Iconologie (Cesare Ripa, 1643)/I/Virginité

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 199-204).

Virginité. CLXXII.

SA figure eſt celle d’vne belle fille, veſtuë de blanc, couronnée d’vne Guirlande, & qui d’vne façon agreable s’eſtraint le milieu du corps d’vne Ceinture de laine blanche.

L’Eſmeraude, ſelon Pierius, eſt vn ſymbole de Virginité. Auſſi fut-elle conſacrée, non pas à Venus la laſciue, mais à la celeſte, que les Anciens croyoient eſtre Deeſſe de l’Amour pure.

Quant à la Ceinture que nous donnons, elle luy conuient fort bien, puis qu’il eſt vray qu’anciennement les ieunes filles en auoient vne, qu’il n’eſtoit permis à perſonne qu’à leur mary de leur oſter la nuict de leurs nopces, comme le remarquent Feſt. Pompée, & le Poëte Catulle dans l’Epithalame de Manlius & de Iulie, où il dit parlant à Iunon,

Celle de qui l’Amour eſt pure
Ne t’inuoque iamais en vain,
Lors que d’vne tremblante main
On luy veut oſter la ceinture.

Or ce que nous auons dit de l’Eſmeraude ſe doit entendre pareillement de la couleur blanche, qui ſignifie la pureté des penſées de l’ame, inſeparables d’auecque les honneſtes actions du corps.

Quelques autres repreſentent la Virginité par vne belle fille qui careſſe vne Licorne ; Car s’il faut tenir pour veritable ce que les Naturaliſtes ont eſcrit de cét animal, il ne ſe laiſſe iamais prendre que par la main d’vne Vierge.