En l’estable entrent où sont li auferant.
Chascuns en prent que li vient à talent ;
Qui mau cheval a, si le vait changeant.
A Kallemaine tolent son auferant
Que il chevauche à estros par les chans.
Au duc Naimon si en font autretant
Et ensement as autres plus avant.
Lor chevaus laissent qui ne valent noient,
Et cels en menent qui sont et bon et grant ;
Ne s’en perçoivent escuier ne sergent.
Quant ont trové les chevaliers dormans,
Armes lor tolent et autres garnemens
Et les espées à tous les vestemens.
Ne lor laissierent ne or cuit ne argent.
Tés fu au soir et riches et manans
Qui l’endemain, à l’aube aparissant,
Ne s’atrova un denier valissant.
Tuit robé furent et d’avoir et d’argent.
Lors Varochers s’en est errant tornés (*)
Quant de Kallon tot le tref ot robé ;
Et son corant destrier en a mené
Et le sien l’ot en eschange laissié.
