Recueil général et complet des fabliaux des 13e et 14e siècles/XXVII

Du Preudome qui rescolt son compere de noier

Anonyme

Du Preudome qui rescolt son compere de noier

Texte établi par Anatole de Montaiglon, Librairie des Bibliophiles, 1872, Tome I (p. 301-303).

XXVII

DU PREUDOME

QUI RESCOLT SON COMPERE DE NOIER.

Man. F. Fr. 19.152, fol. 35 v^o.^[1]

1
Il avint à .I. pescheor,
Qui en la mer aloit .I. jor,
En un batel tendi sa roi.
Garda, si vit très devant soi
5.I. home molt près de noier.
Cil fu moult preuz et molt legier,
Sus ses piez salt, un croq a pris,
Liève, si fiert celui el vis
Que parmi l’ueil li a fichié ;
10El batel l’a à soi saichié.
Arriers s’en vait, sanz plus attendre ;
Totes ses roiz laissa à tendre ;
A son ostel l’en fist porter,
Molt bien servir et honorer.
15Tant que il fust toz respassez.
A lonc tens s’est cil propensez^[2]
Que il avoit son oill perdu
Et mal li estoit avenu :
« Cist vilains m’a mon ueil crevé,
20Et ge ne l’ai de riens grevé ;

Ge m’en irai clamer de lui
Por faire lui mal et enui. »
Torne, si se claime au Major,
Et cil lor met terme à .I. jor.
25Endui atendirent le jor,
Tant que il vinrent à la Cort.
Cil, qui son hueil avoit perdu,
Conta avant, que raison fu :
« Seignor, fait-il, ge sui plaintis
30De cest preudome, qui, tierz dis,
Me féri d’un croq par ostrage ;
L’ueil me creva ; c’en ai^[3] domaige ;
Droit m’en faites ; plus ne demant :
Ne sai-ge que contasse avant. »
35Cil lor respont sans plus atendre :
« Seignor, ce ne puis-ge deffendre
Que ne li aie crevé l’ueil ;
Mais en après mostrer vos vueil
Coment ce fu, se ge ai tort.
40Cist hom fu en peril de mort
En la mer, où devoit noier ;
Ge li aidai ; nel quier noier,
D’un croq le féri, qui ert mien,
Mais tot ce fis-ge por son bien ;
45Ilueques li sauvai la vie.
Avant ne sai que ge vos die ;
Droit me faites, por amor Dé. »^[4]
C’il s’esturent tuit esgaré
Ensamble pour jugier le droit,
50Qant un Sot, qu’an^[5] la Cort avoit,

Lor a dit : « Qu’alez-vos doutant ?
Cil preudons, qui conta avant,
Soit arrieres en la mer mis,
La où cil le féri el vis ;
55Que, se il s’en puet eschaper,
Cil li doit oeil amender ;
C’est droiz jugemenz, ce me sanble. »
Lors s’escrient trestuit ensanble ;
« Molt as bien dit ; jà n’iert deffait. »
60Cil jugemenz lors fu retrait ;
Quant cil oï que il seroit
En la mer mis où il estoit,
Où ot soffert le froit et l’onde,
Il n’i entrast por tot le monde ;
65Le preudome a quite clamé.
Et si fu de plusors blasmé.
Por ce vos di, tot en apert.
Que son tens pert qui felon sert.
Raembez de forches larron,
70Quant il a fait sa mesprison,
Jamès jor ne vous amera,
Ains à tousjours vous haïra^[6] ;
Jà mauvais hom ne saura gré
A mauvais, si li fait bonté ;
75Tot oublie, riens ne l’en est,
Ençois seroit volentiers prest
De faire li mal et anui,
S’il venoit au desus de lui

---

1. XXVII. — D’un Preudome qui rescost son compere
   de noier, p. 301.

   Publié par Méon, I, 87-90 ; et donné en extrait par Legrand d’Aussy, II, 426-427, sous ce titre « Du prud’homme qui retira de l’eau son compère ».

   
   
2. Vers 16 — propenssez, lisez porpenssez.
3. 32 — * ai ; ms., a.
4. 47 — Il faut fermer les guillemets après ce vers.
5. 50 — qu’à, lisez qu’an.
6. 72 — Ce vers, qui manque dans le ms., a été suppléé par Méon.
   
   

   Ce fabliau a été remis en vers par Imbert.