Et de l’avoir que il ont gaagnié
Quanque li fu en sa part alloé
A la roïne l’a trestot deslivré,
A Loéis, son petit iretier.
Et Blancheflor en ot des iex lermé (*)
Quant son avoir voit ensi malmener
Et à tel gent si le voit despenser
Qui ne l’ot mie à nul fuer gaagnié. (*)
Et s’est par tens Kallemaines levé,
Voit de sa chambre que l’avoirs est emblés
Et ses chevaus de l’estable en menés.
Quant l’a véu, moult s’en est merveillé ;
Naimon apele dou duché de Baivier.
« Naimes, fait il, qui a ensi ovré ?
— Sire, dist il, or ne vos dementés ;
« Se vos perdistes, noient n’ai gaagné,
« Que mes chevaus m’en a esté menés. »
Tel en gaberent, quant orent bien cerché,
Qui ne troverent les bons brans acerés
Ne les haubers ne les escus bouclés, (*)
Que Varochers les en avoit portés
O sa maisnie, coiement, à celé.
Ne se pensoit li rois si fust alé,
Ains cuidoit fust de cels de son regné ;
Dont pris en furent plus de mil et loié.
Page:Anonyme - Macaire, chanson de geste.djvu/417
Le texte de cette page a été corrigé et est conforme au fac-similé.
2641—2665
225
Macaire.
![](http://upload.wikimedia.org/wikipedia/commons/thumb/a/a2/Anonyme_-_Macaire%2C_chanson_de_geste.djvu/page417-1024px-Anonyme_-_Macaire%2C_chanson_de_geste.djvu.jpg)