Le Roman du Renart - D. M. Méon — 1826/27
C’est la branche de Renart si come il fu Mires.
Se or vos voliez tesir,
Seignor, jà porriez oïr,
S’estiez de bone mémoire,
Une partie de l’estoire
Si com Renart et Ysengrin
Guerroierent jusqu’à la fin.
Se vos me prestez voz oreilles
Je vos vodrai dire merveilles
De Renart qui est un maufez :
Touz sui espris et eschaufez
De Renart dire en tel endroit
Sanz delaiement orendroit,
Q’ainz n’oïstes en si bon leu
De lui et d’Ysengrin le Leu.
Ce fu entor la Pantecoste,
Icele feste qui tant coste,
Que Dant Nobles tenoit sa feste,
Asanblée i ot mainte beste,
Qar toz li païs en iert plains.
Là n’osast pas estre vilains
Que laidement ne fust botez.
N’en i ot nul ne fust dotez
Et de haut pris et de haut non,
Onc n’i ot se frans homes non
Qui por honorer lor seignor
Fesoient feste la greignor
Que nus hons deviser séust,
Einz n’i ot celui qui n’éust
Robe au mains de vair ou de gris.
Mais li Chastelains de Val-gris,
Dant Renart de qui toz max sort,
N’ert pas adonc venuz à Cort ;
Neporquant si fu bien mandez,
Voire par foi et demandez
Plus de dis foiz, voire de vint,
Mès onc por ce plus tast n’en vint,
Ne jà qu’il puisse n’i vendra.
Mais li Rois, ce cuit, li manda
Sel’ puet tenir n’aura respit
Ce qu’il a sa Cort en despit
Et dit, seignor, à vos me claim
De Renart dont j’ai tant reclaim,
Cel traïtor, cel deputaire :
Ne devez pas celer ne taire
Le bon conseil se le savez.
A vos si con à mes privez
Pri et conmant que orendroit
Le me jugiez et selonc droit
Dou despit et selonc raison,
Après vos dirai l’achoison
Se vos plaist et vos conmandez
Por coi vos ai ici mandez.
Qant il ot sa raison finée ;
Chascuns a la teste enclinée,
Moult sont forment pensif et morne :
Del jugement trestuit à orne
N’i ot un seul qui osast grondre,
Li uns lest à l’autre respondre.
Chascun se test, chascuns escoute,
Chascuns se crient, chascuns se doute
S’il fait sor Renart jugement
Si qu’il li tort à nuisement,
Bien set que honte li fera,
Jà si bien ne s’en gardera,
S’il en puet leu ne aise avoir :
Ice puet bien chascun savoir,
S’en est chascuns en grant destrece.
Maintenant Ysengrin se drece
Cui Renart ot fait mainte guenche,
Or est honiz s’il ne s’en venge,
Que jamès n’en ara tel aise :
Dist Ysengrin, Rois, or vos plaise
A escouter que je voil dire.
Je sui vostre homs et vos mes sire,
Por ce si vos doi conseillier ;
Ne s’en doivent pas merveillier
Cil lui devers Renart s’apendent,
Mès ore escoutent et entendent,
Qant autres ne s’en velt movoir
Je m’en irai parmi le voir.
Rois, fait li Leus, or m’entendez
Del jugement que demandez,
Il i afiert moult grant esgart.
Il me senble de moie part,
Ensi m’aït Sainz Lienarz,
Que moult vos a meffet Renarz
Qant il vostre conmandement
A trespassé si faitement,
Ne daigne devant vos venir :
Bien l’en devroit mesavenir.
Certes grant honte vos a fete
Cil gars, cil leres, ceste sete,
Mandé l’avez, bien un mois a,
Mès onques tant ne vos prisa
Qu’il vos daingnast contremander,
Ne jor ne respit demander.
Rois, or en prenez la vangance
Por le despit, por la viltance,
Por la honte qu’il vos a fet.
Je di par droit sanz autre plet
Que sa terre faciez sesir,
Si en faites vostre plesir,
Et le faites metre en prison,
Jà n’en doit avoir raençon,
Que li autre ne s’i amordent.
Li Rois et tiex i a s’acordent
Au jugement et à l’esgart
Qu’Ysengrin a fait sor Renart,
Et tiex i a qui moult en poise,
Mès il n’en osent faire noise,
Que trop estoit Renart haïz ;
Le jor i fust morz et traïz
Que jà n’en fust resuscitez,
Ce est la fine veritez,
Se ne fust Dant Tybert li Chaz
Quel delivra par son porchaz,
Qui se porpense del hontage
Qu’il li ot fet et del outrage
Qant il el piege le fist prendre.
Mès encor li cuide chier vendre
Se il en puet venir en leu :
Por ce li viaut contre le Leu
Devant le Roi Tybert aidier.
Huimès l’orrez por lui plaidier,
Car volentiers le secorroit,
Savoir s’acorder se porroit
A Renart qui est corociez.
Lors s’est Tybert en piez dreciez,
Si gite sor son dos sa qeue
Et sa lange aguise et desneue
Por bien parler, et si herice
Trestoz les peus de sa pelice.
Tuit se tesent parmi la sale,
Et Tybert defferma sa male
Et dist au Roi, sire, or escoute,
Lai le coissin, si pren la coute ;
De tote riens est-il droiture
C’on i esgart sens et mesure,
Rois, or escoute ma parole.
N’a pas esté à bone escole
Ysengrin por jugement fere,
Por ce li venist miex à tere
De faire esgart ne jugement
Dont l’en déist après qu’il ment ;
N’est pas li jugement loiax
Que il a fait, einçois est fax.
Jà hom qui est bien droituriers
Ne jugera autre en derriers ;
D’autre part ne fet pas à croire
Chose qu’il die, c’est la voire,
Et ce poez-vos bien savoir
C’onques ne porent pès avoir
Li vassal nul jor de lor vie,
Einz sont par mal et par envie
Entr’aus et par mortel haïne
Qui longement lor est voisine,
N’onques ne furent bien ensenble.
Por ce vos di et si me samble
Qu’Ysengrin a fet sor Renart
Fol jugement et fol esgart.
Trop est d’aus deus la guerre amere,
Tort a li Leu qui son conpere
Viaut forjugier en tel maniere
Et de la Cort giter arriere.
Sire, mavès conseil vos done
Cil qui de ce vos araisone
Que Renart soit deseritez
Et fors de vostre Cort gitez.
Ne l’en créez pas, biaus douz sire,
Savez que de Renart puis dire ;
N’avez gaires en vostre terre
Baron miex sache mener guerre
Ne contrester ses anemis,
Ne qui miex s’en soit entremis,
Si vos porroit avoir mestier
Se guerre voliez traitier.
Se besoing vos sordoit, ce cuit
Que plus vos aideroit que tuit
Li baron de vostre maison :
Por ce me sanbleroit raison
Qu’ainçois en féissiez esgart,
Féissiez semondre Renart
Par uns de vos pers et mander.
Ne déussiez pas conmander
A semondre par un garçon
Tel chevalier ne tel baron.
Par Dieu, sire, moult me merveille
Que d’Isangrinz créez conseil :
Jà por son dit, ce est la some,
Ne devez-vos honir franc home.
Par Dieu, sire, ce est la pure,
Trop seroit laide chose et dure
S’il n’i avoit autre achoison.
Rois, esgardez à la raison :
Car qui raison ne set noiant[1],
Sa bataille va tout avant,
Et ne por oc selonc mon sens
Vos en dirai ce que j’en pens.
De pechéor misericorde,
D’omes ocis prent-on acorde :
Bons Rois, or le faites semondre
Qu’il viengne à Cort et por respondre
De qant que demander sauroiz,
Jà autre bon conseil n’auroiz ;
Et lors se il ne vient à Cort,
N’est merveilles se mal en sort,
Qar se ce plaist viaut refuser,
Ne l’en doit mès nus encuser,
Car ce resanbleroit enfance,
Einçois en prent lors ta vengance.
Tyberz se test, ne vost plus dire,
Et li Rois si conmence à rire,
Et li baron dient ensemble,
Bien dist Tybert, si con nos sanble.
Lors ot Ysengrin moult grant honte,
Qant Tybert ot deffet son conte ;
Trestuit le prenent à huer,
Sachiez moult li puet anuier,
Et li Rois par le hu se lieve.
Seignor, fait-il moult par me grieve
Qant cel cri avez tant tenu,
Ne somes pas por ce venu :
Or laissiez le cri et la noise,
Et de Renart qui si me boise
Me conseilliez qu’en porrai faire
Et à quel chief en porrai traire.
Volentiers i envoieroie
Un prodome se le savoie.
Sire, dist Belins li mostons,
Nos entendons et escotons,
Se vos i volez envoier
Ne vos en estuet nul proier,
Et je respons por toz ensenble
Que c’est le mainz que il nos sanble,
Si conmandez qui vos plaira
Le mesage et il le fera.
Belin, ce dist Nobles li Rois,
Moult estes sages et cortois,
Jà mauvès conseil ne donez,
Savez ore que vos ferez,
Distes Roonel le mastin
Qu’il soit devant moi le matin
Toz aprestez de la besoingne
Et qu’il i voist sanz nule essoingne :
Ne puis avoir meillor mesage,
Ne plus delivre ne plus sage.
Roonel l’ot, en piez se dresce
Et parmi les autres s’adresce
Devant le Roi, si li a dit :
Sire, sire, se Diex m’aïst,
Je n’ai plus cure de respit,
Ainz fornirai sanz contredit
Le mesage s’en m’i envoie,
En son païs sai bien la voie.
Va dont, fait li Rois, si li di
Que devant moi soit mercredi
Prez et garniz de soi deffendre,
Ou se ce non jel’ ferai pendre
De la semonce et dou despit
Dont il prist par soi le respit.
Portez mes letres séélées,
Gardez ne li soient celées,
Et se cest mandement refuse
Et par ses vanvoles s’escuse,
De la moie part le desfie,
Si l’apele de felonie.
Rooiniau li respont, biau sire,
Tot ce li saurai-ge bien dire
Si que riens nule n’i faudra,
Ou tel chose qui miex vaudra.
Dou Roi prent congié, si s’en torne,
A son tref vient et si s’atorne
Alains qu’il puet et s’apareille.
Sa mesnie moult se merveille
En quel leu il s’en viaut aler,
Si l’en ont pris à apeler.
Sa feme l’a à raison mis,
Dites, fet-ele, biax amis,
Por quel afaire, por quel ovre
Faites-vos ce ? Cil li descovre
Qu’el mesage le Roi ira,
Que li Rois moult prié l’en a
Por Renart à Cort amener,
Et je me voil, fet-il, pener
De tot son voloir acomplir,
Por ce faz mes males emplir
Et bien atorner mon afaire,
Que ne vodroie envers lui faire
Chose dont se déust irier.
Le matinet à l’esclerier
M’estuet movoir, Diex m’en avoit !
Sire, dist-ele, einçois otroit
Que il vos en puist venir deulx,
Si fera-il, si m’aïst Diex,
Vos en aurez anui et honte :
Onques ne vi ne Roi ne Conte
Qui de Renart s’entreméist,
Qu’en la fin mal ne l’en venist.
Déanble vos ont fait si sage
Que vos avez enpris mesage
A porter à Renart barat :
Manbre-vos de Tybert le Chat
A qui fist panre tant mal mors,
Et de Belin et de Brun l’Ors
A qui il fist perdre la pel
Des orailles dusc’au musel.
Por la char bieu ne savez-vous
C’onques nul bien ne sot li rous,
Cil qui tant set de pute estrace,
Et or quidiez que bien vos face !
Si m’aïst Diex, moult me merveil
Où vos avez pris tel conseil ;
Bien sai se vos me créiez
Que jà cele part n’iriez.
Dame, dame, par Saint Mandé !
Qant li Rois le m’a conmandé,
Et por le cors Saint Boniface,
Dont n’est-il droiz que je le face ?
Ne fust pas droiz, se Diex m’aïst,
Que je li éuse escondit
Chose que li péuse faire ;
Et puis c’ai empris cest afaire,
Voirs est li consauz en est pris.
Se j’ai à ceste foiz mespris,
Une autre foiz me garderai,
Mès cest mesage fornirai
Qant il li vient à volenté,
Puis que li ai acréenté,
Que jà por home nel’ lerai.
Sire, fet-ele, or m’en terai,
Car bien voi que riens n’i feroie
Ne por riens ne vos retendroie.
Atant lessierent le pledier,
Li lit sont fait, si vont couchier
Jusqu’au matin à l’ajornée.
Einçois que l’aube fust crevée
S’est levé, si a pris congié
Que il n’i a plus delaié.
Montez est, si s’en est tornez,
Que il n’i est plus demorez :
Le grant troton s’en vait à force
La matinée tote aorce,
Bien set tenir la voie droite.
Tant se haste, et tant s’esploite,
Tant chevauche bois et garane
Qu’il est venuz à Theroane.
Renart, qui se dotoit de guerre,
Avoit fait porchacier et querre
Charpantiers de plusors manieres
Qui li fesoient ses perieres
Qui où chastel erent asises,
Et mangoniaus de maintes guises,
Et bones portes coléices
Li fesoient devant ses lices.
Ses fossez fesoit redrecier
Et ses passages rafaitier
Que l’en nel’ poist damagier.
Atant ez-vos le messagier
Roonel qui les letres porte,
Renart trueve devant sa porte
Qui de lui ne se prenoit garde.
Par derriere son dos regarde
S’a véu venir Roonel,
Sachiez ne li fu mie bel,
Que vers lui n’a mestier treslue.
Renart, mes sires vos salue,
Fait Roonel, li miaudres Rois
Qui soit en la terre as Irois :
C’est li miaudres que j’ainz véisse.
Et dist Renart, Diex le garisse !
Or vos conterai mon mesage,
Fait Roonel, sanz nul outrage.
Renart, fet-il, li Rois vos mande
Tot à estros et vos conmande,
(Vez ces letres à testemoingne)
Qu’à lui veingniez sanz autre aloingne
Dedenz sa Cort fere droiture
Del despit et de la laidure,
Devant li soiez mercredi,
De la seue part le vos di.
Mespris avez vers vo seignor,
Onques mès hom tel deshonor
Ne fist à son seignor en terre.
L’autre jor vos envoia querre
Et vos n’i daingnastes venir,
Bien vos en doi mesavenir :
Par moi vos en semont encore
Et par cez letres, ne sai ore
Se vos i daingnerez venir ;
Se de ce li volez faillir,
Li Rois méismes vos deffie.
Et dist Renart, ce n’i a mie,
Fox est qui vers seignor estrive,
Jamès à nul jor que je vive
Ne ferai rien qui li desplese,
Einz souferroie grant mesese :
Jà mar en serez en dotance,
J’irai à lui sanz demorance.
Or m’ont à lui mellé si home,
Mès par les Sainz c’on prie à Rome
Onques son mesage ne vi,
La moie foi vos en plevi.
Mès tel ne peche qui encort,
Or irai avec vos à Cort
Oïr qu’il me demandera.
Tot qant que il conmendera
Ferai sanz contredit de rien.
Dist Rooniau, vos dites bien,
Si en serez tenu por sage.
Or ai bien forni mon mesage,
N’i a dont mès fors del errer,
Faites tost vos chastiax fermer,
Car il vos covient, ce vos di,
Qu’à la Cort saiez mercredi,
Et si vos en dirai le voir,
Je ne voil pas sanz vos movoir,
Einz en irons endui ensemble.
Renart respont, ce bien me semble,
Et je lairai ci mes ovriers
Qui overront endementiers.
A ces paroles s’en tornerent
Cil qui onques ne s’entr’amerent,
Si se metent par uns arez.
Or est Renart moult esgarez,
Si va moult ses temples gratant,
Et Rooniaus s’en va devant
Qui l’amoneste de troter.
Et Renart se prant à froter
Et va tot belement derriere,
Si se porpense en quel maniere
De Roonel se partira
Et conment le conchiera.
Tant chevauchierent li vasal
Qu’il sont venu où fons d’un val
Devant une vile champestre.
Par devers la vile à main destre
Avoit vingnes, que bien m’en membre,
Et fu al entrer de setembre.
Vers les vingnes s’est adreciez.
Renart qui moult iert corrociez
Por Rooniau qui si l’esmaie.
Il garde et voit soz une haie
Une céoingnole tendue
C’uns vilains i avoit tendue,
Qui des vingnes avoit la garde.
Bien la quenut et bien l’esgarde,
Et vit le morsel en la corde,
Mais n’a talent que il i morde,
Einz jure qu’il i fera prendre
Son conpaignon et entreprendre.
Se il moult très bien ne se gaite.
Mainte traïson aura faite,
Encor viaut-il faire à cestui,
Ou tort à bien, ou à ennui.
Savez conment l’a decéu ? ·
Qant l’enging a aparcéu,
Devant le laz qui ert tenduz
S’est mis Renart toz estenduz
Agenoillons et merci crie
Au Créator et si li prie
Qu’il le gart des mains au gaignon
Dant Roonel son conpaignon.
Lors s’est Roonel regardez,
Renart, fait-il, por coi tardez ?
Qant vos devez venir avant,
Por coi alez-vos demorant ?
Levez d’ileuc, si en venez,
Vos n’estes mie bien senez :
Rendre vos covendra raison,
Por coi querez-vos achoison ?
Por coi alez-vos delaiant
Ne de la Cort si retraiant ?
A mal éur, ce dist Renart,
Compainz, ne savez que je faz ;
Je faz ci ileuc mes proieres
A ces reliques qui sont chieres
Et de granz vertuz esprovées :
Moult sont ci ileuc ennorées,
Mais vos iestes tant faus et grainz
Que vos n’avez cure de Sainz.
Conment, Renart, dist Roonel,
Es-ce saintuere novel ?
Oïl, ce dist Renart, biau sire,
Et savez que je vos puis dire
Je ne quit pas qu’en tote France
Est reliques de tel puissance
Ne où avaingne tel miracle,
Néis as poisons Saint Romacle.
Si vos di bien de verité
Que nus n’a tele enfermeté,
Se il aproche au saintuere
Que jamès jor ait puis contraire,
Ne nule beste, si la toche
Ne à ses iauz ne à sa boche,
Qui jamès soit envenimée
Dès qu’ele en sera aprimée.
Bien sot Renart gent amuser
Et soi par parole escuser ;
Moult set de torz, moult set de guile,
Que venter m’en péusse en vile,
Mais or m’en sui si mal gardez
Qu’à honte en serai regardez.
Tant fait que à force l’afole
Et va près de la céoingnole,
Et tient bien la parole à voire
Que Renart li a fait acroire.
Li morsiax qui fu en l’enging,
Fu de fromage de gaain,
Et li laz estoit estenduz
Par dessus deus paissons fenduz.
Moult estoit bien la corde mise
Par tel enging et par tel guise
Que se Rooniaus vient avant,
Ou par derriere ou par devant,
Et il tent le groing au fromage,
Bien i porra avoir damage.
Rooniaus a passé la voie,
Qant voit l’engin, si s’en effroie,
Retorner viaut, car il se doute
Que il ne tiengne male route,
Reculant sailli de la vingne ;
Mais cil qui tot le mont engingne,
Le reconforte et met en voie,
Et au saintuere l’envoie,
Et dist, sire, ne doutez pas,
Mais alez belement le pas,
Baisiez les Sainz, si vos plessiez.
A cest mot s’est cil abessiez,
Agenoillons se met à terre
Por le saintuere requerre :
A l’abaissier vit le fromage
Dont il ot puis honte et damage.
Entalentez fu moult du prendre
Por ce qu’il le vit jaune et tendre :
Gite les denz, point ne se tarde,
Haper le viaut, mès ne se garde
Qant la céoignole destent
Et desus le col li descent,
La céoingnole amont l’emporte.
Sachiez que moult s’en desconforte,
Qar en tele maniere l’estraint
Qu’à poi li col ne li a fraint.
Rooniaus conmença à braire,
Hé Diex ! fait-il, que porrai faire ?
A mal ostel sui descenduz
Qant par le col i sui penduz.
Tost m’en enflera li viaires,
Maudahez ait tel saintueres
Qui en tel guise fait baler,
Ciaus qui le veulent aorer !
Je me quidoie, c’est la pure,
Moult bien garder de tel mesure
Et de voz tours et de voz guiles,
Que vanter m’en péusse aus viles ;
Mès or me sui si mal gardez
Qu’à honte en serai regardez :
Por ce dist-l’en en reprovier
Que tel quide son duel vengier
Moult bien qui son anui porchace,
Et son domage quiert et chace.
Renart respont : por les pechiez
Dont vos estiez entechiez
Vos est venuz icest contraires.
Corrociez est li saintueres,
Car vos le voliez embler,
Bien i parut al asembler
Orainz qant serrastes les denz,
Le vousistes metre dedenz,
Por ce vos a-il retenu,
A bon droit vos est avenu.
Jà voir d’anbler bien ne venra,
Ne nus hom bon chief n’en panra :
Or m’en puis bien aparcevoir
Que me voliez decevoir
Qant entendre me fesiez
Et tout por voir me disiez
Por mener fors de ceste terre
Que Dant Nobles m’envéoit querre
Orainz qant nos en alions ;
Mais ainz Dant Nobles li Lions
Ne fist de larron son mesage,
Tant le sai à preuz et à sage.
De vos m’ont vengié li cor saint
Et la vertuz qui vos destraint ;
Droiz est qui mal viaut faire autrui,
Que le mal s’en vaingne par lui :
Je m’en irai, vos remaindroiz,
Gardez les vingnes, bien est droiz.
A ceste parole chemine
Renart, cil remest en la vingne ;
Moult par s’en est bien delivrez,
Renart est en fuie tornez.
Vers son chastel point tant et broche
Qu’il en a véue la roche :
Venuz est, si descent au pont.
Les ovriers qui les euvres font
Amoneste de tost ovrer
Et de lor porte delivrer,
Et de reparer ses fossez,
Qar moult bien estoit apanssez
Se li Rois vient sor lui à ost,
Qu’il n’a pas pooir qu’il l’en ost,
Einçoiz en seroit moult penez.
Moult s’esforce li forsene
De faire fossez et tranchiées,
Tot entor lui à sis archiées
Fait un fossé d’eve parfont,
Riens n’i puet entrer qui n’afont
Desor fu li ponz tornéiz
Moult bien tornez toz coléiz.
Desor la tor sont les perrieres
Qui lanceront pierres plenieres :
N’est nus hom qui en fust feruz,
Qui à sa fin ne fust venuz.
Les archieres sont as querniax
Par où il trairont les quarriax
Por damagier la gent le Roi.
Moult est Renart de grant desroi
Qui si contre le Roi s’afete.
Sor chascune tor une gaite
A mise por eschargaitier,
Qar il en avoit grant mestier.
Moult fu bien d’eve avironez,
Einsi s’est Renart atornez.
Hordéiz ot et bon et bel,
Par defors les murs dou chastel
Ses barbacanes fist drecier
Por son chastel miauz enforcier.
Sodoiers mande par la terre
Qu’il vaingnent à li por conquerre,
Sergens à pié et à cheval :
Tant en i vint que tot un val
En fu covert. Grant joie en fist
Renart, et maintenant les mist
Es barbacanes por deffense.
Nus ne puet savoir ce qu’il pense,
Moult s’est Renart bien entremis
D’aïde faire à ses amis,
Que bien quide sanz nul retor
Qu’il soit assis dedenz sa tor.
Grant craime et grant paor en a,
Mès sachiez qu’il se deffendra,
S’il li vient nus hom qui l’asaille,
Jà n’en partira sanz bataille.
De lui me terai ore ci,
Mès de Roonel qui pendi
Dirai qu’or m’en est souvenu.
Malement li est avenu,
Moult durement gient et baaille,
Ne changast pas une maaille
Qui li donast un esterlin :
Moult ot en celui mal voisin
Qui ileuc le fist atraper.
Moult se debat por eschaper,
Mès ne li vaut un ameçon.
Qar moult tint bien par le laçon
Qui l’a entor le col lacié.
Le cuer en a moult corrocié.
Ileuc se debat et abaie,
Et li vingnerons sanz delaie
Vient qui des vingnes estoit garde,
Celui vit pendu, si l’esgarde,
Entre lui et son conpaingnon
Vienent corant vers le gaingnon
Bien entalenté de mal faire.
Lors ne set Roonel que faire
Qant il les vit vers li venir,
Toz li sanz li prist à fremir,
Que bien cuide estre malbailliz,
Bien set qu’il sera asailliz.
Li Vilain saillent maintenant,
Li uns deriers, l’autre devant ;
Li uns le fiert, l’autre le maille,
Li mastins durement baaille,
Moult crient que morir ne l’estuise,
Ou qu’il n’i lest ou braz ou cuisse,
Durement en est en malese.
Je ne cuit mie qu’il li plese ;
Que tel deduit n’amoit-il pas ;
Et cil vienent plus que le pas
Qui tant ne qant ne l’orent chier.
Maintenant por li damagier
Saillirent avant enbedui,
Sachiez jà li feront ennui.
Li uns lait corre une maçue,
Et dist li autres quivers, tue ;
S’il t’eschape, tu es honiz.
Et cil ne fu pas esbahiz,
Einz l’a feru parmi les rains
D’une grant maçue à deus mains,
Moult li aunent mal ses buriaus.
A mauz paranz est Rooniaus
Dont il n’avoit nul covoitié.
Tant l’ont entr’eus deus martirié,
Et tant li ont le dos batu
Que il li ont le laz rompu
A quoi il pendoit par le col.
Tant l’ont batu que tot fu mol ;
Maintenant chéi à la terre,
Les piez estent et les denz serre.
Lez un fossé se plaint et pleure,
Et cil li corent andoi seure
Là où il se fu acostez.
Tant li ont batu les costez
D’une grant maçue pesant,
Que por mort le lessent gisant.
Atant s’en sont d’ileuc torné
Qant il l’orent si atorné ;
Et li mastins ileuc remaint
Qui des cops ot recéu maint,
Ne quit qu’il ait talent de rire.
Or li estuet trover bon mire,
Se de la batéure eschape :
Ileuques sot-il poi de frape
Qant il ainsi fu pris au laz
Par tex engins, par tex baraz.
Moult se tint por vil ci endroit
De Renart qui si le deçoit
Et qui en tel prison l’empaint
Où cil l’ont bouté et empaint,
Dont jamès ne sera loiax.
Einsi se conplaint Rooniax,
Toz seus à soi méismes tence,
Savent à blasmer se conmence
Qant il fu pris en tel mesure.
Que vos diroie ? C’est la pure,
Malement est la chose ovrée,
Jà es-ce veritez provée,
Hazart geta arriere main,
Ileuc jut jusqu’à lendemain.
Lors s’est levez, tant se demaine,
Les iex ovri à quelque paine,
Et qant il vit l’aube crever
Si conmença à cheminer ;
Au miex que puet d’ileuc s’en torne,
Vers la Cort va, plus ne sejorne :
De la vingne ist et sanz aloingne,
Mais n’a pas bien fait sa besoingne
Ne le mesage le Roi fait,
Que trop savoit Renart de plet.
Que volez-vos ? Ensi est ore,
Vengier s’en quide bien encore.
Iréement à soi parole
Et regarde la céoingnole :
Renart, fet-il, Diex te destruie ?
Chose m’as fet qui moult m’anuie :
Par traïson m’as or fet pendre
Et laidement le col estendre ;
Mès encor le te quit chier vendre,
Jà si ne t’en sauras deffendre,
Par guerre vers toi porchacier.
Atant laisse le menacier
Et vers la Cort torne sa resne.
A soi méismes se desresne
Et dist que jamès n’iert haitiez
Jusqu’à l’eure qu’il iert vengiez.
Einsi se conplaint le gaingnon
De Renart son bon conpaingnon
Qui tant li a fet trere mal.
Tot belement le fonz d’un val
S’en vet traïnant à grant paine,
D’aler à Cort forment se paine,
Mès sovent l’estuet reposer.
Malement se puet aloser
Qu’il soit bons mesagiers ne proz,
Il en sera gabez de toz
A la Cort qant il i vendra,
Dahaiz ait qui nel’ asaudra
Se il puet, et si feront-il.
Je ne cuit pas qu’il i ait cil
Qui aint Renart de nule rien,
Qui ne li die ou mal ou bien.
Tant ala Roonel le jor
Qu’il vint à la Cort son seignor
Ainçois que midis fust passez,
Mès moult fu durement lassez
Que des cops, que del brandeler
Qu’il ot pris as vingnes garder,
Qu’il n’i remest os à brisier.
A grant paine se puet aidier
Et sostenir ; tant fu destroiz
Qu’il chaï bien quatorze foiz
En la voie que il ot fete,
Dont moult durement se deshete :
Totevoies conment qu’il tort,
Est Rooniaus venuz à Cort.
Li Rois s’estoit alé esbatre
De ses barons avec lui quatre,
Brichemers li Cers, Ysengrins,
Grinberz li Tessons et Belins.
Cil quatre furent bien del Roi,
En aus n’avoit point de desroi,
Einz furent prodome ancien,
Moult estoient bon crestien
Tuit quatre et de moult grant renon.
Aveques Noble le Lion
Furent alé esbanoier,
N’avoient cure d’esmaier
Entr’eus de riens nés fors de joie,
Et qui les viaut oïr, ses oie.
Ensenble s’en vont li baron
Par la forez de grant randon
Il cinc sanz plus, qu’il n’i ot autre.
Chascuns tenoit lance sor fautre
Que li Rois ne fust envaïz
Qui estoit de plusors haïz :
Por ce aloient ensi serré,
Et li Rois a premiers parlé.
Seignor, fet-il, vos qui ci estes,
Qui estes prodome et honestes,
Je vos aim moult en bone foi :
Sachiez qu’à la Cort a moult poi
En qui me fi tant con en vos
De barons, non foi que doi vos,
Nus, tant soit hauz, si con je croi.
Seignor, por ce dire vos doi
Por coi j’ai ma gent asanblée,
Nul n’en set verité provée,
Ne uns ne autres fors que je ;
Et vos estes prodome et sage
Trestuit quatre si con je pens,
Por ce vos dirai mon apens
Que je voil aler par esgart.
Bien véez, par Saint Lienart,
Que Renart me prise moult pou,
Por moi ne fait le tronc d’un chou ;
Bien véez qu’il ne viaut venir
Dedanz ma Cort por moi servir,
Einz s’en va toujorz defuiant
Et mes mesagiers conchiant,
Dont il me fait anui et honte ;
Et vos savez bien que ce monte,
Por ce le vos di à consoil
Qu’en nule maniere ne voil
Que ceste chose soit séue
Fors de vos qu’ai requenéue.
Or voil abatre son revel,
G’irai asegier son chastel,
Por q’ai fet ma gent asanbler,
S’ou ferai à Cort amener,
Car mesages ai-ge tramis
A lui, ne sai ou cinc ou sis.
Par maintes foiz l’ai fet mander,
Mès riens que sache conmander
Ne viaut fere, por ce m’en claim
A vos quatre que je moult aim.
Sire, sire, dist Ysengrins,
Demain revendra li mastins
Qui i ala par vostre gré,
Et se il ne l’a amené
Et il ne vient aveques soi,
Par cele foi que je vos doi,
Se mes consauz en iert créuz,
Ses chastiax sera abatuz
Et si sera mis en prison.
Sire Ysengrin, dist le Tesson,
Prenez-vos sor vos ceste mise ?
Li Rois qui l’Empire jostise
N’en fera pas à vostre esgart.
Quidiez-vos dont, se Diex vos gart,
Se Renart ot le mandement,
Qu’il ne viengne delivrement
A Cort por oïr la demande
Por qoi nostre sire le mande ?
Se Roonel revient sanz lui,
Il n’a pas le mesage oï ;
Que je sai bien que se il l’ot,
Il i venra au premier mot :
Jà n’i aura respit requis,
Tant ai-ge de l’afere apris.
Atant lessent le sermoner,
Si se prenent à retorner
Trestot soavet le chemin
Li Rois, Grimberz et Ysengrin,
Et Belins li Mostons ensemble,
Einz ne finerent, ce me semble,
Si sont à la Cort revenu.
Ez-vos Roonel descendu
Tantost où mileu de la Cort ;
A l’encontre chascuns li cort
Et demandent se Renart vient
Et quel essoigne le detient.
Roonel ne lor vost mot dire,
Einçoiz plore moult et sospire ;
Moult li diaut le dos et l’eschine,
Parmi la Cort ses rains traïne,
Bleciez fu en la destre poe,
Et chascuns li a fet la moe,
Et s’escrient trestuit ensemble,
Sire Roonel, il resemble
Que vos aiez chaciez les lous,
Moqué vos a Renart li rous
Qui vos fait venir de travers.
Tenu vos a devers les ners
Et de lonc et de totes parz.
La bone aventure ait Renarz !
Font tuit cil qui voient le chien,
Véez con il resemble bien
Home qui lieve de dormir,
Moult set bien mesage fornir.
Que qu’il gaboient li gaingnon
Li Rois vint et si conpaingnon,
Devant la sale descendié,
Et cil li est chéu au pié :
Sire, fet-il, por Dieu merci,
A grant doleur sui venuz ci.
Bien fis ce que me conmandastes
Et le mesage où m’envoiastes ;
Vos letres portai à Renart
Et si li dis de vostre part
Que devant vos fust hui ce jor,
Qu’il n’i avoit plus de sejor.
Et il me respondi errant
Et si me dist joieusement
Que il i vendroit sanz delaie.
Puis nos méismes à la voie
Lié et joiant sanz demorer,
Et je le semons del troter
Por plus tost aler un petit ;
Et li traistres si me dist
Qu’il ne pooit plus tost aler
Por ce qu’il me voloit lober,
Me respondi que belement
Alissiens et cortoisement
Tot soavet et tot le pas
Por ce que ne fusions trop las.
Je li otroiai son plesir,
Si conmençames à venir.
Endementiers que je venoie
Li traïstres que j’amenoie
M’abricona de sa parole
Qu’il me fist d’une céoingnole
Acroire que c’iert saintuaire
Et qu’ilec gisoit Saint Ylaire,
Et si me dist que jel’ baisasse
Ainçoiz que je outre pasasse.
Je cuidai que voir me déist
Et que nul mal ne me féist :
Cele part ving sanz demorer
Por le saintuere aorer ;
Au déerain m’en ting por fol,
Que je fui penduz par le col,
Si que par poi li oil dou front
Ne me volerent contremont.
Ce me fist en sa conpaingnie
Li traïstres, li foi mentie,
Li parjures et li trichierres,
Li fax, li desloiax, li lierres
Qui le monde abete et engingne,
Pendant me lessa en la vingne,
Et dist que les vingnes gardasse
Et de là ne me remuasse.
Qant ce ot dit, si s’en retorne,
Et je remez pensiz et morne.
Atant me vindrent dui vilain
Chascun un baston en sa main,
Qui tant me donerent de cous
Que toz les costez en ai mous.
Que vos iroie-je disant
Ne mon damage devisant ?
Chascuns me bati sa foiée
Tant que l’eschine ai peçoiée.
Rois, si n’est si con vos ai dit,
Je vos otroi sanz contredit
Que me faciez pendre ou noier ;
Et se Renart le viaut noier,
Près sui que vers lui me combate
Et que en vostre Cort l’en mate.
Rois, or en prenez la vanjance,
Que moult a ci grant meschéance ;
Vengiez vostre honte et la moie
Que Renart m’a fait en la voie.
Atant sa parole a fenie
Et li Rois l’a moult bien oïe
Qui en fu marriz et iriez.
Biaus saingnors, qar me conseilliez,
Fait-il, à vos toz conseil quier
Que ferai de cel aversier,
Cel déable, cel mescréu
Qui tantes foiz m’a decéu
Par son engin et fait marrir.
Conseil de li fere honir
Prendroie moult très volentiers.
Ysengrin, qui fu ses guerriers
Et qui le haoit mortelment,
Li respondi iréement :
Seignor, fet-il, or vos tesiez,
Et sor cest afere jugiez ;
Cil qui set bon conseil doner
Ne s’en doit pas arrier torner,
Ainçois conseilliez mon saingnor,
Qar onques mès honte greingnor
Ne fist nus à prince de terre.
Bien est droiz qu’il en sorde guerre,
Si n’en doit nus avoir pitié ;
Del terme qu’il a respitié
Par lui seus sanz contremander
Onques ne daigna demander
Un jor de terme ne respit.
Par mon chief ci a grant despit,
Et se je en fusse jugierres,
Je jujasse que li lechierres,
Li ribaus, li atéinez
Fust ou penduz ou traïnez,
Que Roonel le messagier
A fet si forment damagier
Par son enging, par son desroi
Qui estoit mesagier le Roi,
L’en li en doit moult fere honte.
Belins, qui ot oï le conte
D’une part et d’autre, saut sus,
Ysengrin, or n’en dites plus,
Fet-il, car trop en avez dit,
Nos savons bien sanz contredit
Que vos haez Renart si fort
Que le vodriez avoir mort :
Or vos pri que n’en parlez mès,
C’on vos en tendroit à mauvès
De tel dit et de tel conmande.
Se me sires li Rois conmande
Et il en son conseil le truisse,
Il iert penduz où c’on le truisse ;
Mès, se Dex plest en qui je croi,
Nul nel’ conseillera le Roi
Que jà li face se bien non.
Se Dant Roonel le gaingnon
N’a fet ce qu’il li conmanda,
Un autre qui miex parlera
I envoit li Rois par mon los,
Que jamais n’i ait nus si os
Qui juge sanz conmandement,
Blasmez en seroit de la gent.
Un mesagier qui miex parlast
Loeroie qui i alast
Sans plus atargier le matin,
Qui parlast romanz et latin.
Li Rois respont sans atargier :
Belin, moult faites à prisier ;
Bien sai qu’en vos a moult sage home.
Foi que doi Saint Pere de Rome
Vos vos en alez par le droit ;
Mais or nos dites orendroit
Qui porroit faire le mesage,
Car moult m’est tart que je le sache,
Einz mès n’oi tel talent de rien.
Sire Brichemers ira bien,
Et si est cortois et vaillanz,
Et si sai bien que miauz parlanz
N’en a pas un céenz, ce croi,
Se il en a de vos l’otroi,
Maintenant le verroiz movoir.
Belin, car i alez savoir
Et li dites que je li mant
Qu’il à moi viengne maintenant.
Brichemers, qui tot entendi,
En piez se dresce et respondi :
Sire Rois, je sui en present
Près de faire vostre talent ;
Se vos m’i volez envoier,
Tantost irai sanz deloier,
Et se gel’ truis, à quoi qu’il tort,
Sachiez jel’ amenrai à Cort.
Brichemers, ce a dit li Rois,
Moult par iestes preuz et cortois,
Et si savez de mainz langages
Dont vos iestes assez plus sages.
Vos iroiz de la moie part
Trestot droit au chastel Renart,
Et li dites sanz deloier
Qu’il vaingne aprendre à cortoier
Sanz achaison querre ne gile,
Que par la foi que doi Saint Gile
Se il m’i fet envoier plus,
Ses chastiax sera abatuz
Et il méismes iert honiz ;
Mès mes letres et mes escriz
Porterez que miex vos en croie.
Cil prent les letres, si s’avoie,
Congié prent, si s’en est partiz,
Et li Rois remest toz marriz.
Brichemer s’en va conme sage,
Bien quide fornir son mesage
Miex qu’il ne fera. Tant chemine
Par bois, par plain et par gaudine,
Et tant ala esperonant,
Que il vint ainz midi sonant
Trestot droit au chastel Renart
Qui de nul home n’a regart :
Car tant iert bien de murs fermez
Qu’il n’iert pris, s’il n’ert afamez ;
Par home qui sache asaillir
Ne li puet nus max avenir.
Brichemer s’est arestéu
Qant il a le chastel véu
Qui estoit si apareilliez,
Durement s’en est merveilliez.
Avant en va desus le pont,
Li sergent qui furent amont
Descochent carriax enpenez.
Jà fust Dant Brichemer finez
Ne fust le haubert qu’ot vestu ;
Plus de dis en ot en l’escu
Dont il s’esmaia durement,
Et il traient menuement.
Brichemer ne les pot soffrir,
Arriere l’estuet resortir,
Ou il vosist, ou bel li fust,
Arriere par le pont de fust
Renart s’estoit alé esbatre
En sus d’ileuc trois piez ou quatre :
Qant il revenoit de joer
Lez le pont trueve Brichemer.
Tantost con le vit et cognut,
Brichemer vers li acorut
Et dist, sire, cel Diex vos gart
Qui toz les biens done et depart !
De Noble vos aport mesage,
Le meillor Roi et le plus sage
Qui soit en la crestienté.
Cil Diex qui maint en Trinité,
Fait Renart, vos trestort voz ires !
Conment le fait ore mes sires ?
Et li barons sont-il haitié ?
Il sont trestuit joiant et lié,
Fait Brichemers, en moie foi,
Mais à vos vieng de par le Roi,
Qu’à sa Cort venir ne daingniez ;
Dites moi por coi desdaingniez
Li ne sa Cort, ce est folie.
Il m’a rové que je vos die
Que demain sanz aloingne traire
Li vaingniez en sa Cort droit faire
De ce que l’avez en despit
Et que par vos prenez repit,
Si ne le tieng pas à savoir.
Li Rois vos fait par moi savoir
Que demain à heure de plet
Soiez devant lui entreset :
Ice vos di-je de par li,
Se n’i estes, je vos deffi
De par lui conme mesagier.
Renart le prent à losengier :
Amis, dist Renart, entendez,
A la Cort, se le conmandez,
Irons je et vos orendroit,
Jà respit ne terme n’i ait,
Ne jà n’i ait plus atendu.
Brichemer li a respondu,
Renart, fait-il, montez dont tost,
Que durement redot vostre ost,
A pou que il ne m’ont maumis,
Atant se sont au chemin mis.
Or s’en vont li baron ensemble,
Et Renart moult durement tremble,
Car grant paor a dou Lion.
S’il trovast qui confession
Li donast, moult très volentiers
La préist. Tant vont les sentiers,
Li Cers avant, Renart après,
Qu’il vindrent d’une vile près
Champestre. Renart s’adreça
Envers la vile et dist, par ça
Nos en irons, se Diex me voie,
Que ce est la plus corte voie.
Brichemers n’i entent nul mal,
Vers la vile par mi un val
S’en vont le droit chemin tot plain.
Atant estes-vos un vilain
Qui avoit avec lui trois chiens :
Ici ne voi-ge nus des miens,
Fait Renart, cist nos ont véu.
Li vilains les a parcéu,
Si hue ses chiens maintenant,
Tuit troi s’en vont en un tenant
Vers Brichemer et si l’ont pris,
Et Renart s’est en fuie mis.
Vers son chastel en vait le trot
Au plus durement que il pot ;
Dedenz se mist et ses ponz dresce.
Et Brichemer fu en destrece,
Car li chien, si con nos lison,
Li despiecent son gambison :
Moult l’atornent vilainement,
Et li vilain vint erraument
A tot un baston, si le frape.
Brichemers est en male trape,
Sa deffense n’i a mestier,
Li chien le prenent à sachier
Moult durement, point ne s’en faingnent.
Par un petit qu’il ne l’estraingnent.
Un d’aus si vilment le conroie
Que dou dos li trait tel corroie
Dont l’en poïst faire un braier :
En Brichemer n’ot qu’esmaier,
A moult grant paine s’en estort,
Jà n’en quida partir sanz mort.
Fuiant s’en va à grant alaine,
N’ira mès o aus des semaine ;
Fuiant s’en va et moult s’esmaie,
Que moult li diaut et quit sa plaie.
Or s’en va Brichemer à Cort,
Sor un cheval qui moult tost cort
S’en vet fuiant par un essart,
Durement se plaint de Renart.
Ne fine de corre à eslès
Tant qu’il est venuz où palès
Où li Rois Nobles sa Cort tint,
Einz ne fina jusqu’il i vint :
Maintenant descent en la place.
Qant li baron voient la trace
Qui el dos Brichemer estoit,
Demandent conment li estoit ;
Mès onques un mot ne respont
Tant qu’il fu en la sale amont
Où asanblez iert li barnez.
Devant le Roi chéi pasmez :
Sire, fet-il, merci vos quier,
Bien sai que n’aurai mès mestier.
Vostre mesage ai bien forni,
Mès ainsi m’a Renart bailli,
Bien quit qu’il m’a mis à la mort,
N’en puis avoir autre confort.
Sire, dist Brichemer au Roi,
Por amor Dieu entendez moi.
Vos m’envoiastes conme sage
A Renart fornir le mesage,
S’en ai male merite éue,
Que tant en ai la pel batue
Que je n’en eschaperai jà.
Li Rois Brichemer esgarda,
Si le voit sanglant et navré,
Si voit maint quarel enpené
Dedenz l’escu que il aporte,
Dont durement se desconforte.
Brichemer, dist li Rois, amis,
En grant dolor a mon cuer mis
Cil qui einsi t’a domagié,
Mais tu en seras bien vengié,
Je le t’acréant et afi.
Dist Brichemer, vostre merci.
Tant fu li Rois fort adolez
Que il en fu toz sanmellez ;
Del ire qui au cuer li touche
Li saut li sans parmi la bouche.
Il s’est dedenz son lit couchiez,
Et qant un poi fu refroidiez,
Li cors li tramble, il se demaine,
Chéuz est en fievre quartaine :
Moult est sorpris de maladie,
Bien en cuida perdre la vie.
Ce fu à une Saint Jehan,
Si li tint près de demi an.
Partot a fet mires mander,
N’en remest nus jusqu’à la mer,
Por li alegier de son mal.
Tant en vint d’amont et d’aval
Que je n’en sai dire le conte.
Il i vint maint Roi et maint Conte
De tiex que je ne sai nomer
Por son malage regarder ;
Trestuit i vindrent sanz delai
Par le conmandement le Roi.
Onques n’en i sot nus venir
Qui dou mal le poïst garir.
Grimberz li Tessons qui là fu,
S’est de Renart aparcéu
Son cousin qui moult sage estoit,
S’au Roi acorder le pooit
Il en aroit au cuer grant joie.
Maintenant s’est mis à la voie
Et dist que mès ne finera
Jusqu’à tant que trové l’aura.
Tant vet Grimbert la matinée
Q’ainçois que none fust sonée
S’en est venuz par une adresce
Trestot droit à la forteresce
Renart son bon cousin germain.
Se fu le jor levé bien main
Et se fu as murs apuiez,
Vit Grinbert, si en fu moult liez.
Tantost sanz autre chose fere
Conmanda la barre en sus trere
Por son cousin fere venir.
Maintenant ont fet son plesir
Cil à qui il l’ot conmandé.
Ez-vos Grinbert en la ferté
Tot belement pas avant autre,
Son cousin salue et maint autre
Qui estoient avecques lui.
Renart forment le conjoï
Et li fist grant feste et grant joie.
Dist Grinberz, grant talent avoie
De parler à vos une foiz :
Li Rois Nobles est si destroiz
D’un mal qui par le cors le tient,
Dont chascun jor sospire et gient ;
Morir en quide, ce sachiez,
Et il est moult vers vos iriez.
Se le pooiez respasser
S’amor ariez sanz fauser ;
Por ce ving ça tot coiement,
Ne voil estre véuz de gent,
Ne onques nus hom n’en sot mot.
Renart prent à rire à cest mot
Et dist : cousins, or me nomez
Par cele foi que me devez,
Por qu’est li Rois vers moi iriez,
Par qui ai esté enpiriez,
Dites qui m’a mellé vers li.
Vostre conpere, ce vos di,
Dist Grinbert, vos i a mellé,
Si vos a Roonel blasmé
Et Brichemer qui el mesage
Furent envoié conme sage,
Et vos en ovrastes moult mal
Qant Roonel dedenz le val
Féistes en la vingne pendre,
Moult par en fistes à reprendre,
Et Brichemer féistes batre,
Ne sai à trois chiens ou à quatre
Qui li ont escorchié le dos
Si que bien en perent les os.
Renart ot parler son cousin,
Dites-vos que par Ysengrin,
Fait se il, sui mellez au Roi
Par son enging, par son desroi :
Mar le pensa li renoiez.
Alez-en, que trop deloiez,
Et g’irai à Cort le matin,
Si m’escuserai d’Ysengrin.
Devant le Roi serai demain
Foi que doi Dieu et Saint Germain.
Renart, dist Grinberz, par ma foi
Ce est le miaudre que g’i voi,
Et faites si, ne deloiez,
Et je m’en vois, à Dieu soiez.
Grinberz s’en va, ne volt plus dire,
Renart remest qui fu sanz ire
De ce qu’il a si bien paiez
Çaus qui li furent envoiez
De par le Roi à toz les briés ;
Mais qui soit bel ne qui soit griés
Il s’en escondira s’il puet.
Lendemain par matin s’esmuet
Fors de la cort, mès ainçois mande
Sa mesnie, si lor conmande
Que gardent son chastel très bien
Que jà home por nule rien
Ne lessent enz metre le pié,
Que il ne soient espié
D’aucune ame, ce seroit max.
Sire, ce dist li Senechax,
De ce ne vos estuet doter,
Que jà home ne fame entrer
Ne lesserons por nule chose.
Maintenant ont la porte close,
Si s’en monterent en la tor,
Et Renart s’en va sanz demor
Parmi la lande esperonant.
Durement va Dieu reclamant
Que tel chose par sa pité
Li doint dont li Rois ait santé.
Einsi vet Renart son chemin,
Moult prie Dieu et Saint Martin
Que il tel chose li envoit
Dont li Rois Nobles gariz soit,
Que moult en a grant desirier.
Toute jor prent à chevauchier,
Ne puet nule chose trover
En coi il se poïst fier.
Tant a erré qu’en un pré entre,
De chevauchier li diaut le ventre,
Et d’autre part moult se dehete
De la jornée qu’il a fete.
Vit la nuit qui de près le suit,
Où pré descent, avant ne fuit ;
La nuit jut en la praerie
Tant que l’aube fu esclairie.
Qant li jorz parut, si se lieve
Et bien sachiez que moult li grieve
Qant il ne puet chose trover
Qu’avec lui en poïst porter
Por doner au Roi garison :
Le jor en fist mainte orison.
Tant erra Renart ce matin
Qu’il s’adreça vers un jardin
Où il ot herbes demanieres
Qui sont précieuses et chieres
Et bones por toz maus sener.
Cele part a pris à errer,
La resne abandone au cheval.
Parmi la costiere d’un val
Est entrez dedenz le vergier ;
Le cheval corut atachier
A un arbre parmi le frain,
Ilec pest de l’erbe et dou fain,
Et Renart enconmence à querre
Par le vergier et tret de terre
Herbes demanieres assez,
Qar il les conoissoit assez
Plus que dire ne vos saroie,
Plus en quiaut de plaine jaloie.
Qant asez en ot arachiées,
Si les a un petit moilliées
En une fontaine qui cort
Par le vergier et par la cort.
Ileucques les a fet moult netes,
Si les bat entre deus tuiletes,
Puis en enpli un barillet
Qu’avec li ot moult petitet.
Ez-le-vos arier repairié,
Si a son barillet lié
A son arçon moult fermement,
Et monte que plus n’i atent.
Dou vergier ist et si s’en vet,
Moult s’envoise et grant joie fet.
Renart s’en vet à esperon,
Moult ot en lui noble baron ;
Entrez s’en est en une lande,
Voie ne sentier ne demande,
Qar il les savoit moult très bien,
Ne l’en estuet aprendre rien.
De la lande en une forest
Entra qui assez miex li plest :
En la forest desoz un pin
Trova dormant un pelerin.
Cist pelerins qui là gisoit,
Une riche aumosniere avoit
Qui iert laciée à sa corroie.
Renart descent enmi la voie,
Moult tost de la mule afeutrée,
Si li a l’aumosniere ostée
Si c’onques ne s’en aparçut.
Renart qui einsi le deçut,
L’ouvre, si a trové dedenz
Une herbe qui ert bone as denz,
Et herbes i trova assez
Dont li Rois sera respassez,
Aliboron i a trové
Que plusors genz ont esprové,
Qui est bone por eschaufer
Et por fievres de cors oster.
Et puis a gardé d’autre part,
Une esclavine vit Renart
Que cil avoit desoz son chief :
Il la prent qui qu’il en soit grief,
Si l’afubla sanz arester
Et va sor son cheval monter
Et se remet en l’ambléure
Par la forest grant aléure.
Tant a à aler entendu
Qu’il est au perron descendu.
Qant Renart fu venuz à Cort,
Toz li mondes à lui acort ;
Ainz n’i ot beste si reposte
Qui ne venist jusqu’à la porte
Por Renart seulement gaber.
N’i a nul qui ne l’aut lober ;
Tex i a qui li gietent boe,
Et Renart lor a fet la moe,
Si s’en monte amont en la sale.
Li Rois ot le vis taint et pale,
Car trop ot grant dolor au chief,
Mais moult li torne, à grant meschief
Qant Renart voit léens entrer ;
Et Renart qui bien sot parler
Le salue cortoisement,
Icil Dieu, fait-il, qui ne ment
Et qui fist tot quanque mer serre,
Si gart le meillor Roi de terre !
Ce est mes sires li Lions,
A tesmoinz de toz ces barons,
Cil qui sont tenu à prodome.
Sire, je sui venuz de Rome
Et de Salerne et d’outre mer
Por vostre garison trover.
Li Rois respont sanz atendue,
Renart, moult savez de treslue :
Or ça que mal saiez venuz,
Fil à putain, vain decéuz !
Par mon chief or estes-vos pris ;
Or avez tel hardement pris
Que devant moi venir osez !
Jà ne seroiz mès alosez,
Qar or vos tieng dedanz ma lice ;
Se or ne faz de vos justice
Tez con ma Cort esgardera.
Avoi ! sire, ce que sera,
Fait Renart, gardez que vos dites ;
Seront-ce donques les merites
Que je aurai de mon servise
Que je vos ai la poison quise
Qui bone est contre vostre mal ?
Par Dieu le Pere esperital
Ele m’a fait moult de mal traire,
Et or me volez jà deffaire,
Si ne savez encor por coi.
Por Dieu, sire, entendez à moi,
S’orez ce que vos voroi dire,
Si refraingniez un poi vostre ire.
Ne savez pas, or le sachiez,
Que moult sui por vos travailliez,
Tant ai alé par la contrée
Qui asez est et grant et lée ;
J’ai esté par tot Moriane,
En Lombardie et en Toscane :
Puis que soi vostre enfermeté
Ne jui en chastel n’en cité
Plus d’une nuit, ce sachiez bien.
N’a delà mer fisicien,
Ne en Salerne ne aillors
A qui n’aie parlé por vos.
Bien a troi moi et plus, ce cuit,
Qu’en ceste terre ne jui nuit ;
A Salerne trovai un sage
A qui je dis vostre malage,
Si vos envoie garison.
Diz me tu voir, dist le Lion ?
Oïl, sire, se Diex m’ament,
Vez la poison ci en present ;
Jel’ aportai por vos garir.
Ele m’a fait mainz max soufrir.
Foi que doi Saint Pere de Rome,
Je vos rendrai sain conme pome
Se vos volez mon conseil croire.
Conment, fait Noble, est chose voire
Que tu diz que me gariras ?
Ne sai se faire le porras.
Oïl, sire, foi que vos doi,
Jà mar en seroiz en esmoi,
Que je vos quit tost respasser.
Lors prent Renart à deffubler
L’esclavine et l’a mise jus,
Si a son baril mis desus.
Atant estes-vos Roonel,
Qant vit Renart, moult li fu bel,
Bien le cuida adomagier
Par ses paroles et vengier
Dou col qui li fu estanduz
Là où il fu par lui panduz,
Qu’encor li pert la trace où col,
De coi Renart le tint por fol.
Danz Rois, ce a dit li gaingnon,
Quar entendez à mes raissons :
Créez-vos dont ce pautonier
Qui dist qu’il fu à Montpellier
Et en Salerne, et si s’en vante ?
Mais onques ne passa Otrante ;
Si dist mires est devenuz,
Pieça déust estre penduz.
Or vos manbre dou grant outrage
Que me fist en vostre mesage
Qant en la vingne me fist pendre :
Or en devez vanjance prendre ;
Moult me fist mal sa conpaingnie.
Envers vos a sa foi mentie,
Je l’en apel de traïson,
Vez ci mon gage, je le don.
Sire, fait Renart, or oez,
Cist mastins est moult desréez,
Il radote ou a trop béu,
Ou il a tot son sens perdu.
Trois mois a bien, ce vos plevis,
Que ne fui mès en cest païs ;
Se Roonel fu en meson,
Ce vieil lechéor, ce gloton,
Ma fame est moult bele meschine
Et si a non dame Hermeline,
Se il li quist honte et folie
Et ele sot tant de voidie
Qu’el se vanga dou pautonier,
Ce ne fet pas à merveillier.
Lors se leva Tybert li Chaz
Que Renart fist jà prendre as laz ;
Va ta voie, fait-il, gaingnon,
Dahaiz fors Noble le Lion
Qui je sui hom et il mes sire,
Qui vos dona congié dou dire
Tel goulée et tel estoutie
Qant apelas de felonie
Si haut baron con est Renart ?
Par ma foi tu es trop musart.
Ce jor que tu fus atrapez
Si con tu t’ies ici clamez,
Pasai-ge devant les plaissiez
Où Dant Renart iert herbergiez,
Ileuc trovai Dame Hermeline
Qui moult par est de franche orime,
Noveles li quis de Renart,
Et el me dist, se Diex me gart,
Qu’il estoit en Salerne alez
A tot cent libvres monéez
Por faire afaitier les poisons
De coi Dant Nobles li Lions
Péust encore avoir santé.
Moult a por lui son cors pené,
Bien savoit que mes sire avoit
Jà le mal dont il se doloit,
Jà soit ce qu’il nel’ déist pas.
Dist Noble, par Saint Nicholas,
Tyberz, vos dites verité,
Voire devant un mois passé.
Sire, dist Renart, il dist voir,
Or poez bien de fi savoir,
Je haz Tibert le Chat de mort,
S’il séust envers moi le tort,
Certes il ne le celast mie,
Einz m’encusast jusqu’à la lie ;
Mais preudons est et veritables,
De sa parole est bien créables.
Ce est, ce dist Noble, bien fait,
Tybert, lessiez ester cest plet,
Et vos, Renart, pensez de moi,
Si en prenez hastif conroi.
Ce que vos feroiz, fait sera,
Ne jà nus ne vos desdira,
Ne n’en dira ne plus ne mains,
Je me met dou tot en voz mains.
J’ai un tel mal que ne voi goute,
Je ne cuit véoir Pentecouste
Se Diex n’en a de moi pitié.
Trop éusse de la moitié
Dou mal dont me sent ci grevé,
Se il venist à Dieu à gré.
En la teste ai un mal si grant
Qu’il me sanble, se Diex m’amant,
Qu’el me soit par piece fendue,
Et si me troble la véue
Sovent si que je ne voit goute ;
Si ai la bouche amere toute
Que riens née ne m’a savor.
Par tot le cors ai grant dolor,
Le piz ai tel que a grant paine
Puis-ge à moi traire m’alaine.
Je ne vos puis la moitié dire
De la dolor qui me fet frire.
Ce dist Renart, gariz serez
Einz que tierz jors voiez passez :
Aportez moi un orinal
Et si verrai dedenz le mal.[2]
Li orinax fu aportez,
Nobles est en séant levez,
Si a pissié plus que demi :
Et dist Renart, bien est issi
Lors le prent et au soleil va,
L’orinal sus en haut leva ;
Moult le regarde apertement,
Torne et retorne moult sovent
Por véoir s’il se torneroit.
Les cercles de ses humors voit,
Bien set, ce dist, et si le quide,
Que li Rois a mestier d’aïde.
Au Roi en vient et fait le baut :
Sire, fait-il, se Diex me saut,
Bien voi vos avez fievre ague,
J’ai la poison qui bien la tue,
Sire Rois, foi que je doi vos.
Le braz prant et taste le pous,
Voit qu’il n’est pas trop destrampez,
La main li met lonc les costez,
Et sor le piz et sor le flanc,
Et dist, sire, par Saint Climent,
A poi ne sui venuz trop tart,
En vostre mal covient esgart
Se talent avez de garir.
Dist Nobles, riens tant ne desir :
Bien vodroie de mon royaume
Avoir doné, par Saint Guillaume,
La moitié que je fusse sains.
Chéoiz estes en bones mains,
Fait soi Renart, se vos volez,
Jà n’en seroiz si adolez
Que ainçois que past la semaine
Ne vos face la teste saine.
Or faites tost ces huis fermer
Et si me faites aporter
Tot quant que vos demanderai,
Le mal dou cors vos osterai,
S’en saudra la fievre quartaine
Qui si vos fait puir l’alaine.
Ce dist Nobles, moult volentiers
Vos aurez quant que iert mestiers.
Sire, fait-il, prenez en cure :
La pel dou Leu à tot la hure
M’estuet avoir premierement.
Jà verroiz tuit conmunement
Conbien je sai d’astronomie,
Je vos metrai où cors la vie.
Qant Ysengrin l’oï parler,
Il n’ot en lui qu’espoenter ;
A Dieu prie que il le gart
Qu’il ne soit au voloir Renart,
Qant il n’i a plus Leu que lui,
Renart se vangera de lui,
Ce voit-il bien hui en cest jor.
Parmi la Cort a fait maint tor,
Il vousist bien estre autre part.
Nobles qui ot oï Renart,
Un pou soulieve les gernons
Et regarda toz ses barons.
Le Leu regarde toz pensis,
Si li a dit, biaus doz amis,
Vos me poez avoir mestier
Et mon malage asoagier.
Ce dist Renart, vos dites voir,
Il vos puet bien mestier avoir
Se il vos velt prester sa pel :
Vez-ci venir le tens novel
Que sa piau iert tost revenue,
N’aura pas froit à la char nue.
Dist Ysengrin, sire, nel’ fetes,
Volez-vos dont honir vos bestes ?
Sachiez ne m’est mie legier
De ma pelice despoillier :
Certes qui tant me tost dou mien,
Bien voi qu’il ne m’aime de rien ;
Por Dieu or le me respitiez.
Li Rois l’entent, si fu iriez,
Si li dist : par mon chief, Danz Leus,
Moult estes ores outrageus
Que ma parole me dedistes,
Vos en auroiz jà les merites,
Je verrai jà qui m’amera.
Seignor, dist-il, or i perra ;
Prenez le tost mes iauz voiant,
Et si li ostez maintenant
La pel dont il nos fait dangier.
Cil corent por lui domagier,
Si le prenent de totes parz
Et par les piez et par les braz,
La pel li traient fors dou dos.
Lor fu li las à mal repos ;
De la sale s’en ist le trot,
Il a bien payé son escot.
Dist Renart, sire, s’il te plest,
Faiz mon voloir tot entreset ;
Il t’estuet de la corne au Cerf
Dou lonc prendre le maistre nerf
Qui soit un pou retret ariere.
En l’orine vi la maniere
La medecine dont garras,
Porchace toi, mestier en as,
Et une corroie dou dos.
Se tu l’as çainte, en grant repos
En seras mis, n’en aies doute ;
Souz ciel n’a ne fievre ne goute
Qui jamès te féist nul mal,
Je l’ai véu à l’orinal.
Ce puet bien estre, fait li Rois.
Brichemer vit séoir au dois,
Si l’a asené à sa poe,
Qar il ne pot movoir la joe.
Par le conmandement le Roi
Fu li Cers mis en grant effroi ;
Il l’abatirent tout envers,
La corroie ont pris de travers,
Si l’ont trenchiée à un costel,
Bien ont encisée la pel,
Et les deus cornes li briserent,
Fors de la sale le chacierent.
Cil ont bien lor escot paié,
Jamès en foire n’en marchié
Deus foiz poiage ne donront,
Mais par tot quitement iront.
Tybert, ce dist Renart, ça vien,
Tu me lairas auques dou tien ;
De ta pel seras despoilliez
Où mes sires metra ses piez.
Tybert l’ot, si conmence à grondre,
Mès n’iert mie tans de respondre
Ne de tencier voiant la gent,
Que il n’i avoit nul parent.
Il sailli sus, il s’afaita,
Sanz congié de la Cort s’en va ;
L’uis iert fermé, mais il s’en saut
Par un pertuis qui iert en haut ;
Tybert s’en vet toz eslessiez,
Si s’est feruz en un plessiez.
Par foi, fait Renart, cist s’en va,
Maudahez ait qui l’engendra !
Se je le puis aus mains tenir
Je li ferai mes jeus puir.
Renart regarda entor lui,
Vit les barons qui grant anui
Avoient de ce qu’il fesoit,
Chascuns de soi por avoit.
Il en apele Roonel,
Fil à putain, fet-il, mesel,
Faites me ci moult tost un feu,
Si me prenez la pel dou Leu,
Si la lavez, si l’essuiez
Et devant moi l’apareilliez ;
Volentiers, sire, s’il vos plest,
Quanque vos vodroiz si iert fet.
Et vos, Dant Grimbert li Tessons,
Venez tost ci agenoillons,
Et vos, Belin, venez à moi.
Cil acorent à grant desroi.
Alez-en tost à mon saingnor,
Diex vos otroit grant deshonor,
Faites moult tost sanz demorer,
Alez le moi ci aporter.
Cil li aportent vistement,
Renart a pris un oingnement :
Sire, dist-il, je vos garrai
Et ceste fievre vos toudrai,
Mais un pou vos covient soufrir.
Et respont Nobles, moult desir
Que de cest maus fuse haitiez,
Car moult en sui afebliez.
Renart l’a fait couchier adenz,
Puis li a mis où nés dedenz
Aliboron que il avoit,
Qui si forz à merveille estoit
Que Nobles prant à eschaufer
Et li cors li prant à enfler :
A demener se conmença
Tant c’un pet du cul li vola,
Il esternue et se demaine.
Moult estoit li Rois en grant paine,
Enflez fu, mès il esternue,
Et la pel dou dos li tressue.
Ce dist Nobles, trop sui enflez.
Et dist Renart, ne vos dotez,
Gariz iestes, n’i avez garde.
Et cil de poirre ne se tarde,
Qar la poison le destraingnoit
Qui tot le cors li eschaufoit.
Renart l’estendi lez le feu,
Puis a prise la pel dou Leu
S’a dedenz couchié le Lion,
Puis a trait fors de la poison
Qu’il avoit emblée au paumier,
A son saingnor en fist mangier.
Tantost con il en ot gouté
Ne senti mal ne enferté
En main n’en pié n’en nule part,
Moult en a mercié Renart.
Renart, fait-il, je sui gariz,
Je vos en rent cinc cent merciz
Et seignor vos faz de ma terre :
Qui vos nuira si aura guerre,
Car en aïe vos serai,
De vos mon conseillier ferai.
Toz sui gariz, nul mal ne sent,
Vos en auroiz riche present.
Diex, dist Renart, en ait les grez
Qant par moi estes respassez ;
Mès si vos venoit à plaisir,
Sire, del aler ai desir
Por ma mesnie visiter
Et por ma fame conforter
Que je ne vis deus mois a jà ;
S’ele me voit, grant joie aura,
Je li dirai de vos noveles,
Sachiez que moult li seront beles.
Sire Brichemer si me het,
Si ne li ai noiant meffet,
Et Ysengrin vostre prevost,
Ils ont jà asanblez lor ost,
Que se il me puent tenir
Il me feront à duel fenir,
Jà n’en aurai se la mort non :
Por ce vos pri en guerredon
Que vos tel conduit me bailliez
Que je n’i soie domagiez.
Et dist Nobles, moult volentiers.
Lors fait monter cent chevaliers,
Bien sont fer vestu et armé,
Si lor a Renart conmandé
A garder con son cors demaine,
Lors s’en viegnent par une araine,
Tant chevauchent par grant vertu
Qu’à Terouane en sont venu[3]
Grant piece ainçois midi passé,
Renart ont mis à sauveté
En son chastel, en sa tesniere,
Si s’en sont retorné arriere.
Sitost con l’en sot sa venue,
Hermeline est acoréue
Sa fame qui savoir voloit
Conment au Roi chevi avoit.
Si le baise, et si l’acole,
Et Renart aquiaut sa parole
Et si li dit et si li conte
Conment il a au Leu fait honte
Et conment la pel il laissa,
Conment Brichemer conchia,
Que les cornes li fist brisier
Et une partie laissier
De sa pel si con il est lons.
Cele sourit et jeue adons
Et dist que il s’est bien vangiez.
Or est Renart joienz et liez
Q’afolé à ses anemis.
Lors sejorna, ce m’est avis,
A son chastel une grant pose,
Qar aséur issir n’en ose.