Le Roman du Renart - D. M. Méon - 1826/19
Si conme Ysengrin s’ala plaindre de Renart à la Cort le Roi.
Ce fu à un tens de pascor
Qu’Ysengrin estoit à sejor,
Si pensoit moult à son afere,
Et li sovint d’un grant contrere
Que Dant Renart li avoit fet,
Si en fu en moult grant deshet,
Si en soupira moult forment
Por la honte Dame Hersent ;
Si en fu moult forment pensis,
Moult corouciez et moult marris
Et en son cuer avoit grant duel
De sa fame : contre son voil
Li avoit Dant Renart croissue
Dont il a moult grant honte éue.
Si asembla de ses amis,
Et lor a à conseil requis
Que il l’aïdent à conseillier
Conment il se porra vengier :
Lors alerent au parlement
Et en dist chascun son talent.
Qant orent dit lor volenté,
En la fin se sont acordé
A ce qu’il s’en alast clamer
Là où porra le Roi trover ;
Et maint o lui Dame Hersent.
Atant finent lor parlement,
Si s’en est chascun retornez.
Ysengrin s’est acheminez
Et erre tant qu’il vint à Cort.
Or cuit que il tendra moult cort
Renart le rous, s’il puet tant fere
Qu’à jugement le puist atrere,
Car moult ert veziez et sages
Et sot moult de divers langages,
Et li Rois l’ot fet conestable
De sa meson et de sa table.
Parvenu sont jusqu’au palès
Là où li Rois tenoit ses plès :
La cort estoit grant et pleniere,
Bestes i ot de grant maniere,
Foibles et fors, granz et petites
Qui totes sont au Roi sougites.
Li Rois sist en un faudestuet,
Itel con à tel home estuet ;[1]
Tot environ siet en coronne
Sa mesnie qui l’avironne :
N’i a un sol qui noise face.
Atant es-vos enmi la place
Dant Ysengrin lui et s’amie
Qui la clamor ont aramie :
Trestuit li autre font silence,
Et mesire Ysengrin conmence
Devant le Roi en sozpirant :
Rois, justise va enpirant,
Veritez est tornée à fable,
Nule parole n’est estable.
Vos féistes le ban roial
Que jà mariage par mal
N’osast nus fraindre ne brisier :
Renart ne vos velt tant prisier
C’onques tenist por contredit
Ne vostre ban ne vostre dit.
Renart est cil qui toz max seme,
Car il m’a honi de ma feme.
Renart ne dote mariage,
Ne parenté ne comperage ;
Il est pire que ne puis dire.
Ne cuidiez mie, Rois biau sire,
Que jel’ die por li reter
Ne por blasme sor li jeter :
Rien que je die n’est mençoingne,
Vez-ci Hersent qui tot tesmoingne.
Voire voir, sire, ce dist-ele,
Dès le jor que je fui pucele
M’ama Renart et porsivi,
Mès jel’ ai à toz jors foï,
N’ainz ne voil mon cuer aploier
A riens qu’il me séust proier,
Et puis que j’oi pris mon seignor,
Me refist-il enchauz graingnor ;
Mès je nel’ voil onques atendre,
Ne ainz mès ne me pot sorprendre
Trusq’à l’autrier en une fosse
Où j’estoie auques crasse et grosse :
Serréement fui el pertuis,
Il s’en issi par un autre huis,
Par derier vint, si me honi
Tant con li giex li abeli.
Ce vit Ysengrin mes mariz
Qui dolent en est et mariz,
Je sui cele qui oi la honte.
Et con ele ot finé son conte
Et Ysengrin si a repris :
Voire voir, sire, je repris
Renart li rous à cest forfet,
Que vos en semble ? a-il mesfet
Bien ne reson en cest endroit ?
A vos m’en clains, fetes m’en droit
Par devant trestoz vos barons
De qanque reter le saurons ;
Et si vos di toz sanz dangier
Que Dant Renart ala tencier
A mes Loviax en la tesniere,
Et qu’il pissa sor ma loviere,
Si les bati et chevela,
Et avoutres les apela,
Et dist que cox estoit lor pere
Et que croissue avoit lor mere.
Tout ce dist-il, mès il menti,
N’onques por ce ne s’alenti
De ma grant honte porchacier.
L’autre eir estoie alé chacier,
Hersent estoit o moi venue,
Là fu ceste descovenue,
Que je vos ai ci acontée,
Je les sorpris à la montée,
Si le blasmai de cest afere,
Mès il m’en ofrit droit à fere
Un serement por lui deffendre
Tot là où jel’ voudroie prendre :
Por ce me fetes jugement
Et amendez delivrement
Ce meffet et ceste discorde
Q’autre musart ne s’i amorde.
Isengrin a son claim finé,
Et le Lion le chief cliné,
Si conmence un poi à sourire,
Avez-vos, fet-il, plus que dire ?
Sire, je non, de tant me poise
C’onques en fu méue noise,
Ne que j’en sui si vergondez.
Hersent, dist li Rois, respondez
Qui vos estes ici clamée
Que Dant Renart vos a amée,
Et vos, amastes-le vos onques ?
Je non, sire. Or me dites donques
Por qoi estiez donc si fole
Qu’en sa meson aliez sole
Dès que vos n’estiez s’amie ?
Merci, sire, ce n’i a mie,
Se vos plet, miex dire poez
Selonc le claim que vos oez
Que vos a dit li conoistable
Mes sires qui bien est estables,
Que il ensemble o moi là vint
Où ceste vergoingne m’avint.
Ert-il o vos ? Ouïl sanz faille,
Qui cuidast ce que Diex i vaille,
Que il esforcier vos déust
Là où li vostres maris fust ?
Lors s’en est Ysengrin levez,
Sire, fet-il, vos ne devez,
Se vos plet, moi ne lui deffendre,
Ainz devez plainement entendre
A la clamor, que que nus die,
Tant ç’on l’ament ou escondie.
Que je vos di bien à fiance
Que j’en voel avoir la venjance,
Que se Renart ert ci presenz,
Je mosterroie qu’à Hersenz
Jut-il à force, que jel’ vi,
Par la foi que je vos plevi.
Li Lions par sa grant franchise
Ne vost soufrir en nule guise
Que fust en sa cort mal-menez
Qui d’amors fust achoisonez,
Por rien les gages n’en préist,
S’il poïst en pais les méist.
De Renart doute la querele
Dont maistres Ysengrin l’apele,
Si li a dit, se Diex me voie,
Por nule rien ne sofferoie
Qu’entre vos et Renart le court
Vos combatissiez en ma court,
Ne que éussiez guerre ensemble.
Sire, dist Ysengrin, moi semble
Que vos soutenez sa partie,
Mès foi que doi Sainte Marie,
Moult miex me déussiez aidier
Et ma partie consilier,
Que je vos ai toz jours bien fait
Assez miex que Renart n’a fait.
Mais se j’éusse esté boisseres,
Faus et traïtes et tricherres,
Miex m’amissiez : par mon musel
Mau dehait ait cui il est bel,
Que je si bien servi vos ai
Qant si mauvais loier en ai ;
Mais on suelt dire en reprovier
Que de tel seigneur tel louier,
Qant li Rois voit qu’il velt tencier,
Si conmença à agencier,
Si li respondi mot à mot,
Ce, fait-il, que Renart l’amot,
L’escuse auques de son pechié.
Se par amors vos a trichié,
Certes proz est et afaitiez,
Et neporqant s’ert-il traitiez
Par jugement et par raison
Selonc l’esgart de ma meson,
Bien en feré prendre conroi.
Li Chameus siet joste le Roi,
Moult fu en la Cort chier tenuz,
De Lombardie estoit venuz
Por aporter mon seignor Noble
Tréu de vers Costentinoble,
Li Pape li avoit tramis,
Ses Legas ert et ses amis :
Moult fu sages et bons legistres.
Mestre, fait li Rois, s’onc oïstes
En vostre terre tex conplaintes
Con à ma Cort a-l’en fait maintes,
Bien vodrions de vos aprendre
Quel jugement en en doit rendre.
Quare, mesire, me audite,
Nos trobat en decrez escrite
Legem expresse publicate
De matremoine violate ;
Primes le doiz examinar
Et s’il non se puisse espurgar,
Grevar le puez si con te place,
Que moult à grant chose mesface.
Hec est en la moie sentence,
S’estar non vult en amendence
De si que parmaine conmune
Universe sone pecune,
De lapidar la corpe ou ardre
De l’aversier de la Renarde,
Et se vos siez, bone Rege
Ce est qui destruie la lege
Et qui la vuel vituparar,
Il les doie fort comparar.
Mès, sire, par la corpe sainte
Que si le jugement ert fainte,
Et tu non soies bon seignor,
Fai droit jujar por ton henor,
Par la sainte cruche de Dé,
Que tu ne soies bone ré,
Se reson ne droit ne velt far
Si con fist Julius Cesar,
Et en ta Cort faches droit dir
Se tu vels estre bone sir,
Videte bonne favelar,
Par la foi teue tien toi car ;
Se ne tiens car ta baronie,
Rent toi por amender ta vie ;
N’aies cure de roialtat
Se tu ne juges par bontat,
Se tu ne garde bien t’enor,
Tu non siées bone seignor,
Favelar, Roi, qanque te place,
Plus ne te di, ne plus n’en face.
Qant li baron l’orent oï,
Tiex i a se sont esjoï,
Et tiex qui en sont corocié.
Li Lions a le chief drecié,
Alez, fet-il, vos qui ci estes
Les plus vaillanz, les graignors bestes.
Si jugiez de ceste clamor
Se cil qui est sorpris d’amor
Doit estre de ce encoupez
Que ses compains l’a acoupez.
A ces paroles lievent sus,
Du tref roial s’en vont en sus
A une part por conseillier,
Plus en i a là d’un millier.
Dant Brichemers le Cers i va
Qui de maulalent s’aïra
Por Ysengrin qui est trichiez ;
Et Bruns li Ors s’est afichiez,
Dist qu’il vodra Renart grever.
Avec els deus ont fet lever
Baucent le Sengler qui de droit
En nul sens guenchir ne vodroit,
Ensemble sont à parlement.
Li Cers parla premierement
Qui s’est sor Baucent acordez :
Seignors, fait-il, or escoutez ;
Vos avez oï d’Ysengrin
Nostre ami et nostre voisin,
Con il a Renart acusé,
Mès nos avons en Cort usé
Qant l’en se plaint de forfeture
Et l’en en velt avoir droiture,
Mostrer l’estuet par tierce main,
Que tiex porroit d’ui à demain
Fere clamor à son voloir
Dont autre se porroit doloir.
De sa fame vos rediron,
Celui a-il en sa prison
Qanque il velt dire et taisir,
Tot li puet fere à son plaisir,
Et bien mentir à escient :
Ne sont mie soficient
Itex tesmoing à esprover,
Autre li covendra trover.
Par Dieu, seignors, ce a dit Bruns,
Des jugéors sui-ge li uns,
Puisque nos somes ci ensemble,
Je diré ce que il me semble.
Dant Ysengrin est Conoistables,
Et bien de la Cort est créables ;
Mès se il fust uns bareteres,
Ou faus, ou traïtres ou lerres,
Sa fame ne li poïst mie
Porter tesmoing ne garantie ;
Mès Ysengrin est de tel non
Que s’il n’i avoit se li non,
Si l’en poïst-on très bien croire.
Par foi, sire, dist Baucent, voire ;
Mès autre chose i a encore,
En vostre foi car dites ore
Qui est li pires ne li mieudre,
Chascun se velt as bons acueudre,
Se vos dites que Ysengrins
Est li mieudres de ses voisins,
Renart li vodra contredire
Que il n’est mains loiax ne pire,
Chascun si se tient à preudome.
Por ce vos di à la parsome
Ce ne puet estre que vos dites,
Dont ne seriez-vos pas quites,
Chascun porroit tel clamor fere
Por sa fame à garant atrere,
Et dire cent sols me devez,
Dont maint home seroit grevez.
Ce n’ert pas fait là où je soie,
Issuz estes hors de la voie :
A vos me tieng, Dant Brichemer,
Il n’a home jusqu’à la mer
Qui en déist plus sagement
Ne loiauté ne jugement.
Seignors, ce dist Platiaus li Dains,
D’autre chose est ore li clains,
Que mesire Ysengrin demande
Estroitement de sa viande
Que Renart prist en sa meson
A force par male raison,
Et qu’il pissa sans nul respit
Sor ses enfanz par fin despit,
Si les bati et chevela
Et avoltres les apela ;
Et à ce afiert grant amende
Se Dant Renart ne li amende,
Et il s’en puet atant estordre,
Encor s’i vodra-il amordre.
Et lors dist Bruns, c’est veritez,
Honis soit et deshenorez
Qui jà Renart consentira
Que un preudome honira,
Et si li toudra son avoir,
Si n’en porra nul droit avoir :
Dont aroit-il borse trovée.
Ce seroit folie provée
Se li Rois ses barons ne venge
Que Renart honist et laidenge ;
Mès à tel morsel itel leche,
Chaz set bien quel barbes il leche,
Je ne cuit pas, sauve sa grace,
Que mesire s’onor i face
Qui s’en aloit ore riant
Et Ysengrin contraliant
Por un garçon, un losengier.
Diex me dont de son cors vengier !
Por Dieu, fait-il, ne vos soit grief
Se je vos fas un conte brief
Du traïtor felon encrime
Con il conchia moi-méisme.
Renart qui moult estoit haïz
Avoit dejoste un plaiséiz
Une riche vile espiée
Novelement édifiée.
Lez le bois avoit un manoir
Où un vilain soloit manoir
Qui moult avoit cos et gelines.
Renart en fist tiex deceplines
Que bien en menja plus de trente,
Tote i avoit mise s’entente.
Li vilain fait Renart guetier,
Ses chiens avoit fait afaitier,
El bois n’avoit sente ne triege
Où il n’éust cepel ou piege,
Ou trebuchet ou las tendu,
Ou roiz ou roisel estendu.
Renart greva qanque il pot,
Car à la vile aler ne sot,
Dont se porpensa li déables
Que g’iere grant et bien véables,
Et il ert petiz et menuz,
Si i seroie ainz retenuz
Ou fust à bois où fust à plain,
Plus tost méist-on à moi main
Où que nos fusomes nos dui
L’en tendroit ainz à moi q’à li,
Et ge miex i fusse atrapez
Et il plus tost fust eschapez.
Il savoit bien que je aim miel
Plus que chose qui soit soz ciel,
A moi vint où estoie oen
Devant la feste Saint Johen :
Ahi ! dist-il, biau sire Brun
Quel vessel de miel je sai un !
Et où est ? Chiés Costant Desnoes.
Porroie i ge metre les poes ?
Oïl, je l’ai tout espié,
Li blé estoient espié,
Le postis trovames ouvert,
S’entrames enz par l’uis ouvert ;
Lés une granche en un vergier
Là nos déumes herbergier
Et gesir trestot en repos
De si au vespre entre les chos.
Cele nuit al aserier
Devions le vessel brisier,
Le miel mengier et revenir,
Mès li gloz ne se pot tenir :
Vit les gelines el paillier,
Si conmença à baaillier.
Il les asaut, eles crierent,
Et li vilain qui laiens erent,
Lievent la noise par la vile,
Tost en i ot plus de deus mile ;
Vers le cortil vindrent corant
Et Renart durement huiant
Plus de quarante en une rote.
Ne fu merveille se j’oi dote,
Les grand galoz en sui tornez.
Renart se fu tost destornez
Qui sot les pas et les destroiz,
Sor moi torna toz li esfroiz.
Qant jel’ vi trere à une part,
Conment, di-ge, sire Renart,
Volez-me vos lessier en place ?
Qui miex porra fere, si face,
Biau sire Brun, or du hater,
Que besoing fet viele troter :
Fetes del miex que vos poez,
Se tranchanz esperons n’avez
Et bon cheval por tost aler,
Cil vilain vos vodront saler.
Or oez con il font grant noise,
Se vostre peliçon trop poise,
Jà n’en soiez desconfortez,
Il vos sera par tans ostez.
G’irai avant en la cuisine,
Si porteré ceste geline
Si la vos apareilleré,
Dites quel savor g’i feré.
Atant li traïtre s’eslesse,
Si me gerpi enmi la presse.
La noise ala si engringnant
Li chien m’alerent ataingnant :
A moi se lient pelle melle,
Et pilez volent conme grelle,
Si cornent li vilain et huient
Que tuit li champ entor en bruient.
Qant j’oï les vilains corner,
Qui lors me véist trestorner
Vers les mastins tot de randon,
Et fouler et mordre environ,
Hurter et batre et desconfire,
Bien péust por verité dire
Que ainz ne fu véue beste
Qui de chiens féist tel tempeste,
Bien me péusse d’eus deffendre.
Qant je vi les pilez descendre
Et les sajetes barbelées
Chaoir entor moi granz et lées ;
Qant les vi venir, si m’en part,
Les chiens guerpi de l’autre part,
Vers les vilains ving eslessiez,
Atant me fu li chans lessiez.
N’i ot si hardi ne si cointe,
Dès que je fis vers eus ma pointe,
Qui lors ne s’en tornast fuiant.
Je ving l’un d’eus aconsuiant,
A terre à mes piez le cravant :
Un autre s’en fuiant avant
Qui portoit une grant maçue,
Cil que je ting s’escrie et hue.
L’autre retorne, si me grieve,
A deus mains la maçue lieve,
Tel cox me feri lez l’oreille,
Chaoir me fist, voille ou ne voille.
Qant je me senti si qassié,
Son compaingnon li ai lessié,
Si sailli sus et il s’escrient,
Et li chien à moi se ralient,
Si me sachent et me detirent.
Qant li vilain entre eus ce virent,
Estes-les vos toz apoingnant,
De lor glaives me vont poingnant,
Pierres jetent, sajetes traient
Et li mastin crient et braient.
Là où je poi un d’els ataindre,
De totes parz me vi açaindre ;
Je vi que g’iere moult plaiez,
Adonques fui moult esmaiez :
Vers le bois conmencé à tendre
Par là où la presse estoit mendre.
Si m’en estors au miex que poi,
Retenuz i fusse à bien poi ;
Mès que fuiant, que deffendant
Par une broce en un pendant
Maugré trestoz mes anemis
Fis-ge tant que el bois me mis.
Einssi Dant Renart m’a bailli
Por les gelines q’asailli ;
Ge nel’ di pas por clamor fere,
Mès por essample de lui trere.
Or s’est clamez Dant Ysengrin,
L’autrier se clama Tiercelin
Qu’il le pluma en traïson,
Si le voloit metre en prison
Tybert li Chas en un chepel
Où il redut lessier la pel,
Et puis refist-il bien que lerre
Que la Mesenge sa conmere,
Qant il en besant l’asailli
Conme Judas qui Dieu traï.
S’en doit bien estre conseil pris
Qant il si sovent est repris,
Que nos i avons grant pechié
Qui tant li avons alechié.
Li Ors a parlé longuement,
Baucent li respondi briément :
Mesire Bruns, fet-il, cist plais
N’iert parfinez as premiers trais,
Encor n’est ore aconséue
La clamor qui ci est venue.
Moult seroit sages qui sauroit
Jugier d’un droit, et il n’auroit
L’autre partie encore atainte :
Nos avons oÏ la conplainte,
Or devons la response atendre,
Et l’un droit après l’autre rendre,
Tant que l’en viengne à la parsome :
En un jor ne fist-l’en pas Rome.
Nel’ di pas por Renart tenser,
Mès nus ne doit à ce penser
Que nos les mellomes en Cort,
Que pechiez seroit et grant tort,
Que ne sai que dire en doions
Devant qu’ensemble les oïons.
Qant Renart ert à Cort venuz,
Et cist clains sera retenuz
Qu’Isengrin a ci amené
Dont à primes ert ordené
Conment sera de l’amendise
Par le jugement de justise.
Ce dist li Singes Cointeriaus,
Mal dahez ait cil hateriaus
Se vos ne dites que i a.
Et li Ors respondu li a :
N’estes mie trop forsenez
Qant devers Renart vos tenez,
Qu’entre vos deus savez assez :
Maint mauvès pas avez passez,
Si fera-il encor cestui
Se l’en velt croire vos et lui.
Le Singes voit qu’il se coroce,
Petit li est de ce qu’il groce,
Moe li fet por plus irestre :
Se Dex vos saut, fet-il, biau mestre,
Or me dites en vostre endroit,
Que en diriez-vos par droit ?
Soz ciel n’a Cort, par Saint Bichier,
Que n’osasse bien afichier,
Se j’en devoie estre créuz,
Que trestoz cist max est venuz
Par Dant Renart et par sa corpe,
Et qu’Isengrin à droit l’encorpe ;
Et qu’alez-vos plus atendant
Qant la chose est venue avant
Que il est pris en avoutere
Méesmement de sa conmere ?
Bien se desrenent envers lui
Hersent et Ysengrin andui :
Por ice seroit avenant
Que Renart fust pris maintenant,
Puis li liast-on poins et piez,
Si fust jetez trestoz liez
En la chartre ou en la jéole,
Puis n’i éust autre parole
Que de fuster ou d’escoillier,
Dès qu’il esforce autrui moillier.
D’esforcier fame n’i a el
Nis s’ele est fame conmunel,
L’en en doit fort justice prendre
Que autre foiz n’i ost entendre.
Et qu’est donc d’une fame espouse
Qui dolente en est et hontouse
De ce que ses mariz le sot ?
Et qui cuide Ysengrin si sot
Qu’il éust plet de ce méu
S’il ne l’éust as eulz véu ?
De tant est-il plus vergondez
Se cist mesfet n’est amendez,
Dont Ysengrin tesmoing li porte :[2]
Dont sera bien justice morte.
Dist li Singes, ci a dur conte
C’on baillist henor à tel honte,
C’un preudome por tel mesfet,
Por Dieu se Renart a mesfet,
De pechéor misericorde,
Si en fetes aucune acorde ;
Li Leus est mendre c’on ne cuide,
Et grant vent chiet à poi de pluie.
Renart n’est pas vaincuz encore,
Encor vendra, ce cuit, autre ore ;
Dist en avez vostre plaisir,
S’avez perdu un biau taisir.
Dant Brichemer fu moult voiseus,
Ne fu jenglerres ne noiseus,
Si con cil autre compaingnon :
Seignors, fet-il, or en prenon
Un jor de cest acordement,
Renart en face serement
Et s’amende par tel devise
Con il a Ysengrin pramise ;
Car si con li Singes le dit,
Ne por mesfet ne por mesdit
Qui n’est apers ne requenuz,
Ne doit jà estre plet tenuz
D’ome afoler ne de desfere,
Ainz i afiert la pès à fere.
Mès primes gardons par mesure
Qu’il n’i ait riens de sorpresure.
Une chose qui moult me serre,
Se li Rois n’est en ceste terre,
Devant qui ert li plaiz traitiez
Se Renart n’en estoit haitiez ?
Li chien Frobert de la fontaine,
Cil nos en metra hors de paine,
En lui a moult bon chien et vrai,
Ne jà home ne troverai
Qui ne die que c’est bien fet
Qu’en a devant li mis cest plet.
A ce se sont tuit asenti
Que nus d’eus ne s’en repenti :
Li conseuls ne fu plus tenuz.
Estes-les vos avant venuz
A grant joie et à grant baudor
Devant le Roi el consitor :
Tuit li autre vont arestant
Et Brichemer fu en estant
Qui la parole a conmenciée :
Bien l’a conduite et agenciée
Si conme bons Restoriens :
Sire, fait-il, nos estiens
Alé le jugement enquerre
Selonc la guise de la terre ;
Trové l’avon, s’il n’est qu’il die,
Jel’ diré, puis que l’en m’en prie,
Volentiers, sauve vostre grace.
Li Lions li torne la face,
Del otroier li a fet signe,
Et Dant Brichemer li encline.
Seignors, fet-il, or m’entendez,
Et se je fail, si m’amendez.
Ce m’est avis que nos déismes
D’Ysengrin qui se clama primes,
Que tote sa droiture aura
De qanque demander saura ;
Mès il li covendroit trover,
Se il la chose velt prover,
Soi tierz por amender son droit
A jor nomé ci orendroit,
Puis féismes par droit ester
Qu’il ne pooit riens conquester,
Ne droiz n’estoit qu’il conquisist
Por riens que sa fame déist.
Brun et Baucent en desputerent,
Mès cil qui avec nos là erent,
Se tindrent miex à ma partie ;
Mès la chose est si bien partie
Que chascun aura sa droiture.
Puis gardomes en quel mesure
Et qant en sera la loi dite
Que Isengrin claint Renart quite.
C’iert diemenche par matin
Devant Roonel le mastin ;
Là manderé Renart qu’il viengne
Et qu’en tel guise se contiengne
Qu’il face sa pès de par Dé
Si con nos l’avons devisé.
Li Lions respont en riant,
Jà par les sainz de Belléant
Ne fusse si liez por mil livres
Con de ce que j’en sui delivres :
Or ne m’en voil plus entremetre,
Ainz lor donré jor de plait metre ;
Tuit i seront li compaingnon
Devant Roonel le gaingnon,
Li chien Frobert de la fontaine
Après la messe diemenche.
Renart se velt adès repondre,
Mès je le feré asemondre,
Grinbert le Tesson i ira
Et de vostre part li dira
Que après la porcession
Li face satisfacion,
Ne jà riens il n’en contredie
De qanque Roonel li die.
A cest mot se sont tuit téu,
Et foible et fort, jone et chanu ;
A son ostel s’en va chascun,
Brichemer et Baucens et Brun,
Et d’autres une grant partie.
Et qant la Cort fu departie,
Grimbert va son mesage fere.
Droit à Malpertuis son repere
Trove Renart et si li conte
Conment li Baron et li Conte
L’ont ajorné del plet à fere,
Si en sera Roonel maire,
Gart qu’il i soit, li Rois li mande.
Renart dist que miex ne demande,
Très bien i ert et bien fera
Qanque la Cort esgardera.
Grimbert s’en va, Renart remaint,
Or li covient qu’il se demaint
Plus sagement que il ne seult,
Mès moult est fox et moult s’orgeult,
Ne se porquiert ne ne porchace,
Ne li chaut gueres qui le hace,
Con puet, si praigne ses aferes.
Mès Ysengrin ses averseres
N’a pas la chose en tel despit,
C’au tierz jors devant son respit
Vint droit à Roonel devant
Qui se déduit en abaiant,
Et gist el paillier à grant aise
Sor le fumier delez la haise.
Ysengrin le voit, si l’eschive,
Mès il le rapele par trive,
Si li a dit moult simplement,
Je vos dirai tot erraument,
Conseils sui venuz à vos querre,
Moi et Renart si avons guerre,
Car il a moult vers moi mespris.
Je m’en clamai, jor en est pris
Après la messe diemenche,
Ci outre n’a ne tor ne ganche,
Renart i ert par tel devise
Que vos ferez dou plet justise ;
Et l’en m’a dit del jugement
Que Renart par un serement
Se doit envers moi escondire
De qanque je li sauré dire.
Or vos proi-ge con mon ami
Que vos soiez dou plet ami
Tant que nos l’aions confondu :
Tot ai clamé et respondu,
N’i a mès autre chose à fere
Que porchacier le saintuere,
Mès de ce sui moult esgarez.
Par foi, fet-il, assez aurez
En ceste vile sains et saintes,
Jà mar en ferez tiex conplaintes :
Très bien en serez conseilliez,
Car je serai apareilliez
Fors de la vile en un fossé.
Vos me tendrez por enossé,
Direz que je sui mehaingniez,
Je me gerrai denz rechingniez,
Le col ploié, la langue traite.
Là soit vostre asemblée faite,
Renart i ert et vos li dites
Qu’il sera bien envers vos quites
S’il puet jurer desor ma dent
Qu’il n’a mespris envers Hersent.
S’il tant s’aproche de mon groing
Que jel’ puisse tenir au poing,
Bien porra dire ainz qu’il m’estorde,
Que ne vit mès saint qui si morde,
Et s’il de ce se velt retraire,
Qu’il ne parviengne au saintuaire,
Ne puet aler là où bien ait,
Que je auré mis en agait
Bien plus de quarante gaingnons
De toz nos meillors conpaingnons,
Des plus igniax, des plus aidables,
Dont iert Renart plus que déables
Se par reliques ou par chiens
Ne puet chaoir en nos liens :
Diex vos saut, pensez del bien fere.
Ysengrin se met el repere
En la forest en une lande :
Moult se porquiert et molt demande
Là où a nul de ses amis.
N’i a nul mesage tramis,
Mès il méismes les va querre
A plain et à bois et à terre ;
Ne remest ne chanuz ne chauz.
Dont Brichemer li senechauz
I est venuz la teste droite,
Et Dant Bruns li Ors s’i esploite ;
Baucens le Senglers vint à Cort,
Musarz li Chamez i acort.
Li Lions mande li Liepart
Que il viengne de seue part :
La Tigre i vint et la Pantere,
Et Cointeriaus li enchanterre,
Uns Singes qui fu nez d’Espaingne
S’est ajostez à la compaingne.
Tant fet li Leus qu’il les assemble ;
Qant il sont parvenuz ensemble
Moult les a semont et proiez.
Biaus Seignor, fet-il, or oiez,
A mon plet vos ai amenez,
Or vos pri que le maintenez
Puis que ci estes aüné
Et li estrange et li privé.
Et tuit cil de son parenté
Li ont plevi et créanté
Que jà ne seront recréant
Devant qu’il ait tot son créant.
Bien les a toz desouz ses mains,
Mès Renart n’en a gaires mains,
Einsi a sa gent atornée
Et trestouz ceus de sa mesniée
Qanque pot avoir par priere
Sont aüné à sa baniere.
Cel jor porta le confanon
Li putoiz qui Foinez ot non,
Et Tybert li Chaz est avec
Qui Renart het, mès ne por ec
S’en fet-il ce que à lui monte.[3]
Grimbert qui ot fet la semonce
N’en ose Renart escondire,
Ne jà por riens qu’en sache dire
Ne li faudra jà, c’est del mains,
Car il est ses cosins germains ;
Nis Rouselez li Escureus
Qui n’estoit mie pereceus,
N’i va pas corant, mès i trote :
Et Dame Gente la Marmote,
Corte la Taupe et Danz Pelez
Li Raz qui bien fu apelez ;
Dant Galopins i vint li Lievres,
La Lurtre, la Martre et li Bievres,
Li Heriçons et la Mostele,
Et li Formiz pas ne s’i cele
Que il n’i viengne fierement,
Que il vodra hardiement
Renart aidier à cest besoing ;
Mès li Connins n’en éust soing
De son venir, car moult s’eschive,
Mès Dant Renart en a pris trive.
A l’asembler ot moult grant presse,
Renart ne fine ne ne cesse,
Ne cil qui avec lui alerent,
Jusqu’à la vile n’aresterent
Où li plez doit estre tenuz :
Dant Ysengrin i est venuz,
Il et Renart ont departies
Lor compaingnes en deus parties.
Sire Ysengrin fu en la plaingne
Et Renart fu en la montaingne.
Dant Rooniax qui Renart gaite
Le col ploié, la langue traite,
Contrefait si la morte beste
Qu’il ne remuet ne pié ne teste.
Sor le fossé s’est arestez,
Toz est li agaiz aprestez
En un vergier delez la soi
De ceux qu’il ot menez o soi,
Bien qu’entre lisses et gaingnons
Plus de cent de ses conpaingnons,
Prisiez et esléuz par non,
Qui ne héent se Renart non.
Brichemer fu chief de la rote,
A lui s’encline la Cort tote,
Car par conmun asentement
Fu enparliers du parlement.
Tot premerains s’en est levez,
Renart, fait-il, vos qui devez
A Ysengrin faire escondit
Einsi con li baron l’ont dit,
Aprochez-vos du serement,
Si le ferez delivrement.
Nos savons bien se lui pléust
Q’assez croire vos en déust
Sanz le jurer ; mès nequedent
Vos jurerez desus la dent
Saint Roonel le rechingnié
Que Ysengrin n’avez boisié,
N’a vostre conmere jéu,
Ne par vos tel hontage éu
N’en tel maniere decéu,
A tort vos en a mescréu.
A cest mot salt Renart en place,
Moult s’apareile et se rebrace,
Et moult s’atorne vistement
Con de fere le serement.
Toz jors sot moult Renart de guenche,
Ainz n’en sot tant Biche soz branche :
Bien aparçut qu’il ert gaitiez
Et que Rooniax ert haitiez
Au flanc qu’il debat et demaine
Qant il soufle et reprent s’alaine :
Arrier se tret qu’il le resoingne.
Qant Brichemer voit qu’il s’esloingne,
Renart, fait-il, que ce puet estre ?
Metre vos covient la main destre
Sor la dent Roonel tot droit ;
Fetes tant que vos aiez droit
Et fetes vostre serement
Devant nos toz apertement.
Renart respont, Dant Brichemer,
Vos me soliez moult amer ;
Miex vodroie gesir en l’aire
Que nel’ fiance au saintuaire.
Je voil Rooniax ait son droit,
Dont ne di-ge reson et droit ;
Oïl, vos dites bien c’apert,
Vos savez bien que Dant Frobert,
Uns riches hons c’on dit Desnoes
Bien a sept mois norri trois oes.
Ce dist Renart, vos dites voir,
Je les cuit bien encui avoir,
Nus ne puet fere serement,
Ne bone offrande loiaument
S’il n’a avant un poi mengié,
Il en a le cuer plus haitié :
Grimbert respont, ia, ia.
Lors dist Renart, encore y a
Plus riche offrende en un lardier
Se Dant Bruns m’en voloit aidier,
Et Dant Tybert fust d’autre part,
Je lor feroie bone part,
Si a bon miel novel requit,
J’en mengeré encui, ce cuit.
Qant Bruns oï del miel parler,
Lors dist qu’il y voloit aler
Entre lui et Tybert li chat,
Mès je cuit bien que chier l’achat,
Qar Renart pense en son coragé
Que chascun i laira son gage.
Dist Brichemers, Dant Brun, Tybert,
Irez-vos donc chiés Dant Frobert ?
Oïl, sire, se Diex me voie
Avec Renart en ceste voie,
Dist Bruns li Ors, or del aler,
Qu’il nos en covient tost r’aler.
Atant se metent à grant cors
Renart, Tybert et Bruns li Ors,
Lors a dit, seignor conpaingnon,
Gardez qu’ensemble nos tenon,
Car vilain sont moult deputaire,
Et je le voi là batre en l’aire.
Je sai moult bien trestot cest estre,
Or regardez ceste fenestre,
Par ci en ert nostre sentiers.
Or del aler moult volentiers,
Ce dist Danz Bruns, qu’il ne demande
Que de mengier de la viande.
Tantost s’en vont tuit troi à destre
Tant qu’il vindrent à la fenestre,
Overte estoit pour essorer.
Tybert et Bruns sanz demorer
Saillirent enz isnelement,
Et Dant Renart tot ensement
Por miex honir ses conpaingnons.
Or dou mengier ne nos faingnons,
Ce dist Renart qui les foloie ;
Et Bruns menjue et si goloie :
Que que Renart lechoit defors,
Tybert et Brun mordent grant mors.
Or pense Renart qu’il ira
Là fors, si les conchiera :
Tybert, Dant Bruns, or del mengier,
J’ai grant péor de vos gagier,
Trestoz li cuers el cors me tremble.
A icest mot tantost s’en emble
Renart li rous fors de laienz,
Qui moult par est liez et joianz,
Par la fenestre que il clot,
Tybert et Bruns laienz enclot.
Renart crie, Dant Brun, Tybert,
Anuit aurez moult bon herbert :
Mengiez souef à grant loisir,
Car vos n’en porrez pas issir
Tresque vos aiez lessié gage
Seignor Frobert de son domage.
Brun oÏ bien qu’il ert traïz,
Renart s’en va au plaiséiz,
N’avoit que fere de lonc conte,
Qar péor a qu’il n’i ait honte.
Qant Bruns se voit enclos laienz,
Del eschaper est-il noienz ;
Ahi ! fait-il, Renart, Renart,
Encor pendrez à une hart,
Se de ceste puis eschaper
Je vos cuit tant batre et fraper.
Ha ! Diex, ce dist Tybert li Chaz,
Con nos a mort cil ort rachaz,
Cil rous puans, cil bareterres !
Séu sera par toutes terres.
Es-vos poingnant sire Frobert
Et Dant Costant et Dant Robert,
Dant Brun oïrent gramenter.
Lez la paroi vont escouter,
Qant il oent que c’est Dant Bruns,
Par les denz bieu, ce dist li uns,
C’est Bruns li Ors, li Chaz Tybert,
Ne li aura mestier haubert,
Qu’autre foiz m’ont-il fet domage.
Par poi que li vilains n’enrage,
Il apele toz ses voisins
Et ses parenz et ses amis.
Or ça, baron, or ça, à l’ors !
Et li vilain viengnent le cors,
Qu’il portent flael et maçue,
Grant merveille est s’on ne le tue.
Tigarz i vint, Brisefouace,
Et le filz Robert de la Place,
Et Hondeberz, Bruisebrachie
Néis sa fame a-il huchie :
A son col porte une grant bole.
Mar vit Dant Bruns le miel de l’orle,
Tuit le menacent d’escorchier.
Nis le filz Caillot le vachier
Jure du cuir fera réonges
A Dant Frobert qui est ses oncles.
Vint tost à l’uis, s’entre dedenz,
Et Brun li Ors jete les denz
Qui le volt saisir au poing destre.
Icil le fiert devers senestre,
Hondeberz le fiert de sa boule,
De lui joue con d’une soule.
Tant li batent et os et pel
Que plus fu mol d’un viez drapel.
Tybert les garde, si les voit,
Par un petit qu’il ne desvoit ;
Tel péor a et si grant duel
Boutez s’en est en un bouel.
Nus ne remest dedenz la vile
Fors seulement Dame Poufile,
Que tuit ne soient à l’Ors batre,
Çà dis, çà sept, çà troi, çà qatre,
Trestuit batoient Dant Brun l’Ors,
Et Renart escoutoit defors,
Et si se pense en son corage
C’or puet-il bien fere domage
Sire Goubert d’une crasse oe,
Jamès n’en metra en sa moe.
Que que vilain Brun l’Ors batoient
Et à son damage entendoient,
Et le fierent de renc en renc,
Et Renart s’en va droit esrant,
Une oe saisi par le col,
Et les autres ont fet lor vol
Par desus la meson Poufile.
Lors crie en haut, ça, bele fille,
Renart le rous enporte l’oie,
Sire Goubert n’en aura joie.
Maintenant celes escrierent,
Et li vilain qui laienz erent,
Saillirent fors isnelement,
Fors que qatre tant solement.
Après Renart crient et huent
Et tant le chacent con il puéent :
Et cil qui Brun ont en prison,
Virent Tybert par la meson.
Li uns regarde un poi en haut,
Si vit Tybert, lors crïe en haut,
Or çà, compains, je voi Tybert
Qui a mengié le miel Frobert ;
La qeue en pert par de defors,
En cel booit en est li cors,
Par la qeue le sache et tire.
Or est Tybert en grant martire,
Si sont tuit troi li conpaingnon
Chacié de maint vilain garçon ;
Renart chacent et Brun batirent,
Tybert de lor piex cravanterent.
Que qu’il entendent à Tybert,
Et Brun saut sus par l’uis overt,
Maugré trestoz ses anemis
Se mist li Ors el plaiséis.
Moult se gramente, moult se deut,
Encor tendra Renart s’il puet
Qui tot ce li a porchacié.
Et li vilain l’ont moult chacié,
Tybert meinent en grant viltance,
Fere li font sa penitance
Del bacon que mengié avoit.
Un grant pertuis laiens avoit,
Tybert le voit, moult est joianz,
Il i monta lor eulz voianz,
Si s’en refuit et il le chacent,
Moult sont dolent, moult le menacent,
N’est pas remez li chacéis
Qu’il sont tui troi el plaiséis.
Brun s’en fuit tote une chariere,
Et Tybert le suit par derriere,
Si li a dit, sire compains,
Moult par est granz nostre mehains :
Ce m’a fait Renart, biau conpere,
Honiz soie se nel’ conpere !
Aussi me r’a-il fet tant batre
En deus, en quint, en troi, en qatre,
Que je ai ma qeue perdue
Et ma teste toute fendue ;
Se Renart ainssi s’en estort
Miex en vodroie avoir la mort.
Tybert s’en fuit et Brun qu’en chace,
Encor n’est pas remez la chace ;
Moult le menacent li vilain,
Et Baudrinez le filz Gilain
Dient entr’eus ne fineront
Tant que il trové les auront ;
Et Brun ne dit pas, cul, sieu moi,
Mès se tu puez pense de toi.
Il s’adrece par une voie,
Au chastel Renart tint sa voie.
Renart ne doute home ne fame,
Cil sont devant la barbacane,
Il sont en haut et cil en bas,
Renart lor a gité deus gas :
Dant Brun, de Dieu soiez saingniez,
Estes-vos de vaine saingniez ?
Vostre bras vos est escrevez,
Je cuit trop tost coru avez.
Et vos, Tybert, où est la qeue ?
Alé estes en male veue :
Por le cuer bieu q’avez-vos fet ?
Qu’avez-vos Dant Goubert mesfet ?
Nule chose que je ne sache,
Avez mengié ne buef ne vache ?
Lessié avez trop riche gage.
Qant Brun l’oï, par poi n’enrage,
Renart, dist Bruns, par ceste teste,
Mar i closistes la fenestre.
Renart respont, voir non fis onques,
Ainçois chaï ; or dites donques
Que ne saillistes-vos ça fors
Qant vos mengiez les granz mors ?
Dites Brichemer je li mant
Ne puis fere mon serement,
Que cil vilain toz nos dechacent,
Je oi de ci qu’il nos menacent.
Alez-vos ent, Brun biau doz sire,
Vos avez bien mestier de mire,
Gardez ne soit plus respitié,
Je ai de vos moult grant pitié.
Bruns ot Renart, ne set que dire,
Par poi que il n’esrage d’ire.
Que que Renart et Brun parloient,
Et li vilain le bois coupoient
Por fere bastons et maçues,
Brun regarde devers les rues
Et voit l’ariere-ban venir.
Moult le menacent à tenir :
Tybert, dist Bruns, or del aler,
Trop i porrions demorer.
Or s’en vont cil, Renart remaint,
Si fais desrois a-il fait maint ;
Cil s’enfuient trusques à l’ost,
Et li vilain retornent tost.
Qant Brichemer vit l’Ors saingnier,
Si se conmença à saingnier,
Et il n’aporte nule oreille,
Trestote la Cort s’en merveille,
Et Tybert qui n’a point de qeue,
Or va la terre male veue.
Que que Bruns fesoit ses conplains,
Atant es-vos parmi les plains
Sire Gonberz toz plains de rage,
Ses poinz detort, ses cheveus sache,
Et plus d’un cent du parenté
Qui tuit ont dit et créanté
Que jamès jor ne fineront
Devant que Brun trové auront,
Et Dant Tybert et Dant Renart
Menacent que pendront à hart.
A ces paroles, à cest mot
Es-vos Gonbert plus que le trot
Et ses parenz et ses amis,
Et Bruns s’est à la voie mis
Qui moult dote cop de vilain :
Tenu l’avoit le filz Gilain
Et Aymeris de la Ruele,
Et Fremeris et Vide-escuele,
Il et Tygiers Brise-fouace,
Et Hondebert qui chiet sor glace,
Qui Tybert ot batu la pel
Dont Renart fu et bon et bel,
Por ce ensemble tuit s’en fuient,
Et li vilain après les huient,
Traient sajetes barbelées
Menuement et granz et lées.
Li une chiet sor Brichemer,
Miex vosist estre dedenz mer ;
Li autre chiet sor Roonel,
Et il saut sus tost et isnel :
Mort se fesoit por engingnier,
Renart le rous voloit mengier.
Il se fesoit saint apeler,
Mès Renart le fera trembler
Et toz les autres traïtors
Maugré Tybert et Dant Brun l’Ors.
Li vilain cuident estrangler
Mon seignor Baucent li sengler :
Il le vont tuit avironant,
Les denz li brisent maintenant.
Lors le pendent lez une poise,
Moult lor anuie et moult lor poise ;
A Dant Grimbert r’ont entendu,
Moult l’ont blechié et bien batu,
A grant paines est eschapez,
Mès nequedent moult fu frapez ;
Mès Roonians ne l’en dut gaires
Qui du serement se fist maires
Et Renart voloit conchier,
Mès il s’en sot moult bien gaitier
Con cil qui assez sot barat.
A itant d’entr’eus se depart
Et vient ariere au serement,
Bien velt tenir le covenant
Que li baron avoient fet.
Tot droit au serement s’en vet
Conme cil qui muer ne l’ose,
Sire, fet-il, or voi tel chose
Espoir que vos ne véez mie,
Si ai talent que je vos die,
Mès ne puet estre, or le lairons.
Dant Grimbers ses niés li Taissons
Aperçut bien la traïson,
Si li a trait autre raison.
Sire, car entendez à moi,
Je cuit que je bien vos dirai
Reson et droit au mien espoir,
Qar Renart ne doit mie avoir
Presse de toute cele gent,
Ne seroit mie bel ne gent
A tel baron n’a si vaillant
Qu’en li voist sor le col saillant :
Fetes vos barons esloingnier
Tant que il se puist aprouchier
Au mains devers le saintuaire,
Tant que il puist l’escondist fere.
Dist Brichemer, ne m’en gardoie,
Je li feré vuidier la voie
Tant qu’il puist venir et aler.
Ses hommes a fait avaler
Et trere ariere plus c’ançois.
Renart a fet le tor guichois
Qui n’a cure de séjorner :
Qant as reliques dut torner,
D’autre part a torné sa chiere,
Foui s’en est li mal trichiere.
Renart s’en fuit teste levée
Par une viez voie chevée ;
Si anemi si l’escrierent,
Et li chien qui en aguet erent,
Li saillent après et corurent,
Jà m’orrez dire qui il furent.
Primes i cort ainz que li autre,
Lance levée sor le fautre,
Roonel le chien Dant Frobert
Et Espillarz le chien Robert,
Le riche vilain del plaissié,
Icil l’ont premier enchaucié.
Après revint à grant eslés
Harpin et Morant et Bruiés,
Espinars et Hurte-vilain,
Et Rechingnié le chien Gillain
Qui fu fame Erart le drapier.
Après se metent el sentier
Afaitiex, Gorfax et Tiranz,
Roilliez, Loviax et Amiranz ;
Clemens i fu et Oliviers,
Le chien Malbarré Deriviers ;
Après i cort Tornebrias
Et Herbeloz avec Frias,
Brisegauz, Frisanz et Voisiez,
Liepart, Tisson et Escoilliez ;
Cortin i cort après Rigaut,
Et Passe-levriers et Gringaut,
Lohier et Passe-outre et Fillarz,
Et Estormiz et Vacularz,
Le chien sire Conber Duchesne,[4]
C’est celui qui miex se desresne,
Et plus tost va et miex le trace.
Après se metent à la chace
Pilez, Chapez et Alingniez,
Pastor, Hector et Euginiez,
Escorchelande le barbez
Et Ivolez li max florez,
Et Oisellez et Gresillons,
Estorniax et Esmerillons,[5]
Chanuz et Morganz et Vergiez,
Et Passe-avant et Ront ses giez ;
Et après est venuz Bolez,
Porchaz et Poingnant et Malez,
Et li chien Reimbaut le bouchier :
Se cil puet Renart aprouchier,
Que il le puisse as denz aerdre,
Tot soit séur de la pel perdre.
Après i sont poingnant venu
Hopitaus et Trace-menu,
Et Torne-en-fuie et Passe-mer
Qui vint de vers Pont-Audemer.
Tuit icil furent conpaingnon,
Bien le chacierent li gaingnon ;
N’i a un sol qu’il ne s’en isse,
Et après eus ne remest lisse
Qui ne crit et ne face noise.
Si acorut Baude et Faloise,
Coquillié, Buart et Sebile,
Et la lasse desoz la vile ;
Après i cort Fauve et Bloete,
Cloete, Brachine et Violete,
Et Malignose et Malparliere,
Qui fu Robert de Lamaliere
Et Gete-rose et Primevoire
La lisse qui fu au Provoire,
Pinçonete qui si se pene
De Renart tenir en demeine ;
Renart ne lesse trestorner,
Ainz li a fet maint tré torner
Ainz qu’il poïst au trou venir,
Moult se paine del retenir.
Ysengrin va les chiens huiant,
Et se Renart s’en va fuiant,
Jà n’i doit-l’en nul mal noter,
Que besoing fet vielle troter.
A l’oraille du bois menu
Li en sont qatre avant venu,
Trenchanz, Briamouz et Faïz :
Renart qui moult estoit haïz
Ot issi grant péor de mort,
N’avoit en soi nul reconfort.
Toz jors est bien Renart chaü,
Mès or li est si mal chaü,
Ne li orent mestier ses bordes,
Que n’en volassent les palordes.
Tant ont Renart li chien tiré
Et desachié et depelé,
Qu’en bien plus de qatorze leus
Li est aparissant li gieus.
A la parfin l’ont tant mené,
Tant traveillié et tant pené,
Tant l’ont folé et debatu,
Qu’à Malpertuis l’ont enbatu
Moult corouciez et moult dolenz.
Et Dant Renart ne fu pas lenz
De coroucier ses anemis,
Et il se r’est en Mal-crués mis,
Moult li est or poi de menace,
Qui le volt haïr si le hace.
Cil s’enfuient, Renart eschape,
Dès or gart bien chascun sa chape.
Renart est en sa forteresse,
Ne lor fera huimès destrece ;
De fine mort het Ysengrin,
Lui et Roonel le mastin
Qui parlerent la traïson
Par quoi Renart fu en prison :
Fet li ot boire grant péur,
Mès or est auques asséur ;
Nes a mès cure d’esmaier,
Par defors les lesse abaier.
Ysengrin maine moult grant duel,
Car retenu l’éust son voil ;
Mès il voit qu’il est eschapez,
Crient jamès ne soit atrapez
En lieu où il en ait droiture,
Moult amast s’ame s’aventure.
El bois ariere en sus ala,
Totes les bestes apela ;
Dant Roonel et vos Dant Bruns,
Dant Baucent, vos estes li uns
De ceus où li Rois miex se croit,
Or avez bien oi le droit
Et la mesdite de Renart,
Plus est lerres de Meviart.
Or voit-on bien que tort avoit,
Et de verité le savoit,
Qu’il n’osa le serement fere
De ma honte et de mon contrere.
Or m’entendez, totes les bestes
Granz et petites qui ci estes,
Or nel’ devez mès resoingner
Que bien ne puissiez tesmoingnier
Devant le Roi nostre Seignor,
Qant il tendra sa Cort graingnor,
Conment Dant Renart m’a bailli
Et de mon serement failli.
Dist Bruns, moult ert mauvès li Rois,
Se bien n’en est pris haut li drois ;
Bien a forfet c’on le desface
Si que trestout le mont le sache.
Bien le doit-on ardoir en cendre,
Voire, dist Ysengrin, ou pendre.
Par mon chapel, sire Ysengrin,
Je tiens Grimbert por son cosin.
Qant vos fustes au pont Guichart
Si véistes outre Renart
N’a pas tant meffet con vos dites,
Ainz doit par reson estre quites :
Vostre traïson aparçut
Tresceque Rooniax se jut,
Connut-il bien que n’est pas mors,
L’alaine li batoit el cors
Rooniax lores poi n’i saut,
Mès de péor le cuer li faut
Por ce qu’il li fesoit grant tort,
Os por le cuer, os por la mort.
Retez me vos de traïson
Sire Grimbert ? Sire, ge non,
Mès por Renart dont il me poise,
Alez à Cort, ne fetes noise
Se rien i a de mesprison,
Là vos en fera-il reson.
Dist Ysengrin, je m’i acort,
Quel part que la parole tort,
Ouen en mai ferai mon clain,
A mon seignor que je moult aim
Me clamerai del traïteur
Et amenrai tesmoingnéeur
Qui tesmoingneront vraiement
Qu’il ne fist pas le serement.
N’en i ot nul qui plus déist
Jusqu’au jor que la Cort asist.
- ↑ Al. Si riche conme à roi estuet.
- ↑ Al. De ce Hersent garant li porte.
- ↑ Al. Moult en i ot de par Renart Qui tuit se tienent de sa part,
Mesire Grinberz en fu uns,
C’onques ne pot amer Dan Bruns ;
Cosins estoit Renart germeins,
Cil ne li pot faillir au meins,
Ne Rosselet li escureus, etc. - ↑ Al. Tibert del freme.
- ↑ Al. Esclariax esmerillons.