Thresor de la langue françoise/Trompette
Trompette, f. penac. Est vn nom ores feminin & originel, & signifie cet instrument musical fait d'airain, ayant emboucheure plate, le tuyau estroict en icelle, & eslargissant peu à peu iusques au bas, qui est euasé en petite cloche, & sonne à puissance de vent a pleines ioües ; vsité tant en la guerre és compagnies de gens de cheual à maints effects, que aux chasteaux de garde en frontiere, pour signifier les retraictes & la diane, qu'aux galeres pour icelle diane, & autres mots publiez par le son, que aux villes & esdits lieux pour les bans cris & proclamations publiques & aussi en autres endroicts, Tuba ærea. Et en ce genre feminin, le mot qui est general, a ces especes, Trompette, Clairon, & Sacquebute, estant Trompette ce qui ia a esté dit (car quant à ce mot Trompe, qui ores est le mesme que Trompete, ores signifie ce cor d'airain entortillé vsité par les veneurs en la chasse pour corner les mots d'icelle tant pour les chiens que pour leurs compagnons, n'est le mot entier dont on puisse dire le diminutif estre ledit mot Trompette) & Clairon, la trompette claironnant pour estre plus gresle de tuyau. Au moyen de quoy l'on dit Clairons & Trompettes. & Saquebute vn presque semblable instrumet d'airain, qui est sonné non seulement par estre entonné à puissance de vet & iouës renflées comme les dessusdits, ains par poulsement & attraict auec la main droite, faits par celuy qui en iouë, d'vn tuyau qui contient dans luy vn autre, sur lequel il coule, pour rendre le son ores gros ores gresle. Et ores est masculin, & signifie celuy qui sonne de la trompette en vne armée ou compagnie de gens de cheual. Selon ce on dit, Il enuoya vn Trompette au camp de l'ennemi. Tubicine internuntio significauit aut, per tibicine hostibus significauit. Ou bien celuy qui sert pour faire les cris & proclamations à son de trompe en vne ville. Et selon ce on dit, Le Trompette iuré d'vne ville, Tubicen publicus, Præco tubicinarius. S'il se peut dire. Et sont ces deux genres concurrents par diuersité de significations en ce met Trompette, tout ainsi qu'en cet autre mot enseigne, lequel au genre feminin signifie le drappeau, Vexillum. Et au masculin ; celuy qui le porte, qu'on dit aussi Port'enseigne, Vexillifer. L'Alemand dit Tromm, & Teltrommet pour la trompette, & Trommetter, pour le Trompeteur.
Trompeter, act. acut. Est ioüer & sonner de la trompette, Tuba canere, Ce que l'Alemand dit Trommeten.