Iconologie (Cesare Ripa, 1643)/I/Imagination

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 91-98).

Imagination. LXXXI.

CEtte Femme qui la repreſente eſt veſtuë d’vne robe de couleur changeante, & ſemble eſtre toute deſolée, de la façon qu’elle tient les yeux hauſſez vers le Ciel, & les mains croiſées l’vne dans l’autre. Mais ce qui la fait remarquer par deſſus tout, c’eſt la bizarrerie de ſa coëffure ; Car aux deux coſtez de ſa teſte, dont les cheueux ſont heriſſez, elle a des aiſles, comme celles de Mercure ; & en lieu de Couronne, de petites figures diuerſement ombragées.

Auant qu’expliquer cette Peinture, il faut ſçauoir auec Ariſtote, Que l’imagination eſt vn mouuement, qui ſe fait actuellement par le ſens ; ou ſi vous voulez, vne connoiſſance de ce qui a touché les autres ſens, à ſçauoir le commun, & les exterieurs. Ce qu’il declare encore en vn autre endroit, où la voulant diſtinguer, il dit, Qu’elle ſe rencontre parfaite, ou imparfaite dans les animaux, ſelon qu’ils ſont plus ou moins parfaits.

Par ſa robe de diuerſes couleurs, il eſt monſtré, Que la puiſſance imaginatiue reçoit les eſpeces de tous les objets, qui luy ſont preſentez par les ſens exterieurs ; Comme par ſes yeux eſleuez au Ciel, auec vne action toute penſiue, il eſt declaré, Que ſoit qu’elle dorme, ou qu’elle veille, elle eſt en vn mouuement continuel, d’où luy naiſſent mille inquietudes, & mille penſées differentes.

Ses aiſlerons & ſes cheueux heriſſez, ſignifient le meſme ; c’eſt à dire, Qu’il nous faut remarquer la viteſſe, ou la ſoudaine operation de cette puiſſance, ſoit à receuoir les eſpeces, ſoit à les repreſenter à l’entendement.

Quant à ſa Couronne, qui eſt en forme de bandeau, d’où s’eſleuent trois ou quatre petites figures, cela veut dire, ſelon les Medecins, Que la vertu imaginatiue a ſon ſiege dans le premier ventricule du ceueau, & que c’est le ſens commun qui luy fournit diuerſes eſpeces.

L’Imagination ſe forme doncques de cette meſme vertu, à qui toutes les autres obeïſſent. Auſſi eſt-il vray, qu’elle ne laiſſe pas d’operer, quand les ſens exterieurs ſont oiſifs, & qu’elle Valer. l. 2. Sext. Emp. Galen. agit mesme bien ſouuent quand nous dormons : dequoy nous auons pluſieurs preuues dans les Autheurs, outre que l’experience nous le confirme.