Recueil général et complet des fabliaux des 13e et 14e siècles/XXXVIII
XXXVIII
UNE BRANCHE D’ARMES
fo 222 vo à 223 ro.[1]
ui est li gentis bachelers ?
Qui d’espée fu engendrez,
Et parmi le hiaume aletiez,
Et dedenz son escu berciez,
Et de char de lyon norris,
Et au grant tonnoirre endormis,
Et au visage de dragon,
Iex de liepart, cuer de lyon,
Denz de sengler, isniaus com tygre,
Qui d’un estorbeillon s’enyvre
Et qui fet de son poing maçue,
Qui cheval et chevalier rue
Jus à la terre comme foudre[2],
Qui voit plus cler parmi la poudre[3]
Que faucons ne fet la riviere,
Qui torne ce devant derriere
.I. tornoi por son cors deduire,
Ne cuide que riens li puist nuire,
Qui tressaut la mer d’Engleterre
Por une aventure conquerre,
Si fet il les mons de Mongeu,
Là sont ses festes et si geu ;
Et, s’il vient à une bataille,
Ainsi com li vens fet la paille,
Les fet fuir par devant lui.
Ne ne veut jouster à nului
Fors que du pié fors de l’estrier,
S’abat cheval et chevalier
Et sovent le crieve par force ;
Fer ne fust, platine n’escorce
Ne puet contre ses cops durer,
Et puet tant le hiaume endurer
Qu’à dormir ne à sommeillier
Ne li covient autre oreillier.
Ne ne demande autres dragies
Que pointes d’espées brisies
Et fers de glaive à la moustarde.
C’est un mès qui forment li tarde,
Et haubers desmailliez au poivre,
Et veut la grant poudriere boivre
Avoec l’alaine des chevaus ;
Et chace par mons et par vaus
Ours et lyons et cers de ruit
Tout à pié, ce sont si déduit ;
Et done tout sanz retenir.
Cil doit moult bien terre tenir
Et maintenir chevalerie
Que cil, dont li hiraus s’escrie,
Qui ne fu ne puns ne couvez,
Mès ou fiens des chevaus trovez ;
S’il savoient à qoi ce monte
Sachiez qu’il li dient grant honte.