1Nobles Françoys, bien haultement
Chantons noel sans nul sejour,
Car le seigneur du firmament
Est nay pour nous en ce sainct jour.
Herode en eust au cueur doulour 5
Tant qu’il saillit hors de son sens ;
Parquoy il feist mettre a doulour
Par grant despit maintz innocens.
❦
2L’ange du ciel subitement
Vint a Joseph, auquel il dit : 10
« Va t’en, amy, bien vistement
« Hors de ce lieu sans contredit,
« Et prens Marie et son chier filz
« Et en Égypte vas grant pas,
vo« Car Herodes rend tous occis 15
« Petitz enfans, tant hault que bas.
❦
3Joseph sur l’asne lors assis
Marie et son chier filz Jesus,
Puis du pays, de sens rassis,
Ce sont partis, eulx trois sans plus, 20
Conduictz du seigneur de lassus,
Dont Herodes cuida mourir ;
Par ses souldars et mammelus
A faict l’enfant par tout querir.
❦
4En Égypte sont parvenus, 25
Sans avoir nul adversité,
Et les boureaulx sont revenus
Devant Herodes despité :
« Avez vous doncq precipité[1]
« Tous les enfans, comme j’ay dit ? » 30
Respondu ont : « Pour verité,
« Accomply est vostre intendit. »
❦
5Tant que Herodes mort despessa,
En Égypte feist son sejour
Le bon seigneur qui composa 35
Après le ciel la nuyct et jour ;
Miracles feist benignement
Sur gens perclus et impotens,
Et si monstroit publicquement
La loy de Dieu omnipotent. 40
❦
Ciiij6Les faulx Juifz, plains de desarroy,
Voyant sa grand perfection,
Se sont souvent mis en arroy
Leurs cueurs remplis de trahison,
Tant qu’en la croix comme ung larron 45
Publicquement l’ont encloué,
Ou mort souffrit et passion,
Entre larrons hault eslevé.
❦
7Or prions le donc humblement
Que par la mort qu’il endura 50
Nous puissons avoir saulvement
Quant nostre dernier jour sera
Et quant son jugement fera.
Vierge de pris, soys nous secours,
Car ung chascun lors tremblera 55
Sans attendre d’aultruy recours.
| 