Les Souspirs amoureux de F B de Verville 1589/En mes tristes regrets je n’ay allegement
LVIII.
En mes tristes regrets je n'ay allegement
Qu'en pensant aux douceurs qui nourrissoyent ma vie,
Quand mon ame de moy heureusement ravie,
En vos rares beautez se perdoit doucement.
Quand sortant par mes yeux d'un chaste mouvement
Elle glissoit en vous, ou de bon heur saisie
De retourner en moy elle perdoit l'envie,
Rencontrant tant de bien en si beau changement.
Encore ce beau penser qui mes malheurs allege,
Estant si loin de vous mon martyre rengrege,
Si que tout mon bon heur me cause ce tourment.
Mais, mon cœur c'est tout un, une cause si douce
Fait que si doucement, mes souspirs je repousse,
Que j'ay en mes ennuis trop de contentement.