Iconologie (Cesare Ripa, 1643)/I/Volonté

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 199-204).

Volonté. CLXXIII.

ELle eſt figurée par vne fille aveugle, qui a des aiſles au dos & aux pieds, vne Robe de couleur changeante, & l’action d’vne perſonne qui marche à taſtons.

La Volonté, qui commande en Reyne à la plus noble partie de l’homme, s’impoſe des loix elle-meſme, ſelon les euenemens ou fauorables ou contraires, que le ſens & la raiſon luy promettent ; d’où il s’enſuit que ſi elle eſt mal perſuadée de l’vn ou de l’autre, elle ſe trompe en ſes commandemens, & met en deſordre l’vnion de l’homme interieur.

Elle eſt peinte aueugle, pource que ne voyant de ſoy-meſme aucune choſe, elle marche à taſtons apres le Sens, s’il eſt foible ou chancelant ; ou apres la Raiſon, ſi elle eſt ferme & solide.

Or pource qu’elle eſt vne puiſſance, qui dans le deſir des choſes que l’apparence luy fait trouuer bonnes, n’a rien de certain, & flotte touſiours entre l’eſpoir & la crainte ; C’eſt pour cela que nous l’habillons icy bizarrement d’vne robe de couleur changeante.

Quant aux aiſles qu’on luy donne, il n’eſt pas hors de propos qu’elle en ait aux pieds comme aux eſpaules, pour vne marque de l’inquietude où elle eſt ſans ceſſe, en trauaillant à l’eſtabliſſement de ſon repos. Et d’autant qu’apres l’auoir long-temps cherché ſur la terre, elle ne l’y peut trouuer, Elle fait vn effort genereux, & ſe guinde vers le Ciel ; à quoy luy ſeruent grandement les aiſlerons qu’elle porte aux pieds, par le moyen deſquels elle ſe deſtache plus aiſément de l’embarras des choſes terreſtres.