plus estre ouuerte, munie, & armée, qu’autre partie d’icelles. Ainsi ne pourueut nature à la perpetuité de l’humain genre. Ainsi crea l’homme nud, tendre, fragile, sans armes ne offensiues, ne defensiues, en estat d’innocence & premier aage d’or, comme animant, non plante : comme animant (diz ie) né à paix non à guerre : animant né à iouissance mirificque de tous fruictz & plantes vegetables, animant né à domination pacificque sus toutes bestes. Aduenent la multiplication de malice entre les humains en succession de l’aage de fer, & regne de Iuppiter la terre commença à produire Orties, Chardons, Espines, & telle autre maniere de rebellion contre l’homme entre les vegetables : d’autre part, presque tous animaulx par fatale disposition se emanciperent de luy, & ensemble tacitement conspirerent plus ne le seruir, plus ne luy obeir, en tant que resister pourroient, mais luy nuire scelon leur faculté & puissance. L’homme adoncques voulant la premiere iouissance maintenir & sa premiere domination continuer : non aussi pouant soy commodement passer du service de plusieurs animaulx, eut necessité soy armer de nouueau. Par la diue Oye guenet (s’escria Pantagruel) depuys les dernieres pluyes tu es devenu grand lifrelofre, voyre diz ie Philosophe.
Considerez (dist Panurge) comment nature l’inspira soy armer, & quelle partie de son corps il commença premier armer. Ce feut (par la vertus Dieu) la couille, & le bon messer Priapus, quand eut faict ne la pria plus[1]. Ainsi nous le tesmoigne le capitaine & philosophe Hebrieu Moses, affermant qu’il se arma d’une braue & gualante braguette, faicte par moult inuention de feueilles de figuier : les quelles sont naïfues, & du tout commodes en dureté, incisure,
- ↑ Et le bon meſſer Priapus, quand eut faict ne la pria plus. Il y a là deux vers de huit syllabes, qui rimaient assez exactement parce qu’on ne prononçait ni l’s finale de Priapus, ni l’l de plus, ainsi du reste qu’il arrive encore dans le langage populaire. Il y a dans le Ve livre (t. III, p. 151) une sorte de jeu de mots du même genre : « quant Priapus… la vouloit… Priapiſer ſans la prier. »
