Iconologie (Cesare Ripa, 1643)/I/Inſtinct naturel

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 91-98).

Instinct natvrel. LXXXII.

IL eſt figuré par vn ieune garçon, qui ſemble courir, ayant le viſage voilé, & en la main droite l’Eliothropion, ou la fleur du Soleil.

Il eſt peint ieune, pource qu’il ne change iamais, & que ſa force eſt touſiours égale. Que s’il a le viſage voilé, c’eſt pour faire voir, Que la cauſe de cét Inſtinct eſt ſi fort cachée, qu’on en peut donner difficilement des raiſons probables, & en faire des demonſtrations, comme des autres choſes de la Nature. C’eſt pour cela qu’Ariſtote compare l’entendement au Soleil, & au ſens de la veuë. Car comme noſtre œil n’eſt pas aſſez fort, pour regarder la lumiere de ce bel aſtre ; Ainſi noſtre entendement eſt trop foible, pour comprendre tous les ſecrets de la Nature, comme eſtans des choſes qui dépendent de la premiere forme, & que Dieu, qui s’eſpend de tous coſtez, ainſi que le Poëte le remarque, a miraculeuſement creées.

Il eſt repreſenté nud, pource qu’il opere par le moyen de ſa propre forme, ſans eſtre aſſiſté des qualitez elementaires, ny d’aucun artificile exterieur ; Et ſemble courir, pour ſignifier l’inclination & le mouuement qui ſe trouuent immediatement en luy meſme, qui opere ſans aucun obſtacle. De là vient auſſi que nous auons de l’amour pour les vns, & de la haine pour les autres, Que nous faiſons quelquesfois du mal aux innocens, & du bien à ceux qui en ſont indignes ; Iuſques-là meſme qu’il y en a que la Fortune a comblez de richeſſes, & qui toutesfois pour en auoir dauantage, ne laiſſent pas de voler à toutes mains, & ſe prostituent aux actes les plus infames ; ce qui ſoit dit neantmoins ſans preiudice de franc-arbitre.

Pour ce qui eſt de l’Eliothropion, ou de la fleur du Soleil, qu’on luy fait tenir en main ; comme il ne manque iamais de ſuiure le mouuement de cét Aſtre, ny de ſe tourner de ſon coſté, ainſi l’on ne peut mettre en doute, que ce qu’il en fait ne ſoit par vn Inſtinct naturel, qui n’eſt pas ſeulement commun aux plantes, mais aux pierres meſme, & aux autres choſes les moins ſenſibles.