Ronsard - Œuvres, Buon, 1587/Tu es vn trop ſec
V es vn trop ſec biberon
Pour vn tourneur d'Anacreon,
Belleau, & quoy ! ceſte Comete
Qui naguiere au ciel reluiſoit,
Rien que la ſoif ne prediſoit,
Ou ie ſuis vn mauuais prophete.
Les plus chauds Aſtres etherez
Ramenent les iours alterez
En ce mois pour nous faire boire:
Boy donques : apres le treſpas,
Ombre tu ne boiras là bas
Que ie ne ſçay quelle onde noire.
Mais non ne boy point mon Belleau,
Si tu veux monter au tropeau
Des Muſes, deſur leur montaigne:
Il vaut trop mieux eſtudier
Comme tu fais que s'allier
De Bacchus & de ſa compagne.
Quand auecques Bacchus on ioint
Venus ſans meſure, on n'a point
Saine du cerueau la partie:
Donc pour corriger ſon defaut,
Vn vieil pedagogue il luy faut,
Vn Silence qui le chaſtie:
Ou les pucelles dont il fut
Nourry, quand Iupin le receut
Tout vif de ſa mere bruſlée:
Ce furent les Nymphes des eaux:
» Car Bacchus gaſte nos cerueaux,
» Si la Nymphe n'y eſt meſlee.