Les Souspirs amoureux de F B de Verville 1589/Je veux noyer ma vie au torrens de mes pleurs
LXI.
Je veux noyer ma vie au torrens de mes pleurs,
Je veux brusler mon cœur en l'ardeur qui m'enflame,
Et sur l'air de ma voix je veux porter mon ame,
Pour la chassant de moy terminer mes malheurs.
Par mille coups plombez tesmoins de mes douleurs
Je pousseray mon corps dessous la froide lame,
Contraignant mon esprit qui de langueur se pasme
A rechercher sa paix és ombreuses horreurs.
Ainsi en deffaillant me ruynantmoy mesme,
En devot sacrifice à la dame que j'ayme,
Humblement j'offriray la cendre qui restra.
Afin que quelque fois de mon amour esmeuë,
Elle pleure dessus & qu'elle la trans-muë
En quelque heureux daimon qui pour elle vivra.