1Pour honnorer la doulce rose
Qui a porté le beau bouton
Chascun de nous en soy compose
En prose ou rime quelque baton
Et le mettons sur ung doulx ton ; 5
Qu’erreur n’y soit par nully pris,
Car des humains c’est le canton
voA qui est deu honneur et pris.
❦
2De tous bergiers la passerose
Est pour nous tous ça bas venu, 10
Et sans elle, bien dire le ose,
Ung plus grand mal fust advenu ;
De riens ne estoit a nous tenu,
Non pourtant voulut [la] mort prendre
Pour noz pechez, tout contenu, 15
Dont en [la] croix on le vit pendre.
❦
3Après qu’il eust la bouche close
Au fond d’enfer est descendu,
Auquel l’avoient par longue pose
Les péres sainctz la attendu ; 20
A chascun d’eulx il a rendu
La liberté suyvant ses ditz,
Et sans arrest, en ce temps deu,
Les a menez en paradis.
