Autres balades (Christine de Pisan)/XIV

Christine de Pisan

Juno me het et meseùr me nuit

Autres balades, Texte établi par Maurice Roy, Firmin Didot, 1886 (p. 223-224).

XIV

Viegne Pallas, la deesse honnourable,
Moy conforter en ma dure destresce,
Ou mon anui et peine intollerable
Mettront a fin ma vie en grant asprece.^[1]
Car Fortune me cuert sure
Qui tout mon bien destruit, rompt et deveure,
Et pou d’espoir me destraint jour et nuit ;
Juno me het et meseür me nuit.

Ne je ne truis nul confort secourable
A mon meschief, ainçois quant je me drece
Vers quelque part ou voye réparable
Deusse trouver, tout le rebours m’adrece,^[2]
Et en vain peine et labeure ;
Car Fortune despece tout en l’eure
Quanque j’ay fait, ou me plaise ou m’anuit ;
Juno me het et meseür me nuit.

Et pour ce pri la haulte venerable
Fille de Dieu, Pallas qui tous radrece
Les desvoiez, qu’elle soit apparable
En mes pensers, comme vraie maistrece
Me dottrine et me secueure ;
Diane soit avec elle a toute heure,
Car de long temps me commence, yer n’anuit^[3]
Juno me het et meseür me nuit.

Princes, ains que mort m’acueure,

Priez Pallas que pour mon bien accueure ;
Car en tous cas, ou que j’aye réduit,
Juno me het et meseür me nuit.

1. XIV. — 4 A¹ M. ma v. a f. — B Mettra a f. ma v. en g. espresse
2. — 12 A² vers le r.
3. — 23 B Ces deux m’aiment, mais non obstant je cuit