Thresor de la langue françoise/Chahuant
Chahuant, m acut. Est vne espece d’oiseau, qui va voletant & huant de nuict, duquel chant huant il est ainsi nommé, car son chant n’est que bu & cry piteux : pour laquelle cause les Latins l’ont appelé Vlula, tiré comme Seruius dit, de ce mot Grec όλαλύζον, qui vaut autant que pleurer, gemir, & hurler, comme si vous disiez chahurlat. Ils l’ont aussi appelé Noctua, parce qu’il ne chante & ne erre que la nuict. Ils l’ont aussi nommé Bubo, par onomatopoée, representans le chant d’iceluy par ce nom, & dient que cest oiseau est feral & funebre, pour estre tenebreux & nocturne & effrayant : & à ceste occasion tenoit on anciennement son chat pour presage de calamité future, mesmes par mort de maladie. Il est hay à merueilles des autres oyseaux, lesquels pour estre diurnes, c’est à dire, errans & voletans par iour, & ne auoir la rencontre ordinaire de ce, dit Chahuant, & pour l’aspect hydeux de luy, le hayent & poursuyuent à coups de bec, & de griffes, quand ils le trouuent, faisans tous vn esquadron combattant contre luy, ausquels, comme Pline dit au liure 10. chap. 17. il resiste par se coucher à l’enners & se reserrant en arc, si qu’il demeure presque couuert de son bec & de ses griffes ou serres, laquelle inimitié estant apperceüe par les oyseleurs, se seruent dudit chahuant, pour attrapper ceux qui viennent à la meslée contre iceluy. De ce que dessus se voit que de l’appeler chathuant, & pour la difficulté de la prolation Francoise en l’aspiration H apres la consone, dire que Chahuant est fait de chathuant, il n’y a pas raison grande veu que ceste particule cha, est ailleurs commune au Fracois, comme en ces mots chatouille, chatfourré, chafouyn, esquels le mot de chat n’a que veoir.