Iconologie (Cesare Ripa, 1643)/I/Inconſtance

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 91-98).

Inconstance. LXXX.

C’Est vne Femme veſtuë de couleur bleuë, ayant en vne main vne Lune, & ſous l’vn de ſes pieds vn Eſcreuice.

On l’habille de bleu, pour la reſſemblance qu’il y a de cette couleur à celle des vagues de la mer, qui ſont, comme il ſe void, extremement inconſtantes, & ſujettes de temps en temps à de nouuelles alterations.

Il en eſt de meſme de la Lune, que nous voyons deſcroiſtre inſenſiblement, comme le plus muable des Aſtres : d’où il vient qu’il eſt dit dans l’Eſcriture, Que l’inſenſé change comme elle, & qu’il ne demeure iamais en vn meſme eſtat. L’on y pourroit adjouſter vn Chat-huant, oyſeau nocturne, ſi peu aſſeuré en ſon vol, qu’il ne ſçait d’où il vient, ny par où il va, comme le remarque le grand ſainct Baſile.

Quant à l’Eſcreuice, l’experience fait voir, qu’auec vne meſme diſpoſition il chemine droit & à reculons. En quoy l’imitent à tout moment, ces eſprits changeans & irreſolus, qui loüent tantoſt la contemplation, tantoſt l’action, demain l’ignorance : par où ils font bien voir, qu’ils ne ſçauent ny ce qu’ils loüent, ny ce qu’ils blaſment, tant ils ſont volages en leurs ſentimens ; Auſſi ſont-ils repris à bon droit dans les ſaintes Lettres, par l’exemple de ce Laboureur mal aduiſé, qui n’a pas pluſtoſt mis la main à la charruë, qu’il s’en repent.

D’autres repreſentent l’Inconſtance, par vne Femme veſtuë de couleur changeante, qui s’appuye des mains ſur vn Roſeau, & des pieds ſur vne boule ; Ce qui monſtre aſſez clairement, Que l’homme volage n’a iamais d’arreſt en ſes penſées, & qu’en matiere d’agir il ſuit d’ordinaire les choſes les plus muables.

Adiouſtons icy, Que les Anciens ont figuré l’Amour inconſtant par le poiſſon appellé Polipe, pource que ſemblable au Cameleon, il prend toutes les couleurs qui luy ſont oppoſées.

L’on en peut dire autant des Amants, que l’on void tantoſt paſlir, & tantoſt rougir ; leur paſſion eſtant vne ſource d’eſpoir & de crainte, de triſteſſe & de ioye, de cholere & de jalouſie, ſelon qu’elle ſe trouue pouſſée par des mouuemens contraires.