NUMÉRO 3
L’an 1520, le samedy deuxième juing, veille de Pentecouste, fut mise la première pierre pour faire l’hostel Dieu de Paris, sur la rivière de Seyne, près l’abbaye Sainct-Germain-des-Prez ; et fut la dicte pierre mise par l’abbé de Sainct-Germain, nommé Briçonnet. Après que le Roy eust donné permission et congé faire le dict hostel Dieu (et estoit le dict hostel Dieu faict pour soulager l’autre ancien et pour y loger et mettre les griefs mallades de peste) plus de demy an y eut grande contrariété par l’abbé de la dicte abbaye de Sainct-Germain-des-Prez et les religieux de la dicte abbaye, pour empescher le dict édifice. Mais néantmoins le Roy permit qu’il y fust faict : et y donna le Roy pour commencer le dict édifice, la somme de dix mille livres, prises sur quinze mille livres d’un emprunt par lui faict en la ville de Paris, l’année mesme.
