Le Roman du Renart - D. M. Méon - 1826/18
C’est li songe Renart si conme Ysangrin le bati.
Or vos redirai de Renart
Le rous, le fel, le deputart ;
En sa chambre fu o sa fame
Hermeline la bone dame :
Renart si se fu endormiz,
Que moult estoit souef ses liz.
Si li avint en avison
Qu’il iert toz seus sanz conpaingnon
Près d’un bois à une montaingne,
S’ot vestu un rouge fustaingne,
Mès que par leus ert detrouez,
Entor le col ert engoulez
D’une liste trestote blanche ;
Mès l’entrée ert d’estroite manche,
Le col si fort li estraingnoit
A par un pou ne l’estrangloit.
Renart de péor s’en esveille,
A lui méismes se conseille
Que puet estre que senefie.
Dame Hermeline est esperie,
Cil li conte, cele soupire,
Renart, fait-el, biau très doz sire,
Grant péor ai de vos charpent,
Car en cest songe ce entent
Que vos aurez dolor et paine.
Or oez du rouge fustaine,
Por ce qu’il ert d’os engoulez
Crieng ne soiez moult mal menez,
Et ce m’esmaie encore plus
Qu’entor le col par de desus
Ert engoulez de blanche liste,
De ce sui-ge dolente et tristre :
Car je sai bien que ce sont vers
Qui vos engouleront les ners.
Ce me fesoit moult soupirer
Que le col vos fesoit serrer.
Ce senefie, ce m’est vis,
Qu’en grant destrece seroiz mis.
Mès or sai bien que je feré,
Un bon charme vos aprendré,
Si le vos di tout entresait,
Jà le jor que vos l’aurez fait
Mar esterez en grant dotance,
Bien vos en otroi ma fiance
Que nus en tot le jor vos face
Chose qui granment vos desplace,
Ne jà le jor que le ferez
Vie ne membre ne perdrez.
Quant vos devrez issir de l’uis
Ou de fossé ou de pertuis,
Ançois que vos ailliez avant
De vostre pié destre devant
Fetes troi croiz sor le lintel[1]
Jà mar direz ne un veel,
Puis porrez estre asséur,
Qar cel jor n’aurez mal éur
Que n’en veigniez tot au deseure.
Renart saut sus, plus n’i demeure,
Son charme fist, puis s’en torna,
Selonc le bois un mont trova.
Le pas s’en va lez la ramille,
Sor un fust vit une cornille
Qui de novel s’estoit baignié
Et de son bec aplanoié,
Et encore s’aplanioit.
Sitost conme Renart la voit
Es-le-vos à terre estendu,
Son v… a sachié trestot nu.
La Cornille par aventure
Garda parmi la raméure,
Vit de Renart le v… de fors,
Cuida c’oisel li éust mors.
Ses êles tent en avalant,
Selonc Renart descent volant,
A lui vint et si l’agaita.
Si conme cele l’aproucha
Et ele volt bechier el v…,
Renart saut sus qui son leu vit ;
Par les êles l’a bien conbrée,
La teste li a engoulée.
Entre le bois et la champaingne
S’en va o tot lez la montaingne,
De l’autre part outre le mont
A trové un marois parfont :
Enz est entrez que nus nel’ voie,
Qar il voudra mengier sa proie.
Mengiée l’a, si s’aquatuet
Son chief, son cors qantque il puet.
Del marchois s’en voloit issir,
Devant lui garde et voit venir
Ysengrin qui riens ne l’amoit.
Ysengrin garde, s’el parçoit,
Renart, dist-il, par ça trairez,
Par le mien chief or recevrez
La merite tout entresait
De qantque vos m’avez mesfet.
Grant honte et grant duel me féistes
Qant Hersent ma fame f…
Et mes loviax toz conpissates
Et fils à putain les clamastes :
Sez-tu, Renart, que je feré,
Et quel loiier je t’en rendré ?
Por ce que tu mes niez estoies
Et que par faintise m’amoies,
Et je t’amoie de bon cuer,
Te metrai-je en si haut fuer,
En tel tor et en tel estage
Que n’ert de si haut parentage
Qui mès te puisse fere anui,
Ne tu ne feras riens nului,
Ne te porra mès nul laidir :
Issi le te voudrai merir,
Si te metrai en tel chastel
Où mauvez agait ne cenbel,
Enging, perriere ne befroi,
Ne douteras prince ne roi.
Renart entent qu’il li pramet,
La qeue entre les jambes met ;
Renart voit bien ne puet guenchir
Ne nule part ne puet foïr ;
Vers son oncle moult s’umelie
Et doucement merci li prie :
Oncles, dist-il, l’en dit en plait,
Nus n’amende s’il ne mefait ;
S’à amende m’en laist venir
Je la feré à vo plaisir
Se Diex me doint anor et joie.
Et cil respont, se Diex me voie,
J’ai grant joie qant je le voi,
Par Dieu le Pere en qui je croi,
Jà autre amende n’en prendrai,
Dedenz mon ventre te metrai :
Illeques seras à ostel
Que jà n’en passeras par el.
Moult auroies isnel cheval,
Se ne te puis livrer estal,
Tant que je t’auré trangloti
Et de mon ventre enseveli :
De toi s’esleveront mi flanc,
De toi acuisera mon sanc,
Si acroistrai mon hardement,
Moult m’en douteront plus la gent.
Que fetes-vos que vos n’entrez
En ma geule ? Que demorez ?
Qant ce ot dit adonc descent,
Cort a Renart et si le prent.
Renart enverse entre ses piez,
Or set-il bien qu’il est jugiez,
C’onques nus hons, tant fust chaitis
N’en terre de sarrazins pris,
Ne fu si bien houcepingniez
Con Renart fu et laidengiez.
Son oncle sovent merci crie,
Ysengrin ne l’escoute mie,
Ainz l’a saisi par le chaon,
Sel’ mastine com un gainon ;
Parmi le col qant que il puet
La pel li deront et esquet,
Ysengrin en fait son revel.
Renart a pelée la pel,
Si fu matez, pas ne se faint,
Ne se remue, ançois se plaint.
Qant toz fu las de martirier
Si se conmence à desresnier.
Renart, ne me puis porpenser
De quel mort te face finer :
Dignes es c’on te doie ardoir
Ou mengier qant j’en ai pooir ;
Mès je te voil longue fin fere
Ainz qu’à la mort te voille trere.
Que qu’il à lui issi parole
Des piez li mouse la chavole.
Si con il la geule baoit
Et Renart estrangler voloit,
Si l’en est prise grant pitié,
Remembre li de l’amistié
Qu’il ont tot jors entre eus éue.
Troublée li est la véue
Si enconmença à plorer
Et durement à soupirer :
Desus Renart s’est acroupiz,
Haï ! fait-il, con sui traïz !
Mon mautalent m’a sorporté,
Trop ai vilainement ovré ;
Je n’ai mès cure de deport
Qant je mon conseillier ai mort.
Renart l’oï, un poi s’estent,
Dist li Leus, qu’est-ce que je sent ?
Au cuer li bat aucune vaine
Et si n’en ist feu ne alaine.
Renart se drece seur ses piez
Et dist, sire, ce est pechiez
Qui si malement me menez ;
Ne soiez pas si forsenez,
Vostre niez sui, ce est la some,
Jà mar tendrez vil petit home.
A cest mot garde lez un plain
Renart, s’a véu un vilain
Qui s’en aloit toute la voie :
Si ert chargiez que trestot ploie,
Sor son col portoit un bacon,
Venuz estoit de sa meson.
Renart le vit, si a souriz,
A son oncle dist, ce m’est vis,
Oncles, oez bone novele
Qui vos sera et bone et bele ;
Un bacon porte cil vilains,
Qar le meton entre nos mains.
Ysengrin l’ot, si regarda,
Le bacon vit que cil porta,
Et Renart entre ses piez gist,
Son oncle esgarde, si li dist :
Oncle, dist-il, lessiez m’aler,
Car miez vos porrez saouler
Del grant bacon à cel vilain
Enquenuit et ore et demain,
Que vos ne feriez de moi ;
Et je vos en afi ma foi,
Se orendroit ne le vos rent,
En revendrai à vos present
Dont porrez fere vo plaisir
Et de mon cors tot vo desir.
Le bacon aurez tout entier,
Et se vos nel’ voulez mengier,
Nos en devendrons marchéant.
Que alon-nos ci delaiant ?
Coron li sus, or n’i ait plus,
Bien sai vendre char sanz refus.
Ore en fetes à vostre esgart,
Je en auré la tierce part,
Et vos les deus qui estes grans,
C’est costume de marchéans
Qu’il se déduisent liement.
Ysengrin li mostre la dent,
Et li respondi, par Saint Cler
Vers vilain n’ai cure d’aler.
Je passai hier par une rue,
Un m’en feri d’une maçue
Si que il m’abati tout plat :
Grant honte me fet qui me bat.
Dist Renart, lessiez ce ester,
Or m’estuet mon sens esprover :
Se le bacon ne vos puis rendre,
A une hart me fetes pendre.
Oncle, fait-il, or demorez,
G’irai avant se vos volez.
Tant l’a blandi, tant l’a proié
Qu’Ysengrin li donne congié.
Renart saut sus si vistement
Con s’il n’éust mal ne torment.
Par devant li vilain s’est trez,
Autressi con s’il fust contrez,
Par devant li grant aléure
Tant qu’il vint à la devanture
Son chief covert d’un mantelet.
Qant il fu devant, jus se met
Enz el mileu d’une chariere.
Li vilain fist moult lede chiere
Qant il a véu le gorpil :
Or est son bacon en peril,
Dont Renart estoit forment liez.
Selonc la voie il s’est couchiez,
Et li vilain moult s’esjoïst.
Sa maçue à une main prist
Qant vit que traïnoit ses rains,
Qar bien le cuida prendre as mains,
Mès Renart fist un petit saut.
Dist li vilains, rien ne te vaut ;
Il lesse corre sa maçue,
A Renart roidement la rue,
Sus la croupe li fist un treu,
Puis si le sieut de preu en preu.
Dist li vilain, par Saint Marcel,
Ta pel ert mise en mon mantel ;
Mès moult a entre dire et fere,
Qart Renart li fera contrere.
Tout jors enforce s’anbléure
Et cil engraingne s’aléure.
Li vilain sueffre moult grant paine,
Ne puet aler, faut li l’alaine :
Adonc se prent à porpenser
Qu’il ne porra après aler
Ne que jamès ne le prendra
Tant con le bacon portera.
A la terre l’a jus geté,
Et Ysengrin l’a regardé
Qui près d’ilec le porsivoit
Por véoir que Renart feroit.
Renart s’en fuit touz les galoz
Et li vilains sieut les esclos :
Ysengrin n’a cure d’enchaut,
Au bacon est venuz les sauz,
Sel’ jete sor son chaaingnon,
Fuit s’en à tot en un buisson.
Li vilain pense en son corage
S’il prenoit cel gorpil sauvage,
Que de la pel acuiteroit
Grant part del bacon qu’il portoit,
Et si i prendroit bon colier
Por son mantel fere acesmer,
Mès moult remest de ce qu’il dist.
Li vilain sa maçue prist,
Puis s’en aloit après Renart,
Qui s’en aloit de l’autre part.
Qant li vilain voit si fuliez
Que jà s’estoit tant aprochiez
Qu’il se cuida lessier chaïr
Sus Renart que il vit fouir,
Tot vif le cuidoit as mains prendre.
Qui donc véist Renart destendre
Conme qarrel ist d’arbaleste,
Et cil toz esbahiz s’areste
Qant il vit qu’il nel’ consiévra,
Au déable le conmanda,
Ariere vint, s’en volt porter
Son bacon, mès nel’ pot trover.
Or n’a l’escus ne la maaille,
Mès Renart n’Isengrin n’en chaille.
Qant vit c’ot perdu son bacon,
Onques tel duel ne fist nus hon.
Renart n’ot cure d’el vilain,
Lesse le corre par le plain :
Renart va tant deçà en là
Que Ysengrin el bois trouva ;
Quant il fu venuz au buisson
Si cuida partir au bacon.
Ysengrin ot assez mengié,
Si en estoit moult plus haitié :
Il a véu venir Renart,
Dou bacon a sachié la hart,
Devant lui l’avoit mise jus,
Un de ses piez a mis desus,
Et le bacon avoit repus
De l’erbe et de rainsiaus foilluz.
Sire Ysengrin, ce dist Renart,
Donez moi del bacon ma part.
Renart, fait-il, car vos taisiez,
Encore soiez-vos touz liez
Se je vos claim quite à itant :
Alez-vos ent, je vos conmant,
Que n’i auriez nule part
Ne mès que solement la hart.
Renart ne volt bataille fere,
Ançois li conmence à retrere :
La hart ait qui l’a deservie,
Qar je ne l’ai deservi mie ;
Par Dieu le filz Sainte Marie,
Mauvese est vostre conpaingnie :
Ne puis ci longuement durer,
Vostre congié voil demander.
Onques ne finai de pechier,
Biax oncles douz, je vos requier
Congié, Saint Jaque voil requerre,
Pelerin serai par la terre,
Dist Ysengrin, et je l’otroi.
Renart fu moult en grant effroi,
Quinze jors va à grant baudor.
Onques Renart ne fist sejor,
Si a Ysengrin conmandez
Au vis déables, as maufez.
Va s’en Renart son grant chemin,
Or velt engingnier Ysengrin ;
Bien li cuide le bacon vendre
Dont il ne li volt sa part rendre ;
Bien a la costume au gorpil.
Devant lui trouva un mesnil,
Là s’en torna, ce est la voire,
Et vint au cortil au Provoire :
Raz i trova à grant plenté.
Diex ! dist Renart, bien ai erré,
Qar fain avoie à desmesure,
Diex m’a doné bele aventure.
Des raz engingnier moult se paine,
Arestez est à moult grant paine,
Si aperçut un gresillon.
Renart en fu en grant friçon,
Qar péor a qu’il ne l’encuse.
Tout contreval le cortil muse,
Si escoute le chantéor
Qui el cortil est près del for.
Le gresillon le connut bien,
Tot coiz se tint qu’il ne dist rien :
Renart en tint le chief enclin,
Clerc sevent bien chanter latin,
Je vos donroie bon loiier,
Dant Clerc, dites vostre sautier.
Le Gresillon prist à garder
Conment Renart vodra ovrer ;
Bien s’aparçut qu’il l’agaitoit.
Qant Renart vit qu’il l’esgardoit
Et qu’il voloit savoir sa fin,
Si en ot le chief plus enclin.
Lors li a conmencié à dire,
Dant Clerc, volez-vos ci escrire ?
Se voulez reconmencier
Por mon pere vostre sautier,
Je vos en sauroie bon gré,
Si en seriez bien loiié,
Et je issi fere le voil.
Le Gresillon dist grant orgoil :
Tesiez-vos, traïtres provez,
N’avez pas ci bergiers trovez,
Trop me regardez de put oil :
Par Saint Denis enquerre voil
De quel pié, fet-il, vos clochiez.
Envers Renart s’est aprouchiez,
Qar il le velt de près gaitier ;
Et Renart qui se velt vengier,
Qui a péor de son aguet,
De son braz une mace tret,
Si l’en a esmé à ferir.
Le Gresillon nel volt soffrir,
Ançois avoit jeté un bret.
Et Renart qui tant set d’aguet,
A la mace jetée jus,
Frobert, fet-il, il n’i a plus,
Bien voi se je te lesse vivre
Tu me porras encui bien nuire.
Lors se porpense qu’il fera
Et conment il s’en vengera :
Bée la geule et muet les dens,
Qu’il volt Frobert englotir ens.
Le Gresillon li dist, Renart,
Con tu es or de pute part !
La male passion te fiere,
Moult es de mauvese maniere.
Or ont Déable un pelerin
Qui la gent mordra en la fin ;
Se tu m’eusses engoulé,
Mort m’éusses et afolé.
Moult ai esté près de morir,
Diex m’a gari par son plaisir :
Je me rendré dedens enclos,
Et tu te tiengnes par defors.
Et dist Renart, je estoie yvres,
Je cuidoie ce fust ces livres ;
Certes se je mengié t’éusse
Trestotes tes chançons séusse.
Moult sui sorpris de grant malage,
Que j’ai fait maint pelerinage,
Si puez bien savoir et penser
Que je ne voi mie bien cler.
Que vaut ? Nel’ puis choisir à l’uel,
Certes moult durement me duel,
Car trop sui plain de grant malage.
Je ai fet maint pelerinage
Qui mon cors ont moult fort pené :
Tel mal ai dedenz moi cové
Par qoi me covendra finer,
Bien voi ne puis longues durer :
Certes je sui un chaitis hon,
Mès fetes moi confession,
Car il n’a ci entor nul prestre,
Et vos savez bien tot cel estre,
Qar clers estes et bons et sages.
En trestoz mes pelerinages
Vos recevré, se Diex me voie,
Qar je sai bien se je cerchoie
Tout cest païs ci environ,
Ne troveroie plus preudon.
Li Gresillon conmence à rire,
N’avoit soin de sa chançon dire,
Bien connoissoit les fez Renart,
Si li a dit, se Diex me gart,
Renart, ne soiez en effroi
De confesser, que jusqu’à poi
Aurez prestres à grant plenté,
Dire porrez vo volenté.
Endementiers que il parloit
Et que au parler entendoit,
Ainz que se fussent regardé,
Sept gaingnon vienent descoplé ;
En après vienent venéor,
Arbalestier et chacéor.
A poi que Renart n’est malmis
Des gaignons qui si l’ont sorpris.
Uns des veneres huie et crie,
Renart entent la taborie,
Ne set que puisse devenir,
Si s’apareille de foïr,
Et li venéor vet après,
Si descouple les chiens engrès.
Or Tribole ! or Clarenbaut !
Par ci fuit le Gorpil, Rigaut !
Or tost Plesence, après alez :
Ses levriers a toz descoplez.
Renart s’en va grant aléure,
Li levrier viegnent à droiture ;
Moult menace le Gresillon
Qui li a fait tel traïson,
C’onques ne l’en volt acointier.
Qant il vit les gaingnons coitier
Et lor cors ot aparcéu,
Et qant Renart ot tant coru
Qui fu amatiz et lassez,
Vers le for se r’est apassez
A ses piez qu’il ot enbouez
Et de l’arzillierre enterrez ;
Sor le partuis saut les galoz
Où li Gresillon fu encloz
Par cui il est tant dommagiez :
Or est-il bien de lui vengiez,
Sa meson a si estoupée
N’en istra mès de ceste anée.
Renart ne fet pas grant séjor,
Ainz saut sor la creste del for :
Là se quati, li chien l’outrerent,
Le flair perdirent, sel’ passerent ;
Et qant Renart les vit passez
Et que il lor est eschapez,
A terre vint les sauz menuz,
Droit au pertuis en est venuz
Où li Gresillon est enclos,
Ses gas li lance par defors.
Preudons, fet-il, se Dex t’ament,
Es-tu or laiens chaudement ?
Je cuit bien t’i puez estuver,
Car point de froit n’i puet entrer,
Tu n’az garde de la gelée,
Que j’ai si estoupé l’entrée,
Se Diex me gart, que ne puis plus.
Or gar que soies bons renclus,
N’aies cure de lecherie
Ne de mauvese coardie ;
Et se riens fetes toutevoie,
N’avez voisin qui pas vos voie :
Par eus n’aqeudrez mauvès los,
Qar je vos ai moult bien enclos.
N’avez garde, par Saint Mandé,
Qu’en vos voie de cest regné,
Votre aferes est bien celez.
Filz à putain, escoz pelez,
Que honiz soit qui vos porta
Qant ele ne vos avorta !
S’en éust esté la pel tendre,
Où péustes hardement prendre
De moi fere si mal mener :
Or povez laienz orguener
Se vos savez rien par cuer dire,
Que vos n’i verrez goute à lire,
Ce me semble, à vostre sautier.
Je cuit qu’il vos ert bien mestier
Que sachiez que que soit par cuer,
Ne foi que doi Hersent ma suer
Or puis-je bien ça defors fere
Trestot qant qu’il me porra plere ;
Ainz ert ceste anée venue
Que vos i aiez mès véue.
Or vos tenez laienz toz coiz
Que vos n’avez garde d’effroi :
Je garderez par ça defors
S’il i a gelines ne cos,
Ne riens que je puisse mengier,
Que j’en aroie grant mestier.
Ainssi dist Renart son gabois,
Et li chien s’en vont vers le bois
Qui l’orent lessié sor le for.
Si lor est avenu cel jor
Qu’entre le bois et le chemin
Encontrerent sire Ysengrin.
Déables li ont amené
Qui li avoient destiné :
Onques nel’ vodrent deffier,
Sa pel conmencent à peler,
Et il durement se desfent,
Qui il consieut as denz le fent :
La bataille est, par contençon,
De son dos volent li flocon.
Renart le vit, si en fu liez,
Or est bien d’Ysengrin vengiez.
Prent la bataille à regarder,
Et Ysengrin à ramposner :
Mar i menjastes le bacon,
Ore en avez le guerredon ;
Maufez vos firent tant mengier,
Le cors éussiez plus legier
Se j’en éusse eu la moitié,
Vos n’éussiez pas tant mengié ;
Miex fust qu’en éusse ma part.
Ysengrin aperçoit Renart,
Et voit qu’il est liez et joianz
De ce qu’il est à mal parenz :
Volentiers s’en alast vers lui,
Mès li chien li font grant anui
Que nel’ lessent cele part trere.
Et Renart se met el repere,
Vers Malpertuis s’est adreciez,
Ileques s’est moult aaisiez.
Ysengrin est en mal deport,
Qar illec ot un gaignon fort ;
Ysengrin asailli as braz,
Or est-il chaoit en mau laz,
Car il li présente les denz
Et li boute en la pel dedenz,
Et il les blece malement
Et les ocist defforcément.
Li chien ne porent endurer,
Ysengrin lessierent ester :
Tornez s’en est grant aléure
Et vet aillors querre pasture
Con cil qui estoit moult dolent.
Renart menace durement
Et dist se il le puet tenir,
De male mort l’estuet morir.
Or puet menacier durement,
Qar Renart le fera dolent ;
Ainz que viengne l’Acension
Li vendra-il chier le bacon
Dont il li ot donné la hart,
Encor le tendra por musart.
- ↑ Al. Ferez trois cous sor le lintel.