vo1Noel chantons par melodye
En ce sainct jour ou Dieu nasquist
Et puis pour nous en croix pendit,
Dont grace nous fust restablye.
❦
2Ung messagier vint vers Marie, 5
La saluant honnestement
De par le roy du firmament,
Qui la rendit toute esbahye.
❦
3« Doulx messagier, je te supplie,
« Narre moy cy, sans rien celler, 10
« Qui t’a transmis vers moy parler,
« Car d’homme nul ne suys amye. »
❦
4« Marie, éscouste mon messaige,
« Que m’a chargé le roy des roys,
« C’est q’ung enfant porter tu doibs, 15
« Reparateur d’humain lignaige.
❦
5« Le sainct Esprit par sa puissance
« Le formera dedans ton corps,
« Comme l’escript en faict recors ;
« En toy sera telle excellence. » 20
❦
6« Joyeuse suys de la nouvelle ;
« Soit faict ainsi que l’as predit ;
« De ton seigneur en faict et dict
« Je veulx estre serve et ancelle. »
❦
7Finy le dit de la pucelle 25
Et qu’elle y mist consentement,
BiijLe filz de Dieu divinement
Fust incarné au sainct corps d’elle.
❦
8Neuf moys entiers la saincte dame
En ses sainctz flans son fruyct porta 30
Et puis sans nul mal enfanta
Sans ayde ne secours de femme.
❦
9Les pastoureaulx sur la couldrette
Avecq troupeaulx faisoyent sejour,
Lesquelz ouyrent en ce jour 35
Une chanson grave et honneste :
❦
10« La gloire au ciel et paix en terre
« Et aux hommes de volunté,
« Qui n’ont cure de volupté
« Ne de mouvoir contre nul guerre ! » 40
❦
11Iceulx pasteurs, sans plus attendre,
Laissérent lors leurs brebis tous,
Et en la ville ont pris le cours
Pour plus avant du faict enquerre.
❦
12Trois nobles roys par une estoille 45
Furent conduyctz sans fiction
Devers la fille de Syon,
Royne des cieulx sans sa pareille.
❦
13Chascun d’eulx trois lors luy donnérent
Tresor fort digne et precieulx, 50
Puis, congié pris du roy des cieulx,
En leur pays tous retournérent.
❦
vo14Or prions donc la saincte dame
Qu’elle supply envers son filz,
Qui fust pour nous en croix affix, 55
Nous preserver de tout diffame.
|