Iconologie (Cesare Ripa, 1643)/II/Innocence

Innocence.


ELle a pour Embleme vne ieune Fille couronnée de Palmes, en action de lauer les mains dans vn Baſſin, & aux pieds de laquelle eſt couché vn Agneau. S. Ambroiſe entend par la couronne de Palmes l’Innocence & la Pureté, qui nous eſt donnée de Dieu dés le meſme inſtant que nous ſommes regenerez par le ſaint Bapteſme : Auſſi eſt-il vray que l’eau en eſt encore vn ſymbole. A raiſon dequoy par vne ancienne couſtume ceux qui ſe vouloient declarer exempts de quelque tache, ou de quelque ordure dont on les ſoupçonnoit, ſe lauoiẽt les mains en la preſence du peuple. Quant à l’Agneau, il n’y a celuy qui ne ſçache que dans les Autheurs ſacrez & prophanes il eſt toûjours pris pour vn Hyerogliphe de l’Innocence.