| ◄ Laisse DXLV | Laisse DXLVI | Laisse DXLVII ► |
Se la fusez soz Mech, en la praiere,
Lez la marine, par sillong la rivere,
La veïsez gant de mainte manere.
Rois Malquidant fait sa gent trer arere ;
D’anbedos pars i avoit mout grant eschere.
Le niés Karlun a retornee la chiere
Vers Pelliais et dist peroules fiere.
« Vasals », feit il, « avant que je te fere,
« Je bien voudroie, se vausist ma proiere,
« Que tu aüses plus que n’ais rason çiere.
« A l’inforcer n’est pas zouse ligiere ;
« Tu pois raison de ta memoire trere.
« S’au roi, tun uncle, promis sa file el pere,
« Necessités, cun je entant, li fist fere.
« Se a li non ploit, el non ha per ni mere,
« Selong les lois de hoi et de chi arere,
« Juger l’en poise, s’elle n’est cunsentere.
« Se ma peroule vous par orgoil desfere,
« Au cief dou tour, se raison n’est triçere,
« En cunvendras estre porteiz en bere,
« Car de tot les vertuz est droiture banere. »