Le Roman du Renart - D. M. Méon — 1826/55
Einssi com Renart s’en fuit au bois à tout un oison cuit, et Tyebers li chaz remest en la maison, si i fu laidement batu.
Renars dist à Tibiert, je sens
Rost au flair dont apriès je pens
Me gloute de geule art apriès.
Et dist Tibiers, alons adiès,
Car mes las ventres rost desire.
Lors traversent andoi un pire,
Et vienent droit à le maison
U en avoit rosti l’oison,
S’estoit mis entre deus platiaus.
A Renart fu cis geus moult biaus,
K’il n’avoit nului par laiens,
Où gardin estoient les gens
U il juoient as eskiés.
Renart, c’a el ne pense adiès
K’à decevoir son conpaignon,
Dist, conment arommes l’oison
K’est mis en sauf en le despense ?
Taisiés, ce dist Tibiers, g’i pense.
Viers le despense andoi en vont,
Lès l’uis le pot à le craime ont
Trouvé ; Tybiers bien s’en refait,
Moult desiroit et craime et lait ;
Mais Renars moult poi en lapa
L’oison saisi, à tout s’en va.
Si caus fu l’oison qu’il dist, wis !
A tout s’en va droit parmi l’uis :
Au passer ataint l’uis un poi
Si que li huis clost apriès soi.
Et Renart fuit au bos moult tost,
En sa geule l’oison en rost ;
Où bos s’assist, tout le menga,
Que nule essaie fait n’en a.
Tout a mengié et car et os,
Et Tibiers li cas est enclos
En le despense ; à miauwer
Prist si haut c’on l’oï tout cler
Où garding. Tout en sont issu
Et puis sont ensemble acouru.
En le despense oent Tibiert,
Li sire en jure Saint Lambiert
Que cist cas a mengié l’oison,
Mais il en ara d’un baston
Sen louier. Lors conmande à clore
Huis et feniestres, car enclore
Violt le cat, s’il puet, et tuer.
Lors a fait à cascun douner
Un grant baston et fist ouvrir
L’uis, et Tibiers prist à fuïr
Sus et jus parmi le maison.
Apriès lui ruent maint baston,
Caçant le vont entor le fu,
Ainc mais à tel meskiés ne fu
Tibiers ; si près dou fu ala
K’en pluseurs lius se piel ulla,
En une loge s’en fuï
U ot estrain, là se quati :
Li vif carbon qui se piel prisent,
L’estrain errant trestout esprisent,
Si qui li maisons arst trestoute,
Tibiers li cas d’ardoir ot doute,
Dou solier saut ens es fossés
Qui d’aige estoient priesque rés.
Outre s’en vait, que bien noer
Sot. Liés fu quant pot escaper,
Ou bos vint ù Renart trouva,
Dormant le vit si l’esveilla.
Et quant Renars fu esvilliés,
Si s’est plus de cent fois sainiés,
Et dist, nomini dame, aimi !
Tibiert ki t’a atiré si ?
Bien sai, Tibiert, que là ù fus
N’iert mie tous estains li fus,
Et c’auwe i fu à boin marcié,
Car tout ton cors en voi moillié.
Renars, ce dist Tibiers, biaus sire,
Pluseurs fois avés oï dire,
Et si l’ai oï recorder,
Cius ne doit mie trop canter,
Biaus sire, qui est à ceval,
Ne plourer cius ki est où val,
Car fortune et aventure ont
Pooir sour trestous ciaus dou mont.
Renart, se Jhesus me sekeure,
Teus rit au main ki au soir pleure,
Et si redist-on moult souvent
Cascuns ne set ç’à l'oel li pent.
Se je sui uslés et baigniés,
Ferus, batus et bufregniés,
Par vous fu, si con mes cuers pense,
Car vous closistes le despense,
Et si en portastes l’oison
Dont fait m’avez maise parçon ;
Mais par Dieu je me clamerai
A Court de vous quant g’i venrai.
Lors conmença Renart à rire,
Et puis li dist, Tibiert biaus sire,
De moi vous plaigniés, je me claime
De vous quant mengastes le craime
Où pot par vous, c’ainc n’i parti.
Respont Tibiers, ce fu par ti :
Se tu ne t’en fuisses partis,
Li pos te fust à droit partis
De le craisme et s’éusses part
A tous les biens c’on i depart ;
Car on m’i vint tel bien partir
C’à poi c’on ne me fist partir
Le cuer où ventre : tel partie,
Renart, vous éust-on partie.
Respont Renart, j’aim miex ensi.
Lors atant ont de lonc coisi
Venir de Cistiaus Dant Abbé
Sour un grant palefroi monté :
Od lui des moines sis au plus,
Et avoec deus convers barbus.
L’un des convers avoit trosé
Un hairon c’on avoit douné
Dant Abé pour ç’ou qu’iert sainiés
Uns chevaliers ki ert ses niés.
Sitost com Renars l’avisa,
A Tibiert dist, sés que voi là
Par de derriere cel convers
Un hairon geté en travers,
Dont ce me sanle grans outrages,
Car deffendus lor est carnages
De car au mains à tés rendus.
Et dist Tibiers, il soit pendus,
S’il onques puet, ki lor laira !
Dou tolir aumosne sera,
Car à mengier n’est pas lor ruille.
Priès de nous au giet d’une tuile
Sont, Renart, dites que ferés,
Et dist Renart, jà le verés.