◄ Laisse DXLVII | Laisse DXLVIII | Laisse DXLIX ► |
Mont fu rice la joste d’anbedos li baron.
Au retorners ziterent li tronchun ;
As brans d’acier ert ja tost la teinçon.
La bone spee que Durindart a non
Trait tote nue le Soudans chanpyon
E pué a dit soz sun hiaume a laron :
« Hai ! boine spee, que fustes rois Eumon,
« Mort et gastere de toutes garnison,
« Plaine d’orgoil, senz merzi ni perdon,
« De chant preudomes estes destruzion
« Que tastounee vos hont par toulison !
« Qui vos atant, bien le teing a bricon. »
Le fiers cival hurtoit des esperon
Vers Pellias, irez choume dragon.
Mais le Païns le hot mis a rayson.
« Vasals », dit il, « or queile la fayron ?
— Au bien cunbatre », respont le nés Karlon,
« Vous par prover, et je chuntradizon :
« Chant que jurastes dedans le pavailon
« Di je qu’est faus et est chuntre raisson ;
« Prover le chroi sens point d’arestesson ;
« S’ensi non faiz, ne moi pris un bouton,
« Car n’avez fait a loi de gentyls hon.
« Cant por droiture mantenir et ses non
« Vais travalant por estranges rouyon
« E prant bataille et trai a fenysson,
« Mais vos n’avés en li nulles braisson,
« Huei est le jors que n’avreis geherdon,
« Char de droiture voil estre cunpaignon.