Œuvres complètes de Bernard Palissy/Recepte véritable par laquelle tous les hommes de la France pourront apprendre à multiplier leurs thrésors/À ma très chère et honorée dame, Madame la Royne mère

Bernard Palissy

Œuvres complètes de Bernard Palissy

Texte établi par Paul-Antoine Cap, J.-J. Dubochet et C^ie, 1844 (p. 6-7).

À MA TRÈS-CHÈRE ET HONORÉE DAME,
MADAME LA ROINE MÈRE^[1].

---

adame, quelque temps après que, par vostre moyen et faveur, à la requeste de Monseigneur le Connestable, ie fus déliuré des mains de mes plus cruels ennemis, i’entray en un débat d’esprit sur le fait de l’ingratitude des hommes : sachant bien que la cause pour laquelle ils me vouloyent liurer à la mort, n’estoit si non pour leur auoir pourchassé leur bien, voire le plus grand bien qui leur pourroit iamais advenir. Quoy considéré, i’entray en moy-mesme, pour fouiller les secrets de mon cœur et entrer en ma conscience, pour savoir s’il y auoit en moi quelque ingratitude, comme celle de ceux qui m’auoient livré au péril de la mort. Lors me vint à souvenir du bien qu’il vous a pleu me faire, quand de vostre grâce vous employastes l’authorité du Roy pour ma déliurance. Quoy voyant, ie trouvay que ce seroit en moy une grande ingratitude, si ie ne recognoissois un tel bien : ce neantmoins, mon indigence n’a voulu permettre que ie me transportasse iusques en vostre présence pour vous remercier d’un tel bien, qui est la moindre récompense que ie pourrois faire. Et combien que Dieu m’aye donné plusieurs inuentions desquelles ie pourrois vous faire service, ce néantmoins ie n’ay eu moyen vous le faire entendre, qui m’a causé mettre en récompense de ce, plusieurs secrets en lumière contenus en ce liure, lesquels tendent à fin de multiplier les biens et vertus de tous les habitans du Royaume. Ma petitesse n’a osé desdier mon œuure au Roy, sachant bien qu’aucuns voudroyent dire que i’aurais ce fait, tendant à fin d’estre recompensé : quand ainsi seroit, ce ne seroit rien de nouueau. Madame, il ne fut iamais que les bonnes inuentions ne fussent recompensées par les Roys ; ce néantmoins, que i’ay espérance que cest œuure sera plus utile au Roy que pour nul autre : toutes fois, à cause de ma petitesse, ie l’ay desdié à Monseigneur de Montmorancy, bon et fidèle serviteur du Roy, lequel j’espère qu’il saura très bien faire entendre à son souuerain Prince et Roy. Il y a des choses escrites en ce liure qui pourront beaucoup seruir à l’édification de vostre iardin de Chenonceaux :

et quand il vous plaira me commander vous y faire seruice,
ie ne faudray m’y employer. Et s’il vous venoit à gré
de ce faire, il feray des choses que nul autre
n’a fait encores iusques ici. Qui sera l’en-
droit, Madame, où ie prieray le
Seigneur Dieu vous don-
ner, en parfaite
santé, longue
et heu-
reuse
vie.

Vostre très humble et très affectionné seruiteur,

Bernard Palissy.

1. Catherine de Médicis.