Le Roman du Renart - D. M. Méon — 1826/54

Texte établi par D. M. MéonTreuttel et Würtz (Tome 4p. 247-251).

Einsi com Belins li moutons vint devant le Roi et aporta son aignel mort, et si vint Beline la berbis et Chantecler le coc et Pelez li ras et Chenue la soriz


Ançois que cascuns fust assis
Leva par le sale uns grans cris,
Car Belins li moutons aporte
Giermete se fille k’ot morte,
Ce dist, Ysengrins et mordrie :
3060Au Roi en fist grant crierie,
Biéline li feme au mouton
En vait belant par le maison.
Atant es le coc Cantecler[1]
C’au Roi conmença à crier
Venjance dou laron cuiviert,
C’on nomme l’escoufle Hubiert,
Ki tous mes poucins a tués,
Et avoec tous mes oés humés.

Empriès le coc Pelés li ras
3070En vint à Court criant hélas,
Il et Kenue li soris
De lor fil ke lor ot ocis
Mitous li cas, li fius Tibiert.
Li Rois en jure Saint Lambiert
Cist forfait seront amendé.
Lors conmande k’enprisouné
Soient cil de cui on se plaint.
Fait fu, juré en a maint Saint
Li Rois que faite en sera lois
3080Et jugemens loiaus et drois.
Renart Rois Noblon regarda,
Et dedens son cuer se pensa
C’orendroit se puet bien vengier
D’Ysengrin k’il n’a mie cier.
Renart dist au Roi, entendés,
Sire Rois, por quoi atendés
Que vous ne pendés ces mordreurs ?
S’il vivent, plus c’ert grans doleurs ;
Lor jugemens est trestous fais,
3090Car sor eaus est provés li fais.
Li Rois fist Mitoul ateler
Et Hubiert et puis traïner
Et pendre. Ysengrin ot respit,
Mais ce li valut moult petit,
Car bien matin fu traïnés
Dusqu’as fources et fu montés

Amont l’eskiele au caaignon,
N’i faloit se l’eskiele non
A tourner k’il ne fust pendus,
3100Se ne fust çou c’au Roi venus
En est li corbiaus Tiesselins
C’au Roi a dit : Sire, Ysengrins
N’a coupes où fait, mès ses fius
Pincars le fist, si m’aït Dieus.
Lors fu Ysengrins delivrés
Et Pincars ses fius traïnés
Et pendus en haut au gibet
C’on ot boine preuve dou fait.
Ensi com li Cours departi
3110Et que Canteclers s’en issi
Et li pluseur autre baron,
Renart coiement à laron
Se mist où bos et s’enbusca,
Et si que Cantecler passa,
L’ainsné fil le coc Cantecler
Couru lués Renars estranler,
Et si netement le menga
Que nule essaie n’i laissa
Fors les plumes et les ossiaus.
3120Encor fist plus li desloiaus,
Si qu’Isengrins s’en dut aler,
Li fist sa plice descirer
A Grignart et à Roeniel,
Ces deus mastins, car lor caiiel

Furent par Ysengrin ocis,
Ce li ot Renart seure mis,
Dont Ysengrins s’en conbati
Encontre Grignart puissedi
Devant le Roi en camp mellé ;
3130Et fu séu par verité
La traïsons que faite en ot
Renart, c’ainc tenir ne se pot
De mal faire et de traïson.
Hiersens li leuwe de randon
S’en fuit, Ysengrins d’autre part ;
Mais il a laissié bien grant part
Des peus de son gris peliçon,
Qu’el camp en gisent li flocon.
Et Hiersens où bos s’en fuï,
3140Et Renars toudis le sivi,
Et de courre tant se lassa
Hiersens, k’ens où bos se pasma.
Quant Renars li vit si menée,
Si en a fait sa destinée,
Et puis le laissa toute coie,
De li se part et tint sa voie.
Enmi le bos Tibiert le cat
Trouva ki de dolour debat
Sen pis, ains tel doel ne vit nus,
3150Pour son fil ki estoit pendus,
Et s’iert de fain si esragiés,
C’à paines pot estre sour piés

Renars le voit, sel’ salua
Et Tybiers respondu li a :
Renart, toi hé et tes salus,
Car par toi fu mes fius pendus.
Et Renart d’un et d’el dit a
Tant que Tiebers li pardouna,
Si qu’il cuida qu’il n’euist coupes
3160En çou. Renart li fist cent loupes
En derriere, et tant le blada
Que trestout le doel oublia
De son fil, mais sa fain ne pot
Oublier, que si très grant ot.
A Renart dist, bien mengeroie.
Renart respont, jou si feroie.



  1. Al. Atant es Cantecler le coc
    ccccC’au Roi en vint criant coc, coc,
    ccccEt si disoit, vengence, Roi ;
    ccccDe duel est mes cuers si destrois
    ccccDe Hubert qu’est leres provés
    ccccQui tous mes pouchins a tués.