1Le createur par sa haulte puissance
Forma le ciel et chascun element,
Ausquelz donna par divine science
Forme et rondeur avecq le mouvement ;
Puis le Seigneur, tant doulx, humble et clement, 5
Beste et oyseaulx en la terre et air estre,
Et les poissons en mer habondamment
Feist sans sejour avoir leur place et estre.
❦
2Après forma Adam le premier homme
De ses deux mains, de pechez innocent, 10
Mais par la femme il mordit en la pomme,
Dont de sa faulte il fust tost cognoissant ;
Du beau vergier dont estoit jouyssant
Fust dechassé a son grant vitupére.
Ô quel morceau ! Il rendit languissant 15
Le genre humain en douleur et misére.
❦
3Pour reparer la faulte perpetrée
Fust ung debat lassus au firmament,
Ou pour nous tous c’est devant Dieu monstrée
Misericorde en plorant tendrement, 20
Disant : « Seigneur, je te prye humblement
« De pardonner a ceste creature
« Que de tes mains as faict benignement
vo« Pour te servir par rayson et droicture. »
❦
4Tant bien parla Misericorde a l’heure 25
Que le Seigneur vers nous on veit rengier,
Et appella devers luy sans demeure
Sainct Gabriel, son secret messagier,
Auquel il dit que, sans plus la songer,
Se departit pour aller vers Marie 30
Pour luy noncer, ung mot tout abreger,
Que d’elle ystra un filz, vray fruict de vie.
❦
5Le messagier n’a faicte demourance ;
Devers Marie est soubdain parvenu,
Auquel il dit par deserte esloquence : 35
« Marie, entens pourquoy cy suys venu ;
« C’est mon seigneur, ung mot tout contenu,
« Qui veulx de toy, d’un amour et bon zelle,
« Avoir ung filz, lequel sera tenu
« Roy trespuissant, point ne fault que le scelle. » 40
❦
6Quant Marie eust entendu ung tel dire,
Elle respond humblement par accords :
« Mon bel amy, comment pourroit produyre
« Enfant de moy ne yssir de mon corps ?
« Impossible est, car pour final records 45
« Vierge seray tout le temps de ma vie.
« Ne parle plus, car ce me sont discords
« D’homme approcher n’eust mon corps oncq envie. »
❦
7« Ne t’esbahys », dit lors Gabriel l’ange,
Bij« Si devers toy j’ay proferé tel dit 50
« Et qu’il te semble en toute sorte estrange
« D’avoir enfant ainsi que j’ay predit ;
« Tu seulle doibs avoir cestuy credit
« Et concepvras vierge sans corrompture
« Par le moyen du benoist Esperit, 55
« Malgré le vueil de madame Nature. »
❦
8« Soit faict ainsi », respondit la pucelle ;
« A ton esdit n’ay le cueur discordant ;
« Du hault Seigneur je suys petite ancelle ;
« A son vouloir veulx bien estre accordant. » 60
Lors Dieu le filz, a cela concordant,
C’est obumbré en la Vierge sans faincte,
Dont a Nature on veit lebvres mordant
Veoir une vierge estre d’ung filz enseinte.
❦
9Pource, seigneurs, que c’es[t] la recouvrance 65
De tous mortelz qui la veullent aymer,
Noel chantons par joyeuse accordance,
Faisant son nom toutes pars reclamer ;
Confondu soit qui la vouldra blasmer,
Car, sans mentir, on n’en sçauroit mal dire. 70
Vierge de pris, vueille mon cueur armer
Contre Sathan, qui en mal trop le tire.
|
