Les Œuvres de François Rabelais (Éditions Marty-Laveaux)/Gargantua/35
Comment Gymnaste soupplement tua le capitaine Tripet et aultres gens de Picrochole.
Chapitre XXXV.
es motz entenduz, aulcuns d’entre eulx commencerent avoir frayeur et se seignoient de toutes mains, pensans que ce feust un diable desguisé. Et quelq’un d’eulx, nommé Bon Joan, capitaine des Franc Topins, tyra ses heures de sa braguette et cria assez hault : « Agios ho Theos. Si tu es de Dieu, sy parle ! Si tu es de l’Aultre, sy t’en va ! » Et pas ne s’en alloit ; ce que entendirent plusieurs de la bande, et departoient de la compaignie, le tout notant et considerant Gymnaste.
Pour tant feist semblant descendre de cheval, et, quand feut pendent du cousté du montouer, feist soupplement le tour de l’estriviere, son espée bastarde au cousté, et, par dessoubz passé, se lança en l’air et se tint des deux piedz sus la scelle, le cul tourné vers la teste du cheval. Puis dist : « Mon cas va au rebours. »
Adoncq, en tel poinct qu’il estoit, feist la guambade sus un pied et, tournant à senestre, ne faillit oncq de rencontrer sa propre assiete sans en rien varier. Dont dist Tripet :
« Ha ! ne feray pas cestuy là pour ceste heure, et pour cause.
— Bren ! (dist Gymnaste) j’ay failly ; je voys defaire cestuy sault. »
Lors par grande force et agilité feist en tournant à dextre la gambade comme davant. Ce faict, mist le poulce de la dextre sus l’arçon de la scelle et leva tout le corps en l’air, se soustenant tout le corps sus le muscle et nerf dudict poulce, et ainsi se tourna troys foys. À la quatriesme, se renversant tout le corps sans à rien toucher, se guinda entre les deux aureilles du cheval, soudant tout le corps en l’air sus le poulce de la senestre, et en cest estat feist le tour du moulinet ; puis, frappant du plat de la main dextre sus le meillieu de la selle, se donna tel branle qu’il se assist sus la crope, comme font les damoiselles.
Ce faict, tout à l’aise passe la jambe droicte par sus la selle, et se mist en estat de chevaucheur sus la croppe.
« Mais (dist il) mieulx vault que je me mette entre les arsons. »
Adoncq, se appoyant sus les poulces des deux mains à la crope davant soy, se renversa cul sus teste en l’air et se trouva entre les arsons en bon maintien ; puis d’un sobresault leva tout le corps en l’air, et ainsi se tint piedz joinctz entre les arsons, et là tournoya plus de cent tours, les bras estenduz en croix, et crioit ce faisant à haulte voix : « J’enrage, diables, j’enrage, j’enrage ! Tenez moy, diables, tenez moy, tenez ! »
Tandis qu’ainsi voltigeoit, les marroufles en grand esbahissement disoient l’ung à l’aultre : « Par la mer Dé ! c’est un lutin ou un diable ainsi deguisé. Ab hoste maligno, libera nos, Domine. » Et fuyoient à la route, regardans darriere soy comme un chien qui emporte un plumail.
Lors Gymnaste, voyant son advantaige, descend de cheval, desguaigne son espée et à grands coups chargea sus les plus huppés, et les ruoit à grands monceaulx, blessez, navrez et meurtriz, sans que nul luy resistast, pensans que ce feust un diable affamé, tant par les merveilleux voltigemens qu’il avoit faict que par les propos que luy avoit tenu Tripet en l’appellant pauvre diable ; sinon que Tripet en trahison luy voulut fendre la cervelle de son espée lansquenette ; mais il estoit bien armé et de cestuy coup ne sentit que le chargement, et, soubdain se tournant, lancea un estoc volant au dict Tripet, et, ce pendent que icelluy se couvroit en hault, luy tailla d’un coup l’estomac, le colon et la moytié du foye, dont tomba par terre, et, tombant, rendit plus de quatre potées de souppes, et l’ame meslée parmy les souppes.
Ce fait, Gymnaste se retyre, considerant que les cas de hazart jamais ne fault poursuyvre jusques à leur periode et qu’il convient à tous chevaliers reverentement traicter leur bonne fortune, sans la molester ny gehainer, et, monstant sus son cheval, luy donne des esperons, tyrant droict son chemin vers La Vauguyon, et Prelinguand avecques luy.