maniere
Eurent bien de faire malisse.
Pirorolus par son grant malisse
Sailloit de toutes pars isniel
Raugiver simia moult biel
Entre tous se sorent avoir.
Tygris, se je dire le voir,
D’orguel passoit tous le plus fors,
Taurus li bos revint si fors
Que tous les rens firent ploiier :
Taurus indie fu si fier
Que nus des autres ne le pase,
Traméi qui avoit grant mase
De gent, revint de l’autre part.
Tragelaphus qui bien sa part
Tenoit aveuch trogoditré,
Talpa sour le destrier monté
Venoit aveuch unicornis,
Ursus vesoutés et urnis
Demandoient moult Dant Renart.
Varius venoit d’autre part
Soi moult demenant à Zibo :
Zubrones tenoit à moult po
Que ses chevaus dont n’estantoit
Et pour itant derrains venoit
De tous chiaus que je vos ai dit.
Quant tuit se furent averit
A Malrepair où li Rois ert,
Cascuns de ces à lui s’apert
Devant lui où il se gisoit
Moult malades, si qu’il paroit
A son iestre et à son viaire.
Devant parla cil qui fu maire
De cele biele compaingnie.
Sire, cil Dius qui en Marie
Prist car et sanc, umanité,
Vos doinst et preite si santé
Come vorroient vostre ami !
Sire Lupart, autel vos di,
Dist li Rois, et puis si se teut.
Apriès çou plus tost que il peut
Cascuns le salua isniel
Et dissent, sire, pas moult biel
Ne nos est de vostre malage.
Singnor, dist-il, ice bien sa-ge ;
Grans merchis, et vos avés droit,
Car ne cui mie se savoit
Cascuns de vos com j’ai grant paine
Aucune fois en mon demaine
Pour vos à droit tous maintenir,
Encore ça avant souvenir
Vos porroit bien, se jou de vos
Faisoie chose que estous,
Mauvais ne faus vos doinst faire,
Et pour itant vos covient faire
Un autre Roi, car jou me muir,
Si vos lairai et os et cuir
Sans arme, qui ne vos pora
Pas justichier quant tans sera,
Des outrages ne des malfais,
Et pour itant uns Rois soit fait
Qui vos sace à çou maintenir
Que vos savés, car moi morir
Covient à ceste Pentecoste :
Coi qu’il me griet ne cui qu’il coste,
Ne m’en puet nus doner confort
Que jou ne me rende à vos mort.
Quant chascuns le Roi entendi,
Si lour a le cuer atenri
Et soupirent moult en parfont.
Li auquant merveille duel font ;
Cil qui l’amoient durement
Disent : sire, or va malement
A vos amis et au roiaume :
Aisil atendoumes pour baume,
Fiel destempré arons pour miel :
Coment c’avingne desou ciel
Ne porroit-on trover vo per.
Et si plaingnoient le bon ber
Dant Noble le Lion norois
Tant qu’en la fin fu lor corois
Avisés que li jours dou tieume
Fu venus ; e-me-vos Dame Ierme
Feme Renars qui à Court vint,
Entre ses bras Renardiel tint
Qui petis ert et jovenchiaus.
De son tierme fu auques biaus :
Li mere par la main l’a pris,
Devant le Roi com bien apris
Vinrent ensamble et le saluent :
Sire Rois, desormais vos muent
Coulours et chieres, Dieu mierchi,
A vos soumes venu ichi
Pour faire tout vostre talent,
Car il nos est or autrement,
Dieu mierchi, que il ne soloit.
Coment, Dame, et que ce doit
Que Renars n’est venus à Court ?
Sire, dist-ele, un habit court
A afublé quant oï dire
Vostre torment, vostre martire ;
Coment chascun covient morir,
Grans perius est de soi viertir
Ens el siecle, qui veut avoir
En l’autre siecle son manoir :
Et pour itant vés ci son fil
A faire del tout vo plaisir.
Biaus sire chiers, dist Ysengrins,
Entendés moi, car maint hustins
Ai puis éut que ne vis mais
Vos que jou voi or si mauvais,
Que bien est drois que je vos die
Le grand orguel et l’estoutie
Que Renars me dist au partir
De lui, ne vos en cuit mentir.
Lors li conta con faitement
Ot primes tenu parlement
De l’estoile dont j’ai conté,
Coment se furent arouté
Quant il dedens le chep chaï
Et il de là le departi
Par son sens et par son engien,
Et del vilain qui en la fin
En eut teil leuier com j’ai dit,
Et coment à darrain li dit
C’à Court venist savoir coment
On se maintin, se du nient
Ooit parler de cele estoile
Dont jou devant ai fait memoire.
Jou, biau sire, m’en vingh ici
Et vos contai trestout isi
Com vos oïstes pour savoir
De toutes ces choses le voir,
Dont vos moi comandastes lors
Que jou n’euise nul depors
Qu’à tous chiaus qui de vos tenoient
Venise tost par coi porroient
Iestre ci au jour qu’il i sont.
Jou m’atournai dont pluisor pont
Et mainte planche puis passai
Dont je vos di que j’encontrai
Renart qui s’ert partis des chiens
Où le chaçoient, mais liiens
Ne le tinrent, car il venoit
Tous delivres. Quant il me voit
Vier moi en vint, et jou viers lui,
Là li contai la vostre anui,
Coment vos mandiés tous vos homes
A darenier furent nos soumes,
Qu’il me dist que moult ere sages
Et que il savoit avantages
Par coi, se je le voloi croire
Et jou ne me voloi recroire,
Que il encor me feroit Roi,
Dont jou pau n’eu or de desroi,
Car jou li dis : pour Diu, Renart,
Ceste detenez en vo part ;
Cure n’avons de vos promesses,
Dont me laidi et fu enesses
Que me préisse à ses templiers,
Dont l’ai ahiers par les illiers
Et il moi par mes ospitaus.
Ha ! Ysengrin, con tu ies faus !
Dist li Rois, com t’as grant envie
Sour ce chaitif où jou t’envie
Que tu le me voises pour huec !
Dame Erme dist qui ert illuec :
Ha ! sire Rois, vostre mierchi,
Sachiés que se mesire ert chi,
Isengrin dist ore teil chose
Qui li fust aques bien enclose
Dedens son cuer ains qu’il déist
Chose nule qui despleuist
A lui ne à home des siens.
Dame, dame, de çou est niens,
Li vostre afaire petit vaut,
Dist Ysengrins ; à pau s’en faut
De vostre chief les lens ne conte :
Que vos aiiés maloite honte
Quant vos encor venistes hui !
De cesti eut li Rois anui
Et dist : coment, sire Isengrin,
Volés-vos ci endroit hustin
Movoir en la moie présence ?
Jou vos ai dit en audience
Que vos Renart m’alés querant,
Et vos ci alés laidengant
Une Dame de haut linage,
Sachiés ne vos tieng mie à sage.
Alés-vos où je vos ai dit,
N’i metés mie contredit.
Sire, dist-il, jou n’irai pas,
Un autre i envoiiés le pas
Ou les galos ou l’ambléure,
Car jou mie ne l’aséure
De quele eure que soiiés mors.
Ha ! dist li Rois, come t’ies amors
De mauvestié et outrageus !
Sire Lupart, n’est mie geus,
A vos me covient or doloir
De teil chose. S’en mon povoir
Fusse ausi bien com jou fui jà,
Mie si hardis ne fust jà
Isengrins que il çou déiste.
Leopardons de çou sourist
Et se tourna del autre part.
Li Rois vit bien que de Renart
N’aroit mie par nul d’iaus deus,
Le Tygre vit qui fu tous seus
Et s’apuioit sour son esponde.
Sire Tygres, à vos m’asconde
Que vos moi vengiés d’Isengrin :
Teil fois ai véu du hustin
Euise tost vengance éue.
Li Tygre de là se remue
Et dist : jà mal n’iere dou vif
Pour mort home, car son juïf
Vorroit bien del tout pourchacier.
Que vos diroie ? Nus vengier
Ne veut le Roi pour çou qu’il virent
Que la mort qui tous chiaus enivrent
Cui elle veut avironer,
Avoit del tout isi rover
A ses bediaus coreusement
Le Roi, qu’il seurent vraiement
Que de lui fu vengance prise ;
Mais d’Isengrin ne fu emprise,
Que chascuns de grans ne doutast
Pour tant que il ne destorbast
Que le Roiaume ne pierdist
Par lui seul se on l’esléist,
Et pour itant isi avint
Que l’Ireçons au Roi en vint
Et li dist : Sire, grant merveille
Ai en mon cuer, mais sa pareille
N’eui, quant tant avés tenu
Tiere quant ainc n’avés éu
Un ami qui à vo besoing
A vos honours de vos ait soing,
Que il pour vos au besoing face
Chose que tous li mondes sache.
Ha ! dist li Rois, biaus dous amis,
Teus est li siecle, à mon avis,
Que puis c’on a de l’oume afaire,
Pau troueve amis et moult contraire.
Quant jou fui en prosperité
Cascuns me tenoit en chierté ;
Quant jou fui en parfaite honor,
Cascuns me tenoit à singnor.
Quant jou fui en ma vive forche
Nus devant moi n’aloit à orche
Que maintenant ne fust vengiés ;
Mais or sui mis si entre piés
De maladie et de mehaing,
Que chascuns de moi a desdaing
Que li comande rien à faire
Qui rien li torne à contraire.
Sire Rois, dist li Hireçons,
Poi ai éu de compaingnons ;
Se jou le véoie entre piés
Par coi jou vise que nus griés
Li avenist, que jou n’aroie
Prise vengance : et toutevoie
Pour tant sans plus que por honor
Que jou voi c’on fait mon singnor,
Vengance en iert prise à itant.
Viers Isengnin s’en vient poignant
Tous hirechiés, les dens ovri,
Et Isengrins ne meschoisi ;
Ahierdre le cuide isniel,
Mais les espines el musiel
Que ferirent maloitement,
Si que cascuns en li se prent,
Que li groins en fu tous porpris.
Li Moutons vint tous ademis,
Si le hurta en la poitrine
Que si dur l’abat sour l’eschine
C’à poi qu’il lués ne l’a crevé.
Là endroit l’ont si atorné,
Qu’il crie et brait si coreument
Que bien cuidoient vraiement
Tuit li baron qu’il l’ochéisent.
De maintenant de çou nul disent :
Ha ! Tibelin, Dans Ireçons,
Soufrés vos, bien n’en avons
Que mesire est bien vengiés.
Atant Ysengrins sour ses piés
Est relevés quant laisié l’ont :
Apriès tost entour lui se sont
Asamblé la menue mains,
Lor li disent, çou fu dou mains,
Dant Ysengrin, grant tort avés
De çou que devant nos avés
Nostre Roi isi aveillié
C’onques ne vosistes plain pié
Aler de tiere pour son dit :
Trop vos féiste grant despit,
Alés tost là où il comande.
Quant Ysengrins ot c’on li mande
Et dist qu’il voise pour Renart,
Il dist que jà Dius n’euist part
A s’ame, se il le savoit.
A Saint Ferri, sire, tout droit,
Dist Dame Hierme, le troverés.
Atant Ysengrins est montés
Qui contredit n’i osa metre,
Ainch ne fina ne val ne tiertre,
Si vint au chastiel que j’ai dist.
A Jacobins tant Renart quist
Qu’il le trova et li dist tant
C’à Malrepair li Cours l’atant.
Qui dont véist le grant orguel
Coment Renars clungnoit de l’uel,
Et dist : biau frere, soverain
Ai ci endroit, g’irai demain
Se jou congié puis jà avoir ;
Sire Isengrin, car dites voir,
A coi avés-vos le musiel
Si piertruisié que jà si biel
L’ai véu par ta mainte fois.
Frere Renart, tous jors renois
Serés en l’Ordene et dehors.
Ha ! Isengrin, com ies amors
A vilains fais et à mais dis !
Atant de lui s’est departis
Et est venus à son Prieus.
Lors li conta coment li Leus
Venoit pour lui de par le Roi.
Li Prieus dist : or certes, coi !
Frere Renart, en irés-vos ?
Sire, dist-il, et moi et vos
Irons-nos, et que feriens dont ?
Mais il covient que tout le mont
Hait hom qui die c’onques mais
Fuse veus en l’Ordene mais
Fors puis cinc jours et un demi,
Car s’on savoit, itant vos di,
C’à l’autre fois euisse esté
A la Court, j’en aroi viuté
A souffrir, si seroit raisons,
Car n’i eut nul de compaingnons
Qui de rien nule convenist,
Tant bien esgarder i seuist
Moi ne mes dis, car pour Renart
Fui auques et mis en sa part
Raisons par coi je fusse Rois ;
Et s’ensi ert, fust tors ou drois,
Seingnour seriés de tout le mont ;
Renart, Renart, dou val où mont
Se doit cascuns metre vias,
Alons-nos ent le petit pas
Tout bielement et souavet :
Tant m’as apris dou Renardet
Puis que te vi premierement,
Que se verités ne me ment,
Jou te cuit coroner à Roi.
Atant se misent entr’aus doi,
Si n’ont finé tant que venu
Sont où li Rois ert, et si dru
Droitement vinrent en la chambre
Qui toute estoit ouvrée à l’ambre,
Où li huisier les laissent ens.
Devant le Roi vinrent presens
Li Prious et frere Renars.
Sire, cil Dius qui fist trois pars
De soi méime, il vos doinst faire
Chose en bien qui à la…[3]
Seingnor, dist li Rois, vos aiés
Bone aventure et bien vingniés !
Frere Renart, li Rois a dit,
Coment vos voi-jou or viestit ?
A loi de prince n’es çou mie.
Ha ! sire Dius me benéie !
En non de moi vos dites voir ;
Pour Diu faites moi savoir
Vostre santé coment vos est.
Sire Renars, pau vous en est,
Dist li Rois, à çou que jou voi.
Ha ! voi ! sire Rois, vos pour coi
Avés çou dit, quant pour vos seul
A mes cuers éu si fait deul
Com vous vés que jou la viesti :
Haimi ! sire, por Diu mierchi,
Dist li Prieus, se vos saviés
Bien r’a cinc jours que forvoiiés
A esté Renart nostre frere,
Car ne cuit c’onques feme mere
Amast onques tant tenrement
Enfans, se dou samblans ne ment,
Car hui cinc jours a que viestimes
Frere Renart, mais ne véimes
C’onques puis mais dormist del uel,
Fors Diu proiier que vos acuel,
Que de vos ara sa pitié
Quant nos tuit soumes avoiié
Pour vos priier à Diu le grant
Que vos puisiés avoir garant
Quant l’arme partira dou cors.
Renart, dist li Rois, mis confors
Ne me puet tenser, je ne non.
Sire, dist-il, se Jhesus non
De mort ne vos puet garantir,
Et pour itant que je morir
Ne vos porroie as iex véoir
Ai-jou fait ce que povés voir.
Or tost, seingnour, alés ensamble,
Faites un Roi teil qu’il vos samble
Qui boins soit à vostre lingnie,
Car ains que muire, ensingnie
Veil que soit la courone d’or,
Pour çou je coumence au cor
Que prime vois je doi avoir,
Et pour itant je fach mon hoir
Del Hireçon qui m’a vengié.
Sour tous les autres ai jugié
Que mius doit corone porter
Que nus de vos, ce puis prover
Par droiture et par sairement,
Et pour itant vrai jugement
En faites tost, jel’ vos recuier.
Renars a dit : Sire, priier
Vos veil pour Diu, : ançois me dites,
Car mie ne doi aler cuites
Que nel’ sace au paraler,
Pour coi l’Ireçon tant amer
Soliiés, et je mot n’en savoie.
Sire Renart, alés vos voie,
Si metés ces barons ensamble,
Bien vos diront, si com moi samble,
L’ocoison et la verité
Pour coi jou ai ensi parlé.
Ce fu droit à l’Asencion
Qu’il avoit grant dissencion
A Malrepair ens el Palès :
Moult i a de bons, de malvès,
Qui chascun voroit apeser.
Renars qui miu savoit parler,
Vint droit au Roi et li a dit :
Sire, à moi un tout seul petit
Entendés pour Diu je le lo,
Voirs est coument c’un seul po
Et jou mais sui mius[4] et chenus.
En une Ordene me sui rendus
Pour moi sauver à bones gens,
Vées ci mon fil qui biaus et gens
Est, desormais jou relenquis
Cest siecle qui est ors et vis ;
A çou que voi ne puis savoir
C’apriès vos ne convingne avoir
Roi malostru et deshonieste.
Sire Renars, de çou n’ai fieste,
Mais alés tost où je vos di.
Atant Renars empiés sailli
Et jeta jus l’abit des Freres,
Si demoura el sien comperes ;
A Renardiel c’avés oït
En haut parla et si a dit :
Seingnour baron, venés avant,
Faire nos estuet le coumant
A mon seingnor c’oï avés.
Nient nul d’iaus ne soit tornés
Deviers lui et ont entendu
A la parole c’ont éu
Dou Roi et de lui ensiment.
Ne puis dire con faitement
Chascuns d’iaus tous isi raisna,
Mais en la fin isi ala
Qu’il troverent selonc droiture
Que pour itant del la laidure
Que Isengrins au Roi paru,
Fu forjugiés c’onques ne fu
A exlection que féisent,
Et li autre de coumun disent
Que pour l’ounor à l’Ireçon,
A Thibelin le blanc mouton
Qu’il orent fait del vengement
Au Roi isi faitierement,
Com vos devant avés oï,
Cil doi eslisent d’esjoï
Cuer un prodome à iestre Rois,
Mais nus d’iaus deus en bone fois
Ne povoient-il coroner.
Cesti chose ont fait saieler
Et pendirent tout lour saiaus,
Dont fu li Hireçons moult biaus,
Et li Moutons à l’autre lés.
Cil doi tinrent moult fort lour lés,
Ensamble sont mis à conseil.
L’Ireçons dit : Je m’esmerveil,
Mouton, de cui veus faire Roi,
Mais tu méismes jou par foi
D’Isengrin le tien grant ami.
Coment Diable ! cil respondi,
Es-çou à chiertes ? Nenil voir,
Mais tu primes en di le voir,
Cui te samble le mius à prendre ?
De çou ne sui-jou à aprendre,
Fait li Moutons, je prent Capra.
Par le Sint Diu haut Roi chi a,
Dist l’Ireçons, voir dist qui dist,
Fox est li hom qui soi maudist
Tant com beniçon puist avoir.
Ice puet-on auques savoir
Et pour çou dist-on ces habés,
Mouton ex re nomen habes :
Moutons ies et Moutons seras
Tous les jours mais que tu vivras.
Et or me di, va, Dant Mouton,
Pour quel pourfit, pour quel raison
As or nomé Capra pour Roi.
Quel sens a ore dedens soi
Pour coi tu l’aies or nomé ?
Cuides-me-tu à çou mené,
Se sui petis et non poissans,
Que jou doi ore à tes talans
Acorder pour çou ? Naie voir,
Ne cuides mie grant savoir
En Capra se sa barbe est longe.
Teus a barbe, n’est pas mençoigne,
Qui en lui n’a, ne doutes mie,
Bien ne valour ne sens demie :
Car se barbes le sens en usent,
Bouch et Chievres moult sage fusent.
Mais ne vos vaut, sire Mouton,
Ne chachiés mie tout vo bon ;
Anchois volés tout trebuchier
Et le courone avillier,
Pour çou que Capra vous atient,
Volés tout le mont metre à nient.
Només un autre, biau dou sire,
Dist li Moutons qui eut grant ire
De çou c’on li a contredit.
L’Ireçons apriès a dit :
Je lo que Renars nos maintingne,
Car il est voirs à qui qu’il tingne,
N’a cil povoir qu’il li eschape,
Tant ait tapith ne corte chape,
Que bien n’ait sa raison de lui,
Et pour itant m’acort à lui,
Jou ne sai que tu en diras.
Coment Diable est-çou or gas,
Sire Hireçons, que dit avés ?
Jà savés-vos Renart provés
Est de mordre et de larecin.
Renars n’eut onques jour voisin
Ne cunchias ou baillis mal ;
Renart ne seit mie mains mal
A tuit cil qui ci sont venu,
Chaitis Mouton, va, que dis-tu ?
S’il seit dou mal, il seit dou bien :
Ainch ne vis home terriien
Qui grant honour à maintenir
Euist que s’il ne seut partir
Le bien dou mal qui vausist mie
En singnorage une alie ;
Et pour çou di, sire Mouton,
C’avoir covient de ci en son
Et bien et mal, jà ne doutés
Rois, Dus et Contes et Chasés :
Pour çou conoissent les malvais
Et les bons pour tenir en pais,
Se Renars vieut iestre preudons,
Biau sire chiers, car le preudons
Nul jou n’i voi, à mon avis
Qui le vaille, car en lor vis
Fist-on mon singnor vilonie,
Ainch n’i ot home qui demie
D’aïe li vosist dont faire
Fors moi tout seul qui el viaire
Me pris de celui qui çou fist,
Et tu quant au desous se mist
Pour la haïne viés c’avoies,
Le hurtas si c’ounor avoies
De çou, et aras tous jours mais
Entre bons et entre malvais.
Si me consent, veilles ou non,
Ma volenté, sire Hireçon,
Et jou veil bien à vos avoir
Amour, car trop i a savoir.
Sages iestes et apensés,
Damages iert quant vos morrés,
Et tout ausi est-il, sachiés
Que vos m’estes plus enforchiés
De cors, de menbres et de avoirs,
Par coi fust plus grans vos povoir.
Alons au Roi et ci nomons
No Roi que nos ci fait avons.
Bien as dit, l’Ireçons respont,
Jou le ferai, saches, del mont
Singnor et maistre du Royaume.
Atant n’euist-on dit grant saume
Quant sont venut devant le Roi
Où nus ne mena grant desroi,
Car n’i eut nul, au dire voir,
Qui n’atendist bien à avoir
Plus de bien c’on ne li donast,
Et pour itant ne cuit sonast
Un seul mot tous li plus vaillans.
Atant s’asisent desour bans
Et haut et bas et sus et jus.
L’Ireçons en est venus,
O lui le Mouton, et a dit :
Sire Rois, à nos un petit
Entendés par amendement,
Li Moutons et jou ansiment
A només par coumun asens
Selonc le nostre povre sens,
De nos barons Roi esléu,
Pour coi nos avons bien véu
Que chascuns i a mis sa foi,
Son saiiel et le sien otroi
Que çou que nos doi avons fait
Iert bien tenut sans faire plait,
Et encore vos recuerons
Parmi vos fois isi que sons,
Que tuit dites à une vois,
Singnor, c’est verités et voirs ;
Et se nus de çou est encontre,
Si se mete avant à l’encontre
Anchois que nos nomons nului :
Car ensi le disons nos dui.
Dont dissent tuit à moult haut ton,
Sire Hireçon, vos, Dant Mouton,
Dites del tout à vo devis,
Car nos sairemens avons mis
Au tenir, si le tenrons tuit.
N’i ara home qui refuit
I mete jà, de çou fis soit.
Sire Prieus ne vos avoit,
Dist l’Ireçons, venés avant,
Nos vos prions ici devant
Iaus tous que vos nos comendés
Nostre Roi et le présentés
Al honour Diu et à no preu.
Il respondi, Dius i ait preu,
Et jou ansiment le ferai
Mais que mesire de cuer vrai
Et li baron m’en prient tuit,
Et il si fisent ; à grant bruit
L’en ont priiet moult bonement,
Dont ne demoura pas granment
Quant li Prieus seut et oï
Que Renart eurent aroii
Et esléu sour tous à Roi,
Pour çou en lui n’eut pas desroi
Que l’Ireçons ne li contast
La raison et bien ne porvast
Par fin droit et par decretales
Que de son droit sans choses males
Il en portoit la beniçon ;
Et li autre pour l’ochoison
Qu’il devant aus virent laidir
Lour Roi, cil qui mauls deuist sir
Le soufrirent et biel lor fu,
Par samblant icil ont pierdu
Le non de Roi et le baillie.
Ceste colours, ne doutés mie,
Douna Renart le non de Roi,
Car il ne fu pas au desroi,
Anchois ert mis o bone gens
Qui a cesti chi li mist sens
A coi il fu li plus sachans,
Li plus preus et li plus vaillans,
Li mius amés, li plus soutius
De ses besoingnes metre au mius.
Quant li Prious eut escouté,
Diu a de cuer moult encliné
Del honor que il lor venoit,
Car riche matere avoit :
Pour comender Renart lor frere
En haut monta com Emperere ;
Or oiiés coment il parla
Li Jacopins, com il viersa
De plain pot en petit vaissiel.
Singnor, dist-il, ne m’est pas biel
Se ne di chose qui atourt
Del tout al honor de la Court ;
Mais ensi est, au dire voir,
De tous ne puet-on grés avoir :
Si a raison et tout le sevent,
Car li bien fait les mauvais levent
Hors de la Court de Paradis.
Et tout ausi, ce m’est avis,
Doit-il faire ici aval ;
Mais nos trovons dou mont el val,
Si met-on bien par covoitise
Et li ouevre souvent atisse
L’oume à çou qu’il faut et vient
A teil chose qu’il ne covient,
Anchois pierdent bien l’un pour l’autre.
Soventes fois il n’i a autre
Que proiiés al conmencement
Le verai Roi omnipotent
Qu’il me doinst dire itel parole
Par coi cascuns oit teille escole
Dont il soit à çou escolés
Qu’il bien face en coste, en lés,
Devant, derier, desus, de jus.
Sire Renart, il n’i a plus,
Venés avant, gentius persone,
Si rechevez ceste courone
De par l’Ireçon vostre ami
Et le Mouton qui autresi
Vos tien à prodome et loial,
Et celui qui de cuer roial
Avés siervi vostre singnour :
Au par aler avés l’ounor,
Car vos coument l’avés siervi
En sa forche, à son ami
Vos puet trover en sa povierte,
Car de bon cuer à force ouverte
Recheuistes en vos priieres
Sa santé d’arme, ne cui manieres
Jou sui pleges au jugement
Que Dius de lui parfaitement
Ara manaie et pitié,
Mais qu’il en gré prende congié
Au mauvais siecle ci endroit
Où nus ne puet avoir nul droit.
Ce vit-il bien Isengrins,
Devant lui veut sachier les crins
Dame Ermengart de Malpietruis,
Et pour itant en decrès truis
Que li baron icestui seurent,
Et dont le blasme au Roi ne veurent
Amender, privé sont et hors
Que nus d’iaus mais n’iere amors
A çou que puist mais iestre Rois,
Si com trovons où cors de lois.
Mais Renart, si com dit avons,
Qui en la Court n’eut ses talons
Quant li despis et li outrages
De ciaus cui jou ne tieng à sages
Fu fais, enporte la courone,
Non pas sans plus, çou est la some,
Dou tout pour çou, mais pour itant
C’on le trueve le plus sachant
De toutes choses où il neut,
Nus autres dechevoir ne peut,
Ne il onques choses ne prist
Que il a chief bien ne méist,
Et teus hom doit porter corone,
Pour coi sachiés ses drois li done,
Et jou si fach et l’Irecons
Méisme, autresi li Moutons.
Si vos dreciés et le prendés
Com vo singnor et couronés.
Lors quant li baron entendirent
Le Prieus, moult fort s’esjoïrent,
Li Rois primes et si ami,
N’i eut nul empiés ne sali
Moult baudement, ne fu li Rois.
Renart prisent qui fu revois
Par samblant de l’eslection.
Coment, fait-il, singnor baron,
Cuidiés-vos que jou à çou bé
Que jà me voie couronné
Tant com mesire soit en vie ?
Ciertes jou n’ai soing ne envie
De corone fors de mon Vesque.
Et coment, Dant Renart, dont qu’es-ce,
Dist li Lupars, refusés-vos
Le corone ? Lupart o nos
S’ensi est que ne s’i acort
Mesire cui veil c’on recort
L’elexion se ne li plaist.
Li Rois l’ot, de çou ne se taist,
Anchois respont alains qu’il pot :
Renart, Renart, n’i a c’un mot.
Tant entent et ai entendu
Que de vo droit avés eu
L’otroi de Roi, et jou le veil
Sauf çou sans plus que jou acuel
Que pour m’amour prodom soiiés.
Sire, dist Renart, ne songniés.
Atant saillent qui ains peut mius
Li plus vaillant, ne fu pas gius,
Virent à lui, haut l’ont levé
Et au moustier l’en ont porté ;
Devant les Sains jurer le font
Que la corone sans descont
A son povoir tous jours tenra.
Isi Renart le fiancha
Et encor plus se on vossist.
De maintenant où chief li mist
Leopardus et Isengrins
La corone, mais que li Lins
Fu li tiers pour çou qu’il véoit
Plus cler que nus autres qui soit.
En çou qui en est avenu
Là eut grant priese et grant huhu,
Si que li fort et li menbru
I ont, sachiés, lour liu tenu :
Li feble et li non poissant
Aloient entr’iaus bas muchant
Au mius qu’il porent. L’Ireçons
Qui le Roi fist, des aguillons
Point chà et là comunement
Pour çou qu’il veut plus aisement
Venir au Roi pour lui mostrer
Et soi valoir et hounorer
Com cil qu’il l’eut bien desiervi ;
Mais li pluisor l’ont dessiervi,
Car il sont plaint qu’il les coisoit.
Li Rois a dit, à mal çou soit,
Metés le hors d’entre vos tous,
N’ai cure que nus espinous
Soit entre nos, ne de Mouton
Qui soit niches, simples, je non
N’en ai que faire entour moi,
Car en tel gent n’a fors anoi.
Mouton sont adiés à aprendre,
Pour çou n’en veil-je nus prendre
Entour moi, ne d’oume qui poingne
Ne die chose qui ne m’oingne
Par ses paroles et en fait
Par coi m’amour adiés atrait,
Et jou de cuer amer le veil.
Or s’en gart bien, que se me dueil
D’ome que j’aie, au par aler
De moi ne se porra louer.
Et pour tant n’aim-jou le Mouton
Ne les puiens Dant l’Ireçon ;
Metés le hors de mon ostel.
De maintenant il n’i ot tel
Qu’Isengrins vint à Tibelin,
Par la geule tout entraïn
De la sale l’a mis tost hors.
Li Hireçons, fust drois ne tors,
Au Lion en est revenus
Qui ert malades et confus :
Sire, dist-il, à vous me plaing
Del injure et dou mehaing
De Renart cui j’avoi fait Roi,
Or m’a fait si vilain desroi
Que de sa Court nos a bani.
Amis, dist-il, ce poise mi,
Ne cuidiés mie en fol cuidier
Qu’il soit hui de çou qu’il fu hier :
N’est hui mie çou qu’il soloit,
Renars seit bien que faire doit.
D’ore en avant jou ne me doi
Meller de chose fors de moi,
Car en moi ai asés à faire
Se jou voloie tout retraire
De çou c’à moi méime afiert.
Et cil qui à autrui aquiert
Cose dont soi mete au desous,
N’est mie sages com vos dous
N’iestes à çou que Renars dist.
Atant li contes ci nos dist
Que li jours de la Pentecoste
Fu lendemain, dont cascuns jouste
Delés le Roi Renart se tint :
Chascuns l’encline, cascuns vint
A lui et li portoit offrande.
Tuit li donent, cascuns demande,
Sire, volés-vos nule rien ?
Ne cuit nul home terrien
Dounast-on onques tant juiaus
Dont nul ne vot, mais Renardiaus
Ses fius et sa feme Emengars
Tous les rechiut ; mais Rois Renars
Les merchioit del grant honour
Qu’il son fil fisent celui jour.
Dont ne demeure que li Roi
A fait bailliu pour tors et drois
Faire, quant il mius li plaira,
Li Lupars qui grant povoir a :
Cil fu maistres de son ostel.
Li Thigres apriès n’i ot tel,
Estoit huisiers et chambrelens.
Li Oliphans qui estoit lens,
Fu à la porte pour ovrir
As grans fiestes as Cours tenir.
Li Bugles qui moult estoit fors,
Refu huisiers pour çou que hors
Demourassent cil qui à Court
N’aportent chose qui atourt
A la maisnie charité.
Boutillier furent apresté
Pirolus et Dant Simia ;
Raugiver mesire Talpa
Furent maistre de la cuisine.
Ursus d’autre part le racline
Qu’il fu li maistre panetiers ;
Taurus d’autre part mesagiers
Furent entre lui et Aper.
Que vos diroie ? En nés un ver
Ne truis que ne fust remués
De toutes choses li ostés
Dou Roi Lion et dou Renart.
Quant çou fu fait, si fu moult tart
Ains que les taules fusent mises,
Dont n’i ot fait longes devises,
C’apriès tost que li Rois s’asist,
Apriès li autre nus n’i mist
Longes que tuit sisent au doit.
Isengrins fu li plus cortois ;
Devant le Roi ala siervir.
Qui dont véist siergans venir
A grant plenté porter viande,
De toutes pars cuit qu’ele espande,
Si grant plenté en i avoit.
Li Prieus au desus séoit
Del Roi et dist : Biau sire chiers,
Outrages est quant si pleniers
Sont cil platiel, ces escuieles.
Li Rois a dit, c’est grans mierveilles,
Sire Prieus, que jà pensés
Que mes osteus soit remués :
Lonc tans a que j’ai Court tenue,
Onques n’avint qu’ele si nue
Fust que asés on i mangast
Qui conquest la crust ne paiast
D’asé mengier ne d’asés boire
Ne verron mon ostel recroire.
De cesti fu Renart cortois
Et li Prieus fel et renois
Quant de çou reprist le pourveur
Qui à la Court faisoit l’ouneur.
Asés burent, asés mangierent,
Tant que li amosnier criierent,
Par coi on osta les hanas.
Les napes trairent, ne fu gas
Que on les tables jeta jus.
Dant Timers est atant venus
Qui la harpe tint en ses mains
Dont il ne fist pas com vilains,
Car une note a comenchie
Qui de tous fu adont prisie,
Mais que si haut l’enconmença,
Car à darrains les estouna,
Par coi sa note ne pleut mie
Au Lion cui la mors aigrie,
Qui pour Diu prie c’on le port
A moustier pour avoir deport,
Et on si fist. Atant briément
De cuer devot et bonement
Dist-on vigiles là endroit.
Isi avint c’à Court venoit
Cascuns au soir à Court souper,
Quant il oïrent Dant Thiber
Et l’Ireçon que haut crioient
Pour Diu que il de fain moroient,
Aucun pau lours là féist-on
De bien à lui et al Mouton.
Ne fu qui à aus entende,
Anchois s’en vont, mais n’est qu’entende
A nape metre pour souper,
Car li Rois ert alé ourer
Au moustier ; nus ne souperoit
C’ont entendu illuech endroit,
Car n’avoit gaires c’on menja.
Dist un fol grars, on me rouva
Que jou à tous bien le déise,
Et jou si fas, car meféise
Se jou longement i metoie.
Atant chascuns tourne sa voie
Et sont à lour osteus venus.
Que vos diroie ? Il n’i ot plus,
Li jours passa et la nuit vint,
Que lendemain morir covint.
Si com orgius envie avoient
Qui le bons à morir convoient,
Envie, orgius et Renardie
Les bons à morir nos avie ;
Renardie, envie et orgius
Les maus retient, s’ochit le mius,
Et tout isi avint adont,
Que le Liuon qui estoit dont
La plus noble bieste qui fust,
Covint morir et metre en fust
Et entierer au dire voir,
Que onques puis pour nul avoir,
Pour parens ne pour nul ami
Ne peut de mort avoir mierci.
Ensi avint, ensi fina
Nobles li Rois, ne doutés jà
Et par la malise à celui
Dont je vos ai conté je hui,
Coment de louch puis à sa chief
L’iauve dont est venus à chief,
Que par lui, que par aventure,
Dont cil orent mal aventure
Qui traitierent…[5]
Dont il avint qu’el coperent
Tout le premier c’avés oït.
Maint autre ausi ains que j’ai dit
Le compererent ansiment,
Se li drois conte ne nos ment
Que j’ai traitié et traiterai.
Ains que jou fine conterai
Une partie de son rengne,
Ains que jou sache sus mon regne.