« Diex sait le voir, la voire majesté,
« Contre t’onor se je fis onc pechié
« Ne se me vint en cuer ne en pensé. » (*)
Et dist li rois : « Por noient en parlés. (*)
« Atrovée estes ens el mortel pechié
« Si qu’escuser de ce ne vos poés.
« De la vostre arme or tost vos porpensés ;
« Vos jugemens est huimais ordenés.
« Qui son segnor faut doit estre bruslés ! » (*)
Et dist la dame : « Vos feriés grant pechié. »
Et dist Macaires : « Ja vos torne à vilté
« Quant avec ele si lonc tens deraisniés. »
Naimes l’oï, s’en a le chief crollé ;(*)
A soi méisme a dit sans delaier :(*)
« Cil jugemens sera chier comperé ;
« Mar verra Kalles le felon parenté, (*)
« Qui toz jors l’a traït et engané ! »(*)
li emperere cui douce France apent (*)
De Blancheflor fu et grains et dolens,
Que il l’amoit sor tote rien vivant ;
Mais por joutice ne pot aler avant
Ne face d’ele faire le jugement, (*)
Tot maugré lui, qui qu’en rie o qu’en chant.
