◄ Laisse DXLVI | Laisse DXLVII | Laisse DXLVIII ► |
Dist l’Arabis : « Par mon Dé Trevigant,
« En cels peroules ne en si fait demant
« Non soi mist unques nul fils de mercheant.
« Sois qui vous estre, que je d’or in avant
« Voil que tu sentes de mon contenimant :
« Je toi desfi cumme mon malvoillant.
« A cist esplé mostreray toy choumant
« En mon païs sunt les lois aprendant.
« Dunc n’i a al. — Ensi soit », dist Roullant.
« Se ancor ancué ne toi faiz rechreant,
« Tout les vertuz Mahons non pris un gant. »
Dist le Païns : « Et je toi ensemant.
« Trou avons fait enci long parlemant ;
« De toi prant garde, plus ne toi di avant. »
Lor tornerent li destrers maintenant,
Pué brocerent a un sons d’un olifant.
L’entrevenir fu d’un si grief semblant
Paor en unt qui les vait remirant.
La fille au roi en estoit mout en grant,
Le freir ausi, plain d’autretiels atant.
Sor le fils Mille fiert le niés Malquidant
Horible cols, fiers et de maltalant ;
L’escuz li trence jusque l’aubers tinant,
Non poit forfaire en l’aubers tant ni quant.
Bien i a fait le niès Karle autretant ;
Li escuz sunt perzé chomunaumant ;
Par les costez en vont les tours batant.
Sor sun detrers, yreis chome serpant,
Outre s’an vait li Paians meschreant.
Par quoi non fust notre duc conoisant,
Au trespaysser vait tot escolorjant ;
I.or s’eschrïerent plus de cinq cent Persant :
« Par Mahomet, preus est noutre paisant. »
La damoiselle en ot sun cuers joyant,
Le roi ausi, sa fame et suen enfant.