Ronsard - Œuvres, Buon, 1587/Ma petite Colombelle
A petite colombelle,
Ma mignonne toute belle,
Mon petit œil baiſez moy :
D’vne bouche toute pleine
De muſq, chaſſez-moy la peine
De mon amoureux eſmoy.
Quand ie vous diray Mignonne,
Approchez vous qu’on me donne
Neuf baiſers tout à la fois,
Donnez-m’en ſeulement trois,
Tels que Diane guerriere
Les donne à Phœbus ſon frere,
Et l’Aurore à ſon vieillard :
Puis reculez voſtre bouche,
Et bien loin toute farouche
Fuyez d’vn pied fretillard.
Comme vn toreau par la prée
Court apres ſon amourée,
Ainſi tout chault de courrous
Ie courray fol apres vous :
Et priſe d’vne main forte
Vous tiendray de telle ſorte
Qu’vn Aigle vn Cygne tremblant :
Lors faiſant de la modeſte,
De me redonner la reſte
Des baiſers ferez ſemblant.
Mais en vain ſerez pendante
Toute à mon col, attendante
(Tenant vn peu l’œil baiſſé)
Pardon de m’auoir laiſſé.
Car en lieu de ſix adonques
I’en demanderay plus qu’onques
Tout le Ciel d’eſtoiles n’eut,
Plus que d’arene pouſſée
Aux bords quand l’eau courrouſſée
Contre les riues s’eſmeut.