Recueil général et complet des fabliaux des 13e et 14e siècles/CXLII

Des .IIII. Prestres

Haisel

Des .iiii. Prestres

Recueil général et complet des fabliaux des XIII^e et XIV^e siècles, Texte établi par Anatole de Montaiglon et Gaston Raynaud, Librairie des Bibliophiles, 1890, Tome VI (p. 42-45).

CXLII

DES .IIII. PRESTRES

[par Haisel]

Bibl. roy. de Berlin, Mss. Hamilton 257, fol. 50 a à 50 c.^[1]

1
De trois prestres, voire de quatre,
Nos dit Haiseaus por nos esbatre
Et por nos aprendre à garder,
Merveilles que oï conter.
5.III. prestre^[2] amoient une fame ;
A son baron le dist la dame.
A .I. jor tous trois les manda,
Si con ses barons li loa,
Et lor manda qu’en son labour
10Sera son baron celi jour ;
Mès li païsanz ne se mut
A icel jor, einz se reput
El four que laienz fet avoient,
Et sot que li prestre venoient.
15Les fist la dame el four mucier,
Ausi le tiers con le prenier.

Le païsant .I. levier prist,
Desus le four compresse fist :
La clef de la voute soutret
20A .I. enging que avoit fet :
La voute fendi enroment.
Tuit .III. sunt mort en .I. moment.
Le païsant s’en repentist
Tot meintenant, se il poïst ;
25Mès la fame qui s’apensa,
Meintenant .I. ribaut manda,
Et li a dit que por s’amour
S’est .I. prestres muciez el four,
« Por ce qu’il douta mon baron
30Qu’il oï venir en meson.
Or est li four fondu sus li ;
Si dout que je n’en aie anui.
Se tu descombrer m’en pouaies,
.XL. sous du mien aroies. »
35.I. des prestres a lors trousé
Seur son col, et l’en a porté.
En une parfonde malliere
Le geta, et revint ariere.
Ses .XL. sous demanda ;
40La dame respondu li a :
« Arou ! ribaut, que m’as tu fet ?
Revez le là, revenuz est.
— Par le cuer Dieu, n’i demorra ! »
Fet il. L’autre prestre trousa^[3] ;
45Si le geta en la malliere.
Si tost con il revint ariere,

Cele le tierz li remoutra,
En soi saignant, et dit li a :
« Harou ! ribaut, or m’as tu morte ?
50Revoiz le là ! va, si le porte.
— Et vos me bailliez pein et vin
Et du feu, » fet il, « et enfin
Je le garderé si de près
Que vos ne le verrez jamès. »
55Lors a le tiers prestre trousé ;
En la malliere l’a geté.
Seur la malliere demora :
Meintenant le feu aluma.
Quant il ot beü et mengié
60Et jusques vers le jor veillié.
Par anui s’endormi : s’avint
C’uns autres prestres par là vint :
Vers le feu se tret por le froit.
Que que li prestres se chaufoit,
65Et le ribaut s’est esveilliez ;
Tot meintenant sailli en piez :
« Dant prestre, vos irez ariere, »
Dist li ribaut, « en la malliere ! »
Le prestre corut enbracier :
70En la fose le volt lancier,
Mès li prestres se contretint.
A litier totes voies avint,
Qu’il^[4] leur en est si mescheü
Qu’en la malliere sunt cheü.
75Ce puet on bien dire du prestre :
Mieus li venist au moustier estre.

Or puet hon le proverbe ci
Metre à point que jadis oï :
Soventes foiz avient à court
80Que tieus ne peche qui encourt.

Explicit.

---

1. CXLII. — Des .IIII. Prestres, p. 42.

   Ce titre ne se trouve pas dans le manuscrit.

   
   
2. Vers 5 — * prestre ; ms., prestres.
3. 44 — * trousa ; ms., trousé a.
4. 73 — * Qu’il ; ms.. Qui.
   
   

   Nous avons déjà rencontré souvent le même récit ; voyez plus loin, à la fin des Notes et Variantes du fabliau CL, le groupement de toutes les rédactions de ce conte.