Virelays/XII
XII
Se pris et los estoit a departir
Et a donner, selon mon jugement ;
J’en sçay aucuns qui bien petitement
Y devroient a mon avis partir.
Et non obstant qu’ilz cuident bien avoir
Assez beauté, gentillece et proece,
Et que chascun cuide un prince valoir,
A leurs beaulx tais appert leur grant noblece.
Mais puis qu’on voit, qui qu’il soit consentir[1]
A villains fais et parler laidement.
Pas nobles n’est ; ains deust on rudement
D’entre les bons si faitte gent sortir,
Se pris et los estoit a départir.
Ne en leurs dis il n’a nul mot de voir,
Grans vanteurs sont, n’il n’est si grant maistrece
Qu’ilz n’osent bien dire que leur vouloir
En ont tout fait, hé Dieux ! quel gentillece !
Comme il siet mal a noble homme a mentir
Et mesdire de femme ! et vrayement[2]
Telle gent sont drois villains purement,[3]
Et devroit on leur renom amortir,
Se pris et los estoit a départir.