Ronsard - Œuvres, Buon, 1587/Pallas eſt ſouuent
Allas eſt ſouuent d'Homere
Dite fille d'vn bon pere,
Et vous la Pallas d'ici
Par moy ſerez dite ainſi.
Homere ainſi l'a nommée,
Pour eſtre fille eſtimée
Du Dieu que les ſiecles vieux
Nommerent pere des Dieux:
Et moy ie vous nomme telle,
Fille d'vn Roy qu'on appelle
Ici bas en tous endrois
Le bon pere des François.
Pallas & vous, ce me ſemble,
Auez vos meſtiers enſemble.
Elle touſiours s'amuſoit
Aux vers qu'elle compoſoit:
Souuent voſtre eſprit s'amuſe
Aux ſaints labeurs de la Muſe,
Qui en deſpit du tombeau
Rendra voſtre nom plus beau.
Elle addonnoit ſon courage
A faire maint bel ouurage
Deſur la toile, & encor
A ioindre la ſoye à l'or:
Vous d'vn pareil exercice,
Mariez par artifice
Deſur la toile en maint trait
L'or & la ſoye en portrait.
Vne ſeule differance
Vous ſepare : car la lance,
Les guerres & les combats
Eſtoient ſes plus doux esbats:
Mais vous aimant la concorde,
Chaſſerez toute diſcorde,
Et le plus beau de vos faits
Ce ſera d'aimer la paix,
Et par nouueau mariage
De Mars appaiſer la rage,
S'il vouloit vne autre fois
Pouſſer en armes nos Rois.