Noelz de Jehan Chaperon/Sur « Les Bourguignons mirent le camp »

Noelz de Jehan Chaperon, dit le Lassé de repos
(p. 30-33).

VIII

Aultre sur le chant de : Les Bourguignons ont mis le champ.


1Chantons noel a haulte voix,
Nobles Françoys, je vous supplie,
Pour honnorer le roy des roys ;
En joyeulx chant chascun se lye !
Laissons toute triste omelie, 5
CijEsperant paix en ses bas lieux ;
France florit cointe et jolye
Soubz l’estandart du roy[1] des cieulx.


2L’imperateur regnant lassus
Gabriel, son messagier, mande, 10
Qui sans vouloir faire reffus
Se presenta a sa commande :
« Je veulx », dist le roy, « et commande
« Que alliez la bas, sans plus targer,
« Noncer a une dame grande 15
« Qu’en son hostel veulx heberger,


3« Car j’ordonne que mon seul filz
« Repare tost l’offense faicte
« Que fist Adam, quant je le mis
« Seulet en mon jardin terreste ; 20
« Par trop il creust la beste infecte ;
« Du fruyct mengea contre mon vueil ;
« Encor en est toute sa secte
« Subjecte en porter larme en l’oeil. »


4Quant Gabriel eust entendu, 25
Tout le vouloir de Dieu le pére,
A departir n’a attendu ;
Conduyct d’une grande lumiére,
Il vint devant la tresoriére
D’amour, de grace et de valleur, 30
En luy disant : « Doulce bergiére,
vo« Salut te faitz par mon seigneur. »


5Quant la Vierge ouyt l’esdit
De Gabriel, fust fort troublée :
« Regarde, amy, a ce que as dict, 35
« Car j’ay virginité vouée ».

— « Ta saincteté[2] est tant louée, »
Respond Gabriel sans sejour,
« Que tu seras seulle espousée
« De cil qui faict la nuyct et jour. 40


6« Du sainct Esprit tu concepvras
« Ton pére et filz, seul Dieu en gloire,
« Lequel neuf moys tu porteras,
« Sans point errer, il le fault croire.
« Nature lors pour ceste hystoire 45
« En soy beaucoup s’esbahyra ;
« Mesmes sur Mort aura victoire
« Et sur les cieulx imperera. »


7La Vierge dict sans fiction
« De ton seigneur je suys[3] l’ancelle, » 50
Et lors le seigneur de Syon
Engrossit la tendre pucelle,
Non pas par œuvre naturelle,
Mais par le faict du sainct Esprit,
Comme David le nous revelle 55
En son psaultier royal qu’i fist.


8Or prions donc, nobles Françoys,
CiijCelle pucelle en ce bas estre,
Qu’elle impétre au roy des roys,
Son filz unicque et nostre maistre, 60
De la hault avecq luy nous mettre
Quant nostre corps mort occira.
Noel chanter ne fault obmettre
En ce sainct jour pour Maria.

  1. du roys.
  2. La saincteté.
  3. je ouys.